ဒ်သိးကညီ၀ါတဖၣ် တၢ်ပာ်ဖှိၣ်မၤသကိးတၢ် ကအါထီၣ်အဂီၢ် တၢ်ဒုးအိၣ်ထီၣ် ကညီ၀ါသးစၢ်ကရၢ

လါယူၤ ၄ သီႇ ၂၀၁၉ နံၣ်ႇ နါ၀့ၣ်ဖၠိစၣ်

ဒ်သိးဒီး ကညီ၀ါတဖၣ် ဆဲးကျိးလိာ်အသး လၢတၢ်လီၢ်အါတီၤကန့ၢ်အဂီၢ်ဒီး လၢကညီ၀ါဂ့ၢ်၀ီတ ကပၤ ပာ်ဖှိၣ်မၤအီၤကန့ၢ်အဂီၢ် ပညိၣ်၀ဲဒီး တၢ်ဒုးအိၣ်ထီၣ်၀ဲ ကညီ၀ါသးစၢ်ကရၢ(Karenphyu Youth Organization-KPYO) ဖဲန့ၣ်ပၠံၣ်တီၣ်ကီၣ်ကးဟီၣ်က၀ီၤႇအီၣ်နဲခၠိၣ်သ၀ီအပူၤန့ၣ်လီၤႉ

ဖဲတလါအံၤ လါယူၤ ၂သီတုၤ ၃သီအနံၤ ကညီ၀ါသးစၢ်ခၢၣ်စး လၢသ၀ီအါဖျၢၣ် ပာ်ဖှိၣ်ထီၣ်သးအဂၤ (၆၀)ဘျဲၣ်အံၤ မၤ၀ဲတၢ်ထံၣ်လိာ်အသးတခါဖဲ အီၣ်နဲခၠိၣ်သ၀ီအပူၤဒီး ကွဲးပာ်လီၤ၀ဲကရၢကရိ တၢ်အိၣ်ဆၢထၢၣ်တဖၣ်ႇ သနူသ့ၣ်တဖၣ်ဒီး ပာ်ဂၢၢ်ပာ်ကျၢၤ၀ဲ၀ံၤ ဒုးအိၣ်ထီၣ်၀ဲ ကညီ၀ါသးစၢ်ကရၢ (KPYO)အံၤန့ၣ်လီၤႉ

စီၤသါတိအီၤ လၢဘၣ်တၢ်ဃုထၢထီၣ်အီၤ လၢကညီ၀ါသးစၢ်ကရၢခိၣ်တဂၤစံး၀ဲလၢ “ပ၀ဲကညီ၀ါသးစၢ်သ့ၣ်တဖၣ် အဲၣ်ဒိး မၤကလုာ်ဂ့ၢ်၀ီ အါန့ၢ်အံၤဒံးႇ အဃိပပာ်လီၤ၀ဲကရၢသနူကျိၤကျဲသ့ၣ်တဖၣ်၀ံၤ ပာ်ဂၢၢ်ပာ်ကျၢၤ၀ံၤမး ပဒုးအိၣ်ထီၣ်၀ဲ တၢ်ကရၢ ကရိန့ၣ်လီၤႉ လၢအပူၤကွံာ် ကညီ၀ါသးစၢ်ဘျးစဲအိၣ်ဘၣ်ဆၣ် တအိၣ်ဒီး သနူလီၤတံၢ်လီၤဆဲးဘၣ်အဃိ က့ၤဒုးအိၣ်ထီၣ်က့ၤ ကရူၢ်ဒ်အံၤန့ၣ်လီၤႉ”

လၢန့ၢ်အမဲာ်ညါ သးစၢ်ကရၢအ၀ံၤ တမ့ၢ်ထဲ ကညီ၀ါသးစၢ်ကဒဲကဒဲကဘျးစဲလိာ်အသးတခါဧိၤဘၣ်ဒီး လၢကလုာ်ဂ့ၢ်၀ီတကပၤ မူဒါလၢအလီၤဘၣ်အ၀ဲသ့ၣ်တဖၣ် ကနုာ်ပၣ်ဃုာ်အီၤ တၢ်ပညိၣ်အိၣ်၀ဲအဂ့ၢ် ကညီ၀ါၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ

