Home တၢ်ကစီၣ် သးစၢ်ကြၢးဟးဆှဲး၀ဲကလုာ်တၢ်အိၣ်ဆၢထၢၣ် တၢ်ထံၣ်လၢတကပၤဒ့အဂ့ၢ် (ခ့ၣ်အဲၣ်ယူၣ်)ဆီၣ်သခူ

သးစၢ်ကြၢးဟးဆှဲး၀ဲကလုာ်တၢ်အိၣ်ဆၢထၢၣ် တၢ်ထံၣ်လၢတကပၤဒ့အဂ့ၢ် (ခ့ၣ်အဲၣ်ယူၣ်)ဆီၣ်သခူ

43
0

လါမ့ၤ ၂၄ သီႇ၂၀၁၉နံၣ်ႇစီၤမၠၣ်အူသၣ်

ကီၢ်တဘ့ၣ်လၢ ကလုာ်ဒူၣ်တဖၣ်အိၣ်ဆိး၀ဲအါဖုအံၤအပူၤ ကညီသးစၢ်တဖၣ်ကြၢး ဟးဆှဲး၀ဲတၢ်သူၣ်ထီၣ်က လုာ်လၢတကပၤဒ့အံၤအဂ့ၢ် ခ့ၣ်အဲၣ်ယူၣ် ကညီဒီကလုာ် စၢဖှိၣ်ကရၢ နဲၣ်ရွဲၣ်သဃဲၤ (၂) ပဒိၣ်စီၤလၣ်ထိ ဆီၣ်သခူထီၣ်၀ဲဖဲ တၢ်မၤလၤကပီၤ၀ဲ အနံၣ် ၃၀ၦဲၤထီၣ် ကညီသးစၢ်အမုၢ်နံၤ ဖဲ ဒူပျာ်ယာ်ကီၢ်ရ့ၣ်ႇ ၀ီၢ်ရီကီၢ်ဆၣ်ဘျီ အပူၤဖဲလါမ့ၤ၂၃သီအနံၤ တတၢ်ရဲၣ်တၢ်ကျဲၤအပူၤန့ၣ်လီၤႉ

ကညီသးစၢ်သ့ၣ်တဖၣ် လၢအၦၤကလုာ်အဂီၢ်မ့ၢ်ဂ့ၤႇ ထံကီၢ်အဂီၢ်မ့ၢ်ဂ့ၤ ကဘၣ်မၤဖိးမံလိာ်အသးဒီး ကလုာ်ဒူၣ်အတၢ်အိၣ်သး လၢတၢ်တဒ်သိးလိာ်သးဘၣ်ဒီး လၢတၢ်သူၣ်ထီၣ်ထံကီၢ်အဂီၢ်သုတလဲၤအီၤတကပၤဒ့ဘၣ်ဒီး ဟးဆှဲးဘၣ်အီၤ အဂ့ၢ်ပဒိၣ်စီၤလၣ်ထိစံး၀ဲန့ၣ်လီၤႉ

“လၢတၢ်ဃ့ထီၣ်တလိၣ်ဘၣ်ကလုာ်တၢ်သဘံၣ်သဘုၣ်ဘၣ်န့ၣ် အိၣ်စ့ၢ်ကီး ဒီးတၢ်အခီၣ်တဃာ်လၢတဘၣ်လဲၤတကပၤဒ့လၢတၢ်သူၣ်ထီၣ်ကလုာ်ဂ့ၢ်၀ီဘၣ်ႉ တၢ်မ့ၢ်တသူၣ်ထီၣ်စၢၤသွဲၣ်သီ သးစၢ်သ့ၣ်တဖၣ်ဘၣ်န့ၣ် ကလုာ်အသုးသ့ၣ် တၢ်အိၣ်ဖျါလၢအမ့ၢ်လံာ်လဲၢ်ႇကျိာ်ႇတၢ်ဆဲးတၢ်လၤတဖၣ်ႇလုၢ်လၢ်သ့ၣ်တဖၣ် ကဟါမၢ်န့ၣ်လီၤႉ သးစၢ်ခိၣ်နၢ်တဖၣ် ကနၢ်ပၢၢ်လိာ်သးႇ ပာ်ကဲလိာ်သးကဒဲကဒဲ၀ံၤ ကသူၣ်ထီၣ်သကိးႇလဲၤဃူဃူဆူဖဲၣ်ဒရဲၣ်ကီၢ်စၢဖှိၣ်န့ၣ်လီၤ ”အဂ့ၢ် ပဒိၣ်စီၤလၣ်ထိ စံး၀ဲန့ၣ်လီၤႉ

