လါအ့ဖြ့ၣ် ၉ သီႇ ၂၀၁၉ နံၣ်ႇစီၤထိလ့
သၣ်တီၣ်ကၠံကီၢ်ဆၣ်ႇ တီပၠါကၠံသ၀ီအပူၤ တၢ်သ့တၢ်ဘၣ်တီၤထီကၠိလၢတၢ်ကသူၣ်ထီၣ်ကၠိတၢ်လီၢ်အံၤ ကီၢ်စဲၣ်ကိတိာ်က သုးန့ၢ်၀ဲ တၢ်လီၢ်အဂ့ၢ် တီပၠါကၠံသ၀ီ တၢ်ကွၢ်ထွဲကဟုကယာ်ထံကျိထံကွာ်ဒီးခိၣ်ဃၢၤန့ဆၢၣ် ကမံးတံာ်ခၢၣ်စး စီၤလးထူစံးဘၣ် ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ
တၢ်သ့တၢ်ဘၣ်တီၤထီကၠိလၢတၢ်ကသူၣ်ထီၣ်အီၤန့ၣ် မ့ၢ်၀ဲတၢ်လီၢ်အရ့ဒိၣ်တတီၤလၢတၢ်ဟံးန့ၢ်ထံ တၢ်ထီၣ်ထီလီၢ်တခါဒီး လီၢ်က၀ီၤဖိတဖၣ် တၢ်ပာ်ဖျါထီၣ်အဖီခိၣ် ဖဲလါအ့ဖြ့ၣ် ၈သီအနံၤကညီကီၢ်စဲၣ် ကိတိာ်ခိၣ်ကျၢၢ် နါခ့ၣ်ထွ့မၠ့းလဲၤလီၤဃိထံကွၢ်၀ဲဒီး ဆၢတဲာ်လီၤ၀ဲလၢကသုးကွံာ်တၢ်လီၢ်န့ၣ်လီၤႉ
“တနံၤအံၤ ကိတိာ်ခိၣ်ကျၢၢ်ဟဲတုၤလၢတီပၠါကၠံသ၀ီန့ၣ်လီၤႉ သ၀ီဖိတဖၣ်တဲလၢတၢ်လီၢ်၀ဲန့ၣ်မၤတဂ့ၤ မ့ၢ်၀ဲတၢ်ဟံး န့ၢ်ထံတၢ်လီၢ်တတီၤအဃိန့ၣ်လီၤႉ သ၀ီဖိတဖၣ်လဲၤဒုးနဲၣ်၀ဲတၢ်လီၢ်အသီတခါ ဒီး အ၀ဲသ့ၣ်ဆၢတဲာ်လီၤ၀ဲန့ၣ်လီၤႉ တၢ်လီၢ်လၢ တၢ်ကသုးကွံာ်အီၤန့ၣ်မ့ၢ်၀ဲတၢ်လီၤလၢ အလီၤဖုၣ်န့ၢ်တၢ်ဟံးန့ၢ်ထံတၢ်လီၢ်တခါန့ၣ်လီၤႉ တယံာ်လိာ်သးအါအါဒီး တၢ်လီၢ်တၢတတီၤန့ၣ်ဘၣ်ႉ”အဂ့ၢ် တၢ်ကွၢ်ထွဲ ကဟုကယာ်ထံကျိထံကွာ်ဒီးခိၣ်ဃၢၤန့ဆၢၣ်ကမံးတံာ်ခၢၣ်စး စီၤလးထူစံး၀ဲန့ၣ်လီၤ.
ခီဖျိလၢကိတိာ်ခိၣ်ကျၢၢ်သုးန့ၢ်အီၤတၢ်လီၢ် ဒ်အံၤအဖီခိၣ် တီပၠါကၠံသ၀ီဖိသ့ၣ်တဖၣ် ဘၣ်သူၣ်ဘၣ်သး၀ဲအသိး ၦၤသ၀ီဖိတဖၣ် မ့ၢ်ၦၤသးလီ၀ဲ တၢ်ကူၣ်ဘၣ်ကူၣ်သ့အဃိ လၢကထီဒါ၀ဲ တၢ်ကသူၣ်ထီၣ်ကၠိအံၤန့ၣ် တအိၣ်ဘၣ်ႇ သ၀ီဖိတဖၣ် မၢသုးကွံာ်၀ဲတၢ်လီၢ်အံၤ မ့ၢ်၀ဲတၢ်လီၢ်လၢတၢ်ဟံးန့ၢ် ထံအခီၣ်တဃာ်အဃိလီၤအဂ့ၢ် စီၤလးထူတဲအါထီၣ်၀ဲလီၤ.
တၢ်သ့တၢ်ဘၣ်တီၤထီကၠိအံၤလၢတၢ်ကသူၣ်ထီၣ်တၢ်လီၢ်အသီ၀ဲန့ၣ် တၢ်တိာ်ဃာ်အီၤဒီး တၢ်ကဃိထံကွၢ်ဟီၣ်ခိၣ်ကလုာ်မနုၤသ့ၣ်တဖၣ်မ့ၢ်၀ံၤ တၢ်ကစးထီၣ်တၢ်ဖံးတၢ်မၤဖဲ အတါခါ၀ံၤအလီၢ်ခံအဂ့ၢ် သၣ်တီၣ်ကၠံကီၢ်ဆၣ်ပတီၢ်ၦၤလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ
သၣ်တီၣ်ကၠံကီၢ်ဆၣ်ႇတီပၠါကၠံသ၀ီအံၤ ဘၣ်တၢ်စးထီၣ်သူၣ်ထီၣ်အီၤ လၢအပူၤကွံာ် ၂၀၀နံၣ်လံၤလံၤန့ၣ်လီၤႉ ခီဖျိ တၢ်ဒုးအိၣ်ထီၣ်၀ဲသၣ်ဒီၣ်ကၠံ၀့ၢ်ႇဘယ့ၣ်နီၣ်သုးတး၀့ၢ်တဖၣ်အဃီ ဘၣ်ဟ့ၣ်လီၤ၀ဲဟီၣ်ခိၣ်လီၢ်တဖၣ်ဒီး ကတီၢ်အံၤ သ၀ီအံၤ ၦၤနီၣ်ဂံၢ်အိၣ်(၈၀၀ႇ ဟံၣ်ခိၣ်(၁၈၀)ဘျဲၣ်န့ၣ်လီၤႉ သၣ်တီၣ်ကၠံကီၢ်ဆၣ်သ၀ီသ့ၣ်တဖၣ်န့ၣ် အိၣ်လၢကစၢၢ်ကလိကျါအဃိ တၢ်ခူၣ်၀ဲထံပူၤႇ ထံကမါပူၤသ့ၣ်တဖၣ်ကီခဲဃိ တၢ်ဟံးန့ၢ်သူ၀ဲထံလၢကစၢၢ်ခိၣ်န့ၣ်လီၤႉ
