တၢ်လီၢ်လၢထံထီၣ်သူအလီၢ်တဖၣ် ကညီဒွဲလၤကူၣ်သ့ဖိတဖၣ်လဲၤမၤဘူၣ်လီၤထံ

လါနိၣ်၀့ဘၢၣ် ၁၁သီႇ ၂၀၁၉ နံၣ်ႇ စၣ်အဲၣ်ဆူ

ဖဲကညီကီၢ်စဲၣ်ႇ ဖၣ်အၣ်ကီၢ်ဆၣ် ဘါကၣ်ႇ အီၣ်ကီၣ်ယ့ႇ ယသ့ၣ်ပၠၤႇ ပါကိသ၀ီကရူၢ်အပူၤသ၀ီသ့ၣ်တဖၣ် ခီဖျိလၢထံဟဲထီၣ်သူထီၣ်အဃိ လီၢ်က၀ီၤသ၀ီဖိလၢအသဂၢၢ်ဘၣ်ဒီးထံတၢ်ကီတၢ်ခဲတဖၣ်အဂီၢ် ကညီဒွဲလၤကူၣ်သ့ဖိစၢဖှိၣ်ကရၢ -KCO တီခိၣ်ရိၣ်မဲ၀ဲဒီး ဖဲလါနိၣ်၀့ဘၢၣ် ၈ သီအနံၤန့ၣ် လဲၤမၤဘူၣ်လီၤ၀ဲထံန့ၣ်လီၤႉ

ဖဲအပူၤကွံာ်လါအီးကထိဘၢၣ်လါထီၣ်သီန့ၣ် တၢ်လီၢ်ဟီၣ်က၀ီၤဖဲန့ၣ် ဒူဖိသ၀ီဖိသူ၀ဲဒၣ် ထံပူၤႇထံကမျၢတဖၣ် အပူၤန့ၣ် ထံသ့ၣ်တဖၣ်ဟဲထီၣ်သူထီၣ်၀ဲဒီး ညၣ်သ့ၣ်တဖၣ်စ့ၢ်ကီးသံ၀ဲဒၣ် တၢ်ကဲထီၣ်သးအဃိ လၢကသူက့ၤ ၀ဲထံအဂီၢ် ကဲထီၣ်၀ဲတၢ်ကီတၢ်ခဲန့ၣ် သ့ၣ်ညါဘၣ်လီၤႉ

လၢတၢ်ဟဲမၤဘူၣ်လီၤ၀ဲထံအံၤ ၦၤတီခိၣ်ရိၣ်မဲတၢ်ဖိ နါလါစ့ဖီစံး၀ဲလၢ“ဒ့မုၣ်ဖိတဂၤဟဲတဲဘၣ်ယၤႇ ယနၢ်ဟူလၢနၣ်ကိသ၀ီတပၤန့ၣ် ထံဟးဂီၤ၀ဲဒၣ်အဃိ လိၣ်ဘၣ်၀ဲတၢ်မၤစၢၤန့ၣ်လီၤႉ လၢတၢ်န့ၣ်အဃိ ပ၀ဲသ့ၣ်တဖၣ်ပအဲၣ်ဒိးမၤဘူၣ်၀ဲအဃိ တနံၤအံၤပဟဲဒီးမၤဘူၣ်၀ဲလီၤ”အဂ့ၢ် စံးဘၣ် ခ့ၣ်အဲးစံၣ်– ကညီတၢ်ကစီၣ်န့ၣ်လီၤႉ

ခီဖျိပသ့ၣ်ညါဘၣ်လၢကမျၢၢ်သ့ၣ်တဖၣ် ထံၣ်ဘၣ််၀ဲတၢ်ကီတၢ်ခဲအံၤအဖီခိၣ် ဘၣ်ပသးတမုာ်ဘၣ်ဒီး တၢ်လၢထံန့ၣ် ကဲ၀ဲဒၣ်ပသးသမူအဃိ မ့ၢ်ဆဲးဟဲကဲထီၣ်ဒီးအသးဒ်အံၤန့ၣ် လၢဖိစိၤလံၤစိၤအဂီၢ် ဆိကမိၣ်မၣ် တဘူၣ်လၢၤဘၣ် အဃိ တၢ်ကဲထီၣ်အသးသ့ၣ်တဖၣ်အံၤန့ၣ် ၦၤလၢအဘၣ်မူဘၣ်ဒါတဖၣ်ကဟံးမူဒါဒီးဘှါရှဲအီၤလိၣ်၀ဲဒၣ်အဂ့ၢ်န့ၣ် နါလါစ့ဖီဆဲးစံး၀ဲန့ၣ်လီၤႉ

လၢတၢ်ဟဲမၤဘူၣ်လီၤထံဘျီ၀ဲအံၤန့ၣ် ကီၢ်ပူၤ -KCO ဒဲလွၤကူၣ်သ့ဖိတဖၣ်ႇ -KCO အကရၢဖိ ကညီဒွဲ လၤကူၣ်သ့ဖိလၢအတုၤအိၣ်၀ဲ ကီၢ်ကၠီၣ်တဲၣ်ႇ ကီၢ်အမဲရကၤ သ့ၣ်တဖၣ် ပာ်ဖှိၣ်ထီၣ်သးဒီးလဲၤမၤဘူၣ်လီၤ၀ဲ ထံအီဃုာ်ဒီးထံလၢတၢ်သူအီၤတဖၣ် လၢသ၀ီ ၈ ဖျၢၣ်အဂီၢ် အလုၢ်အၦ့ၤပာ်ဖှိၣ်ခဲလၢာ် အကလီၢ် ၇၀ ကၠးအဂ့ၢ်န့ၣ် -KCO စံး၀ဲဒၣ်လီၤႉ

