Home တၢ်ကစီၣ် တလါအတီၢ်ပူၤ တၢ်ဖီၣ်န့ၣ်၀ဲ ၦၤသူကသံၣ်မူၤဘှီး ၃၀၀ ဂၤ ဃၣ်ဃၣ်

တလါအတီၢ်ပူၤ တၢ်ဖီၣ်န့ၣ်၀ဲ ၦၤသူကသံၣ်မူၤဘှီး ၃၀၀ ဂၤ ဃၣ်ဃၣ်

1466
0

လါနိၣ်၀့ဘၢၣ် ၇ သီ၊ ၂၀၁၈ နံၣ်။ စီၤမၠၣ်အူသၤ

(ခ့ၣ်အဲၣ်ယူၣ်)ကညီဒီကလုာ်စၢဖှိၣ်ကရၢ ၀ီၢ်ရီဟီၣ်က၀ီၤ ( ကၠၤအ့ဆ့းကၠံကီၢ်ဆၣ်) အပူၤ ဖဲအပူၤကွံာ် လါအိးကထိဘၢၣ်အတီၢ်အပူၤန့ၣ် တၢ်ဟ့ၣ်တၢ်ကမၣ် လၢၦၤသူကသံၣ်မူၤဘှီးဖိအဂၤ ၃၀၀ ဃၣ်ဃၣ် အဂ့ၢ် ကညီပၢၤကီၢ်ကရူၢ် (KNPF)ၦၤဘၣ်မူဘၣ်ဒါတဲ၀ဲန့ၣ်လီၤႉ

၀ီၢ်ရီကီၢ်ဆၣ်အပူၤ(ခ့ၣ်အဲၣ်ယူၣ်)ၦၤဘၣ်မူဘၣ်ဒါတဖၣ်ဒီးဒူသ၀ီၦၤဘၣ်မူဘၣ်ဒါတဖၣ် ပာ်ဖှိၣ်ထီၣ်သး၀ံၤလီၤ၀ဲဒၣ်လၢသ၀ီအဖျၢၣ် ၂၀ဘျဲၣ်အပူၤၦၤလၢအသူကသံၣ်မူၤဘှီးတဖၣ် လၢဟံးအရ့ဟ့ၣ်တၢ်ကမၣ်ဒီးဟ့ၣ်တၢ်သ့ၣ်ညါနၢ်ပၢၢ်အဂ့ၢ် ၀ီၢ်ရီကီၢ်ဆၣ် နီၣ်ဂံၢ် (၄) ပၢၤကီၢ်၀ဲၤလီၢ်မူဒါခိၣ်စီၤည့ခၠါတဲဘၣ်ကညီတၢ်ကစီၣ်ဒ်အံၤန့ၣ်လီၤႉ

အ၀ဲတဲ၀ဲလၢ“ဖဲလါအီးကထိဘၢၣ်အပူၤ ပပာ်ဖှိၣ်ထီၣ်သးဒီး ဒူသ၀ီခိၣ်နၢ်တဖၣ်ဒီး ပဖီၣ်န့ၢ်၀ဲၦၤသူကသံၣ်မူၤဘှီးဖိအဂၤ ၃၀၀ ဃၣ်ဃၣ် ဒီးပဟ့ၣ်အီၤတၢ်ကမၣ် ဒ်ၦၤဂ့ၢ်၀ီအသိးလီၤႉ အါလၢၦၤ ၃၅ နံၣ်အဖီခိၣ်တဖၣ်၊ သးစၢ်သ့ၣ်တဖၣ်စှၤလီၤႉ ၦၤလၢတၢ်ဟံးအရ့တဖၣ် ဟ့ၣ်အီၤတၢ်ကမၣ် ဖဲသ၀ီပူၤလီၤႉ တၢ်မၢအီၤဒ်ဒူသ၀ီဂ့ၢ်၀ီ၊ ဒီးတၢ်ဂုၤထီၣ်ပသီထီၣ်အဂီၢ်န့ၣ်လီၤႉ”။
၀ီၢ်ရီဟီၣ်က၀ီၤအပူၤ ဖါပြး၊ ၀့ထီ၊ ကကဒ့း၊ နါခွံ၊ ပနီကျဲခံ၊ ဃီကျါ၊ ခီခီ၊ ၀့ခနး၊ တည့ၣ်၊ လိးရှါ၊ ၦၤဆါကသံၣ်တဖၣ်တၢ်ဟံးန့ၢ်အီၤအရ့ ဒီးသ၀ီလၢအဂၤတဖၣ် တၢ်ကဆဲးရဲၣ်ကျဲၤမၤအီၤအဂ့ၢ်ကညီပၢၤကီၢ်ကရူၢ်တဲ၀ဲန့ၣ်လီၤႉ

ဖါပြးကညီသးစၢ်ကရၢခိၣ် စီၤမၠိစဲးသ့ၣ်တဲ၀ဲလၢ “ၦၤသူကသံၣ်မူၤဘှီးတဖၣ်တတီၤ၊ ၦၤဆါကသံၣ် တဖၣ်တၢ်လီၢ်တတီၤ တၢ်ပာ်အီၤဒ်န့ၣ်လီၤႉ ပတဲသကိးတၢ်ဒီး သ၀ီခိၣ်နၢ် တဖၣ်၀ံၤမၤအီၤဒ်န့ၣ်လီၤႉ မ့မ့ၢ်လၢပသ၀ီတၢ်ဟံးအရ့တဒူၣ်၀ံၤတဒူၣ်အဖီခိၣ် ကအိၣ်လၢအကယၤလီၤႉ ၦၤသူတၢ်ဖိတဖၣ်လၢသ၀ီပူၤဒုတအိၣ်လၢၤဘၣ်တဲသ့”အဂ့ၢ် တဲဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ

(ခ့ၣ်အဲၣ်ယူၣ်)၀ီၢ်ရီကီၢ်ဆၣ်အပူၤ ၦၤဆါ၀ဲကသံၣ်မူၤဘှီးတဖၣ်အံၤ စးထီၣ်လၢ၂၀၁၆ နံၣ်၊ လါယူၤလံတုၤ ၂၀၁၈နံၣ်၊ လါမ့ၤကတီၢ် ၦၤဖီၣ်န့ၢ်၀ဲအဂၤ ၂၀၀ဘျဲၣ် ဒီးကသံၣ်ဖျၢၣ် တကလီၢ်ဘျဲၣ်အဂ့ၢ်ဒီးတၢ်ပာ်လီၤဒွဲၣ်အူ၀ဲလၢကမျၢၢ်အမဲာ်ညါ ၄ ဘျီလံန့ၣ်လီၤႉ