Home တၢ်ကစီၣ် ရၤမတံ-ကီးတရံး အ့ရှၢၣ်ကျဲမုၢ်အပူၤ သိလ့ၣ်တီၣ်ၦၤကညီတခိၣ် တကျၢၢ်အဃိ ပိာ်မုၣ်သံတဂၤဒီး ၦၤ ၃၅ ဂၤဘၣ်ဒိႉ

ရၤမတံ-ကီးတရံး အ့ရှၢၣ်ကျဲမုၢ်အပူၤ သိလ့ၣ်တီၣ်ၦၤကညီတခိၣ် တကျၢၢ်အဃိ ပိာ်မုၣ်သံတဂၤဒီး ၦၤ ၃၅ ဂၤဘၣ်ဒိႉ

11
0

လါစဲးပထ့ဘၢၣ် ၁၁ သီႇ၂၀၁၉ နံၣ်ႇ န့ၣ်နီၣ်ႉ

ရၤမတံ-ကီတရံး အ့ရှၢၣ်ကျဲမုၢ် တၢၣ်နီၢ်ဂံၢ် ၁၅၈-၁၅၉ ကံၣ်လိၣ်မံထၢၣ် အဘၢၣ်စၢၤ (ကမွ်းခြံေကွ့ကုန်း)ကစၢၢ်အလီၤတၢ်လီၢ်အံၤ သိလ့ၣ်ဒိးလဲတီၣ်ၦၤကညီ၀ဲန့ၣ် လီၤတကျၢၢ်၀ဲဖဲ လါစဲးပထ့ဘၢၣ် ၁၀ သီႇမုၢ်ထူၣ် ၁:၃၀မံနံးကတီၢ် ပိာ်မုၣ်သံ၀ဲတဂၤဒီး ၦၤ ၃၅ ဂၤဘၣ်ဒိ၀ဲအဂ့ၢ် သ့ၣ်ညါဘၣ်လီၤႉ

ကညီကီၢ်စဲၣ် ၀့ၢ်ဖၣ်အၣ်အပူၤ တၢ်သူၣ်တၢ်ဖျးကၠိဖိတဖၣ် ကဟဲလီၤဃိထံသ့ၣ်ညါတၢ်လၢ ကီၢ်ကၠီၣ်တဲၣ် ၀့ၢ်မဲၢ်ဆီးအံၤ ဟဲထီၣ်လၢသိလ့ၣ်ခံခိၣ်ကတီၢ် သိလ့ဒိးလဲတီၣ်ၦၤကညီရွ့ၣ်ပၠံၣ်သၣ်သိလ့ၣ်အံၤ ဟဲလီၤ၀ဲဖဲ ကစၢၢ်တၢ်က့ၣ်သနၢၣ်ဖဲသဲးကျီး(ကမွ်းခြံေကွ့)ကတီၢ် ပၢၤက့ၤ၀ဲသိလ့ၣ်အံၤ အသဟီၣ်တန့ၢ်လၢၤဘၣ်ဒီး တကျၢၢ်၀ဲဒီး ၦၤဘၣ်ဒိတဖၣ်န့ၣ်ၦၤလၢရၤမတံႇသ့ၣ်ကါညံၣ်နီၣ်ႇ၀့ၣ်ရှဲႇကီၤတရံးၦၤဂ့ၢ်၀ီမၤစၢၤကရူၢ်သ့ၣ်တဖၣ်ဆှၢအ၀ဲသ့ၣ်ဆူရၤမတံကမျၢၢ်တၢ်ဆါဟံၣ်ဖးဒိၣ်ချုးဆၢချုးကတီၢ်အဂ့ၢ်ၦၤမၤစၢၤတၢ်သ့ၣ်တဖၣ်စံး၀ဲဒၣ်န့ၣ်လီၤႉ

“ကလဲၤဟးလိာ်ကွဲ လီၤဃိထံတၢ်လၢ ကၠီၣ်တဲၣ်တခီထံခီကီၢ်ဒီး တၢ်ကဲထီၣ်သးဒ်အံၤ သးတမုာ်ဘၣ်ႉ အနီၢ်ကီၢ်ခီ ၦၤနီသိလ့ၣ်ဖိလီၤႉ မ့ၢ်ဟဲကျဲ၀ဲအံၤန့ၣ် ဘၣ်သမံသမိးသိလ့ၣ်မူာ်နီၢ်လီၤႉ ကဘၣ်နီအီၤဂ့ၤဂ့ၤ”အဂ့ၢ် ပိာ်မုၣ်တဂၤလၢ အပၣ်ဃုာ်ဖဲလလ့ၣ်တကျၢၢ် ဘၣ်ဒိတဆံးတက့ၢ်တဂၤ တဲ၀ဲလီၤႉ

