Home တၢ်ကစီၣ် (၇)ဘျီတဘျီ ကညီ,ဖျိၤ လံာ်လဲၢ်ဒီး တၢ်ဆဲးတၢ်လၤ တၢ်သိၣ်လိတၢ်ပျၢ်ကၠိ ၦၤနီၢ်ဂံၢ်လၢအကထိဘျဲၣ်လဲၤထီၣ်

(၇)ဘျီတဘျီ ကညီ,ဖျိၤ လံာ်လဲၢ်ဒီး တၢ်ဆဲးတၢ်လၤ တၢ်သိၣ်လိတၢ်ပျၢ်ကၠိ ၦၤနီၢ်ဂံၢ်လၢအကထိဘျဲၣ်လဲၤထီၣ်

269
0

လါအ့ဖြ့ၣ် ၈သီ, ၂၀၁၉နံၣ်ႇစီၤရှါ

ကညီကီၢ်စဲၣ်ႇ ကၠၤအ့ဆ့ၣ်ကၠံကီၢ်ဆၣ်ႇ ၀ီၢ်ရီဟီၣ်က၀ီၤ ဆ့ၤပၠ့သ၀ီ(ဆင်ပြေး)အပူၤ ဖဲလါအ့ဖြ့ၣ် ၇ သီတုၤ ၈သီအနံၤ တၢ်မၤ၀ဲတၢ်ပျၢ်က့ၤ ကညီ=ဖျိၤလံာ်လဲၢ်ဒီး တၢ်ဆဲးတၢ်လၤမူးတၢ်ရဲၣ်တၢ်ကျဲၤအပူၤ ၦၤနီၣ်ဂံၢ်လၢအကထိတဖၣ် ဟဲထီၣ်၀ဲန့ၣ်လီၤ.

၀ီၢ်ရီဟီၣ်က၀ီၤ ကညီလံာ်လဲၢ်ဒီးတၢ်ဆဲးတၢ်လၤကမံးတံာ်တီခိၣ်ရိၣ်မဲ၀ဲဒီး တနံၣ်အံၤတၢ်သိၣ်လိပျၢ်မူးအပူၤ သရိာ်၀ါဒီးကၠၤအ့ဆ့ၣ်ကၠံကီၢ်ဆၣ်ခံဘ့ၣ်အပူၤ သ၀ီခဲလၢာ် ၄၄ ဖျၢၣ်ဘျဲၣ်ႇၦၤကညီနီၣ်ဂံၢ် ၂ႇ၅၃၃ ဂၤ ပာ်ဃုာ်၀ဲလၢလံာ်လဲၢ်ဒီးတၢ်ဆဲးတၢ်လၤတၢ်ပြၢသ့ၣ်တဖၣ်အပူၤန့ၣ်လီၤ.

တၢ်သိၣ်လိမူဒါခိၣ် စီၤဆၣ်ဂ့ၤသဘျ့စံး၀ဲ“ပ၀ဲပၦၤကညီဖိတဖၣ်အံၤ စိၤလၢကဟဲန့ၣ် သုပတအိၣ်ဘၣ်လၢတၢ်ကွၢ်ကီအလီၢ်ဘၣ်အဂီၢ် ပပၢၤဃာ်က့ၤလုၢ်လၢ်တၢ်ဆဲးတၢ်လၤတဖၣ်ကသ့အဂီၢ်ႇ သးကအိၣ်လၢကဘၣ်ပၢၤဃာ်က့ၤအီၤအဂီၢ်ႇ ဒီး ကသ့ၣ်ညါလံာ်လဲၢ်ဒီးတၢ်ဆဲးတၢ်လၤတဖၣ်အလုၢ်အၦ့ၤတဖၣ်အဂီၢ် ပအိးထီၣ်၀ဲတၢ်သိၣ်လိအံၤလီၤ”အဂ့ၢ် စံး၀ဲန့ၣ်လီၤႉ

တၢ်သိၣ်လိ၀ဲအံၤစးထီၣ်လၢ လါအ့ဖြ့ၣ် ၇သီအနံၤဒီး အိၣ်ဒီးတၢ်ဒိးစဲးတဖၣ် ဒ်အမ့ၢ် လံာ်ကညီစှီၤဒီးကညီဖျိၤတဖၣ်ႇ တၢ်ဘၣ်ဖးလံာ်တဖၣ်ႇတၢ်ဘၣ် တဲပြၢ၀ဲတၢ်ဂဲၤပူတဖၣ်အမဲာ်ညါ မုၢ်နၤခီတၢ်ရဲၣ်တၢ်ကျဲၤအိၣ်ဃုာ်ဒီး တၢ်ဂဲၤကလံၣ် ဒိ(၁၃)ကရူၢ် တၢ်ပြၢသ့ၣ်တဖၣ်န့ၣ်လီၤ.

တၢ်ပြၢသ့ၣ်တဖၣ်တၢ်ဟ့ၣ်လီၤကဒါက့ၤ၀ဲခိၣ်ဖး လၢ ၈ သီဟါလီၤခီကတီၢ်ဒီး ဒိတၢ်ဂဲၤကလံၣ်ခိၣ်ဖးတၢန့ၣ် ကွံကဆီစံၣ်ကၠိဖိဒိကရူၢ်ႇ ခိၣ်ဖးခံတခီ ဖါပြၣ်ကၠိဖိဒိကရူၢ်ႇ ခိၣ်ဖးသၢန့ၣ် တခိးသ၀ီဒိကရူၢ်သ့ၣ်တဖၣ်ဒိးန့ၢ်၀ဲန့ၣ်လီၤ.

ဖါပြၣ်သ၀ီဒိကရူၢ် နါစူစူစ့ၣ် လၢကဟဲထီၣ်၀ဲတၢတနံၣ်တဂၤစံးလၢ“ဒ်သိးကစိာ်ကဖီႇ ပၢၤဃာ်ႇပာ်ဖျါထီၣ်မၤထီၣ်ထီက့ၤ ကလုာ်လံာ်လဲၢ်ဒီး တၢ်ဆဲးတၢ်လၤသ့ၣ်တဖၣ်အဂီၢ် ဟဲပြၢ၀ဲတၢ်ပြၢဘျီ၀ဲအံၤလီၤ”အဂ့ၢ် စံး၀ဲန့ၣ်လီၤႉ

ကညီ,ဖျိၤ လံာ်လဲၢ်ဒီးတၢ်ဆဲးတၢ်လၤတၢ်သိၣ်လိ၀ဲအံၤ လၢ၀ီၢ်ရီကီၢ်ဆၣ်ဟီၣ်က၀ီၤအပူၤ စးထီၣ် ဖဲ ၂၀၁၃နံၣ် ဒီး တၢတဘျီန့ၣ် ဘၣ်တၢ်မၤအီၤလၢဃီကျါသ၀ီႇ ၂ ဘျီတဘျီလၢလိၣ်ရှါသ၀ီႇ ၃ဘျီတဘျီဒီး ၄ဘျီတဘျီလၢဖါပြၣ်သ၀ီႇ ၅ ဘျီတဘျီလၢဃီကျါသ၀ီဒီး ၆ဘျီတဘျီလၢကွံကဆီစံၣ်သ၀ီစုာ်စုာ်န့ၣ်လီၤ.