Home တၢ်ကစီၣ် ဟံၣ်လၢတပူၤဒီး ကီၢ်ကၠီၣ်တဲၣ် ကီၢ်ပယီၤ နီၣ်ဂံၢ်(၂)တိၤ ကျဲတဖၣ် တၢ်မၤဟးဂီၤကွံာ်အီၤ

ဟံၣ်လၢတပူၤဒီး ကီၢ်ကၠီၣ်တဲၣ် ကီၢ်ပယီၤ နီၣ်ဂံၢ်(၂)တိၤ ကျဲတဖၣ် တၢ်မၤဟးဂီၤကွံာ်အီၤ

12
0

လါအ့ဖြ့ၣ် ၄သီႇ ၂၀၁၉နံၣ်ႇန့ၣ်နီၣ်

ကီၢ်ကၠီၣ်တဲၣ် ကီၢ်ပယီၤရၤမတံက၀ီၤဒ့(၅) ယ့ၣ်ပူၣ်သ၀ီပူၤ တိၤနီၢ်ဂံၢ်(၂)လၢ အိၣ်လၢကီၢ်ကၠီၣ်တဲၣ် ဟဲခီပတာ်၀ဲဆူရၤမတံအံၤန့ၣ် တၢ်လီၢ်အ၀ဲန့ၣ် တပူၤဒီးကျဲဘၣ်အဃိ မၤဟးဂီၤကွံာ်၀ဲၦၤအိၣ်ဟံၣ်လီၢ်တဖၣ်ဒီး ကရၢၢ်တဖၣ် ဖဲလါအ့ဖြ့ၣ် ၄သီဂီၤခီကတီၢ် အဂ့ၢ်သ့ၣ်ညါဘၣ်လီၤ.

ဟံၣ်(၃)ဖျၢၣ်လၢအတပူၤဒီးကျဲမုၢ်အံၤ တကးဘၣ် လၢအပူၤကွံာ် ၂၀၁၈နံၣ် လါဒံၣ်စ့ဘၢၣ် ၂ သီအနံၤ ဟံၣ်(၅)ဖျၢၣ် အလီၢ် လၢတၢ်မၤဟးဂီၤဃာ်အီၤ ဒီးတၢ်က့ၤသူၣ်ထီၣ်ကဒါ က့ၤကရၢၢ်တဖၣ်အံၤရၤမတံကီၢ်ဆၣ်ပတီၢ် ၦၤပၢဆှၢတၢ်အခိၣ် အူဖၠိစီၣ်ကိၣ်ကိၣ် ပာ်ဖှိၣ်ထီၣ်သးဒီး ၀ဲၤကျိၤၦၤမၤတၢ်ဖိတဖၣ် သူ၀ဲဂံၢ်ဘါၦၤအဂၤ(၅၀)လဲၤမၤဟးဂီၤကွံာ်၀ဲန့ၣ်လီၤ.

“တိၤကျဲမုၢ်၀ဲအံၤမ့ၢ်၀ဲ အ့ရှၢၣ်ကျဲမုၢ်အဃိ ကျဲမုၢ်ကပၤန့ၣ်တၢ်ပာ်ပနီၣ်ပာ်အီၤလၢ တၢ်ကဘၣ်ပာ်၀ဲ ၁၂၅ပ့ၣ်အဃိ ဟံၣ်လၢအပၣ်ဃုာ်လၢကျဲမုၢ်၀ဲန့ၣ် ၃ဖျၢၣ် တၢ်မၤရှဲပျီကွံာ်အီၤန့ၣ်လီၤႉ”အဂ့ၢ် အူဖၠိစီၣ်ကိၣ်ကိၣ် လၢအဟံးမူဒါ ဖဲတၢ်မၤရှဲပျီတၢ်ဘျီ၀ဲန့ၣ်လီၤႉ

လၢတၢ်မၤရှဲပျီၦၤအိၣ်ဟံၣ်လီၢ်တဖၣ် လၢတၢ်သူၣ်လီၤဃာ်၀ဲန့ၣ် လၢအပူၤကွံာ် ၂၀၀၅နံၣ်ခါ အူစ့ၣ်၀့လၢဘၣ်တၢ်ဖီၣ်အီၤဘၣ်ဃး တၢ်မၤကၤ၀ဲ ၦၤကညီ အကျီးလၢအအိၣ်၂၅ အ့ကၢၣ်အံၤ တၢ်ဟံးန့ၢ်အီၤ၀ံၤ မ့ၢ်၀ဲကီၢ်ပဒိၣ်တၢ်ခွဲးတၢ်ယာ်အိၣ်လၢကရဲၣ်ကျဲၤ၀ဲန့ၣ်လီၤႉ လၢတချုးတၢ်မၤဟးဂီၤ၀ံၤဟံၣ် ဒံးဘၣ်န့ၣ် ကျဲမုၢ်ကျဲဘိ၀ဲၤကျိၤဟ့ၣ်ဒုးသ့ၣ်ညါ၀ဲအိၣ်သၢဘျီအဂ့ၢ် ကီၢ်ဆၣ် ၦၤပၢဆှၢတၢ်အခိၣ်အံၤ စံး ၀ဲန့ၣ်လီၤႉ