သိလ့ၣ်တကျၢၢ်အဃိ နီၢ်မုၣ်ဒါလၢအအိၣ်ဖဲ ၀့ၢ်ဖၣ်အၣ် ဒီနးကိသ၀ီလၢ အသးနံၣ်အိၣ် ၄၂ နံၣ်တဂၤအံၤ အသးသမူဟးထီၣ်ကွံာ်ဖဲ တၢ်ကဲထီၣ်သးအလီၢ်န့ၣ်လီၤႉ ဒီး ၦၤလၢအဘၣ်ဒိဘၣ်ထံးသ့ၣ်တဖၣ် ဟဲတုၤ၀ဲဆူရၤမတံကမျၢၢ် တၢ်ဆါဟံၣ်ဖးဒိၣ်ဒီးၦၤ ဆါ(၃၆)ဂၤအကျါပိာ်ခွါ၃ဂၤႇ ပိာ်မုၣ်၁၇ဂၤန့ၣ်ဘၣ်ဒိ၀ဲနးနးကျံာ်ကျံာ်အဃိ ဘၣ်တၢ်ကူစါယါဘျါ၀ဲသ့ၣ် ဒ်တၢ်ကိပူၤၦၤဆါအသိးန့ၣ်လီၤႉ ၦၤလၢအဘၣ်ဒိထံးစှၤအကျါ ပိာ်မုၣ်၁၅ဂၤႇ ပိာ်ခွါ ၁ဂၤသ့ၣ်တဖၣ်တခီ ဘၣ်တၢ်ကူစါယါဘျါအ၀ဲသ့ၣ်ဒ်တၢ်ချၢၦၤဆါအသိးအဂ့ၢ်သ့ၣ်ညါဘၣ်န့ၣ်လီၤႉ

ကီးတရံး၀့ၢ်ႇဂ့ၢ်ဂီၢ်အူၦၤဆါတၢ်မၤစၢၤတၢ်ကရူၢ် ပလဲဖၠူၣ်ၦၤဂ့ၢ်၀ီၤမၤစၢၤအကရူၢ်ခိၣ် ကိၣ်ထဲး စံး၀ဲလၢ န့ၢ်တၢ်ကစီၣ်လၢ သိလ့ၣ်တကျၢၢ်ဒီး ပလဲၤဃီၤဒီး သိလ့ၣ် ၃ ခိၣ်န့ၣ်လီၤႉ ၦၤဆါတဖၣ် ပဆှၢဃီၤဆူ ရၤမတံတၢ်ဆါဟံၣ်အဂ့ၢ်ႇ ဒ်န့ၣ်အသိး ရၤမတံႇညံၣ်နီၣ်ဒီး ၀့ၣ်ရှဲ ၦၤဂ့ၢ်၀ီမၤစၢၤကရူၢ်သ့ၣ်တဖၣ် သနာ်က့ ဟဲမၤစၢၤစ့ၢ်ကီး၀ဲအဂ့ၢ် စံး၀ဲဒၣ်န့ၣ်လီၤႉ

ၦၤနီသိလ့ၣ်ဖိ အူအ့ၣ်မၠ့ၣ်အံၤ ခီဖျိလၢအနီ၀ဲသိလ့ၣ်တဘၣ်ဘျီးဘၣ်ဒါဒီးၦၤဘၣ်ဒိ၀ဲအါအါဂီၢ်ဂီၢ်ဒီး တုၤ ၦၤဘၣ်သံ ၁ ဂၤအဃိ သ့ၣ်ကါညံၣ်နီၣ်လီၢ်က၀ီၤပၢၤကီၢ်ကဟံးန့ၢ်အီၤအရ့ဒ်တၢ်ဘျၢသဲစးအိၣ်အသိးအဂ့ၢ် ပၢၤကီၢ်ၦၤဘၣ်မူဘၣ်ဒါသ့ၣ်တဖၣ်စံး၀ဲဒၣ်န့ၣ်လီၤႉ