လါနိၣ်၀့ဘၢၣ် ၁၈ သီႇ ၂၀၁၉ နံၣ်ႇ စီၤထိလ့
ဖဲတၢ်ပတုာ်တၢ်ခးတၢ်အိၣ်သးအတီၢ်ပူၤ လၢလီၢ်က၀ီၤသ၀ီဖိတဖၣ် ကဒိးန့ၢ်ဘၣ်တၢ်တြီတၢ်တြၢ်အဂီၢ် ယံာ်ဒံး၀ဲ အဂ့ၢ်န့ၣ် ဖဲလါနိၣ်၀့ဘၢၣ် ၁၅ သီအနံၤႇ ကညီၦၤဂ့ၢ်၀ီခွဲးယာ်ကရူၢ် – KHRG ထုးထီၣ်၀ဲလံာ်ဘိးဘၣ်ရၤလီၤ လၢအမ့ၢ် ‘ကဒိးန့ၢ်ဘၣ်တၢ်တြီတၢ်တြၢ်အဂီၢ် ယံာ်၀ဲဒံး’ အံၤန့ၣ် ဒုးနဲၣ်ဃာ်၀ဲန့ၣ်လီၤႉ
လံာ်ဘိးဘၣ်ရၤလီၤအ၀ဲန့ၣ် လၢကီၢ်ပယီၤမုၢ်ထီၣ်ကလံၤထံးတကပၤ လီၢ်က၀ီၤကမျၢၢ်တဖၣ်န့ၣ် တၢ်မုာ်တၢ်ခုၣ် တၢ်တြီတၢ်တြၢ်ဒီးႇ တၢ်သ့ဟံးမူဒါအဖီခိၣ်န့ၣ် တၢ်ထံၣ်တၢ်ပာ်သးသ့ၣ်တဖၣ် ဒ်သိးၦၤကသ့ၣ်ညါဘၣ်အါအါအဂီၢ် ပညိၣ်ဃာ်၀ဲဒီးဘၣ်တၢ်ထုးထီၣ်၀ဲလီၤအဂ့ၢ်န့ၣ် ကညီၦၤဂ့ၢ်၀ီခွဲးယာ် စံး၀ဲဒၣ်လီၤႉ
လၢန့ၣ်အမဲာ်ညါ ဖဲ ၂၀၁၂ တၢ်မၤ၀ဲ ပတြီာ်တၢ်ပတုာ်ဃာ်၀ံၤအလီၢ်ခံ တၢ်ဒုးတၢ်ယၤသ့ၣ်တဖၣ်စှၤလီၤ၀ဲဘၣ်ဆၣ် လီၢ်က၀ီၤကမျၢၢ်တဖၣ်သဂၢၢ်ဘၣ်၀ဲဒၣ်ဒီး တၢ်ထီဒါၦၤဂ့ၢ်၀ီခွဲးယာ်လၢအသီတဖၣ် ဒ်အမ့ၢ် တၢ်ဟံး ဆူၣ်ဟီၣ်ခိၣ် ကပံာ်ႇ မုၢ်ကျိၤ၀ဲၤကွာ်အတၢ်ဖံးတၢ်မၤအဃိ တၢ်ဘၣ်ဒိဘၣ်ထံးအိၣ်ထီၣ် ဒီး တၢ်ဂ့ၢ်လၢအဂၤ တဖၣ်အကလုာ်ကလုာ်န့ၣ်လီၤႉ လၢတၢ်န့ၣ်အဃိ ကဒိးန့ၢ်ဘၣ်တၢ်တီတတြၢ်အဂီၢ် တၢ်အိၣ်သးအိၣ်၀ဲဖးယံာ်ဒံးအဂ့ၢ်န့ၣ် KHRG ၦၤနဲၣ်တၢ် နီၢ်ထူထူ စံးဘၣ်ခ့ၣ်အဲးစံၣ်လီၤႉ
