Home တၢ်ကစီၣ် ခီဖျိပယီၤသုးကျိဖးဒိၣ်အဃိ သ၀ီဖိတဖၣ်ဘၣ်ဃ့ၢ်၊ ပနၢ်တဖၣ်ဘၣ်သံ

ခီဖျိပယီၤသုးကျိဖးဒိၣ်အဃိ သ၀ီဖိတဖၣ်ဘၣ်ဃ့ၢ်၊ ပနၢ်တဖၣ်ဘၣ်သံ

473
0

ယနူၤအါရံၤ၂၉ သီ၊ ၂၀၁၉နံၣ်။

(ခ့ၣ်အဲၣ်ယူၣ်)ကညီဒီကလုာ်စၢဖှိၣ်ကရၢ၊ မုၢ်တြီၢ်ကီၢ်ရ့ၣ်(သုးက့=၅)ဟီၣ်က၀ီၤအပူၤ ဖဲယနူၤအါရံၤ၂၅ ဒီး ၂၆သီအနံၤ ပယီၤပဒိၣ်အသုးခးလီၤ၀ဲကျိဖးဒိၣ်ဆူသ၀ီဖိအိၣ်ဆိးလီၢ်သ့ၣ်တဖၣ်အဃိ ဖိဒံဖိသၣ်သးၦၢ်ပၣ်ဃုာ်သ၀ီဖိတဖၣ် ဘၣ်ဃ့ၢ်ပူၤဖျဲးအသးဒီး ဆၣ်ဖိကီၢ်ဖိလၢအမ့ၢ်ပနၢ် တဖၣ်သံ၀ဲအဂ့ၢ်(ခ့ၣ်အဲၣ်ယူၣ်)သုးက့=၅ သုးဂ့ၢ်၀ီခိၣ် သုးခိၣ်ဒိၣ်ဖိ စီၤကျၢၤဒိၣ်စံး၀ဲန့ၣ်လီၤႉ

“ဖဲ၂၆သီ ဟါလီၤခီ(၅) နၣ်ရံၣ်ကတီၢ် စှီၤမုၢ်ပျီ သ၀ီဖိဟဲက့ၤခီကျဲဒီးပနၢ်တဖၣ်ကတီၢ် ပယီၤသုး လၢအဟံးကျဲတၢ် ဘံၣ်တၢ်ဘၢတဖၣ်ခး၀ဲၦၤကညီဒီးပနၢ်သ့ၣ်ဖၣ်န့ၣ်လီၤႉ ဘၣ်ဆၣ်ၦၤကညီဘၣ်ဒိတအိၣ်ဘၣ်ႉ ဘၣ်ဆၣ်ပနၢ် တဖၣ်အိၣ်တ့ၢ်ဖဲန့ၣ်ခဲလၢာ်လီၤႉ သံၦဲၤဒုလဲၣ်ခီတသ့ၣ်ညါဘၣ်ႉ တုၤကတီၢ်အံၤလဲၤကွၢ်တဘူၣ်ဒံးဘၣ်ႉ”အဂ့ၢ် သုးခိၣ်ဒိၣ်ဖိ စီၤကျၢၤဒိၣ် စံး၀ဲန့ၣ်လီၤႉ

ဒ်န့ၢ်အသိးဖဲ ၂၅ သီအနံၤ ဂီၤခီကတီၢ် ပီၣ်ဃ့ခိၣ်ဟီၣ်က၀ီၤ တကူၣ်သဲသ၀ီအပူၤ ပယီၤသုး ခးလီၤ၀ဲကျိဖးဒိၣ်အဃိ လီၢ်က၀ီၤကမျၢၢ် ၂၉ ဂၤပျံၤတၢ်ဃ့ၣ်ဟး ထီၣ်ကွံာ်ဒီးဖဲ ၂၆အနံၤစ့ၢ်ကီးပယီၤ သုးတကပၤခးလီၤ ကဒီး၀ဲကျိ ဖးဒိၣ် အဆူ သ၀ီဖိအအိၣ်အဃိ လီၢ်က၀ီၤအမျၢၢ်(၃၅)ဂၤဘၣ်ဟးထီၣ်ကွံာ်ကဒီး၀ဲအဂ့ၢ် သုးခိၣ်ဒိၣ်ဖိ စီၤကျၢၤဒိၣ်တဲ အါထီၣ်ကဒီး၀ဲန့ၣ်လီၤႉ

ကီၢ်ပဒိၣ်သုးလၢအခးလီၤ၀ဲကျိဖးဒိၣ်အံၤ တၢ်တသ့ၣ်ညါအီၤလၢမ့ၢ်သုးရ့ၣ်မတၤလဲၣ်ဆၣ် ဖဲစှီၤမုၢ်ပျီဟီၣ်က၀ီၤ ကလံၤစိးသုး၀ဲၤလီၢ်န့ၣ် အိၣ်ဒၣ်ထဲ(တပခ)စုဒုၣ်စုတီၤအဖီလာ်ဒီး ဟံး၀ဲကျဲတၢ်ဘံၣ်တၢ်ဘၢဒီး ဘၣ်မနုၤအဃိ ခးလီၤ၀ဲန့ၣ်တၢ်တသ့ၣ်ညါအီၤဘၣ်ဒီးလီၤဂာ်ဒ်က့ၤမၤ၀ဲဒ်အပူၤကွံာ်ညီနုၢ်တၢ်မၤအသိးလီၤအဂ့ၢ်သုးခိၣ်ဒိၣ်ဖိ စီၤကျၢၤဒိၣ်စံး၀ဲန့ၣ်လီၤႉ

ဘၣ်ထွဲဒီးတၢ်ဂ့ၢ်အ၀ဲအံၤအဖီခိၣ် ခ့ၣ်အဲးစံၣ်=ကညီတၢ်ကစီၣ်ဂုာ်ကျဲးစၢးဆဲးကျိး၀ဲ ကီၢ်ပယီၤပဒိၣ်သုး ကလံၤစိးသုး၀ဲၤလီၢ်ခိၣ်သ့ၣ်(တပခ)ၦၤတဲတၢ်ပၢ သုးခိၣ်ဒိၣ်ဖိ မၠိအီၣ်အံၤ ဘၣ်ဆၣ်တၢ်ဆဲးကျိးတန့ၢ်ဘၣ်န့ၣ်လီၤႉ
ဘၣ်ဆၣ် ဖဲတလါအံၤ၂၅သီအနံၤ ကီၢ်ပဒိၣ်သုးလံာ်တၢ်ပာ်ဖျါအပူၤ ပာ်ဖျါဃာ်၀ဲအသိးန့ၣ် လၢကလံၤစိးသုး၀ဲၤလီၢ်ခိၣ်သ့ၣ်ဟီၣ်က၀ီၤ၊ လၢၢ်မုၢ်ပျီဟီၣ်က၀ီၤအပူၤ န့ၣ်(ခ့ၣ်အဲၣ်ယူၣ်) သုးက့(၅)ခိးခးစဲးပြဲးအ၀ဲသ့ၣ်အိၣ်၀ဲ(၉)ဘျီဒီးသိလ့ၣ်ဘၣ်မ့ၣ်ပိၢ် (၂)ဘျီ ကဲထီၣ်အသး ဒီးမ့ၢ်၀ဲတၢ်လဲၤခီပတာ်မၤဟးဂီၤ (အဲၣ်စံၣ်အ့ၣ်)တၢ်အၢၣ်လီၤတဖၣ်န့ၣ်လီၤႉ