Home တၢ်ကစီၣ် ခ့ၣ်အဲၣ်ယူၣ်ဒီးလီၢ်က၀ီၤကမျၢၢ် ပာ်ဖှိၣ်ထီၣ်သး သူၣ်လီၤ၀ဲသ့ၣ်အထူၣ်(၂ႇ၀၀၀)ဘျဲၣ်

ခ့ၣ်အဲၣ်ယူၣ်ဒီးလီၢ်က၀ီၤကမျၢၢ် ပာ်ဖှိၣ်ထီၣ်သး သူၣ်လီၤ၀ဲသ့ၣ်အထူၣ်(၂ႇ၀၀၀)ဘျဲၣ်

316
0

လါယူၤလံ ၁ သီႇ ၂၀၁၉နံၣ်ႇ စးအဲၣ်စူ

လါယူၤ ၁သီအနံၤ လၢအလီၤဘၣ် ကီၢ်သူလ့ၤတၢ်သူၣ်သ့ၣ်အမုၢ်နံၤအံၤန့ၣ် ခ့ၣ်အဲၣ်ယူၣ် ကညီဒီကလုာ်စၢဖှိၣ်ကရၢ သုးက့(၇)ဘ့ၣ်အပူၤ လီၢ်က၀ီၤကမျၢၢ်ပာ်ဖှိၣ်ထီၣ်သးဒီး သူၣ်လီၤ၀ဲသ့ၣ်အထူၣ် (၂၀၀၀)ဘျဲၣ်ဖဲ ဖၣ်အၣ်ကီၢ်ရ့ၣ်ႇ တၢ်ကြဲၢ်ကီၢ်ဆၣ်ႇ ပံၣ်တခး သ၀ီအပူၤန့ၣ်လီၤ.

ခ့ၣ်အဲၣ်ယူၣ်လီၢ်ခၢၣ်သးသ့ၣ်ၦၢ်၀ဲၤကျိၤတကပၤတီခိၣ်ရိၣ်မဲ၀ဲဒီး ခ့ၣ်အဲၣ်ယူၣ် ဒူသထူၣ်ႇ ချၢၣ်လွံၢ်ထူၣ်ႇ ဘျံးဒ၀ဲၢ်ႇ မုၢ်တြီၢ်(ဖၣ်ပူၣ်), ဒူပျာ်ယာ်ဒီး ဖၣ်အၣ်ကီၢ်ရ့ၣ်(၇)ဘ့ၣ်တဖၣ်ဒီးလီၢ်က၀ီၤကမျၢၢ်သ့ၣ်တဖၣ်ပာ်ဖှိၣ်သူၣ်လီၤ၀ဲန့ၣ်လီၤ.

ခ့ၣ်အဲၣ်ယူၣ် လီၢ်ခၢၣ်သးသ့ၣ်ၦၢ်ခိၣ် ပဒိၣ်မါဘးထိတဲ၀ဲ“ကတီၢ်အံၤသ့ၣ်ၦၢ်တဖၣ်လီၤစှၤအါထီၣ်ဒီး တၢ်လီၢ်ကိးတီၤဒဲလၢတၢ်လုၢ်အီၣ်သးသမူအဂီၢ်ႇ န့ဆၢတၢ်ဘၣ်ဒိဘၣ်ထံးတဖၣ်ဒ်အမ့ၢ် တၢ်ယီၤခါထံကၤႇ တၢ်စူၤခါထံဒိၣ်၀ံၤ ဆၣ်ဖိကီၢ်ဖိလၢမၤဘၣ်ဒိၦၤကညီတဖၣ်ဟဲအါထီၣ် တၢ်မုၢ်တၢ်ဘိတဖၣ်တၢ်မၤ န့ၢ်အီၤစှၤလီၤအဃိ သ့ၣ်ၦၢ်န့ၣ်အရ့ဒိၣ်မးလီၤ”အဂ့ၢ် စံးဘၣ် ခ့ၣ်အဲးစံၣ် ကညီတၢ်ကစီၣ်န့ၣ်လီၤႉ

တၢ်သူၣ်သ့ၣ်တၢ်ရဲၣ်တၢ်ကျဲၤ၀ဲန့ၣ်အပူၤ ခ့ၣ်အဲၣ်ယူၣ်(လခသ)သ့ၣ်ၦၢ်ႇ ကီၢ်ရ့ၣ်ႇ ကီၢ်ဆၣ်တဖၣ်အပူၤ ၦၤဘၣ်မူဘၣ်ဒါတဖၣ်ႇ လီၢ်က၀ီၤကမျၢၢ်တဖၣ်ႇ ကၠိဖိႇ မုၣ်ခွါခဲလၢာ်(၃၀၀)ဃၣ်ဃၣ်ပၣ်ဃုာ်သူၣ်၀ဲသ့ၣ်(၂ႇ၀၀၀)ထူၣ်ဃၣ်ဃၣ် ဒ်အမ့ၢ် သ့ၣ်ပဟံၣ်ႇ ယူၣ်ကလ့ၣ် ဒီး သ့ၣ်အဂၤတဖၣ်န့ၣ်လီၤ.

