လါဒံၣ်စဲဘၢၣ် ၁၀ သီ၊ ၂၀၁၈နံၣ်။ စးအဲၣ်ဆူ
ကီၢ်ကၠီၣ်တဲၣ်ကီၢ်ပယီၤကီၢ်ဆၢ၊ နီၣ်ဂံၢ် (၂) ရၤမတံမဲၢ်ဆီးတိၤတၢ်တိာ်ကျဲၤအံၤအပူၤ ဟံၣ်ခိၣ်(၆)ဖျၢၣ် ဘၣ်တၢ်မၤဟးဂီၤအီၤအဖီခိၣ် ဟံၣ်ကစၢ်(၅)ဂၤကက့ၤလိာ်ဘၢလိာ်ကွီၢ်က့ၤ၀ဲ ၦၤလၢအဟဲမၤဟးဂီၤတၢ်တဖၣ်အဂ့ၢ်န့ၣ် စံးလီၤ၀ဲလၢရၤမတံ ဖဲဒံၣ်စဲဘၢၣ် (၅)သီအနံၤ န့ၣ်လီၤႉ
ဖဲလါဒံၣ်စဲဘၢၣ်(၂)သီအနံၤ ၦၤဘၣ်မူဘၣ်ဒါတဖၣ် မၤဟးဂီၤကွံာ်၀ဲဟံၣ်(၆)ဖျၢၣ် လၢအတဘၣ်လိာ်ဖိးဒ့ဒီးတၢ်ဘျၢအဖီခိၣ်ၦၤလၢတၢ်မၤဟးဂီၤအဟံၣ်တဖၣ်ကက့ၤဟံး၀ဲအရ့အဂ့ၢ်ၦၤလၢတၢ်မၤဟးဂီၤအဟံၣ်အူကၠ့ၣ်ထိတဲဘၣ်ခ့ၣ်အဲးစံၣ်န့ၣ်လီၤ။
“ၦၤလၢတၢ်မၤဟးဂီၤအဟံၣ်ခဲအံၤသ့ၣ်တဖၣ် ကီၢ်ပဒိၣ်ဟ့ၣ်စ့အီၣ်လိးလီၤႉ ပတဟံးအီၤတမ့ၢ်ဘၣ်ႉ ဟ့ၣ်၀ဲထဲတၢ်သုးလီၢ်သုး ကျဲအလဲန့ၣ်လီၤႉ ဘၣ်မနုၤဃိ ၦၤထံဖိကီၢ်ဖိသ့ၣ်တဖၣ်တသုးဘၣ်လဲၣ်န့ၣ် ကျဲမုၢ်၀ဲန့ၣ်အကျိၤဆီ တလဲသးအဃိန့ၣ်လီၤႉ ပတီၣ်ထီၣ်လၢကဘှါရှဲန့ၢ်ၦၤအဘျီတဖၣ်အဘီလျီၤႉ အ၀ဲသ့ၣ်တကပၤတဲ၀ဲလၢပဟံၣ်လီၢ်န့ၣ်အိၣ် တလၢကွံာ်၀ဲထံကီၢ် အဟီၣ်ခိၣ်လီၢ်အဃိ မၤဟးဂီၤကွံာ်၀ဲန့ၣ်လီၤႉ မၤ၀ဲလၢအတဖိးမံဒီးတၢ်ဘျၢဘၣ်န့ၣ်လီၤႉ ပကဲကမျၢၢ်ဘၣ်ဒိလၢၦၤလီၤႉ ၀့ၢ်အံၤပၢပြးခိၣ်ဟ့ၣ်လီၤတၢ်ကလုၢ် ဟဲမၤဟးဂီၤ၀ဲလၢဂီၤခီ(၅)နၣ်ရံၣ်လၢတၢ်န့ၣ်အဃိ ပဟံးပက့ၤ လိာ်ဘၢလိာ်ကွၢ်က့ၤ အ၀ဲသ့ၣ်လီၤႉ”
ဟံၣ်လီၢ်လၢတၢ်မၤဟးဂီၤအီၤတဖၣ် အလုၢ်အၦ့ၤ ပၢၢ်တုၤလၢအကလီၢ်(၄)ကယၤ၊ ဟီၣ်ခိၣ်လီၢ်အၦ့ၤလၢမုၢ်မဆါတနံၤအံၤကလီၤလၢတုၤလၢကလီၢ်လၢအကထိဃၣ်ဃၣ် ဘၣ်ဆၣ် ကီၢ်ပဒိၣ်တကပၤကိးထံၣ်အ၀ဲသ့ၣ်ကတီၢ်ဟ့ၣ်၀ဲစ့လၢကသုးကွံာ်အသးအဂီၢ် (၆၆)ကလီၢ်လီၤအဃိ တတူၢ်လိာ်၀ဲတၢ်အံၤဘၣ်အဂ့ၢ်အူကၠ့ၣ်ထိတဲအါထီၣ်၀ဲန့ၣ်လီၤႉ
