Home တၢ်ကစီၣ် ၦၤအိၣ်လၢသုး အဟီၣ်ခိၣ်လီၢ်တဖၣ် ဃ့ထီၣ်၀ဲ လၢကဒိးန့ၢ်ဘၣ် တၢ်ခွဲးတၢ်ယာ်တုၤသိး

ၦၤအိၣ်လၢသုး အဟီၣ်ခိၣ်လီၢ်တဖၣ် ဃ့ထီၣ်၀ဲ လၢကဒိးန့ၢ်ဘၣ် တၢ်ခွဲးတၢ်ယာ်တုၤသိး

61
0

လါမ့ၤ ၁၇သီႇ၂၀၁၉ နံၣ်ႇခ့ၣ်အဲးစံၣ်

ကညီကီၢ်စဲၣ်ကၠၤအ့ဆ့ၣ်ကၠံကီၢ်ဆၣ် ဃိၣ်သၢဖျၢၣ်၀့ၢ်ပူၤ ၦၤလၢအလဲၤအိၣ်လၢကီၢ်ပဒိၣ်အသုးမုၢ်ဒိၣ် အဟီၣ်ခိၣ်လီၢ်သ့ၣ်တဖၣ် လၢအ၀ဲသ့ၣ်အဂီၢ် ဆၢမုၢ်လၢ်၀ဲလၢ ကဒိးန့ၢ်ဘၣ် ဟီၣ်ခိၣ်အလံာ်အုၣ်သး (၁၀၅)အံၤ အဂ့ၢ် ဖဲလါမ့ၤ ၁၃သီအနံၤ မၤ၀ဲ တၢ်မၤရှဲလဲ ၦၤကွဲးတၢ်ကစီၣ်ဖိအမူးတခါဒီး ဃ့ထီၣ်၀ဲလၢတၢ်သးကညီၤ အပူၤန့ၣ်လီၤ.

သုးကလၢၤဟီၣ်ခိၣ်လီၢ်လၢ အလဲၢ်အိၣ် ၃၀ႉ၃၀၀အပူၤအံၤ ဟံၣ်ခိၣ်အိၣ်၀ဲ ၁၁၂ဖျၢၣ်ႇ ၦၤနီၣ်ဂံၢ် ၅၀၀ ဂၤ ဃၣ်ဃၣ်အိၣ်ဆိးန့ၣ်လီၤႉ လၢအ၀ဲသ့ၣ်အကျါတနီၤန့ၣ် ဒိးန့ၢ်ဘၣ်၀ဲ ဟီၣ်ခိၣ်လံာ်အုၣ်သး (၁၀၅)အံၤလံဘၣ်ဆၣ် အါဒၣ်တၢ်တက့ၢ်န့ၣ် တဒိးန့ၢ်ဘၣ်ဒံးဘၣ် အဖီခိၣ် ဒ်သိးကဒိးန့ၢ်ဘၣ်၀ဲ ဟီၣ်ခိၣ်ဟီၣ်ခိၣ်လံာ်အုၣ်သး(၁၀၅)အံၤ ကိးဂၤဒဲးအဂီၢ် ဆၢမုၢ်လၢ်၀ဲလၢတၢ်ကတီၣ်ဖျါထီၣ်န့ၢ် အ၀ဲသ့ၣ်ဆူကီၢ်ပဒိၣ်ဘၣ်မူဘၣ်ဒါတဖၣ်အိၣ်အဂ့ၢ် ဃ့ထီၣ်၀ဲဖဲ တၢ်မၤရှဲၦၤကွဲးတၢ်ကစီၣ်ဖိအမူ ဖဲဃိၣ်သၢဖျၢၣ်ႇ ဒၤမၣ်ဟ့ၣ်၀ိၣ်သီခါဖၠၣ်အကတီၢ် ၦၤတီခိၣ်ရိၣ်မဲတၢ်အူစဲယူၣ်စံးဘၣ် ခ့ၣ်အဲးစံၣ်=ကညီတၢ်ကစီၣ်န့ၣ်လီၤႉ

