Home တၢ်ကစီၣ် နီၢ်သီသွဲထူ ပူၤဖျဲးထီၣ်ကွံာ် လၢတၢ်လိာ်ဘၢလိာ်ကွီၢ် ခီဖျိ စိာ်ဃာ်၀ဲစ့အဘျၣ်

နီၢ်သီသွဲထူ ပူၤဖျဲးထီၣ်ကွံာ် လၢတၢ်လိာ်ဘၢလိာ်ကွီၢ် ခီဖျိ စိာ်ဃာ်၀ဲစ့အဘျၣ်

6
0

လါအ့ဖြ့ၣ် ၁၈ သီႇ၂၀၁၉နံၣ်ႇ ခ့ၣ်အဲးစံၣ်

ပကိကီၢ်ခီဒိၣ်ႇ ဒဲၣ်အူကီၢ်ဆၣ်အပူၤ နီၢ်သီသွဲထူလၢတၢ်ဘၢလိာ်ကွီၢ်အီၤလၢအဟဲက့ၤစိာ်ဘၣ်၀ဲ စ့တကလးကၠးလၢအဘျၣ်တဖၣ်အံၤ ဖဲလါအ့ဖြ့ၣ်, ၁၈သီအနံၤ ပူၤဖျဲးထီၣ်ကွံာ်လၢတၢ်မူးတၢ်ရၢ်အဂ့ၢ် ပီၢ်ရီစီၤထူသးထီလၢအလူ၀ဲတၢ်ဂ့ၢ်၀ဲအံၤ စံးဘၣ်ခ့ၣ်အဲးစံၣ် ကညီတၢ်ကစီၣ်န့ၣ်လီၤ.

အ၀ဲစံး၀ဲလၢ“တၢ်ကတီၣ်ထီၣ်အီၤလၢ တၢ်အုၣ်သးလီၤတံၢ်လီၤဆဲးတအိၣ်နီတမံၤဘၣ်အဃိ ဘၣ်တၢ်ပျၢ်က့ၤအီၤလၢ တၢ်ဘျၢခိၣ်သ့ၣ် (၁၃) တၢ်ဘျၢကွီၢ်မ့ၣ် နီၣ်ဂံၢ် ၁၅၃(၁)န့ၣ်လီၤႉ” အဂ့ၢ် စံး၀ဲန့ၣ်လီၤ.

နီၢ်သီသွဲထူအံၤ လၢအပူၤကွံာ် ၂၀၁၈နံၣ်ႇ လါဒံၣ်စ့ဘၢၣ် ၆သီနံၤကတီၢ် ဟဲက့ၤလီၤစိာ်ဘၣ်၀ဲစ့ပယီၤအဘျၣ်တကလးကၠး ၁၅၄ ဘ့ၣ်အဖီခိၣ် ဒဲၣ်အူပၢၤကီၢ်(ပ)၁၄၂၀၊ ၂၀၁၈၊ ဖီၣ်ဟံးန့ၢ်အီၤအရ့လၢ ကီၢ်ပယီၤ ကီၢ်စၢဖှိၣ်စ့တၢးတၢ်ဘျၢကွီၢ်မ့ၣ် နီၣ်ဂံၢ် ၁၀၅, ၁၀၆ဒီး ဖဲလါဒံၣ်စ့ဘၢၣ်အသီ၂၀အနံၤ ပူၤဖျဲးထီၣ်ကွံာ်၀ဲလၢတၢ်ကမၣ်ဒိၣ် ကွီၢ်မ့ၣ် နီၣ်ဂံၢ် ၁၀၆အဂ့ၢ်န့ၣ်လီၤ.

နီၢ်သီသွဲထူအံၤ ခီဖျိဟဲက့ၤစိာ်၀ဲ စ့အဘျၣ်အံၤအဃိဘၣ်အိၣ်၀ဲလၢတၢ်ဒုးဃာ်အလီၢ် ၂၅သီနံၤ၀ံၤဖဲလါယနူၤအါရံၤ ၃သီအနံၤဟဲက့ၤထူၣ်ဖျဲးထီၣ်၀ဲလၢ တၢ်အုၣ်ကီၤ၀ံၤ က့ၤထူၣ်ဖျဲးက့ၤ ဒ်အံၤန့ၣ်လီၤႉ

