Home တၢ်ကစီၣ် တၢ်ကသုးကံွာ် သုးခိၣ်ကျၢၢ်အီၣ်ဆါ တၢ်ဂီၤစိးပျၤအဂီၢ် ကဆဲးဂုာ်ကျဲးစၢး၀ဲအဂ့ၢ် ကရ့ၣ်နံၣ်သးစၢ်စံး၀ဲ

တၢ်ကသုးကံွာ် သုးခိၣ်ကျၢၢ်အီၣ်ဆါ တၢ်ဂီၤစိးပျၤအဂီၢ် ကဆဲးဂုာ်ကျဲးစၢး၀ဲအဂ့ၢ် ကရ့ၣ်နံၣ်သးစၢ်စံး၀ဲ

230
0

လါမ့ၤ ၁၄ သီ ႇ၂၀၁၉နံၣ် ႇစးအဲၣ်စူူ

သုးခိၣ်ကျၢၢ်အီၣ််ဆါတၢ်ဂီၤစိးပျၤ လၢအအိၣ်ဖဲ ကယါကီၢ်စဲၣ် ႇလွဲၣ်ကီၣ်၀့ၢ် ကၣ်ဒၣ်ဟ့ၣ်၀ိၣ်ဖီကရၢၢ်အပူၤအံၤ တၢ်ကသုးကွံာ်အီၤအဂီၢ် ကဆဲးဂုာ်ကျဲးစၢးမၤအီၤအဂ့ၢ် ကရ့ၣ်နံၣ်သးစၢ်ကရူၢ် စံးလီၤ၀ဲဒၣ် ဖဲလါမ့ၤ ၁၄သီအနံၤ ဖဲကရ့ၣ်နံၣ်သးစၢ်ကရူၢ်ဒီး ကီၢ်စဲၣ်ပဒိၣ် တၢ်ထံၣ်လိာ် ထိၣ်ဃူတဲသကိးဘၣ်ဃး သုးခိၣ်ကျၢၢ်အီၣ်ဆါတၢ်ဂီၤစိးပျၤ တၢ်အိၣ်ဖှိၣ်ဖဲ ကီၢ်စဲၣ်ပဒိၣ်အရူပူၤအံၤ ဟးဂီၤကံွာ်အလီၢ်ခံန့ၣ်လီၤႉ
ကရ့ၣ်နံၣ်သးစၢ်ကရူၢ် ဒံဒံၣ်(ကိး)စ့ၣ်မိစံး၀ဲလၢ “ သုးခိၣ်ကျၢၢ်အီၣ်ဆါ တၢ်ဂီၤစိးပျၤ ကသုးကံွာ်အသးအဂီၢ် ပကဆဲးဟူးဂဲၤ ကျဲလၢအသီတဘိန့ၣ်လီၤႉ”အဂ့ၢ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

လၢတၢ်တဲသကိးဘှါရှဲ၀ဲတၢ်ကသုးကွံာ် သုးခိၣ်ကျၢၢ်တၢ်ဂီၤစိးပျၤအံၤ တၢ်အိးထီၣ်မူးတၢ်ရဲၣ်တၢ်ကျဲၤအပူၤ ကီၢ်စဲၣ်ကိတိာ်ခိၣ်ကျၢၢ် အူအဲးလ်ဖီရှိၤစံးလီၤ၀ဲဒၣ်လၢ သုးခိၣ်တၢ်ဂီၤစိးပျၤအံၤ လ့ၤတက့ၤ တသုးကွံာ်၀ဲဘၣ်အဃိ ကရ့ၣ်နံၣ်သးစၢ်သ့ၣ်တဖၣ်စံးက့ၤ၀ဲ လၢကဘၣ်ဆဲးတဲသကိးဆူညါအဂီၢ်တအိၣ်လၢၤဘၣ်ဒီး ပာ်ပတုာ်ကွံာ်တၢ်တဲသကိး၀ံၤ ဟးထီၣ်ကွံာ်၀ဲဒၣ်လၢတၢ်အိၣ်ဖှိၣ်အပူၤန့ၣ်လီၤ.