နံၣ် (၃၀) ၦဲၤထီၣ် ကညီသးစၢ်ကရၢ အမုၢ်နံၤတၢ်ရဲၣ်တၢ်ကျဲၤဘျီ၀ဲန့ၣ် ကညီသးစၢ်လၢ(ခ့ၣ်အဲၣ်ယူၣ်)ကီၢ်ရ့ၣ် ၇ဘ့ၣ်အပူၤ ဒီးသးစၢ်ခိၣ်နၢ်လၢတၢ်လီၢ်အါတီၤခၢၣ်စးခဲလၢာ် တကထိဃၣ်ဃၣ်ဟဲထီၣ်၀ဲန့ၣ်လီၤႉ မူးတၢ်ရဲၣ်တၢ်ကျဲၤအပူၤ တၢ်ဒုးနဲၣ်ပာ်လီၤ၀ဲ ကညီသးစၢ်ကရၢ တၢ်စံၣ်စိၤတဲစိၤ တၢ်ကွၢ်ကီလီၢ်ႇ ကညီလံာ်လဲၢ်ဒီးတၢ်ဆဲးတၢ်လၤ တၢ်စံၣ်စိၤတဲစိၤ တၢ်ကွၢ်ကီလီၢ်ဒီး (ခ့ၣ်အဲၣ်ယူၣ်) တၢ်မုာ်တၢ်ခုၣ်တၢ်လဲၤကျဲ တၢ်ကွၢ်ကီလီၢ်တဖၣ်န့ၣ်လီၤႉ

တလၢၤသးစၢ်တဖၣ်ကရူၢ် နဲၣ်ရွဲၣ်(၁) မ့စၣ်နံၣ်အူစံး၀ဲ“ပမ့ၢ်တၢ်ဒ်သိးသိး အိၣ်လၢတၢ်လီၢ်တခါဃီဒီး ပတနီၤဖးတၢ်အဒူၣ်အဆၢဘၣ်ဒီး ဟဲထီၣ်၀ဲတၢ် ရဲၣ်တၢ်ကျဲၤအံၤန့ၣ်လီၤႉ လၢပကလုာ်ဒူၣ်အဘၢၣ်စၢၤ တၢ်ဘၣ်ဂံာ်ဂူာ်အိၣ်ခဲအံၤခဲအံၤလီၤႉ ထံၣ်အီၤဒ်သိးတၢ်ဟ့ၣ်တခါလၢအတဂ့ၤဘၣ်န့ၣ်လီၤႉ သုပတဟံး ဖီၣ်ထီၣ်တၢ်ဟ့ၣ်သါလၢအတဂ့ၤတဖၣ်အံၤတဂ့ၤႇ ပကဟံးန့ၢ်တၢ်ဟ့ၣ်သါလၢအဂ့ၤတဖၣ်ဒီး ပာ်ကဲလိာ်သးကဒဲကဒဲလိၣ်၀ဲလီၤ”အဂ့ၢ် စံး၀ဲန့ၣ်လီၤႉ

တၢ်ရဲၣ်တၢ်ကျဲၤ၀ဲန့ၣ်အပူၤ ၦၤပၢၤလီၢ်ဆ့ၣ်နီၤ ကညီသးစၢ်ကရၢၦၤပၢၤလီၢ်ဆ့ၣ်နီၤစီၤလၢၢ်နၢၤ အိးထီၣ်၀ဲတၢ်ရဲၣ်တၢ်ကျဲၤ လၢတၢ်ကတိၤ အိးထီၣ်ႇ(KOA-Karen Organization of America)ကရူၢ်ႇ (SYCB-Students and Youth Congress of Burma)ကရူၢ်လံာ်ဟ့ၣ်ယုၢ်လၢအဆှၢဃီၤ၀ဲတဖၣ် တၢ်ပာ်ဖျါထီၣ်အီၤ၀ံၤ တၢ်ဟ့ၣ်လီၤက့ၤ၀ဲတၢ်ပြၢခိၣ်ဖးတဖၣ်အဂ့ၢ်န့ၣ်လီၤႉ

ကညီသးစၢ်ကရၢ KYOအံၤ တၢ်ဒုးအိၣ်ထီၣ်အီၤလၢ ၁၉၄၆နံၣ်အပူၤ ဘၣ်ဆၣ် ခီဖျိခိၣ်နၢ်တဖၣ်တၢ်ထံၣ်တလီၤပလိာ်သးဘၣ်အဖီခိၣ် တၢ်ဟူးတၢ်ဂဲၤတဖၣ် ဘၣ်ပတုာ်ကွံာ်အသးလၢ စှၤကိာ်နံၣ်၀ံၤအလီၢ်ခံဒီး တၢ်က့ၤဒုးအိၣ်ထီၣ်ကဒါက့ၤအီၤဖဲ ခ့ၣ်အဲၣ်ယူၣ် ၀ဲၤလီၢ်ခိၣ်သ့ၣ်လီၢ်လံၤ မၤနၢၤပျီတၢ်လီၢ် ဖဲ ၁၉၈၉နံၣ်ႇလါမ့ၤ၂၃သီအနံၤန့ၣ်လီၤႉ