“ၦၤလိၣ်ဘၣ်၀ဲလၢ ဟီၣ်ခိၣ်လံာ်အုၣ်သး ၁၀၅ ကိးဂၤဒဲးလီၤႉ မ့ၢ်၀ဲၦၤလၢအိၣ်လၢသုးကလၢၤကရၢၢ်အချၢအဃိ အဲၣ်ဒိးအိၣ်၀ဲဒီး တၢ်အုၣ်ကီၤဒီးအိၣ်လၢတၢ်မုာ်တၢ်ခုၣ်အပူၤလီၤႉ ပတၢ်အိၣ်တၢ်ဆိးအလံာ်မ့ၢ်တအိၣ်ဘၣ်န့ၣ် လၢခံပကမၤဒ်လဲၣ် တသ့ၣ်ညါဘၣ်ႇပသးကိၢ်ဒိၣ်မး”အဂ့ၢ် အူစဲယူၣ်တဲ၀ဲလီၤ.

ၦၤလၢအဃ့ထီၣ်၀ဲဟီၣ်ခိၣ်လီၢ်လံာ်အုၣ်ကီၤတဖၣ် အိၣ်ဆိး၀ဲဖဲသုးကလၢၤ ဟီၣ်က၀ီၤဖဲန့ၣ်အိၣ်လၢ ၁၀နံၣ်တုၤ ၃၀နံၣ်လံဒီး လၢအပူၤကွံာ် ဃိၣ်သၢဖျၢၣ်၀့ၢ်အပူၤ တၢ်ဒုးတၢ်ယၤအိၣ်အကတီၢ် အ၀ဲသ့ၣ်ဒိးန့ၢ်ဘၣ်တၢ်ခွဲးတၢ်ယာ်လၢကအိၣ်ဆိးဖဲန့ၣ် န့ၣ်လီၤႉ လၢအအိၣ်ဆိး၀ဲဒ်န့ၣ်အဖီခိၣ် ကမၤထီဒါ၀ဲသုးတၢ်တၢ်ပၢတၢ်ပြးတအိၣ် နီတမံၤဘၣ်ဒီး ကတီၢ်အံၤမးဒ်သိးကန့ၢ် ဘၣ်လံာ်အုၣ်ကီၤအဂီၢ် ဃ့ထီၣ်၀ဲလၢတၢ်သးကညီၤအပူၤအဂ့ၢ် ၦၤအိၣ်ဆိးဖဲန့ၣ်တဖၣ်စံး၀ဲန့ၣ်လီၤ.

ဘၣ်ဃးတၢ်ဂ့ၢ်၀ဲန့ၣ်အဖီခိၣ် ၀့ၢ်ဃိၣ်သၢဖျၢၣ် စံာ်ၦဲၤသူၣ်ဖျးတၢ်ပၢတၢ်ပြးဒီးဟီၣ်ခိၣ်စရီ၀ဲၤကျိၤမူဒါခိၣ် အူမၠိ၀့စံး၀ဲ“ အ၀ဲသ့ၣ်အတၢ်လီၢ် အပူၤန့ၣ် သုးကလၢၤဟီၣ် ခိၣ်ပၣ်ဃုာ်၀ဲအ့ကၢၣ် ၃၀.၃၀၀န့ၣ်လီၤႉ အဃိ ကဟ့ၣ်လီၤ၀ဲတဟ့ၣ်လီၤ၀ဲန့ၣ် အိၣ်လၢသုးအစုပူၤလီၤႉ တၢ်အုၣ် ကီၤမ့ၢ်အိၣ်တမံၤမံၤမး ထုးထီၣ်န့ၢ်ဟီၣ်ခိၣ်စရီလံာ်အုၣ်သး ကဘူၣ်လီၤႉ သုးမ့ၢ်ဟ့ၣ်လီၤမး ပမၤန့ၢ်ကဘူၣ်လီၤႉ” အဂ့ၢ် စံးဘၣ် ခ့ၣ်အဲးစံၣ်=ကညီတၢ်ကစီၣ်န့ၣ်လီၤႉ

