Home တၢ်ကစီၣ် (DKBA)ဒီး မိၣ်ကီၢ်သီပၣ်တံၣ် တၢ်ခးလိာ်သးကဲထီၣ် ၂ ဘျီႉ

(DKBA)ဒီး မိၣ်ကီၢ်သီပၣ်တံၣ် တၢ်ခးလိာ်သးကဲထီၣ် ၂ ဘျီႉ

225
0

လါစဲးပထ့ဘၢၣ် ၂၀ သီႇ၂၀၁၉ နံၣ်ႇ စးအဲၣ်ဆူ

ဘူးဒးတၢ်ဘါ တၢ်လဲၤထီၣ်လဲၤထီ ကညီသုးမုၢ်ဒိၣ်(DKBA)ဒီး မိၣ်ကီၢ်သီပၣ်တံၣ် (NMSP)သ့ၣ်တဖၣ် ဖဲလါစဲးပထ့ဘၢၣ် ၁၇ သီအနံၤဒီး ၁၈ သီအနံၤန့ၣ် တၢ်ခးလိာ်သးကဲထီၣ်ဖဲ ကညီကီၢ်စဲၣ် ၀့ၢ်ဃိၣ်သၢဖျၢၣ် တကပၤ လၢကီၢ်ကၠီၣ်တဲၣ် ကီၢ်ပယီၤကီၢ်ဆၢ တၢ်လီၢ်တတီၤအဂ့ၢ် ခံခီခ့ကပၤ ၦၤဘၣ်မူဘၣ်ဒါတဖၣ် ပာ်ဂၢၢ်ပာ်ကျၢၤ တဲ၀ဲန့ၣ်လီၤႉ

ဖဲအပူၤကွံာ် လါစဲးပထ့ဘၢၣ် ၁၇ သီအနံၤ (NMSP)ဒီး သုးခိၣ်ကျၢၢ်စီၤကၠီၣ်သဲး စုဒုၣ်စုတီၤဖီလာ် (DKBA)ထုးဖးသးကရူၢ်တဖၣ် မၤ၀ဲတၢ်ထံၣ်လိာ်သးတခါ၀ံၤအလီၢ်ခံ တၢ်ခးလိာ်အသးကဲထီၣ်ဒီး မ့ၢ်၀ဲတၢ်လဲၤရှဲပျီ ဟီၣ်က၀ီၤဒီး ဘၣ်သဂၢၢ်လိာ်သး တဆံးတက့ၢ်အဂ့ၢ် (NMSP)တကပၤ သုးခိၣ် နဲၣ်အၣ်ကၣ် တဲ၀ဲန့ၣ်လီၤႉ

အ၀ဲတဲ၀ဲလၢ“ဒ်ပသ့ၣ်ညါဘၣ်အသိး ပသုးကျိၤ ၃ ဒူၣ် လဲရှဲပျီဟီၣ်က၀ီၤကတီၢ် ဘၣ်သဂၢၢ်လိာ်သး တဆံးတက့ၢ်လီၤႉ ဒ်သ့ၣ်ညါဘၣ်အသိး ထံၣ်လိာ်သး၀ံၤကတီၢ် ပသုးကျိၤတကပၤ အိၣ်လၢအံၤတဒူၣ် လၢန့ၣ်တဒူၣ်ဒီး ကဲထီၣ်အသးလီၤႉ တၢ်ကဲထီၣ်သးအံၤ မ့ၢ်၀ဲတၢ်လဲၤ&ှဲပျီဟီၣ်က၀ီၤဒီး ခးလိာ်အသး ၃ ထံၣ် ၄ ထံၣ်လီၤ”အဂ့ၢ် တဲဘၣ် ခ့ၣ်အဲးစံၣ်န့ၣ်လီၤႉ

ဘၣ်ဆၣ်ဒီး အ၀ဲသ့ၣ် ၂ ဒူၣ်ထံၣ်လိာ်အသးလၢ ၁၇ အနံၤ၀ံၤ ထံၣ်လိာ်အသးလၢ မနုၤအဃိလဲၣ်န့ၣ် တသ့ၣ်ညါဘၣ်ဒံးဘၣ်ဒီး တၢ်ဘၣ်ဒိဘၣ်ထံး အိၣ်တအိၣ်အဂ့ၢ် တသ့ၣ်ညါဒံးအီၤဘၣ်ဒီး မ့ၢ်၀ဲတၢ်ခးပျံၤခးဖုးလီၤအဃိ တၢ်ဘၣ်ဒိဘၣ်ထံး တအိၣ်ဘၣ်အဂ့ၢ် သုးခိၣ် နဲၣ်အၣ်ကၣ် တဲအါထီၣ်၀ဲန့ၣ်လီၤႉ

