Home တၢ်ကစီၣ် ကၠိဖိနီၢ်ဂံၢ်အါအဃိ သူမှဲခံကၠိ သဂၢၢ်ဘၣ် တၢ်သိၣ်လိတီၤဒၢးဒီး အိၣ်ဆိးတၢ်လီၢ် တၢ်ဂ့ၢ်ကီ

ကၠိဖိနီၢ်ဂံၢ်အါအဃိ သူမှဲခံကၠိ သဂၢၢ်ဘၣ် တၢ်သိၣ်လိတီၤဒၢးဒီး အိၣ်ဆိးတၢ်လီၢ် တၢ်ဂ့ၢ်ကီ

293
0
Photo: KIC

လါအီးကထိဘၢၣ် ၁၅ သီႇ၂၀၁၉ နံၣ်ႇ နါ၀့ၣ်ဖၠိစၣ်ႉ

ကီၢ်ကၠီၣ်တဲၣ်ႇ ဖိၣ်ဖြၣ်ကီၢ်ဆၣ် ခီကီၢ်ကၠိတဖျၢၣ်လၢအမ့ၢ် သူမှဲခံကၠိအံၤ တနံၣ်အံၤအပူၤ တူၢ်လိာ်၀ဲကၠိဖိနီၢ်ဂံၢ် အါန့ၢ်ဒံး တၢ်ပာ်ပနီၣ်အဃိ သဂၢၢ်ဘၣ်တၢ်ကီတၢ်ခဲလၢ အိၣ်ဆိးတၢ်လီၢ်ဒီး တၢ်သိၣ်လိတီၤဒၢးအဂ့ၢ် ၦၤဘၣ်မူဘၣ်ဒါတဖၣ် တဲ၀ဲန့ၣ်လီၤႉ

ခီကီၢ်ၦၤမၤတၢ်ဖိ ကၠိဖိတဖၣ်ပာ်ဂံၢ်ပာ်ဘါ၀ဲ ကၠိတဖျၢၣ်လၢအမ့ၢ် သူမှဲခံကၠိအံၤ တနံၣ်အံၤ ၂၀၁၉–၂၀ တၢ်သိၣ်လိနံၣ်အပူၤ ကၠိဖိနီၢ်ဂံၢ်အိၣ်၀ဲ ၁ႇ၀၀၀ ဃၣ်ဃၣ်အဃိ သဂၢၢ်ဘၣ်ဒီး တၢ်ကီတၢ်ခဲဒ်အံၤလီၤအဂ့ၢ် ကၠိခိၣ် စီၤၦ့ၤဒိၣ် တဲဘၣ် ခ့ၣ်အဲးစံၣ်–ကညီတၢ်ကစီၣ် ဒ်အံၤန့ၣ်လီၤႉ

“ဘၣ်ထွဲတၢ်တူၢ်လိာ်၀ဲ ကၠိဖိနီၢ်ဂံၢ်အံၤ ပအဲၣ်ဒိးပာ်ပနီၣ်အီၤလီၤႉ ကၠိဖိလၢအဲၣ်ဒိးမၤလိတၢ် ဒီးဟဲတုၤဖဲအံၤတဖၣ် ပမ့ၢ်တတူၢ်လိာ်အီၤဘၣ်န့ၣ် အ၀ဲသ့ၣ်ကသဂၢၢ်ဘၣ်ဒီး တၢ်ကီတၢ်ခဲလီၤႉ မ့ၢ်လဲၤထီၣ်ကၠိလၢ တၢ်လီၢ်အဂၤ ကစဲၤခံလီၤႉ လၢဖိသၣ်တဖၣ် တၢ်ခွဲးတၢ်ယာ် တၢ်သးစဲ အဲၣ်ဒီးထီၣ်ကၠိဖဲအံၤန့ၣ် ပကဘၣ်ကွၢ်ဒီး ဟ့ၣ်အီၤတၢ်ခွဲးတၢ်ယာ်လီၤႉ တၢ်ကီတၢ်ခဲအိၣ်သနာ်က့ တကပၤပဘၣ်တူၢ်လိာ်အိၣ်လီၤ” အဂ့ၢ် ကၠိခိၣ်စီၤၦ့ၤဒိၣ် တဲ၀ဲန့ၣ်လီၤႉ

