လါအီကူာ် ၆ သီႇ ၂၀၁၉နံၣ်ႇ စီၤမၠၣ်အူသၣ်
တလၢၤကီၢ်စဲၣ်ပတီၢ် ကညီလံာ်လဲၢ်တၢ်ဆဲးတၢ်လၤအရူ တၢ်သူၣ်ထီၣ်အံၤန့ၣ် တၢ်ကစးထီၣ်အိးထီၣ်အီၤလၢ လါလၢကဟဲ လါနိၣ်၀့ဘၢၣ်ႇ ဖဲ၀့ၢ်မီၣ်လမၠဲၣ် ကၠီၣ်တါ က၀ီၤဒ့အဂ့ၢ် တၢ်မၤလိၣ်ထီၣ်ဖးထီၣ်တၢ် ကမံးတံာ်စံးဘၣ် ခ့ၣ်အဲးစံၣ် ကညီတၢ်ကစီၣ်န့ၣ်လီၤ.
တလၢၤကီၢ်စဲၣ်အပူၤ‚ ကီၢ်ဆၣ်အဘ့ၣ် ၁၀ လၢကညီကလုာ်အိၣ်ဆိး၀ဲအလီၢ်န့ၣ် ဒ်သိးကဟူးဂဲၤဖံးမၤ၀ဲ လံာ်လဲၢ် တၢ်ဆဲးတၢ်လၤကန့ၢ် အဂီၢ်ဒီး ကၠိဖိလၢ အဟဲမၤလိမၤဒိး၀ဲတၢ်ကူၣ်ဘၣ်ကူၣ်သ့တဖၣ် ဟဲအိၣ်ကဒုသးကန့ၢ်အဂီၢ် ပညိၣ်ဃာ်၀ဲဒီး ကညီလံာ်လဲၢ်တၢ် ဆဲးတၢ်လၤရူအံၤ တၢ်ကသူၣ်ထီၣ်အီၤလီၤအဂ့ၢ် တၢ်ဒုးလိၣ်ထီၣ်ဖးထီၣ် ကညီလံာ်လဲၢ်တၢ်ဆဲးတၢ်လၤရူကမံးတံာ် သီခါအူပညၣ် ၀ၤသၣ် စံးဘၣ်ခ့ၣ်အဲးစံၣ် ကညီတၢ်ကစီၣ် ဖဲလါအီကူာ် ၁သီအနံၤန့ၣ်လီၤ.
“၂၀၁၉ နံၣ်ကလၢာ် လါနိၣ်၀့ဘၢၣ်ကတီၢ် ကမၤဖျါထီၣ်ရူတၢ်သူၣ်ထီၣ်အမိၢ်လံၤမိၢ်ၦၢ်ႇ ကတီၢ်အံၤဟီၣ်ခိၣ်လီၢ်တခီ လီၤလၢ၀ဲ စ့ကလီၢ်(၅၀၀) ကၠးလီၤႉ အခဲအံၤကမၢ်အိၣ်တ့ၢ်ဒံး စ့အကလီၢ် တကယၤကၠးဒ်လီၤႉ ပၣ်ဃုာ်ဒီးကီၢ်ဆၣ်အဘ့ၣ် ၁၀ သီခါ ဟ့ၣ်ကူၣ်ဟ့ၣ်ဖးတၢ် လံာ်လဲၢ်ဒီးတၢ်ဆဲးတၢ်လၤတဖုန့ၣ် အကလီၢ် ၁၀ စုာ်စုာ် ဒီး ကညီကလုာ်ဂ့ၢ်၀ီကိတိာ် တၢ်မၤစၢၤန့ၣ်လီၤႉ မ့ၢ်ဒၣ်တၢ်ပညိၣ်လၢ တၢ်ကပၢၤဃာ်က့ၤလံာ်လဲၢ်တၢ်ဆဲးတၢ်လၤဒီး ဖိသၣ်လၢဟဲထီၣ်ကၠိတဖၣ် အိၣ်ကသ့အဂီၢ်လီၤ”အဂ့ၢ် သီခါအူပညၣ်၀ၤသၣ် စံး၀ဲန့ၣ်လီၤႉ
၀့ၢ်မီၣ်လမၠဲၣ်အပူၤ တၢ်တိာ်ပာ်လၢတၢ်ကတ့ထီၣ်၀ဲ ရူအလီၢ်လၢ ကၠီၣ်တါက၀ီၤဒ့အံၤန့ၣ် အထီ ၆၀ပ့ၣ် ၊ အလဲၢ် ၄၀ လၢတၢ်သူၣ်ထီၣ်ခံကထၢဒီး တၢ်တယးဃာ်လၢ စ့ကလၢာ်၀ဲအကလီၢ် ၈၀၀ဃၣ်ဃၣ်ဒီး ခီဖျိကမျၢၢ်တၢ်ဆီၣ်ထွဲမၤစၢၤအဃိ တၢ်ကသူၣ်ထီၣ်အီၤလီၤအဂ့ၢ် လံာ်လဲၢ်တၢ်ဆဲးတၢ်လၤ ဘၣ်မူဘၣ်ဒါတဖၣ်တဲ၀ဲန့ၣ်လီၤ.
