Home တၢ်ကစီၣ် ကြုၢ်တု၀့ၢ်ပူၤမ့ၣ်ပိၢ်ပိၢ်ဖးထီၣ်အဃိ ပၢၤကီၢ်သံ ၃ ဂၤ ဒီးသ၀ီဖိသံ၀ဲတဂၤ

ကြုၢ်တု၀့ၢ်ပူၤမ့ၣ်ပိၢ်ပိၢ်ဖးထီၣ်အဃိ ပၢၤကီၢ်သံ ၃ ဂၤ ဒီးသ၀ီဖိသံ၀ဲတဂၤ

271
0
Photo: Nay Naw

လါနိၣ်၀့ဘၢၣ် ၁၂ သီႇ ၂၀၁၉ နံၣ်ႇ န့ၣ်နီၣ်

ဖဲလါနိၣ်၀့ဘၢၣ် ၁၁ သီႇ ဟါခီ ၈ နၣ်ရံၣ်ဃၣ်ဃၣ်အဆၢကတီၢ်န့ၣ် မ့ၣ်ပိၢ်ပိၢ်ဖးကဲထီၣ်အသးတခါဖဲ ကညီကီၢ်စဲၣ်ႇကီးတရံးကီၢ်ရ့ၣ် ကြုၢ်တု၀့ၢ် နီၣ်ဂံၢ် (၁) က၀ီၤဒ့ ခၠီဖၠါကျဲမုၢ်ႇပၢၤကီၢ်ရူအကပၤအဃိ ပၢၤကီၢ် ၃ဂၤႇ ၦၤကမျၢၢ် ၁ဂၤ သံ၀ဲဒီး ပၢၤကီၢ် ၄ဂၤႇၦၤကမျၢၢ် ၅ဂၤ ဘၣ်ဒိ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

တၢ်ကဲထီၣ်သးန့ၣ် ဖဲလါနိၣ်၀့ဘၢၣ် ၁၁ သီႇ ဟါခီ ၇ နၣ်ရံၣ် ၄၀ မံးနံး အဆၢကတီၢ်န့ၣ် ကြုၢ်တုလီၢ်က၀ီၤ ပၢၤကီၢ်ရူ ပၢၤကီၢ်ခိၣ်မၠိမ့ထိ တီခိၣ်ရိၣ်မဲ၀ဲပၢၤကီၢ်သုးဖိ ၇ ဂၤဒီး ဖဲလၢအဟးဆှၣ်တၢ်လၢ၀့ၢ်ပူၤအဆၢကတီၢ် ဖဲပၢၤကီၢ်ရူအကပၤ နီၣ်ဂံၢ် ၁ က၀ီၤဒ့ ခၠီဖၠါကျဲ (လီၢ်က၀ီၤဖိတဖၣ် ကိး၀ဲလၢ တၢ်စိာ်ဆါဟုၣ်တၢ်တြဲၤလီၢ်) န့ၣ် ၦၤတဒူၣ်လၢတၢ်တသ့ၣ်ညါ၀ဲအမံၤတဖၣ်လၢအဟဲဒိး၀ဲဒီးသိလ့ၣ်ယီၢ်(ဆဲးကဲး)အံၤ ဟဲကွံာ်ပိၢ်ဖး၀ဲ မ့ၣ်ပိၢ်၀ံၤ ဃ့ၢ်ပူၤဖျဲးကွံာ်အသးဆူဖိခံသ၀ီတကပၤအဂ့ၢ်န့ၣ် ပၢၤကီၢ်ထုးထီၣ်ပာ်ဖျါ၀ဲတၢ်ကစီၣ်န့ၣ်လီၤႉ

ၦၤကညီလၢတၢ်တသ့ၣ်ညါဘၣ်အမံၤခံဂၤလၢအမၤပိၢ်ဖးထီၣ်တၢ်အံၤ ပၢၤကီၢ်သုးလၢ အဟးဆှၣ်ကွၢ်တၢ်လၢ အပၣ်ဃုာ်လၢသိလ့ၣ်ပူၤ ၇ ဂၤ ဒီး ၦၤကမျၢၢ် ၆ဂၤ ဘၣ်ဒိဘၣ်ထံး၀ဲအကျါ ပၢၤကီၢ် ၂ဂၤဒီး ၦၤကမျၢၢ် ၁ ဂၤသံ၀ဲဒၣ်န့ၣ်လီၤႉ ၦၤလၢအဘၣ်ဒိဘၣ်ထံးတဖၣ်မ့ၢ်၀ဲ ပၢၤကီၢ်ရူမူဒါခိၣ် မၠိမ့ထိဃုာ်ဒီးပၢၤကီၢ်ကရူၢ်ဖိ ၅ဂၤဒီး ၦၤသ၀ီဖိ ၃ဂၤအံၤန့ၣ် ဘၣ်တၢ်ဆှၢအီၤလၢဖၣ်အၣ်တၢ်ဆါဟံၣ်အခါ ပၢၤကီၢ်သုးစကီၤ ၁ဂၤ ဖဲအလဲၤတုၤ လၢတၢ်ဆါဟံၣ်ဒီးသံ၀ဲအဂ့ၢ်န့ၣ်သ့ၣ်ညါဘၣ်လီၤႉ

လၢတၢ်ဟဲကွံာ်ပိၢ်ဖးထီၣ်မ့ၣ်ပိၢ်အတၢ်ဂ့ၢ်တၢ်ကျိၤတခီန့ၣ် ပၢၤကီၢ်ကရူၢ်တဖၣ် တဲဖျါထီၣ်၀ဲ တၢ်ဂ့ၢ်တၢ်ကျိၤတအိၣ်ဒံးဘၣ်ဒီး ၦၤလၢ အဟဲကွံာ်ပိၢ်ဖးထီၣ် မ့ၣ်ပိၢ်တဖၣ် တၢ်ကဖီၣ်ဟံးန့ၢ်အရ့ လၢအဆိအခ့အျဂီၢ် ကဃုသ့ၣ်ညါဒီးသမံသမိးဟံးထီၣ်ဖီၣ်ထီၣ်အီၤအဂ့ၢ်န့ၣ် ပၢၤကီၢ်ကရူၢ်တပၤစံး၀ဲဒၣ်လီၤႉ

ဖဲအပူၤကွံာ်လါအီးကထိဘၢၣ် ၅သီႇ ဟါခီ ၇နၣ်ရံၣ်အဆၢကတီၢ်စ့ၢ်ကီး တၢ်ဟဲကူၣ်ခးသံ၀ဲ တၢ်ဘၣ်ဘျုး ဒံၣ်မိၣ်ခြ့ၣ်စံၣ် ကညီသုးမုၢ်ဒိၣ်(ဒံၣ်ခ့ၣ်ဘံၣ်အ့ၣ်)အသုးခိၣ် သုးခိၣ်ဒိၣ်ဂီၢ်ဂ့ၢ် စီၤ၀့ၢ်ထူ လၢအအိၣ် ဖဲကီးတရံး၀့ၢ်နီၣ်ဂံၢ် (၁) က၀ီၤဒ့ႇ ခၠီတီၤ တၢ်လီၢ်သီ နီၢ်ဂံၢ် (၂) ကျဲအံၤန့ၣ် ကဲထီၣ်တ့ၢ်သးအိၣ်၀ဲဘၣ်ဆၣ် တုၤလၢအခဲအံၤ တၢ်ဖီၣ်၀ဲ ၦၤဟဲကူၣ်သံတၢ်ဖိ တချုးဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