လီၢ်က၀ီၤအပူၤ သဂၢၢ်ဘၣ်၀ဲဒီးထံတၢ်ကီတၢ်ခဲအံၤ ဟဲကဲထီၣ်အသးန့ၣ် မ့ၢ်၀ဲ ဖဲသ၀ီတဖၣ်အခိၣ်အဃၢၤ ဂာ်လၢၢ်ကမူၣ် စဲးဖီကဟၣ် တၢ်မၤလီၢ်လၢ အလဲၤတရံးအသးလၢလၢၢ်သွဲၣ်လးတဖၣ်အံၤ အတၢ်ပၣ်ပူၣ်ထီၣ်၀ဲလၢၢ်သွဲၣ်လးအဃိ တၢ်ကဲထီၣ်သးလီၤအံၤအဂ့ၢ်န့ၣ် လီၢ်က၀ီၤတဖၣ်ပဲာ်ထံနီၤဖး၀ဲန့ၣ်လီၤႉ

နၣ်ကိသ၀ီဖိ နါလၣ်သါစံး၀ဲလၢ “အခဲအံၤဒုတၢ်ကီတၢ်ခဲအိၣ်၀ဲအါမးလီၤမီၣ်ႉ လၢတၢ်ကပီၤထီၣ်န့ၣ် ကဘၣ်သူထံလီၤႉ ၦၤဟဲမၤဘူၣ်လီၤမ့ၢ်အိၣ်ဒု ပအီဘၣ်ဒံးမီၤႉ လၢခံၦၤဟဲမၤဘူၣ်လီၤမ့ၢ်တအိၣ်လၢၤန့ၣ် ကကီခဲ၀ဲသၦၢ်ကတၢၢ်လီၤႉ ပမ့ၢ်ဆိကမိၣ်န့ၣ် မံတန့ၢ်အီၣ်တ၀ံၣ်လၢၤဘၣ်ႉ ဒ်သိးဒီး ထံသ့ၣ်တဖၣ်အံၤ ကကဆှီထီၣ်က့ၤအဂီၢ် ပ၀ဲသ့ၣ်တဖၣ် ပတမ့ၢ်ၦၤကူၣ်ဘၣ်ကူၣ်သ့ဖိတဖၣ်ဘၣ်ႉ အခဲအံၤၦၤလၢအဟဲမၤဘူၣ်လီၤတၢ် တၢ်ကရၢကရိတဖၣ် ခဲလၢာ်ပသးခုစံးဘျုးဘၣ်အ၀ဲသ့ၣ်ဒိၣ်မးလီၤ ”န့ၣ် စံး၀ဲန့ၣ်လီၤႉ

ဘၣ်ထွဲဒီး လီၢ်က၀ီၤဖိ သဂၢၢ်ဘၣ်ဒီး ထံတၢ်ကီတၢ်ခဲ တၢ်အိၣ်သးတဖၣ်အံၤန့ၣ် ဖဲအပူာ်ကွံာ်လါအီးကထိဘၢၣ် လါထီၣ်သီန့ၣ် ကညီကီၢ်စဲၣ်ကိတိာ်ခိၣ်ကျၢၢ်အနီၢ်ကစၢ်ဒၣ်၀ဲတီခိၣ်ရိၣ်မဲ၀ဲဒီး မၤ၀ဲတၢ်နုာ်လီၤသမံသမိးတၢ်ဒီး တၢ်မၤကွၢ်၀ဲ ထံအဒိတဖၣ်၀ံၤ တၢ်မ့ၢ်ဟဲကဲထီၣ်သးတမံၤလၢ်လၢ်န့ၣ် ကလိာ်ကွီၢ်၀ဲ ဂာ်လၢၢ်ကမူၣ်စဲးဖီကဟၣ်တၢ်မၤလီၢ်အ၀ဲန့ၣ်အဂ့ၢ် ကီၢ်စဲၣ်ကိတိာ်ခိၣ်ကျၢၢ်စံး၀ဲဒၣ်န့ၣ်လီၤႉ

လၢန့ၣ်အမဲာ်ညါ လီၢ်က၀ီၤသ၀ီဖိလၢအဘၣ်သဂၢၢ်၀ဲဒီးထံတၢ်ကီတၢ်ခဲအံၤအဂီၢ် ကီၢ်စဲၣ် ပဒိၣ်ဒီးၦၤလၢအသူၣ်အိၣ်သးအိၣ် မၤဘူၣ်ထံတဖၣ်စ့ၢ်ကီး ဟဲမၤ၀ဲတၢ်ဟ့ၣ်နီၤလီၤထံန့ၣ်လီၤႉ ခီဖျိလၢထံဟဲသူထီၣ်အဃိ နၣ်ကိသ၀ီဒီးသ၀ီလၢအဘူးလိာ်သးဖဲန့ၣ်တဖၣ် ခဲလၢာ် ၃၀ ဖျၢၣ်ဃၣ်ဃၣ်ဒီး သဂၢၢ်ဘၣ်၀ဲဒၣ်ဒီးတၢ်အိၣ်သးလီၤအံၤအဂ့ၢ်န့ၣ် လီၢ်က၀ီၤတဖၣ်စံး၀ဲဒၣ်လီၤႉ