Home တၢ်ကစီၣ် (JMC-S) တလၢၤဒီး ကညီ ကမျၢၢ်ခၢၣ်စးအကျါ ပိာ်မုၣ်တၢ်ပၣ်ဃုာ် ဟဲဂ့ၤထီၣ်

(JMC-S) တလၢၤဒီး ကညီ ကမျၢၢ်ခၢၣ်စးအကျါ ပိာ်မုၣ်တၢ်ပၣ်ဃုာ် ဟဲဂ့ၤထီၣ်

9
0

လါစဲးပထ့ဘၢၣ် ၂၄ သီႇ၂၀၁၉ နံၣ်ႇ နါ၀့ၣ်ဖၠိစၣ်ႉ

(JMC-S)ကညီကီၢ်စဲၣ် ဒီးတလၢၤကီၢ်စဲၣ် ကီၢ်စဲၣ်ပတီၢ် တၢ်ကွၢ်ဟုၣ်ကွၢ်စုၣ် တၢ်ပတုာ်တၢ်ခး ကမံးတံာ် ကမျၢၢ်ခၢၣ်စးအပူၤ ပိာ်မုၣ်တၢ်ပၣ်ဃုာ် မျးကယၤ အိၣ်ဒီးတၢ်သးမံအဂ့ၢ် (JMC-S)အပူၤ ကမျၢၢ်ခၢၣ်စးတဖၣ် စံး၀ဲန့ၣ်လီၤႉ

(JMC-S) ကညီ ကမျၢၢ်ခၢၣ်စးအပူၤ ပၣ်ဃုာ်၀ဲ ၈ ဂၤအကျါ ပိာ်မုၣ်ပၣ်ဃုာ်၀ဲ ၄ ဂၤဒီး(JMC-S)တလၢၤ ကမျၢၢ်ခၢၣ်စးကရူၢ်အပူၤ ၄ ဂၤအကျါ ပိာ်မုၣ်ပၣ်ဃုာ်၀ဲ ၂ ဂၤအဃိ မ့ၢ်၀ဲ တၢ်ပၣ်ဃုာ်လၢ အိၣ်ဒီးတၢ်ထဲးသိးတုၤသိးအဂ့ၢ် ပိာ်မုၣ်ခၢၣ်စးတဖၣ် စံး၀ဲန့ၣ်လီၤႉ

“လၢၦၤကညီတကပၤ ပၣ်ဃုာ်၀ဲ ၅၀ မျးကယၤအဃိ သးမံလီၤႉ လၢတၢ်မုာ်တၢ်ခုၣ် တၢ်လဲၤကျဲကတီၢ် ပဖၢနုာ်လီၤ ပကလုၢ်န့ၢ်လၢတၢ်လီၢ်တကစူးစူးမီၣ်ႉ လၢဘျီၣ်ဒိၣ်အပူၤ ပိာ်မုၣ်တၢ်ပၣ်ဃုာ် အိၣ်၀ဲအသိး လၢ(JMC-S)အပူၤ ပၣ်ဃုာ်အဃိ လၢတၢ်မုာ်တၢ်ခုၣ် တၢ်လဲၤကျဲအပူၤ တၢ်ဘၣ်ဂံာ်ဂူာ်ဒီး တၢ်ဘၣ်ဒိဘၣ်ထံး တၢ်မၤသ့ၣ်တဖၣ် ပတဲအီၤကန့ၢ်လီၤႉ ပိာ်မုၣ်တဖၣ် တၢ်ပၣ်ဃုာ်အဃိ တၢ်ဘၣ်ဂံာ်ဂူာ်ဒီး တၢ်ထံၣ်တၢ်ကမၣ်တဖၣ် ဟဲစှၤလီၤန့ၣ်လီၤ”အဂ့ၢ် (JMC-S)ကညီကမျၢၢ်ခၢၣ်စး နါစ့အွၣ် တဲ၀ဲလီႉ

လၢန့ၢ်အမဲာ်ညါ လၢပိာ်မုၣ်သ့ၣ်တဖၣ် တကပၤ နုာ်လီၤပၣ်ဃုာ်ဘၣ်လၢ တၢ်လီၢ်ဒံးန့ၣ်အဃိ လၢတၢ်တၢၣ်ပီၣ်တဲသကိးအပူၤ ဒ်သိး တၢ်ဂ့ၢ်ကီတဖၣ် သုတဟဲဒိၣ်ထီၣ်အဂီၢ် ဖီၣ်ဂၢၢ်ဃာ်အီၤန့ၢ်၀ဲအသိး တၢ်ဂ့ၢ်ကီလၢ ပိာ်မုၣ်တဖၣ်သဂၢၢ်ဘၣ်သ့ၣ်တဖၣ်စ့ၢ်ကီး တၢ်ဘှါရှဲအီၤလၢ တၢ်ထံၣ်သဘျ့တဖၣ်အိၣ်၀ဲအဂ့ၢ် သ့ၣ်ညါဘၣ်လၢ ပိာ်မုၣ်ခၢၣ်စးတဖၣ် တဲ၀ဲန့ၣ်လီၤႉ