တၢ်မၤဟးဂီၤကွံာ်အဟံၣ်ခိၣ်(၆)ဖျၢၣ်အပူၤ ဟံၣ်ခိၣ်တဖျၢၣ်ဟံးန့ၢ်၀ဲစ့အီၣ်လိးန့ၣ်လီၤႉ မ့မ့ၢ်လၢဟံၣ်ခိၣ်အိၣ်တ့ၢ်ယဲၢ်ဖျၢၣ်အကျါ ခံဖျၢၣ်န့ၣ် အတီၣ်ထီၣ်ဃာ် တၢ်လိာ်ဘၢလိာ်ကွီၢ်ဆူ ပၢၤကီၢ်အရူ၀ံၤ၀ဲလံဒီး ဟံၣ်ခိၣ်အိၣ်တ့ၢ်သၢဖျၢၣ် ကဆဲးတီၣ်ထီၣ်က့ၤ၀ဲလံာ်လိာ်ဘၢလိာ်ကွီၢ်အံၤ စံးလီၤ၀ဲဖဲတၢ်မၤ၀ဲတၢ်ဒုးသ့ၣ်ညါၦၤတၢ်ကစီၣ်ဖိတဖၣ်န့ၣ်လီၤႉ
ဘၣ်ဃးတၢ်မၤရှဲပျီ၀ဲဟံၣ်ခိၣ်သ့ၣ်တဖၣ်အဖီခိၣ် ဖဲဒံၣ်စ့ဘၢၣ် ၄သီအနံၤ တၢ်တိာ်ကျဲၤၦၤဘၣ်မူဘၣ်ဒါတဖၣ်မၤ၀ဲ တၢ်ဒုးသ့ၣ်ညါမူးတခါ အပူၤ တၢ်ကွၢ်ထွဲခိၣ်ဃၢၤန့ဆၢၣ်၊ သ့ၣ်ၦၢ်၊ ဟီၣ်လာ်ဒီးကျဲကိတိာ်ခိၣ်စီၤ ပၠံၣ်သၣ်တဲ၀ဲလၢတၢ် တိၣ်ကျဲၤအံၤအဖီခိၣ် တၢ်ကိးထံၣ်၀ဲဟံၣ် ခိၣ်သ့ၣ်တဖၣ်ဒီးဘှါရှဲ၀ဲတၢ်ဂ့ၢ်အံၤ အဘျီတဖၣ်အဘျီဒီး တဘၣ်ဘျီးဘၣ်ဒါဘၣ်အဃိတၢ်မၤရှဲပျီအီၤလၢတၢ်ဘျၢအသိးန့ၣ်လီၤႉဒီး ဟံၣ်ခိၣ် ၅ ဒူၣ်လၢအိၣ်တ့ၢ်တဖၣ်တၢ်ကဆဲးဘှဲရှဲအီၤဒ်တၢ်ဘျၢအသိးလီၤအဂ့ၢ်န့ၣ်လီၤႉ
နီၣ်ဂံၢ်(၂) တိၤတၢ်တိာ်ကျဲၤအံၤ တၢ်ကမၤ၀ံၤအီၤလၢလါဒံၣ်စဲဘၢၣ်အံၤဒီး တၢ်ကဘၣ်က့ၤဟ့ၣ်လီၤက့ၤလၢကီၢ်ကၠီၣ်တဲၣ်အိၣ်အဃိ လၢတၢ်တိာ်ကျဲၤ၀ဲန့ၣ်အပူၤဟီၣ်ခိၣ်လီၢ်၊ ဟံၣ်တဖၣ်တၢ်မၤရှဲပျီအီၤအဂ့ၢ်န့ၣ်သ့ၣ်ညါဘၣ်အီၤန့ၣ်လီၤႉ
တိၤတၢ်တိာ်ကျဲၤအံၤအပူၤ ဟံၣ်ဒူၣ်(၉၀) ဘျဲၣ်ဟီၣ်ခိၣ်လီၢ်သ့ၣ်တဖၣ် တၢ်ဟ့ၣ်လီၤ၀ဲစ့အီၣ်လိးလၢ၂၀၁၆နံၣ်၊ လါယူလံ ကတီၢ်လၢရၤမတံ၀ံၤလံ၀ဲဒီး ကျဲမုၢ်န့ၣ်တၢ်ထိၣ်ဆီတလဲအီၤတုၤ(၅)ဘျီလံအဃိ ဟံၣ်ဒူၣ်လၢဒိးန့ၢ်ဘၣ်စ့အီၣ်လိးတနီၤတပၣ်ဃုာ်၀ဲလၢတၢ်တိာ်ကျဲၤအံၤလၢၤဘၣ်ဒီးကတီၢ်အံၤဟံၣ်လၢဟီၣ်ခိၣ်(ဂရမ်)အိၣ်ဃုဖျၢၣ်အံၤဘၣ်တၢ်မၤဟးဂီၤအီၤအဂ့ၢ်လီၢ်က၀ီၤဖိတဖၣ်တဲ၀ဲန့ၣ်လီၤႉ
တၢ်တိာ်ကျဲၤအံၤမ့ၢ်၀ဲထံကီၢ်အပတီၢ်လၢကီၢ်ကၠီၣ်တဲၣ်ကီၢ်ပယီၤထံကီၢ်ခံဘ့ၣ်မုၢ်ကျိၤ၀ဲၤကွာ်အဂီၢ်ဒီးတိၤနီၣ်ဂံၢ်(၂)တၢ်တိာ်ကျဲၤအံၤစးထီၣ်အသးလၢ၂၀၁၅နံၣ်၊ လါအီကူာ် ၃၀သီအနံၤဒီး ထံကီၢ်ခံဘ့ၣ် ကီၢ်ပဒိၣ်တဖၣ် တိာ်ပာ်၀ဲလၢ ကအိးထီၣ်တိၤအံၤ ဖဲ၂၀၁၉နံၣ်၊လါမးရှးန့ၣ်လီၤႉ