လၢတၢ်ဒုးအိၣ်ထီၣ်၀ဲ တၢ်ကရၢကရိ၀ဲန့ၣ်ဒီး ဆီလီၤပာ်လီၤ၀ဲ ၦၤတီခိၣ်ရိၣ်မဲတၢ်ခိၣ်နၢ်တဖၣ် ဒ်အမ့ၢ် ကရၢခိၣ်ႇ ကရၢခိၣ်(၂), နဲၣ်ရွဲၣ်ႇ တၢ်ကရၢကရိ၀ဲၤကျိၤႇ တၢ်ရ့လိာ်မုာ်လိာ်၀ဲၤကျိၤ ဒီးခိၣ်ဃၢၤန့ဆၢၣ်ဘၣ်မူဘၣ်ဒါတဖၣ် ဃုထၢထီၣ်၀ဲန့ၣ်လီၤႉ
ကညီ၀ါကလုာ်ဒူၣ်အံၤန့ၣ် ကတီၢ်အံၤ လၢတၢ်ထုးဖျါထီၣ်ကလုာ် လံာ်လဲၢ်တၢ်ဆဲးတၢ်လၤတဖၣ်စှၤဒံး၀ဲဒီး ဒ်သိး တၢ်ကထုးဖျါအါထီၣ်ကန့ၢ်အဂီၢ် ကညီ၀ါဂ့ၢ်၀ီတၢ်မၤအဂၤတဖၣ် ဂုာ်ကျဲးစၢးမၤ၀ဲအဖၢမုၢ်ဒီး တၢ်ဒုးအိၣ်ထီၣ်၀ဲ တၢ်ကရၢကရိဒ်အံၤစ့ၢ်ကီး မ့ၢ်၀ဲ ကညီ၀ါဂ့ၢ်၀ီကမံးတံာ် တီခိၣ်ရိၣ်မဲ ဒုးအိၣ်ထီၣ်၀ဲလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ကညီ၀ါဂ့ၢ်၀ီကမံးတံာ် ၦၤပၢၤလီၢ်ဆ့ၣ်နီၤ စီၤစိနဲၣ်စံး၀ဲ“ကညီ၀ါဂ့ၢ်၀ီအဂီၢ် ကညီ၀ါကမံးတံာ်တဖု မၤအီၤတန့ၢ်ဘၣ်ႉ သးစၢ်ဂံၢ်ဘါန့ၣ် လိၣ်ဖးဒိၣ်ညါႇ သးစၢ်သ့ၣ်တဖၣ်မၤ၀ဲန့ၢ်အါႇ အဒိၣ်အအါဒ်သိးသးစၢ်သ့ၣ်တဖၣ်ကမၤအီၤအဂီၢ် သးကအိၣ်မၤအီၤအဂီၢ် ဒီးတၢ်ဘျးစဲကဂ့ၤထီၣ်အဂီၢ် မ့ၢ်တၢ်အိးထီၣ်န့ၢ်ကျဲ တဘိလီၤအဃိ မၢသးစၢ်သ့ၣ်တဖၣ် ဒုးအိၣ်ထီၣ်တၢ်ရၢကရိန့ၣ်လီၤ”အဂ့ၢ် စံး၀ဲန့ၣ်လီၤႉ

ကညီ၀ါသးစၢ်ကရၢ လၢတၢ်ဒုးအိၣ်ထီၣ်အီၤ၀ံၤ၀ဲအံၤ လၢတၢ်ကွဲးလီၤသနူဒီး တၢ်သူၣ်ထီၣ်ဆီလီၤတဖၣ်န့ၣ် ဘၣ်တၢ်မၤစၢၤသကိးအီၤ လၢကညီ၀ါကမံးတံာ်(KAC)ဒီး(Youth Circle)သ့ၣ်တဖၣ်အဂ့ၢ် သ့ၣ်ညါဘၣ်လီၤႉ

ကညီ၀ါသ့ၣ်တဖၣ်အံၤ အိၣ်ဆိး၀ဲအါဒၣ်တက့ၢ်လၢ န့ၣ်ပၠံၣ်တီၣ်ကီၣ်ကးဟီၣ်က၀ီၤအပူၤႇ ယိၤဒိၣ်ကီၢ်စဲၣ် ပ့ၤလီကီၢ်ဆၣ်ႇ မါတလ့ကီၢ်ခီႇ ကညီကီၢ်စဲၣ် သဲၣ်တီၣ်ကီၢ်ဆၣ်ဒီး ပကိကီၢ်ခီဒိၣ်သ့ၣ်တဖၣ်အပူၤန့ၣ်လီၤႉ ကညီ၀ါနီၢ်ဂံၢ်အံၤ အိၣ်အါန့ၢ် ၅ ကလးဘျဲၣ်အဂ့ၢ် သ့ၣ်ညါဘၣ် လၢကညီ၀ါဂ့ၢ်၀ီကမံးတံာ်အအိၣ်န့ၣ်လီၤႉ