ကီၢ်စဲၣ် ကိတိာ်ခိၣ်ကျၢၢ် အူအဲးလ်ဖီရှိၤ ကတိၤလီၤ၀ဲဖဲ မူးတၢ်အိးထီၣ်အပူၤအကတီၢ် စံး၀ဲလၢ “ပ၀ဲကယါကီၢ်စဲၣ်ပဒိၣ်တကပၤ ဘၣ်ဃးဒီးသုးခိၣ်ကျၢၢ်တၢ်ဂီၤစိးပျၤအံၤ ပတဲသကိးအီၤခံခီခံကပၤ သနာ်က့ၤ တဘၣ်ဘျီးဘၣ်ဒါဘၣ်န့ၣ်လီၤႉ အဃိ ကယါကီၢ်စဲၣ်ကီၢ် ပဒိၣ်တကပၤ ဘၣ်ဃးသုးခိၣ်ကျၢၢ်တၢ်ဂီၤစိးပျၤအံၤ ပတသုးအီၤဘၣ်အဂ့ၢ် အဲၣ်ဒိးဒုးသ့ၣ်ညါပာ်ဖျါထီၣ်၀ဲလီၤ” အဂ့ၢ် စံးလီၤ၀ဲဒၣ်န့ၣ်လီၤ.

လၢန့ၢ်အမဲာ်ညါ ကီၢ်စဲၣ်ပဒိၣ်တကပၤ ကဘၣ်ပၢၤဃာ်၀ဲသုးခိၣ်ကျၢၢ်အီၣ်ဆါ အမုၢ်နံၤဒိၣ်နံၤထီတဖၣ်အဂီၢ် မူဒါအိၣ်အဃိ ကတီၢ်အံၤ ကယါကီၢ်စဲၣ် ႇလွဲၣ်ကီၣ်၀့ၢ် ကၣ်ဒၣ်ဟ့ၣ်၀ိၣ်ဖီကျီးအပူၤ သုးခိၣ်ကျၢၢ်တၢ်ဂီၤစိးပျၤအံၤ ကဘၣ်ကွၢ်ထွဲကဟုကယာ်အီၤအဂ့ၢ် ကိတိာ်ခိၣ်ကျၢၢ်တဲအါထီၣ်၀ဲဖဲတၢ်အိးထီၣ်မူးအပူၤန့ၣ်လီၤ.

လၢတၢ်ဘှဲရှဲထိၣ်ဃူထိၣ်ဖိးတဲသကိး တၢ်အိၣ်ဖှိၣ်ဟးဂီၤကံွာ်၀ဲ၀ံၤ က&့ၣ်နံၣ်သးစၢ်ဂံၢ်ဘါကရူၢ် ထုးထီၣ်၀ဲလံာ်တၢ်ပာ်ဖျါတဘ့ၣ်ဒီး စံး၀ဲလၢ စးထီၣ်မုၢ်နံၤအ၀ဲအံၤ တၢ်မၤဟးဂီၤကံွာ်၀ဲ ကရ့ၣ်နံၣ်သးစၢ်ဂံၢ်ဘါကရူၢ် တၢ်ပာ်ဖျါထီၣ်တၢ်ဘၣ်သးကမံးတံာ်လံဒီး မ့ၢ်ဘၣ်ထဲဒွီး တၢ်ဂီၤစိးပျၤအံၤ တၢ်မ့ၢ်ကဲထီၣ်တမံၤလၢ်လၢ်တခီန့ၣ် တဟံးမူဒါလၢၤဘၣ်အဂ့ၢ်ပာ်ဖျါဃာ်၀ဲန့ၣ်လီၤ.

တကးဘၣ်အမဲာ်ညါ တၢ်ကဲထီၣ်သးဒ်အံၤအဖီခိၣ် ကီၢ်စၢဖှိၣ် ႇကီၢ်စဲၣ်ပဒိၣ်ဒီးပၣ်တံၣ်လ ၢအနၢၤတၢ်ဖးသ့ၣ်တဖၣ်တပာ်ကဲတၢ်လၢကမျၢၢ်သ့ၣ်တဖၣ် တၢ်လိၣ်ဘၣ်အဂ့ၢ် ကရ့ၣ်နံၣ်သးစၢ်ဂံၢ်ဘါကရူၢ်တဖၣ် ပာ်ပနီၣ်ဃၣ်၀ဲဒ်န့ၣ်လီၤ.

တၢ်ထိၣ်ဃူထိၣ်ဖိး တၢ်အိၣ်ဖှိၣ်လၢအဟးဂီၤကွံာ်၀ဲန့ၣ် ကီၢ်စဲၣ်ပဒိၣ် ကိတိာ်ခိၣ်ကျၢၢ် အူအဲးလ်ဖီရှိၤဒီး ကီၢ်ဆၣ်ပဒိၣ်ကိတိာ်တဖၣ်ႇတၢ်ဂီၤစိးပျၤကကဲထီၣ်အဂီၢ်ကမံးတံာ်တဖၣ် ႇကရ့ၣ်နံၣ်သးစၢ်ဂံၢ်ဘါကရူၢ်ကမံးတံာ် ဒီးၦၤဘှဲရှဲတၢ်ကမံးတံာ်ခၢၣ်စးတဖၣ် ဟဲထီၣ်၀ဲန့ၣ်လီၤႉ