စ့တၢးတၢ်ဘျၢကွီၢ်မ့ၣ် ၁၀၅အံၤ တၢ်မ့ၢ်သ့ၣ်ညါၦၤတဂၤဂၤလၢအသူ၀ဲစ့အဘျၣ်ဒီးဘၣ်ဟ့ၣ်စ့အီၣ်လိးမ့ၢ်ဂ့ၤႇ ဘၣ်လီၤဃိာ်ပူၤ လၢအတဘၣ်အါန့ၢ်၀ဲ ၃နံၣ်ဆူ အဖီခိၣ်မ့ၢ်ဂ့ၤ မ့တမ့ၢ် ဘၣ်တၢ်ဟ့ၣ်တၢ်ကမၣ်ခံခါလၢာ်မ့ၢ်ဂ့ၤသ့ၣ်၀ဲန့ၣ်လီၤႉ ဒီးမ့မ့ၢ်တၢ်ဘျၢကွီၢ်မ့ၣ် ၁၀၆တခီ တၢ်မ့ၢ်သ့ၣ်ညါလၢတၢ်ထုးထီၣ်ခူသူၣ်၀ဲစ့အဘျၣ်ႇ ဆှၢဆူ ထံဂၤကီၢ်ဂၤဒီးထံလီၢ်ကီၢ်ပူၤမ့ၢ်ဂ့ၤန့ၣ် ဘၣ်လီၤ၀ဲဃိာ်အနံၣ် ၁၀တုၤအနံၣ်၂၀ အဂ့ၢ်သ့ၣ်ညါဘၣ်လီၤ.

နီၢ်သီသွဲထူတၢ်ဂ့ၢ်အံၤအဂီၢ် ပကိကီၢ်ခီဒိၣ်ကညီဂ့ၢ်၀ီကိတိာ် ဃုာ်ဒီး ဂံၢ်ခီၣ်ထံးတၢ်ကရၢကရိတနီၤ ပာ်ဖှိၣ်မၤစၢၤအီၤအမဲာ်ညါ ဖးဒိၣ်ႇအ့တနီၣ် ဒီးဒဲၣ်အူကီၢ်ဆၣ်ပီၢ်ရီ ၃ဂၤမၤစၢၤအီၤအဂ့ၢ်န့ၣ်လီၤ.

ပကိကီၢ်ခီဒိၣ်ကညီဂ့ၢ်၀ီကိတိာ်ဂ့ၢ်၀ီကိတိာ် နီၢ်ၦဲၤစ့စံး၀ဲ“တမ့ၢ်ယမၤစၢၤထဲတဂၤဘၣ်ႉ တၢ်ကရၢကရိခဲလၢာ်ႇ ဘျီၣ်ဒိၣ်ခၢၣ်စးပာ်ဃုာ်မၤစၢၤ၀ဲန့ၣ်လီၤႉ တနံၤအံၤဒုပူၤဖျဲးထီၣ်ကွံာ်၀ဲန့ၣ်လံႇ ဆၢမုၢ်လၢ်လၢၦၤလၢအအိၣ်လၢကီၢ်ပူၤကီၢ်ချၢကိးဂၤဒဲးအသးကမုာ်၀ဲန့ၣ်လီၤႉ” အဂ့ၢ်စံး၀ဲန့ၣ်လီၤ.

နီၢ်သီသွဲထူလၢအအိၣ်ဖဲဒဲၣ်အူကီၢ်ဆၣ်ႇ လဲၣ်ကၠါမၠီၣ်သ၀ီၤအံၤ ဖဲ၂၀၁၇နံၣ်ႇ လါဒံၣ်စ့ဘၢၣ်အပူၤလဲၤမၤတၢ်လၢကီၢ်စ့ကပူၣ် ဒ်အမ့ၢ်ၦၤမၤတၢ်လၢဟံၣ်ဃီပူၤဒီးဖဲ၂၀၁၈နံၣ်ႇလါဒံၣ်စ့ဘၢၣ်ထီၣ်သီကတီၢ်ဟဲက့ၤလီၤဟးလိာ်ကွဲလၢကီၢ်ပယီၤပူၤအဂ့ၢ်န့ၣ်လီၤ.

အ၀ဲဟဲက့ၤဟးလၢကီၢ်ပယီၤကတီၢ် အတၢ်မၤကစၢ်လၢကီၢ်စ့ကပူၣ်အံၤ ဆှၢလီၤန့ၢ်အ၀ဲတၢ်မၤအစ့တဖၣ်လၢ (MM Sharife)အဂ့ၢ် နီၢ်သီသွဲထူသ့ၣ်တကပၤတဲဖျါထီၣ်၀ဲဘၣ်ဆၣ် မ့မ့ၢ်လၢ ပၢၤကီၢ်တကပၤဒ်ဒိးန့ၢ်ဘၣ်တၢ်ကစီၣ်အသိး ဖဲလါဒံၣ်စ့ဘၢၣ် ၆သီအနံၤ လဲၤဃု၀ဲနီၢ်သီသွဲထူအဟံၣ်ဒီးထံၣ်န့ၢ်၀ဲ စ့အဘျၣ်တဖၣ်အဃိ ဟံးန့ၢ်၀ဲအရ့အဂ့ၢ် ထုးထီၣ်ပာ်ဖျါဃၣ်၀ဲန့ၣ်လီၤ.