တၢ်ကပာ်ပနီၣ် ပာ်ကဲကလုာ်ဒူၣ်တဖၣ်အခွဲးကယာ်အဂီၢ် အ့ယၣ်၀တံၣ် ကညီသးစၢ် ထုးထီၣ်တၢ်ပာ်သး

လါစဲးပထ့ဘၢၣ် ၁၄ သီႇ၂၀၁၉နံၣ်ႇစးဖါရှီႉ

ကီၢ်ပဒိၣ်တကပၤ ကပာ်ပနီၣ် ကလုာ်ဒူၣ်တဖၣ် အခွဲးအယာ် လၢတၢ်တုၤသိးထဲသိးအဂီၢ်ႇ ကပာ်ကဲဒီး ဟ့ၣ်တၢ်ခွဲးတၢ်ယာ် တၢ်ဒီသဒၢ ဒ်သိးသိးအဂ့ၢ် ညီၣ်တိကီၢ်ဆၣ်အပူၤ ကညီသးစၢ်မၤ၀ဲ တၢ်ထံၣ်လိာ်တဲသကိး၀ံၤ ဖဲလါစဲးပထ့ဘၢၣ် ၁၃ သီအနံၤ ထုးထီၣ်တၢ်ပာ်သးဒီး ဃ့ထီၣ်၀ဲန့ၣ်လီၤႉ

ညီၣ်တိကီၢ်ဆၣ် ကညီလံာ်လဲၢ်ဒီးတၢ်ဆဲးတၢ်လၤ ကမံးတံာ်ႇ ကညီသးစၢ် တၢ်ဂုၤထီၣ်ပသီထီၣ်ကရၢ( KYDA) ဒီး သးစၢ်က၀ီၤကရူၢ်(YC)တဖၣ် တီခိၣ်ရိၣ်မဲ၀ဲဒီး မၤ၀ဲသးစၢ် တၢ်ထံၣ်လိာ်တဲသကိးဖဲ ညီၣ်တိကီၢ်ဆၣ်ႇ ဖီၣ်ယိခၠိသ၀ီအပူၤ၀ံၤ ဖဲစဲးပထ့ဘၢၣ် ၁၃ သီအနံၤ ကညီကလုာ်တဖၣ် လၢအဟဲထီၣ်လၢ အ့ယၣ်၀တံၣ်ကီၢ်ခီဒိၣ်တဖၣ် ထုးထီၣ်၀ဲ တၢ်ပာ်သးဒ်အံၤန့ၣ်လီၤႉ

ဘၣ်ထဲတွၢ်ထုးထီၣ်၀ဲ တၢ်ဘၣ်သးအဖီခိၣ် ၦၤတဲတၢ်ပၢ မါ၀့မီၣ်တဲ၀ဲ“ဘၣ်ဃးတၢ်မၤလၤကပီၤ၀ဲ ကညီမၤထူရၤအမုၢ်နံၤအံၤ တၢ်တြီ အီၤ အမၠိမၠိကလုာ်ကလုာ် တၢ်ဟံးအရ့သ့ၣ်တဖၣ်အံၤ မ့ၢ်၀ဲတၢ်မၤတရီတပါ၀ဲ ကလုာ်ဒူၣ်တဖၣ် အခွဲးအယာ်ဒီး ကတီၢ်အံၤ တၢ်မုာ်တၢ်ခုၣ်တၢ်လဲၤကျဲ သနာ်က့ ကဲထီၣ်၀ဲ တၢ်မၤတံာ်တာ်န့ၣ်လီၤ”အဂ့ၢ် တဲ၀ဲန့ၣ်လီၤႉ

လၢန့ၢ်အမဲာ်ညါ ကလုာ်ဒူၣ်တဖၣ် အမံၤမဲာ်ညါအပူၤ မ့ၢ်၀ဲ မါႇဂါ သ့ၣ်တဖၣ်အံၤ ထီထီၣ်အီၤလၢ မံၤမဲာ်ညါတန့ၢ်ဘၣ်အံၤ မ့ၢ်၀ဲတၢ်မၤဘၣ်ဒိ၀ဲ တၢ်ခွဲးတၢ်ယာ်အဃိ တၢ်ကပာ်ပနီၣ် ပာ်ကဲတၢ်ခွဲးတၢ်ယာ်အဂီၢ် မ့ၢ်တၢ်ဃ့ထီၣ်အဂ့ၢ် ပါတနီၣ်ကီၢ်ဆၣ် ကညီလံာ်လဲၢ်ဒီး တၢ်ဆဲးတၢ်လၤကမံးတံာ် နဲၣ်ရွဲၣ် မါ၀့မီၣ် တဲအါထီၣ်၀ဲန့ၣ်လီၤႉ