ဖဲအပူၤကွံာ်၂၀၁၂ နံၣ်န့ၣ် လၢသုးတးတကပၤ ဟ့ၣ်လီၤတၢ်ကလုၢ်လၢ ၦၤကမျၢၢ်တဖၣ် ကသုးကွံာ်အဟံၣ်ဒီး တအဲၣ်၀ဲလၢက သူၣ်ဘှီအါထီၣ် ဟံၣ်ဃီတဖၣ်လၢၤဘၣ်ဒီး ဟံၣ်တဖျၢၣ်န့ၣ် တလါ ဘၣ်ဟ့ၣ်လီၤ၀ဲလၢ စ့ယိၤ ၁၀၀ ဘးန့ၣ်လီၤႉ လၢတၢ်န့ၣ်အဃိ ကမျၢၢ်တဖၣ် ဃ့ထီၣ်၀ဲတၢ်သးကညီၤဆူ ကီၢ်စဲၣ်ပဒိၣ်အအိၣ်အဖီခိၣ် မုၢ်ထီၣ်ကလံၤထံးသုးကီၢ်ခီ သုးခိၣ်ကျၢၢ် တ့ၣ်မီၣ်၀့ ဟဲလီၤဃိထံ၀ဲတၢ်လီၢ်အ၀ဲန့ၣ်ဒီး နဲၣ်လီၤ၀ဲလၢတဘၣ်ဟံးန့ၢ်တၢ်အခိလၢၤဘၣ်အဂ့ၢ် သ့ၣ်ညါဘၣ်လၢၦၤလီၢ်က၀ီၤ ဖိဖဲန့ၣ်တဖၣ်အအိၣ်န့ၣ်လီၤ.

ဒၤမၣ်ဟ့ၣ်၀ိၣ်သီခါဖးဒိၣ် အူညၣ်နီဘၣ်သၣ်စံး၀ဲလၢ “လၢအပူၤကွံာ် ၁၃၄၉ နံၣ်ကတီၢ် ခ့ၣ်အဲၣ်ယူၣ်တၢ်ပၢအစိၤ ခ့ၣ်အဲၣ်ယူၣ် ၀ီၢ်ရီကီၢ် ဆၣ်ခိၣ် ပဒိၣ်စီၤမီၣ်တီဟ့ၣ်လီၤ၀ဲ တၢ်လီၢ်အံၤလၢတၢ်ဘူၣ်တၢ်ဘါဟီၣ်က၀ီၤအဂီၢ်လီၤႉ ဖဲ ၁၃၅၁ နံၣ်အပူၤ ကီၢ်ပယီၤသုး တဖၣ်တဲ၀ဲလၢအဲၣ်ဒိးဟဲအိၣ်လၢသီခါဖၠၣ်ကပၤလီၤႉ ၦၤအိၣ်ဖဲန့ၣ်တဖၣ် တၢ်ဟ့ၣ်အီၤတၢ်ပျဲလၢကအိၣ်လၢအပူၤကွံာ်လံႉ ဘၣ်တူၢ်တၢ်နးတၢ်ဖှီၣ်ဒ်သိးသိးလၢအနံၣ်၂၀ ဘျဲၣ်လံႉ အဲၣ်ဒိးတၢ်တုၤသိးထဲသိးလၢကမျၢၢ်ခဲလၢာ်အဂီၢ်လီၤ” အဂ့ၢ်စံး၀ဲဖဲ လါမ့ၤ ၁၄သီန့ၣ်လီၤႉ

ၦၤအိၣ်ဖဲဃိၣ်သၢဖျၢၣ် သုးမုၢ်ဒိၣ် သုးကလၢၤ ဟီၣ်ခိၣ်လီၢ်သ့ၣ်တဖၣ် ကတီၢ်အံၤ တၢ်မၢသုးကွံာ်သးတအိၣ်ဘၣ် ဘၣ်ဆၣ် ခီဖျိ ဟီၣ်ခိၣ်အလံာ်အုၣ်ကီၤတအိၣ်ဘၣ်အဃိ ဘၣ်ယိၣ်၀ဲဒၣ်လၢ မုၢ်တနံၤ ကဘၣ်သုးကွံာ်အဟံၣ်အဃီန့ၣ်လီၤႉ