ဖၣ်ပူၣ်ကီၢ်ရ့ၣ်ႇ လူၤသီကီၢ်ဆၣ် လီၢ်က၀ီၤဖိ စီၤတၢ်မုၢ်လၢ် စံး၀ဲ“ပသူၣ်သ့ၣ်ဒ်အံၤပမ့ၢ်လီၤဘှံးန့ၣ်ပဟံးန့ၢ်တၢ်အိၣ်ဘှံးလီၢ်သ့ႇ စၢၤသွဲၣ်လၢကဟဲလၢခံတဖၣ် ဟံးန့ၢ်၀ဲ တၢ်လဲၤခီဖျိလၢပအိၣ်သ့ႇ ပမ့ၢ်လဲၤလၢၦၢ်ပူၤန့ၣ် ပမၤ၀ဲတၢ်မၤနီၢ်သ့ႇ တၢ်န့ၣ်အဃိ စၢၤသွဲၣ်တဖၣ်သုတကူာ်သ့ၣ်လၢၤ ဘၣ်ဒီးသူအီၤလၢကန့ၢ်တၢ်ကဒုဒီးသူအီၤ လၢတၢ်လိၣ်အဖီခိၣ်”အဂ့ၢ် တဲ၀ဲန့ၣ်လီၤ.

ကတီၢ်အံၤ ကညီကီၢ်စဲၣ်အပူၤ တကးဘၣ် ကီၢ်ပယီၤဒီဘ့ၣ် တၢ်လီၢ်အါတီၤ တၢ်ထုးထီၣ်၀ဲ သ့ၣ်လၢအတဖိးသဲစးဘၣ်ဒီး လီၢ်က၀ီၤပူၤတၢ်ဖိတၢ်လံၤတဖၣ်ဟဲအါထီၣ်အဃိ သ့ၣ်ၦၢ်လီၤစှၤဟဲအါထီၣ်၀ဲန့ၣ်လီၤႉ သ့ၣ်ၦၢ်လၢကကၢၤဃာ်ထံတဖၣ် ဟဲစှၤလီၤအဃိ တၢ်လီၢ်အါတီၤသဂၢၢ်ဘၣ်ထံဒိၣ်လုၢ်ဘၢတၢ်ဒီး လၢအပူၤကွံာ်နံၣ်စ့ၢ်ကီး ကညီကီၢ်စဲၣ်အပူၤ သဂၢၢ်ဘၣ်ထံလုၢ်ဘၢတၢ်လၢတလၢကွံာ်တၢ်ပာ်ပနီၣ်အဖီခိၣ်န့ၣ်လီၤ.

ဖဲ ၂၀၁၆နံၣ် ခ့ၣ်အဲၣ်ယူၣ် (၁၅)ဘျီတဘျီ ခီကရဲးအပူၤ လါယူၤလံ တသီအနံၤန့ၣ် ဘၣ်တၢ်ဆၢတဲာ်လီၤအီၤလၢ ကီၢ်သူလ့ၤတၢ်သူၣ်သ့ၣ်အမုၢ်နံၤ ဒီး တၢ်ကက့ၤကတီၤကဒါက့ၤသ့ၣ်ၦၢ်ႇ လၢတၢ်ကဟုကယာ်သ့ၣ်ၦၢ်အပူၤ ကမျၢၢ်တဖၣ်ကပၣ်ဃုာ်အဂီၢ်ႇ သ့ၣ်ၦၢ်တၢ်ဘျၢလၢတၢ်ပာ်လီၤအီၤတဖၣ် တၢ်ပညိၣ်လၢကမျၢၢ်တဖၣ် ကသ့ၣ်ညါအီၤအမဲာ်ညါ ကညီဒီကလုာ် ကအဲၣ်ပာ်လုၢ်ပာ်ၦ့ၤ၀ဲသ့ၣ်ၦၢ်ဒီးတၢ်ကသ့ၣ်ညါအီၤလၢဟီၣ်ခိၣ်ဒီဘ့ၣ်အဂ့ၢ် တၢ်ပာ်လီၤ၀ဲတၢ်သူၣ်သ့ၣ်အမုၢ် နံၤန့ၣ်လီၤ.

ကီၢ်သူလ့ၤတၢ်သူၣ်သ့ၣ်အမုၢ်နံၤ၀ဲန့ၣ် တၢ်ဘၣ်ဘျုး ဒံၣ်မိၣ်ကရ့ၣ်စံၣ်ကညီသုးမုၢ်ဒိၣ် (ဒံၣ်ခ့ၣ်ဘံၣ်အ့ၣ်) အိၣ်ဆီလီၤသးတၢ်လီၢ် ဖဲရၤမတံကီၢ်ရ့ၣ် ဆိၣ်စံမၠဲၣ် တၢ်လီၢ်အပူၤစ့ၢ်ကီး ၦၤဘၣ်မူဘၣ်ဒါဒီးလီၢ်က၀ီၤကမျၢၢ်တဖၣ်ပာ်ဖှိၣ်ထီၣ်သးဒီး မၤ၀ဲတၢ်သူၣ်သ့ၣ်တၢ်ရဲၣ်တၢ်ကျဲတခါန့ၣ်လီၤ.