တလၢၤကီၢ်စဲၣ် ကညီကလုာ်ဂ့ၢ်၀ီကိတိာ် စီၤအီၣ်မၠ့ၣ်ခဲၣ်စံး၀ဲ“မ့ၢ်တၢ်လီၢ်လၢ ကပာ်ဖှိၣ်ကလုာ်ဒူၣ် ၄ ဒူၣ် အတၢ်ဆဲးတၢ်လၤအဂီၢ် န့ၣ်လီၤႉ ပဃ့ပာ်တၢ်သူၣ်အဂီၢ် ဟီၣ်ခိၣ်လီၢ်အိၣ်၀ဲ ၉ အ့ကၢၣ်န့ၣ်လီၤႉ ကီၢ်ပဒိၣ်တကပၤ မ့ၢ်ဟ့ၣ်လီၤ၀ဲတခါဒီး တၢ်မ့ၢ်ဃ့လၢ အဂၤ တဖၣ်န့ၣ် ကဟ့ၣ်အဂီၢ်တန့ၢ်ဘၣ်ႉ ရူလီၢ်တၢ်သူၣ်ထီၣ်အံၤ ဒ်သိးပာ်တ့ၢ်န့ၢ်ၦၤလၢခံတစိၤ ကန့ၢ်အဂီၢ် ကဘၣ်သူၣ်ထီၣ်အီၤလၢ ဃံးဃီၣ်ဒီၣ်လီၤ”အဂ့ၢ် စံး၀ဲန့ၣ်လီၤႉ
တကီၢ်ခါ ဆၢကတီၢ်အခဲအံၤ တနီသရံးကီၢ်ခီဒိၣ်ႇ ကညီကီၢ်စဲၣ်ႇ တလၢၤကီၢ်စဲၣ် ကီၢ်ဆၣ်အဘ့ၣ်၁၀အပူၤ ကညီဖိလၢဟဲထီၣ်ကၠိ တဖၣ် လၢကအိၣ်ကဒုအဂီၢ် တၢ်လီၢ်တအိၣ်ဘၣ်အဃိ ဘၣ်အိၣ်ကဒုလၢ မီၣ်လမၠဲၣ် သီခါဖၠၣ်တဖၣ်အမဲာ်ညါ ဒီးလၢကမၤလၤကပီၤ၀ဲ လံာ်လဲၢ်တၢ်ဆဲးတၢ်လၤမ့ၢ်ဂ့ၤ ဒီကလုာ်မုၢ်နံၤဒိၣ်မုၢ်နံၤထီသ့ၣ်တဖၣ်မ့ၢ်ဂ့ၤ တၢ်လီၢ်တအိၣ်လီၤ တံၢ်လီၤဆဲး ဘၣ်ဒီး ဘၣ်မၤ၀ဲဒၣ်လၢ တၢ်ဘူၣ်တၢ်ဘါတၢ်သူၣ်ထီၣ်သ့ၣ်တဖၣ်အပူၤအဂ့ၢ် သ့ၣ်ညါဘၣ်လၢ လံာ်လဲၢ်ဘၣ်မူဘၣ်ဒါ တဖၣ်အအိၣ်န့ၣ် လီၤ.
