လါယူၤ ၂၄ သီႇ ၂၀၁၉နံၣ်ႇ စီၤထိလ့
၀့ၢ်တကူၣ်ကီၢ်ခီဒိၣ် ကီၢ်ပဒိၣ်တီၤဖုၣ်ကၠိသ့ၣ်တဖၣ်အပူၤ ကၠိသရၣ်မၤစၢၤ(Teacher Assistant)ကၠိသရၣ်ႇ မုၣ် လၢအသိၣ်လိကညီလံာ် (၆၁ဂၤ) အံၤ ဒိးန့ၢ်ဘၣ်တၢ်ခွဲးတၢ်ယာ် လၢကထီၣ်ဘၣ်၀ဲကၠိသရၣ်တၢ်သိၣ်လိအဂ့ၢ် ကီၢ်ခီဒိၣ် ကညီလံာ်လဲၢ်ဒီးတၢ်ဆဲးတၢ်လၤကမံးတံာ် နဲၣ်ရွဲၣ်မါသါ၀့အူတဲဘၣ် ခ့ၣ်အဲးစံၣ် ကညီတၢ်ကစီၣ်န့ၣ်လီၤ.
“၀့ၢ်တကူၣ်ကီၢ်ခီဒိၣ် (TA)ကၠိသရၣ်ႇ မုၣ်လၢအသိၣ်လိကညီလံာ်အိၣ် (၆၁ဂၤ)အံၤ ထီၣ်ဘၣ် တီၤဖုၣ်ကၠိသရၣ်တၢ်သိၣ်လိလီၤႉ ၦၤကိးဆိလၢၦၤဖျိထီၣ်ဖၠၣ်စိမိၤတဖၣ်ႇ ထီၣ်တၢ်သိၣ်လိမ့ၢ်၀ံၤန့ၣ် သိၣ်လိတီၤဖုၣ်န့ၢ်လံႉ လၢလံာ်တၢ်ဒုးသ့ၣ်ညါအပူၤ တၢ်ပာ်ဂၢၢ်ပာ်ကျၢၤအီၤကန့ၢ်အဂီၢ် ကဘၣ်ထီၣ်တၢ်သိၣ်လိအံၤန့ၣ်လီၤႉ” အဂ့ၢ် မါသါ၀့အူသ့ၣ်ညါဘၣ်လီၤ.
ကၠိသရၣ်ႇ သရၣ်မုၣ် လၢအထီၣ်ဘၣ်တၢ်သိၣ်လိတဖၣ်အံၤ လၢထါတပ့ၣ်ကီၢ်ဆၣ် (၂၂ဂၤ), ဒဲၣ်အူကီၢ်ဆၣ် (၁၃ဂၤ), မီၣ်ဘံၣ်ကီၢ်ဆၣ်အပူၤ (၁၀ဂၤ), ကီၢ်မူကီၢ်ဆၣ်အပူၤ (၄ဂၤ), လဲကူႇ တိၣ်တ့ႇ ကိခၠဲၤကိကီၢ်ဆၣ် (၃ဂၤ), ရွ့ၣ်ပၠံၣ်သၣ်ကီၢ်ဆၣ် (၂ဂၤ)ဒီးအ့စ့ၣ်(နိၣ်တၢ်မျၢ်) ကီၢ်ဆၣ် (၁ဂၤ)န့ၣ်လီၤႉ
၀့ၢ်တကူၣ်ကလံၤထံးကီၢ်ရ့ၣ်ႇ ထီတထူၣ်ကီၢ်ဆၣ်ႇ တီၤခၢၣ်သးအဒ့ မဲၢ်ပလံၣ်ကၠိ ကညီလံာ်ကၠိသရၣ်မုၣ် နီၢ်ခၠဲၣ်ရံၣ်မိတဲ၀ဲ“စးထီၣ်၂၀၁၇နံၣ်ႇနိၣ်၀့ဘၢၣ်အပူၤ စးထီၣ်မၤ (TA)ကၠိသရၣ်မုၣ်န့ၣ်လီၤႇ တနံၣ်အံၤတၢ်သိၣ်လိနံၣ်အပူၤ လၢတၢ်အိးထီၣ်၀ဲကၠိသရၣ်တၢ်သိၣ်လိ ၃၈ ၀ီတ၀ီအံၤ ပၣ်ဃုာ်ဒီးယၤန့ၣ်လီၤႉ ကဘၣ်စး ထီၣ်အခါဖဲလဲၣ်ႇ တသ့ၣ်ညါဒံးဘၣ်ႉ ကီၢ်ခီလံာ်လဲၢ်တၢ်ဆဲးတၢ်လၤ သနာ်က့တဒုးသ့ၣ်ညါၦၤဒံးဘၣ်ႉ” အဂ့ၢ်စံး၀ဲန့ၣ်လီၤ.
၀့ၢ်တကူၣ်ကီၢ်ခီဒိၣ်ႇ ကီၢ်ပဒိၣ် ဂံၢ်ခီၣ်ထံးကၠိသ့ၣ်တဖၣ်အပူၤ ကၠိသရၣ်ႇသရၣ်မုၣ် လၢသိၣ်လိကညီလံာ်လဲၢ်တဖၣ်အံၤ ကီၢ်ခီလံာ်လဲၢ်ဒီးတၢ်ဆဲးတၢ်လၤကီၢ်ဆၣ်တဖၣ် တဲသကိး၀ဲဒီး ကူၣ်သ့၀ဲၤကျိၤ၀ံၤ ကီၢ်ပဒိၣ်တကပၤ ဟ့ၣ်လီၤ၀ဲတလါန့ၣ်သၢကလးကၠးန့ၣ်လီၤႉ ဖဲန့ၣ်၀ံၤအလီၢ်ခံ ကညီကၠိသရၣ်ႇ မုၣ်တဖၣ်အံၤ တၢ်ပာ်က့ၤအ၀ဲသ့ၣ် ဒ်(နေ့စားလေပး) တသီဂီၢ်အဘူးအလဲအသိးဒီး ကတီၢ်အံၤ တၢ်ကက့ၤဟ့ၣ်တၢ်ခွဲးတၢ်ယာ်လၢ ကထီၣ်၀ဲတီၤဖုၣ်ကၠိသရၣ်တၢ်သိၣ်လိဒ်အံၤအဂ့ၢ် သ့ၣ်ညါဘၣ်လီၤ.
