ကသ့ၣ်နီၣ်လိာ်ဒံးပသး

၁ႉ ဖဲလၢတပာ်သူၣ်ပာ်သး တၢ်ကစီၣ်ပူၤထံၣ်ဘၣ်နၤ ခွါဖိနသ့ၣ်နီၣ်ဒံးဧါ ဖဲအိၣ်တပူၤဃီအခါ ခီဖျိပယီၤတၢ်ထီၣ်ဒု ဃ့ၢ်အိၣ်ခူသူၣ်လၢၦၢ်ပူၤ ပနီၢ်ဆံးသးလီၤဘဲညီ တၢ်အီၣ်တအိၣ်လၢပဂီၢ် နပါပါဒီးယပါပါ ပယီၤဖီၣ်မၤသံမၤဆါ ဒုၣ်ဒါတၢ်မၤအၢမၤသီ ဒွဲၣ်အူဃုာ်ပဒူသ၀ီ အိၣ်တသ့လၢာ်ပဘၣ်ဃ့ၢ်
ဒ့ပီၤလီၢ်ကျဲဘၣ်ပာ်တ့ၢ်

၂ႉ ခွါဖိဧၢသ့ၣ်နီၣ်ဘၣ်နၤ ဖဲလၢပနီၢ်ဆံးဒံးခါ တၢ်ကတိၤဖိလၢပတဲ ကပိာ်ထီၣ်တၢ်ပၢၢ်ဆၢကျဲ ပကလုာ်တၢ်မ့ၢ်မၤအၢ နၤဒီးယၤကဒုးတြီဆၢ ခွါဧၢမ့မ့ၢ်ယဲတခီ ဒုးတၢ်လၢပကလုာ်ဂီၢ် တၢ်စူၤတၢ်ချံၣ်ပစီၤကျါ တၢ်သဘျ့ဂီၢ်ယတူၢ်ဆါ ဖဲထံၣ်လီၤနၤတၢ်ကစီၣ် ဃုာ်ဒီးနတၢ်အိၣ်ဆိးလီၢ် တၢ်ခဲလၢာ်လၢၦဲၤဒီးနၤ
ခွါဃိပာ်ကဖၢယသး

၃ႉယခွါဖိယတံၤသကိး သ့ၣ်နီၣ်ဒံးယဲနၤထီဘိ ခီဖျိလၢတၢ်ဂ့ၢ်အါမံၤ တုၤယဲဆူထံယံၤကီၢ်ယံၤ မ့ၢ်အိၣ်ဘၣ်ဆၣ်လၢၦၤကီၢ် သ့ၣ်နီၣ်ဒံးပအိၣ်ဆိးလီၢ် တၢ်ကတိၤလၢပအၢၣ်လီၤ ယကမၤလၢၦဲၤက့ၤအီၤ တၢ်ကူၣ်သ့လၢယမၤလိ ဒ်တၤလၣ်အိၣ်ဒီးယၤသိး လၢနလီၢ်ဒီးလၢယလီၢ် မၤပ၀ဲလၢကလုာ်ဂီၢ် ထဲတမံၤယဃ့ကညး
ခီဖျိလၢပာ်တ့ၢ်ယဲနၤ

၄ႉတံၤသကိးသးဘိယခွါ ဆိမိၣ်နၤဒီးယထံၣ်ဖျါ လၢကလုာ်တၢ်သဘျ့ဂီၢ် နဟ့ၣ်လီၤနသးနီၢ်နီၢ် အီၣ်နဲဒၣ်မ့မဖိ၀ါ၀ါ မံလၢသ့ၣ်လၣ်၀ၣ်လၣ်ကျါ ကလုာ်ဂီၢ်တူၢ်ခီၣ်ပာ်သး ပိာ်ထီၣ်နဲကျဲမၤထူရၤ စးထီၣ်နံၤအံၤဒီးဆူညါ ကဟံးထီၣ်ယဲယမူဒါ ဒုးနဲဒၣ်လၢစုက၀ဲၤ ကဒုးယဲတၢ်ဆီၣ်ထွဲကျဲ သွံၣ်တစၢၤဃီနၤဒီးယၤ
ကသ့ၣ်နီၣ်လိာ်ဒံးပသး

အိၣ်တမှံၤကီၢ်အီစ်ထြ့လ်ယါ သူလ့ၤနီၣ်မံၤဖိ