ယနူၤအါရံၤ ၂၇သီ၊ ၂၀၁၉ နံၣ်။ စီၤမၠးအူသၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ၊ ဘျံးဒ၀ဲၢ်ကီၢ်ရ့ၣ် (သုးက့-၄) ၦၤစံၣ်ညီၣ်ကွီၢ်ခိၣ်ကျၢၢ် ပဒိၣ်စီၤဘံလၢၢ် စူး ကွံာ်အသး ဖဲယနူၤအါရံၤ(၂၆)သီ၊ ဟါခီ (၈)နၣ်ရံၣ်ကတီၢ် ဖဲကီၢ်ကၠီၣ်တဲၣ်၊ ရံၣ်ဘူၣ်လ့ၣ်တၢ်ဆါဟံၣ်အပူၤ လၢပသိၣ်ခဲစၢၣ်တၢ်ဆါန့ၣ်လီၤႉ
ပဒိၣ်စီၤဘံလၢၢ်အံၤ အမ့ၢ်တ့ၢ်၀ဲ ဘျံးဒ၀ဲၢ် ကီၢ်ရ့ၣ်ခိၣ်တဂၤအသိးဒီး ဖဲအ၀ဲစူးကွံာ်အသးကတီၢ် အသးနံၣ်အိၣ်၀ဲ (၆၈)နံၣ်န့ၣ်လီၤႉ အ၀ဲမ့ၢ်၀ဲ(ခ့ၣ်အဲၣ်ယူၣ်)လီၢ်ခၢၣ်သးကမံးတံာ်တဂၤ၊ ဘျံးဒ၀ဲၢ်ကီၢ်ရ့ၣ်စံၣ်ညီၣ်ကွီၢ်ခိၣ် ကျၢၢ်ဒီးတနီသရံးကီၢ်ခီဒိၣ်(JMC)တၢ်ကွၢ်ဟုၣ်ကွၢ်စူၣ်တၢ်ပတုာ်တၢ်ခးကမံးတံာ်ၦၤပၢၤလီၢ်ဆ့ၣ်နီၤ(၂) တၢတဂၤ န့ၣ်လီၤႉ
“အ၀ဲမ့ၢ်ၦၤလၢအဟံးမူဒါကတီၢ် စူးကွံာ်အသးလၢတၢ်ဆါလီၤမီၤႉ လၢတၢ်မုာ်တၢ်ခုၣ်တၢ်လဲၤကျဲ အပူၤအ၀ဲမ့ၢ်ၦၤ လၢဘျၢလီၤအသးဒီးနီၢ်ခိတဂၤလီၤႉ အ၀ဲမ့ၢ်ၦၤလၢအမၤ တၢ်ဖျိဖျိဖျါဖျါတဂၤလီၤႉ ပာ်ကဲစ့ၢ်ကီးအီၤလၢအ၀ဲတၢ်ဒူ လၢတၢ်မုာ်တၢ်ခုၣ်တၢ်လဲၤကျဲအပူၤန့ၣ်လီၤႉ မ့ၢ်တၢ်ဘၣ်ဒိဖးဒိၣ်တခါလၢပဂီၢ်လီၤ ”အဂ့ၢ် ကီၢ်ရ့ၣ်ဘျံးဒ၀ဲၢ် ကီၢ်ရ့ၣ်ခိၣ်ပဒိၣ်စီၤဆၣ်ပံၢ်တူးစံး၀ဲန့ၣ်လီၤႉ
ပဒိၣ်စီၤဘံလၢၢ်အံၤ ဖျိထီၣ်၀ဲကၠိလၢ စကဲကီၢ်ခီဒိၣ်ကီၢ်စၢဖှိၣ်ကလုာ်ဒူၣ်တဖၣ်တၢ်ဂုၤထီၣ်ပသီထီၣ်စဲအ့ၣ်ဖၠၣ်စိမိၤ ဒီးမၤတ့ၢ်၀ဲသရၣ်ကၠိခိၣ်လၢတနီသရံးကီၢ်ဆၣ်၊ သကၠဲးခၠီသ၀ီအပူၤခီဖျိထံရူၢ်ကီၢ်သဲးတၢ်အိၣ်သးအဃိ ဖဲ(၁၉၇၈) နံၣ်န့ၣ်နုာ်လီၤ၀ဲဒၣ်ဆူကညီတၢ်ပၢၢ်ဆၢအပူၤန့ၣ်လီၤႉ လၢန့ၢ်အမဲာ်ညါအ၀ဲကဲထီၣ်၀ဲဘျံးဒ၀ဲၢ်ကီၢ်ရ့ၣ်ခိၣ်၊ ကီၢ်ဆၣ်ခိၣ်(၂) တဆီဘၣ်တဆီဒီး ကတီၢ်အံၤမ့ၢ်၀ဲ(KNU)လီၢ်ခၢၣ်သးထီဘိကမံးတံာ်တဂၤန့ၣ်လီၤႉ
ဘျံးဒ၀ဲၢ်ကညီပီၢ်ရီဘျးစဲကရူၢ်စးအ့ၣ်ယၣ်၀့စံး၀ဲလၢ“လၢလီၢ်က၀ီၤအဂီၢ်၊ ကလုာ်အဂီၢ်ဒီး (ခ့ၣ်အဲၣ်ယူၣ်)အဂီၢ် ၦၤအရ့ဒိၣ်တဂၤလီၤမၢ်ကွံာ်အဃိ မ့ၢ်တၢ်လီၤသးအုးဖးဒိၣ်တခါလီၤႉ ဒ်သိးသးစၢ်သ့ၣ်တဖၣ်ကကဲထီၣ်ခိၣ်နၢ်အဂီၢ် မုၢ်လၢ်၀ဲဒီးဒုးအိၣ်ဖျဲၣ်ထီၣ်၀ဲဒီဒူၣ်၊ ဒ်တၢ်ကလဲၤလၢ(NCA)အဂီၢ် အဖုဘံလၢၢ်မၤ၀ဲတၢ်ဒီဒူၣ်၊ စးထီၣ်ဖဲန့ၣ်ဒီ တကတီၢ်မၤ၀ဲတၢ်မုာ်တၢ်ခုၣ်၊ ကလုာ်ဂ့ၢ်၀ီဒီးဟ့ၣ်လီၤအသးအနီၢ်ကီၢ်န့ၣ်လီၤႉ မၤတၢ်လၢကလုာ်ဂ့ၢ်၀ီဒီးမ့ၢ်ၦၤတဂၤလၢအိၣ်ဒီးတၢ်နၢ်ပၢၢ်တဂၤလီၤႉ”အဂ့ၢ် စံး၀ဲန့ၣ်လီၤႉ
ပဒိၣ်စီၤဘံလၢၢ် အိၣ်ဖျဲၣ်ထီၣ်၀ဲဖဲ တနီသရံးကီၢ်ဆၣ်၊ သရဲးဘွ့သ၀ီဒီး အဒီပုၢ်၀ဲၢ်ခဲ လၢာ်(၆)ဂၤအကျါ မ့ၢ်ၦၤအဒိၣ်ကတၢၢ်တဂၤလီၤႉ ဒီးဖဲစူးကွံာ်သးကတီၢ်အမၢၤဒီး အဖိအမုၣ်အဖိခွါအိၣ်လီၤတဲာ်ကွံာ်၀ဲ (၅)ဂၤန့ၣ်လီၤႉ ဒီးတၢ်ပာ်လီၤကွံာ် အစိၣ်ဖဲလါဖ့ၤဘြူၤအါရံၤ လါထီၣ် ၁ သီအနံၤန့ၣ်လီၤႉ