“(JMC-S)အပူၤ ခီဖျိပိာ်မုၣ်တဖၣ် ပၣ်ဃုာ်အဃိ လၢတၢ်လဲၤဟးလၢ ကမျၢၢ်အကျါကတီၢ် ပထံၣ်ဘၣ်လၢ ပိာ်မုၣ်သ့ၣ်တဖၣ် တနီၤအကလုၢ်ဟဲသီၣ်ဒိၣ်ထီၣ်ႉ တၢ်ဒုးတၢ်ယၤအဃိ ပိာ်မုၣ်တဖၣ်တူၢ်ဘၣ်တၢ် အိၣ်စ့ၢ်ကီးဒီး ပိာ်မုၣ်တဖၣ် ပၣ်ဃုာ်လၢကမံးတံာ်အံၤအပူၤန့ၣ် အ၀ဲသ့ၣ်မ့ၢ်သဂၢၢ်ဘၣ်ဒီး တၢ်ဘၣ်ဂံာ်ဂူာ်ခါဂ့ၤန့ၣ် အ၀ဲသ့ၣ်တဲဖျါထီၣ်တၢ်လၢ တၢ်သူၣ်ဒူသးဒူအပူၤအိၣ်န့ၣ် ပထံၣ်ဘၣ်လီၤ”အဂ့ၢ် (JMC-S)တလၢၤကမျၢၢ်ခၢၣ်စး ဒီကထၢၣ် မံၣ်ယ့ၣ်ခၠဲ တဲ၀ဲလီၤႉ

(JMC-S)ကီၢ်စဲၣ်ပတီၢ် ကမျၢၢ်ခၢၣ်စးတၢ်လီၢ်အပူၤ ပိာ်မုၣ်တၢ်ပၣ်ဃုာ် မျးကယၤဂံၢ်ဘါ ဂ့ၤ၀ဲဘၣ်ဆၣ် လၢကီၢ်ပဒိၣ် ခၢၣ်စးဒီး ကလုာ်ဖီၣ်စုက၀ဲၤကရူၢ် (EAO)အပူၤ ပိာ်မုၣ်ခၢၣ်စး တၢ်ပၣ်ဃုာ်ဂံၢ်ဘါ စှၤဒံး၀ဲအဂ့ၢ် သ့ၣ်ညါဘၣ်လီၤႉ

ဘၣ်ထွဲ ပိာ်မုၣ်တၢ်ပၣ်ဃုာ် ကီခဲလၢ (JMC-S) ကီၢ်ပဒိၣ်ပတီၢ်ဒီး (EAO)အပူၤ အံၤန့ၣ် တၢ်မုာ်တၢ်ခုၣ်ဒီး တၢ်ဘံၣ်တၢ်ဘၢ မၠးမၣ်အဲးစ်စတံၣ်ကၠူၣ် (မြန်မာအင်စတီကျု) (MIPA-Executive Director) ဒီကထၢၣ် မ့စီၣ်အူ စံး၀ဲဒ်အံၤန့ၣ်လီၤႉ

“(JMC)ကီၢ်ပဒိၣ်တကပၤ တၢ်သူၣ်ထီၣ်ဆီလီၤန့ၣ် လၢကီၢ်စဲၣ်(JMC)ပတီၢ် တၢ်ကွၢ်ထွဲ ထံလီၢ်ကီၢ်ပူၤ ကဘၣ်မ့ၢ်၀ဲ ပၢၤကီၢ်ခိၣ် န့ၣ်လီၤႉ မ့ၢ်၀ံၤထံလီၢ်ကီၢ်ပူၤ တၢ်ဘံၣ်တၢ်ဘၢ ကိတိာ်ခိၣ်လီၤႉ ၦၤပၢဆှၢရဲၣ်ကျဲၤတၢ်ခိၣ်ဒိၣ်ႇ ၦၤဟံးမူဒါ၀ဲန့ၣ်တဖၣ် မ့တမ့ၢ် ပိာ်မုၣ်ဘၣ်န့ၣ် ပိာ်မုၣ်ပၣ်ဃုာ်တန့ၢ်ဘၣ်ႉ တၢ်ကီတၢ်ခဲအိၣ် တၢ်၀ဲန့ၣ်တခါလီၤ”အဂ့ၢ် ဒီကထၢၣ် မ့စီၣ်အူ တဲ၀ဲလီၤႉ

လၢန့ၢ်အမဲာ်ညါ တၢ်မုာ်တၢ်ခုၣ်တၢ်လဲၤကျဲၤအပူၤ ပိာ်မုၣ်တၢ်ပၣ်ဃုာ် ကဟဲဂ့ၤထီၣ်အဂီၢ် လၢကီၢ်ပဒိၣ်တကပၤမ့ၢ်ဂ့ၤ ကလုာ်ဒူၣ်ဖီၣ်စုက၀ဲၤ တၢ်ပၢၢ်ဆၢကရူၢ် (EAO)တကပၤ မ့ၢ်ဂ့ၤ ထံၣ်ဘၣ်လၢ တၢ်မၤဂ့ၤထီၣ် ပိာ်မုၣ်ကံၢ်စီအဂီၢ်န့ၣ် စှၤဒံး၀ဲအဂ့ၢ် ဒီကထၢၣ် မ့စီၣ်အူ တဲအါထီၣ်၀ဲလီၤႉ

ကီၢ်ပယီၤ တၢ်မုာ်တၢ်ခုၣ်တၢ်လဲၤကျဲ သနၢၢ်တဖၣ်အပူၤ တၢ်ဃ့ထီၣ်အိၣ်၀ဲလၢ ပိာ်မုၣ်တၢ်ပၣ်ဃုာ် ၃၀ မျးကယၤ အိၣ်သနာ်က့ ကတီၢ်အံၤ တၢ်အိၣ်သးအသိး ထဲဒၣ် (JMU-S)ပတီၢ်ဒီး(JMC-L) ပတီၢ်တဖၣ်အပူၤ ပိာ်မုၣ်တၢ်ပၣ်ဃုာ်အိၣ်၀ဲဒီး မ့မ့ၢ် (JMU-S)အပတီၢ်တခီ ပိာ်မုၣ်တၢ်ပၣ်ဃုာ် တအိၣ်ဒံးဘၣ်အဂ့ၢ် သ့ၣ်ညါဘၣ်လီၤႉ