လၢန့ၢ်အမဲာ်ညါ ဖီၣ်စုက၀ဲၤ တၢ်ပၢၢ်ဆၢကတီၢ် တဒူၣ်ဒီးတဒူၣ်အဘၢၣ်စၢၤ ကဘၣ်လဲၤလၢ တၢ်ထံၣ်လိာ်တဲသကိးဒီး တၢ်ထံၣ်ကမၣ်မ့ၢ်အိၣ်ထီၣ်န့ၣ် တၢ်ခးကဲထီၣ်လိာ်အသး ဟဲအိၣ်ထီၣ်၀ဲသ့အဂ့ၢ် သုးခိၣ် နဲၣ်အၣ်ကၣ် တဲၦဲၤအါထီၣ်၀ဲန့ၣ်လီၤႉ

ဘၣ်ဃးတၢ်ခးလိာ်သး၀ဲန့ၣ် (DKBA)ထုးဖးသးကရူၢ် သုးခိၣ်ကျၢၢ် စီၤကၠီၣ်သဲး စုဒုၣ်စုတီၤဖီလာ် သုးခိၣ်နကါ တီခိၣ်ရိၣ်မဲကရူၢ်တဖၣ် ဖဲစဲးပထ့ဘၢၣ် ၁၇ သီအနံၤ ၅ နၣ်ရံၣ်ဘျဲၣ် တဘျီဒီး ၁၈ သီအနံၤ မုၢ်ထူၣ် ၁၁ ဘျဲၣ်တဘျီဒီး (NMSP)တကပၤ ခးဆိအ၀ဲသ့ၣ်အဃိ က့ၤခးဆၢ၀ဲလီၤအဂ့ၢ် (DKBA)တကပၤ တဲ၀ဲန့ၣ်လီၤႉ

(DKBA) သုးခိၣ်ကျၢၢ် စီၤကၠီၣ်သဲးတဲ၀ဲ“ အိၣ်စီၤစုာ်ဒီး ယၤအဃိ တသ့ၣ်ညါလီၤတံၢ်လီၤဆဲးဘၣ်ႉ ဘၣ်ဆၣ် ဒ်ယသ့ၣ်ညါဘၣ်အသိး ပၦၤဒီး အ၀ဲသ့ၣ်အၦၤ ထံၣ်လိာ်သးလၢ ကၠီၣ်တဲၣ်တကပၤ၀ံၤ လၢပၦၤဟဲက့ၤကတီၢ် အ၀ဲသ့ၣ် (NMSP)တကပၤ ဟဲအိၣ်ခိးလၢကျဲ၀ံၤ မၢပလဲၤဒုးနဲၣ် ပတၢ်လီၢ်လီၤႉ မၢပလဲၤပၠးပတၢ်လီၢ်၀ံၤ ထီၣ်ခးပၦၤလီၤႉ အ၀ဲသ့ၣ်ခးပၦၤဒီး ပၦၤက့ၤခးလီၤ ဒီးပသ့ၣ်ညါဘၣ်လၢ အ၀ဲသ့ၣ် က့ၤဖီၣ် ပၦၤ ၆ ဂၤန့ၣ်လီၤ”အဂ့ၢ် တဲဘၣ်ခ့ၣ်အဲးစံၣ်လီၤႉ

လၢန့ၢ်အမဲာ်ညါ တလၢၤဒီး ၦၤကညီန့ၣ် တမ့ၢ်ဒုၣ်ဒါဘၣ်ဒီး ဒီးအ၀ဲသ့ၣ် မၤၦၤဒံးအံၤ ပဆိကမိၣ်တဘၣ်ဘၣ်အဂ့ၢ် သုးခိၣ်ကျၢၢ် စီၤကၠီၣ်သဲး တဲအါထီၣ်၀ဲလီၤႉ

ဘၣ်ဃးတၢ်ခးလိာ်သး၀ဲန့ၣ် ၦၤဘၣ်မူဘၣ်ဒါလၢ အပၣ်ဃုာ်လၢ တၢ်ခးလိာ်သးဘျီ၀ဲအံၤန့ၣ် တၢ်ဆဲးကျိးသံကွၢ်တန့ၢ်ဒံးဘၣ်ဒီး တၢ်ကစီၣ်ဟူထီၣ်သါလီၤလၢ ခံခီခံကပၤ တၢ်ဘၣ်ဒိဘၣ်ထံး အိၣ်ဘၣ်ဆၣ် တၢ်ဂ့ၢ်တၢ်ကျိၤ လီၢ်ခံတဖၣ် တၢ်ပာ်ဂၢၢ်ပာ်ကျၢၤ တအိၣ်ဒံးဘၣ်န့ၣ် သ့ၣ်ညါဘၣ်လီၤႉ