ဖၣ်အၣ်ယ့ၣ်တွ့ကိသ၀ီအပူၤ ညၣ်တဖၣ်သံအဃိ လီၢ်က၀ီၤဖိတဖၣ် တၢ်ဘၣ်ယိၣ် ဟဲအါထီၣ်

လါအီးကထိဘၢၣ် ၁၆ သီႇ၂၀၁၉နံၣ်ႇစီၤရှါႉ

တကီၢ်ခါခဲအံၤလၢ၀့ၢ်ဖၣ်အၣ်အလီၢ်ခံ ဘါကၣ်သ၀ီကရူၢ်ယ့ၣ်တွ့ကိသ၀ီလၢ အအိၣ်ဘူးဒီးနၣ်ကိသ၀ီန့ၣ် ထံသ့ၣ်တဖၣ်အမံၤဒိၣ်ထီၣ် ခီဖျိထံသ့ၣ်တဖၣ် တမ့ၢ်ဒ်သိးလၢအပူၤကွံာ်ဒီး ဟဲသူထီၣ်၀ဲန့ၣ်လီၤႉ ထံသ့ၣ်တဖၣ်သူထီၣ်၀ံၤအလီၢ်ခံဖဲလါအီးကထိဘၢၣ်၁၅သီ အနံၤန့ၣ် ညၣ်သ့ၣ်တဖၣ်သံဒီး ထီၣ်ဖီ၀ဲဒၣ်ဒီဒူၣ်ဒီထၢအဃိ ဘၣ်အိၣ်လၢတၢ်ဘၣ်ယိၣ်ဘၣ်ဘှီပူၤလီၤအဂ့ၢ် လီၢ်က၀ီၤဖိသ့ၣ်တဖၣ်စံး၀ဲ ဒၣ်န့ၣ်လီၤႉ

စးထီၣ်လၢ လါအိးကထိဘၢၣ် ထီၣ်သီကတီၢ် ထံဟဲထီၣ်သူအဃိ ညၣ်သံ၀ဲအဂ့ၢ် သ၀ီဖိတဖၣ်တဲ၀ဲ ခ့ၣ်အဲးစံၣ် ဒ်အံၤန့ၣ်လီၤႉ ယ့ၣ်တွ့ကိ သ၀ီသးၦၢ် စီၤငွ့ၣ်လိစံး၀ဲ“တဂီၤအံၤ ညၣ်သံအုၣ် ထီၣ်ဖီဒီဒူၣ်န့ၣ်လီၤႉ ညၣ်ဘၣ်တၢ်အစုၣ်ဧါႉ သ့ၣ်လၣ်အုၣ်အဃိဧါႉ တသ့ၣ်ညါလီၤတံၢ်ဘၣ်သနာ်က့ ပဆိကမိၣ်ဒု ခီဖျိလၢၢ်သွဲၣ်လးအဃိလီၤႉ တမ့ၢ်ထဲသ၀ီဖဲအံၤဘၣ် လၢကီးယ့ႇ ကမါသ၀ီတကပၤ သနာ်က့ နၢ်ဟူဘၣ်လၢ ညၣ်သံဒီဒူၣ်လီၤႉ ထံထီၣ်သူ ညၣ်သံဒ်အံၤ စးထီၣ်ကဲထီၣ်အသးလၢ တနံၣ်အံၤအတီၢ်ပူၤလီၤ”အဂ့ၢ် စံး၀ဲလီၤႉ