နါ၀့မီၣ်လၢၦၤမၤဟးဂီၤအဟံၣ်တဂၤစံး၀ဲ “ပ၀ဲဒၣ်ပတမ့ၢ်ၦၤလၢအလဲၤအိၣ်လၢၦၤတၢ်လီၢ်ဘၣ်ႉ လၢအပူၤကွံာ်(၉)နံၣ်ကတီၢ် ပၦ့ၤဃာ်၀ဲဟီၣ်ခိၣ်လီၢ်လၢ အူစ့ၣ်၀့အအိၣ် ပ့ၣ်၈၀ ၆၀အံၤလၢစ့ (၃၅)ကလီၢ်၀ံၤ ပဘၣ်လဲၤမၤတၢ်လၢယိၤကီၢ် လၢကပၢၤကနါဒီးပၦ့ၤအီၤလီၤႉ ကီၢ်ပဒိၣ်တကပၤတဟ့ၣ်တၢ်ဘၣ်ဒိ အလဲနီတမံၤဘၣ်ဒီးမၤဟးဂီၤကွံာ်၀ဲဒ် အံၤအဖီခိၣ်ပသး တမံဘၣ်ႉ”အဂ့ၢ် တဲ၀ဲန့ၣ်လီၤ.

နီၢ်ဂံၢ်(၂)တိၤတၢ်တိာ်ကျဲၤအဂီၢ် ဟံၣ်လီၢ်လၢတပူၤဒီးကျဲတဖၣ် ဒိးသန့ၤထီၣ်သးလၢ ဟီၣ်ခိၣ်အဖီခိၣ် အလုၢ်အၦ့ၤဒီး တၢ်သူၣ်ထီၣ် အလုၢ်အၦၤ့ဒီးတၢ်သုးလီၢ်သုးကျဲအဂီၢ် တၢ်ပာ်လီၤန့ၢ်၀ဲ လၢစ့ပယီၤအကကွဲၢ် (၃ႇ၅၂၆ႇ၀၃၀ႇ၇၁၄)န့ၣ်လီၤႉ ဖဲန့ၣ် တၢ်က့ၤသူလၢစ့အီၣ်လိးအပူၤအိၣ်ဒၣ် (၃ႇ၄၈၇ႇ၅၇၆ႇ၂၅)အဂ့ၢ် ဖဲအပူၤကွံာ် လါဒံၣ်စ့ဘၢၣ် (၄)သီအနံၤ တၢ်မၤ၀ဲတၢ်ထံၣ်လိာ် တဲသကိးလၢ တၢ်တိာ်ကျဲၤၦၤဘၣ်မူဘၣ်ဒါတဖၣ်ဒီး ၦၤဟံးတၢ်ကစီၣ်သ့ၣ်တဖၣ် ဖဲ၀့ၢ်ဖၣ်အၣ်ႇ ကျဲမုၢ်ကျဲဘိ၀ဲၤကျိၤအဘျီၣ်ပူၤ ကတီၢ် ကီၢ်စဲၣ်ပဒိၣ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤ.

နီၢ်ဂံၢ်(၂)တိၤလၢအခီပတာ်၀ဲသူမှဲကျိလၢအအိၣ်ဖဲ ရၤမတံ,မဲၢ်ဆီးတိၤအံၤန့ၣ် ၂၀၁၅နံၣ် နံၣ်လၢာ်ကတီၢ်တၢ်စးထီၣ်တ့အီၤ၀ံၤ တိၤအထီလၢကၠီၣ်တဲၣ် တကပၤအထီအိၣ်၀ဲ ၁၇ ကံလိမံထၢၣ်ဒီး လၢကီၢ်ပယီၤတကပၤအိၣ်၀ဲ ၄ကံလိမံထၢၣ်န့ၣ်လီၤ.

တၢ်တ့ထီၣ်တိၤ၀ံၤ ၁၀၀ မျးကယၤတၢ်ပနီၣ်အမူးအံၤ တၢ်မၤအီၤဖဲတနံၣ်အံၤ လါမးရှး ၁၉သီဂီၤခီ လၢနီၢ်ဂံၢ်(၂)တိၤအဖီခိၣ်၀ံၤ ကီၢ်ပယီၤ ထံကီၢ်ၦၤဟ့ၣ် ကူၣ်ဟ့ၣ်ဖးတၢ် ဒီၣ်အီၣ်ဆါစူၣ်ကၠံၣ်ဒီး ကီၢ်ကၠီၣ်တဲၣ်ကိတိာ်ခိၣ်ကျၢၢ် ပရၣ်ယိၣ်ခၠၣ်အိၣ်ခၠၣ်သ့ၣ်တဖၣ် ဟဲထီၣ်၀ဲဖဲတၢ်ရွဲၣ်တၢ်ကျဲၤန့ၣ်လီၤႉ ဘၣ်ဆၣ်တိၤ၀ဲန့ၣ်တုၤအခဲအံၤ တၢ်တသူအီၤ ဒံးဘၣ်အဂ့ၢ်သ့ၣ်ညါဘၣ်လီၤ.