အ့ယၣ်၀တံၣ် ကီၢ်ခီဒိၣ်အပူၤ ကညီသးစၢ် တၢ်ပာ်ဖှိၣ်မၤသကိးအဂီၢ်ဒီး တၢ်ကွဲးလီၤ တၢ်မၤရဲၣ်ကျဲၤခိၣ်သ့ၣ် ကဟဲအိၣ်ဖျါထီၣ်အဂီၢ် တၢ်ပညိၣ်မၤအီၤ၀ံၤ တၢ်ထံၣ်လိာ်တဲသကိးအပူၤ (KNP & KPP)ၦၤ ဘၣ်မူဘၣ်ဒါတဖၣ်ႇ ကီၢ်ခီဒိၣ်အပူၤ ကီၢ်ဆၣ် ၂၀ဃၣ်ဃၣ်ႇ ကညီလံာ်လဲၢ်တၢ်ဆဲးတၢ်လၤ ကမံးတံာ်တဖၣ်ႇ ကညီသးစၢ်လၢ ဖၠၣ်စိမိၤအပူၤ ခဲလၢာ် ၁၀၃ ဟဲထီၣ် တဲသကိး၀ဲန့ၣ်လီၤႉ

လၢတၢ်တဲသကိးအပူၤ တၢ်တဲသကိး၀ဲ တၢ်မၤရဲၣ်ကျဲၤခိၣ်သ့ၣ် ကဟဲအိၣ်ဖျါထီၣ်အဂီၢ် အမဲာ်ညါ ကတီၢ်အံၤ တၢ်ဒိးဘၣ်သလၣ်လၢ ၦၤတီခိၣ်ရိၣ်မဲ မၤလၤကပီၤ၀ဲ ကညီမၤထူရၤမုၢ်နံၤ နီၢ်အိလးဃုာ်ဒီး သးစၢ် ၂ ဂၤ တၢ်လိာ်ကွီၢ် အဖီခိၣ် တၢ်တဲသကိးအီၤ၀ံၤ ထုးဖျါထီၣ်၀ဲ တၢ်ဘၣ်သးဒ်အံၤ န့ၣ်လီၤႉ

တကးဘၣ်အမဲာ်ညါ ကညီကလုာ်တဖၣ် အမံၤမဲာ်ညါ တၢ်ပနီၣ်တဖၣ်လၢအမ့ၢ် စီၤႇနီၢ်ႇစးႇမါႇနၣ်ႇဂၣ်ႇနါ တၢ်ကထၢနုာ်လီၤအီၤအံၤ ကီၢ်ပဒိၣ်၀ဲၤကျိၤ ဘၣ်မူဘၣ်ဒါတဖၣ် ကွၢ်ကပာ်၀ဲ၀ံၤ ထၢနုာ်လီၤ၀ဲ အူႇဒီၣ်ႇမးႇမီၣ် သ့ၣ်တဖၣ်အံၤ မ့ၢ်၀ဲတၢ်မၤဟးဂီၤ၀ဲ ကလုာ်ဒူၣ် သ့ၣ်တဖၣ် အမံၤကယၢ တၢ်ပနီၣ်သ့ၣ်တဖၣ်အဃိ တြီဆၢထီဒါ၀ဲအဂ့ၢ် လံာ်တၢ်ပာ်ဖျါအပူၤ ပာ်ဖျါဃာ်၀ဲန့ၣ်လီၤႉ

အ့ယၣ်၀တံၣ် ကညီသးစၢ် တၢ်ထံၣ်လိာ် တဲသကိးလၢ တၢ်မၤအီၤဖဲ လါစဲးပထ့ဘၢၣ် ၁၃ သီအနံၤအံၤန့ၣ် တၢ်ကမၤအီၤလၢခံတဘျီဖဲ လါနိၣ်၀့ဘၢၣ် ကတီၢ်ပူၤအဂ့ၢ် သ့ၣ်ညါဘၣ်လၢ ၦၤတီခိၣ်ရိၣ်မဲတၢ် အအိၣ်န့ၣ်လီၤႉ