သူမှဲခံကၠိအံၤ ကၠိဖိလၢကီၢ်ပူၤ ကီၢ်ဆၢတဖၣ်အပူၤ ဟဲမၤလိတၢ်ဒီး အိၣ်၀ဲ ၄ ပတီၢ်ဒ်အမ့ၢ် တီၤဖုၣ်ႇ တီၤခၢၣ်သးႇတီၤထီဒီး (Post Ten)န့ၣ်လီၤႉ ကၠိအံၤအပူၤ တၢ်သိၣ်လိန့ၢ်၀ဲ လံာ်ကိၤလၤ၀ါႇပယီၤႇ ယိၤႇ ကညီဒီး တၢ်လုၢ်အီၣ်သးသမူ တၢ်မၤလိသ့ၣ်တဖၣ် အဂ့ၢ် သ့ၣ်ညါဘၣ်န့ၣ်လီၤႉ

လၢန့ၢ်အမဲာ်ညါ ကၠိဖိလၢဖျိထီၣ် ကၠိဖဲန့ၣ်တဖၣ် တနီၤလဲၤထီၣ်မၤလိ စ့ၢ်ကီးတၢ်လၢ ကီၢ်ချၢထံဂုၤကီၢ်ဂၤအိၣ်၀ဲဒီး နုာ်လီၤမၤတၢ်လၢ ဂံၢ်ခီၣ်ထံးတၢ်ကရၢကရိ (INGO)အပူၤ အိၣ်၀ဲအဂ့ၢ် သ့ၣ်ညါဘၣ်န့ၣ်လီၤႉ

ကၠိဖိ စီၤနၢၤဒိၣ် တဲ၀ဲ“ဟဲထီၣ်ကၠိဖဲအံၤ တၢ်ကီတၢ်ခဲအိၣ် လၢအကပၤကပၤလီၤႉ မ့ၢ်ကွၢ်ကဒါက့ၤလၢ ဟံၣ်ဖိဃီဖိတကပၤ အိၣ်၀ဲလီၤႉ လၢကၠိတကပၤ ပ၀ဲပအိၣ်လၢ ကီၢ်ပယီၤအဃိ ပတၢ်ဂီၤတၢ်ဖီၣ်လၢထံကီၢ်ဖဲအံၤပာ်ပနီၣ်အီၤတအိၣ်ဘၣ်အဃိ ကီခဲလၢတၢ်လဲၤထီၣ် က့ၤလီၤတကပၤလီၤႉ အခဲအံၤ ကၠိဖိနီၢ်ဂံၢ်ဟဲအါထီၣ်ဒီး တၢ်သိၣ်လိ တီၤဒၢးသ့ၣ်တဖၣ် တလၢလီၣ်လၢၤဘၣ်ႉ ခါဆူမဲာ်ညါပအဲၣ်ဒိးလၢ ကအိၣ်လၢၦဲၤဒီး တီၤဒၢးသ့ၣ်တဖၣ် ဒ်ထံဂုၤကီၢ်ဂၤအသိးန့ၣ်လီၤ”အဂ့ၢ် တဲ၀ဲလီၤႉ

သူမှဲခံကၠိအံၤ တၢ်ပညိၣ်အီၤလၢ ခီကီၢ်ကၠိဖိတဖၣ် ကဟဲမၤလိတၢ်အဂီၢ်ဒီး တၢ်စးထီၣ်ဒုးအိၣ်ထီၣ်အီၤဖဲ ၂၀၀၂ နံၣ် လၢ တီၤဖုၣ်ကၠိအပတီၢ်ဒီး ကတီၢ်အံၤ အိၣ်တုၤလၢ (Post Ten)ကၠိ ပတီၢ်န့ၣ်လီၤႉ လၢကၠိတၢ်လဲၤ တရံးသးကန့ၢ်အဂီၢ် တၢ်မၤဘူၣ်ကစၢ်လၢအမ့ၢ် (The Hope Project, Spinning Top and I-Care Foundation)သ့ၣ်တဖၣ် မၤစၢၤ၀ဲအဂ့ၢ် သ့ၣ်ညါဘၣ်န့ၣ်လီၤႉ