လီၢ်က၀ီၤဖိသ့ၣ်တဖၣ်အံၤ ထံဟဲထီၣ်သူအဃိ သူက့ၤ၀ဲထံလၢ ထံပူၤတဖၣ်တဘူၣ်လၢၤဘၣ်ဒီး သူက့ၤ၀ဲထံအီဒၢသ့ၣ်တဖၣ်ဒီး ထံအလွဲၢ်ဆီတလဲသးဒ်အံၤ သ၀ီဖိတဖၣ် တယး၀ဲလၢ ဂာ်လၢၢ်ကမူၣ်(ဘံလးမၠ့ၣ်)စဲးဖီကဟၣ်တၢ်မၤလီၢ် လၢအဘူးဖဲသ၀ီဖဲန့ၣ် ပာ်ပူၣ်ဃာ်၀ဲ လၢၢ်သွဲၣ်လးအဃိလီၤ အဂ့ၢ် ပဲၣ်ထံနီၤဖး၀ဲန့ၣ်လီၤႉ
နါထူလ့ၣ်လၢ အမ့ၢ် ယ့ၣ်ထွ့ကိသ၀ီဖိတဂၤ စံး၀ဲ “ဟဲအိၣ်ဖဲအံၤ ဖးယံာ်လံ ထံဟဲသူထီၣ် ညၣ်သံဒ်အံၤ တထံၣ်ဘၣ်နီတဘျီဘၣ် ထံၣ်ဘၣ်ခဲအံၤလီၤႉ ယဆိမိၣ်လၢ ညၣ်တဖၣ်အံၤ ဘၣ်ဒီးထံအံၤ အီဘၣ်ထံအံၤအဃိ သံလီၤႉ ၦၤတဲလၢ မ့ၢ်တဲဘၣ်ဃး လၢၢ်သွဲၣ်လးအဂ့ၢ်န့ၣ် ၦၤကဖီၣ်အဃိ တဲတဘူၣ်အါအါဘၣ်”အဂ့ၢ် စံး၀ဲန့ၣ်လီၤႉ
ညၣ်တဖၣ်သံအဃိ ကီၢ်ပဒိၣ်၀ဲၤကျိၤ ဘၣ်မူဘၣ်ဒါတကပၤ ဟဲလီၤကွၢ်ဃိထံတၢ် အိၣ်၀ဲဒီး ညၣ်သံအခီၣ်ထံးခီၣ်ဘိတဖၣ် ကက့ၤမၤကွၢ်၀ဲလၢ တၢ်မၤကွၢ်အလီၢ်၀ံၤ ကက့ၤဒုးသ့ၣ်ညါ၀ဲ ကမျၢၢ်တဖၣ်အဂ့ၢ် ကညီကီၢ်စဲၣ် ဘုၣ်ဖီၣ်မၤညၣ်၀ဲၤကျိၤ ၦၤနဲၣ်တၢ် ဒီၣ်အ့အ့စီၣ် စံး၀ဲဒ်အံၤန့ၣ်လီၤႉ

“နၢ်ဟူလၢ ညၣ်သံအဃိ ဟဲကွၢ်အီၤလီၤႉ ကတီၢ်အံၤ တၢ်မၤကွၢ်အသိး ထံအံၤအိၣ်၀ဲ (Ph)၆ႉ၁ႇ ၆ႉ၈ အဘၢၣ်စၢၤ အဃိ ညၣ်သံတန့ၢ်ဘၣ်ႉ ဘၣ်မနုၤအဃိ ညၣ်မူသံလဲၣ်တခီ ပက့ၤစိာ်၀ဲ ညၣ်ဒီး ပကဆှၢလၢ ၀့ၢ်တကူၣ် ဘုၣ်ဖီၣ်မၤညၣ်၀ဲၤကျိၤ တၢ်မၤကွၢ်အလီၢ်လီၤႉ တၢ်အစၢမ့ၢ်ဟဲထီၣ် ဖဲန့ၣ်မး ပဟ့ၣ်တၢ်အဆၢ ကန့ၢ်လီၤ”အဂ့ၢ် စံး၀ဲလီၤႉ

နဲးကိသ၀ီဃုာ်ဒီး သ၀ီလၢအအိၣ်ဘူးဖဲန့ၣ်သ့ၣ်တဖၣ် သဂၢၢ်ဘၣ်ဒီး တၢ်အိၣ်သး၀ဲန့ၣ်အဖီခိၣ် ဖဲအပူၤကွံာ် လါအိးကထိဘၢၣ် ၁၁ နံၤ မုၢ်ထူၣ်ကတီၢ် ကညီကီၢ်စဲၣ် ကိတိာ်ခိၣ်ကျၢၢ်အနီၢ်ကစၢ်ဒၣ်၀ဲ ဟဲလီၤဃိထံကွၢ်၀ဲ တၢ်အိၣ်သးတဖၣ်အဂ့ၢ် သ့ၣ်ညါဘၣ်လီၤႉ
ကတီၢ်အံၤ တၢ်အိၣ်သးတဖၣ်အသိး ဖၣ်အၣ်ကီၢ်ဆၣ်အပူၤ နၣ်ကိးသ၀ီဃုာ်ဒီး ဘါကၣ်ႇကီးယ့ႇယသ့ၣ်ပၠဲၣ်ႇပဲကိသ၀ီကရူၢ်အပူၤ သ၀ီ ၃၀ ဃၣ်ဃၣ် ကသဂၢၢ်ဘၣ်ဒီး တၢ်အိၣ်သး၀ဲဒ်အံၤသ့၀ဲအဂ့ၢ် ၦၤလီၢ်က၀ီၤဖိတဖၣ်စံး၀ဲန့ၣ်လီၤႉ