လါယူၤလံ၉သီႇ ၂၀၁၉နံၣ်ႇ စးဖါရှီ
ကညီကလုာ်ဒူၣ်ဖိ(၇)ဒူၣ် လုၢ်လၢ်တၢ်ဆဲးတၢ်လၤတဖၣ်ဒီးႇ ကျိာ်တၢ်ကတိၤလံာ်လဲၢ်တၢ်ဂ့ၢ်တဖၣ် လၢတၢ်ကပၢၤဃာ်ဒီးကမၤထီၣ်ထီအဂီၢ် ကညီကလုာ် ဒူၣ်ဖိကရူၢ်(KNTA)အံၤတၢ်ဒုးအိၣ်ထီၣ်အီၤဖဲကညီကီၢ်စဲၣ် လါယူၤလံ၆သီအနံၤန့ၣ်လီၤ.
(Karen National Tribal Association-KNTA)အံၤ မၤစၢၤတၢ်လၢကညီ စှီၤႇ ဖှိၤႇ ဘွဲႇ မိၢ်န့ၣ်ၦၢ်ႇ ဂ့ၤဘါႇ ပကူဒီးကညီ၀ါကလုာ်ဒူၣ်ဖိသ့ၣ်တဖၣ်ကန့ၢ်အဂီၢ် ကဃ့ထီၣ်၀ဲလၢပဒိၣ်အအိၣ်လၢအဖိးသဲစး ဒီးကဟူးဂဲၤမၤတၢ်န့ၣ်လီၤႉ
ကညီကလုာ်ဒူၣ်ဖိကရူၢ်(KNTA)ၦၤပၢၤလီၢ်ဆ့ၣ်နီၤ စီၤခၠ့းသဲတဲ၀ဲ“ကီၢ်ပဒိၣ်ဒီးကညီကလုာ်ဒူၣ်သ့ၣ်တဖၣ်တၢ်ထံလိာ်သးဂံၢ်စၢ်ဒိၣ်မးႇ မ့ၢ်ဘၣ်တဲန့ၣ်လၢ ကညီဂ့ၢ်၀ီခဲလၢာ်လီၤႇ လၢတၢ်အိၣ်သးခဲလၢာ်အဖီခိၣ် တၢ်အိၣ်သးတနီၤပတဲဖျါထီၣ်လၢ ကီၢ်ပဒိၣ်အအိၣ်ကန့ၢ်အဂီၢ် အဃိပဒုးအိၣ်ထီၣ်တကဲထီၣ်တုၤကဲ ထီၣ်န့ၣ်လီၤ”အဂ့ၢ်တဲဘၣ်ခ့ၣ်အဲၣ်စံၣ်န့ၣ်လီၤ.
(KNTA)ကညီကလုာ်ဒူၣ်ဖိကရူၢ်လၢတၢ်ဒုးအိၣ်ထီၣ်၀ဲအံၤ ဒ်သိးကပတံထီၣ် အမံၤလၢပဒိၣ်အိၣ်ကန့ၢ်အဂီၢ် ကတီၣ်ဖျါထီၣ်၀ဲလၢ ကီၢ်ဆၣ်ပဒိၣ်အအိၣ်ဖဲလါယူၤလံသၢနွံတနွံ ဒီးမ့ၢ်န့ၢ်တၢ်အခွဲးတခီ ကအိၣ်ဆၢထၢၣ်ဒ်ကရူၢ်ဖိးသဲစး အသိးအဂ့ၢ် စီၤခၠ့းသါတဲအါထီၣ်၀ဲန့ၣ်လီၤ.
ကညီကလုာ်ဒူၣ်ဖိကရူၢ်(KNTA)အံၤတၢ်ဒုးအိၣ်ထီၣ်အီၤလၢ ၦၤတီခိၣ်ရိၣ်မဲတၢ်(၅)ဂၤဒ်အမ့ၢ် ၦၤပၢၤလီၢ်ဆ့ၣ်နီၤ စီၤခၠ့သါႇ ၦၤပၢလီၢ်ဆ့ၣ်နီၤခိၣ်(၂) စီၤကၠဲၣ်ထွ့ႇ နဲၣ်ရွဲၣ် နါမၠ့ၣ်တ့ၣ်ႇ နဲၣ်ရွဲၣ်သဃဲၤ စီၤအိတ့ၣ်ႇ ၦၤပၢၤစ့ နီၢ်မၠဲးမၠဲးစ့ၣ်ႇ ၦၤစဲးစရီ စီၤမၠၣ်ထိဃုာ် ဒီးကမံတံး၁၂ဂၤန့ၣ်လီၤ.
ကရူၢ်တၢ်ပနီၣ်အပူၤ ကျိၣ်ႇ ကွဲၤႇ ဆၣ် ၇ဖျၢၣ်ဒီး တကီဖီသ့ၣ်တဖၣ်ပၣ်ဃုာ်၀ဲ၀ံၤ ကညီကလုာ်ဒူၣ်ဖိ(၇)ဒူၣ်လုၢ်လၢ်တၢ်ဆဲးတၢ်လၤတဖၣ်ႇ ကျိာ်လံာ်လဲၢ်တၢ် ဂ့ၢ်တဖၣ်အမဲာ်ညါ ဘၣ်ဃးကညီကလုာ်စံၣ်စိာ်နုာ်အမုၢ်နံၤသီသ့ၣ်တဖၣ်တၢ်ကမၤလၤကပီၤအီၤႇ ကညီကလုာ်ဒူၣ်တဖၣ်တၢ်ခွဲးတၢ်ယာ်တဖၣ်ႇ တၢ်ဒိးန့ၢ်ႇ တၢ်ဘၣ်ဒိဘၣ်ထံးသ့ၣ်တဖၣ် ကဒီသဒၢတၢ်မၤတဖၣ်ပာ်လီၤဃာ်၀ဲန့ၣ်လီၤ.
ကညီကီၢ်စဲၣ်အပူၤဘၣ်ထွဲလံာ်လဲၢ်တၢ်ဆဲးတၢ်လၤတကပၤ တၢ်ဒုးအိၣ်ထီၣ်ဃာ်၀ဲကညီကီၢ်စဲၣ်လံာ်လဲၢ်ဒီး တၢ်ဆဲးတၢ်လၤတၢ်လဲၤထီၣ်လဲၤထီကရူၢ်ဒီး ကတီၢ်အံၤတၢ်ဒုးအိၣ်ထီၣ်၀ဲကညီကလုာ်ဒူၣ်ဖိကရူၢ်(KNTA)အံၤအိၣ်၀ဲခံဖုန့ၣ်လီၤ.