အ၀ဲစံး၀ဲလၢ “ကမျၢၢ်လၢအတူၢ်ဘၣ်၀ဲ တၢ်ထီဒါၦၤဂ့ၢ်၀ီခွဲးယာ်န့ၣ် လိၣ်ဘၣ်၀ဲဒၣ်တၢ်တီတၢ်တြၢ်လီၤႉ လၢအ၀ဲသ့ၣ်ကလဲၤတၢၣ်၀ဲတၢ်ဆူ ကွီၢ်ဘျီၣ်အဂီၢ်တခီဒု တသ့၀ဲဘၣ်ႉ ဘၣ်ပျံၤ၀ဲဒၣ်ၦၤဖီၣ်စုက၀ဲၤဖိတဖၣ်လီၤႉ ခ့ၣ်အဲၣ်ယူၣ် –ကညီဒီကလုာ်စၢဖှိၣ်ကရၢ မ့ၢ်ဂ့ၤႇ ကီၢ်ပယီၤပဒိၣ် မ့ၢ်ဂ့ၤ ပအဲၣ်ဒိးတဲလၢ တၢ်ကလဲၤကွီၢ်ဘျီအဂီၢ် ကမျၢၢ်တဖၣ်လၢအသဂၢၢ်ဘၣ်ဒီးတၢ်ကီတၢ်ခဲတဖၣ် ခဲလၢာ်န့ၣ် ပကဘှါဆှဲသကိးအီၤႇ လၢတၢ်စံၣ်ညီၣ်ပီတ့ဂ့ၢ်၀ီသနူစ့ၢ်ကီး ကဒုးအိၣ်ဖျါထီၣ် သနူလၢအအိၣ်ဒီးတၢ်သဘျ့ဒီး တၢ်တီတၢ်တြၢ်န့ၣ် ပအဲၣ်ဒိးဟ့ၣ်သဆၣ်ထီၣ်အခံလီၤ” န့ၣ် စံး၀ဲဒၣ်ဖဲလါနိၣ်၀့ဘၢၣ် ၁၅ သီအနံၤန့ၣ်လီၤႉ
လၢန့ၣ်အမဲာ်ညါ ကီၢ်ပယီၤန့ၣ်မ့ၢ်ထံကီၢ်တဘ့ၣ်လၢ ဆဲးလီၤဃာ်၀ဲစုမုၢ်ကျၢၢ်လၢ ထံဂုၤကီၢ်ဂၤ ၦၤဂ့ၢ်၀ီခွဲးယာ်ဒီး တၢ်ဟ့ၣ်သးကညီၤတၢ် အလံာ်ဃံးဃာ်အပူၤအဃိ ပကဘၣ်ပာ်ကဲဒီးတြီဆၢမၤၦဲၤအီၤအဂ့ၢ်ႇ ကီၢ်ပယီၤမုၢ်ထီၣ်ကလံၤထံးအပူၤန့ၣ် တၢ်တြီဃာ်ဒီးဟ့ၣ်လီၤတၢ်ကလုၢ်လၢ မုၢ်နၤခီန့ၣ်လီၢ်က၀ီၤကမျၢၢ်တဖၣ် တဘၣ်လဲၤတၢ်က့ၤတၢ်ဘၣ်တၢ်ဂ့ၢ်ႇ သ၀ီဖိအိၣ်တၢ်လီၢ်အကပၤန့ၣ် တၢ်ဟ့ၣ်သုးတၢ်သိၣ်လိႇ သုးအတၢ်ဟူးတၢ်ဂဲၤတဖၣ် ကပတုာ်အီၤဒီး တၢ်ထီဒါၦၤဂ့ၢ်၀ီခွဲးယာ်လၢသ၀ီဖိတဖၣ်အဂီၢ် ကဒုးလိၣ်ထီၣ်ဖးထီၣ် တၢ်စံၣ်ညီၣ်ပီတ့သနူလၢ အအိၣ်ဒီး တၢ်သဘျ့ဒီး တၢ်တီတၢ်တြၢ်အဂ့ၢ်န့ၣ် လံာ်တၢ်ဘိးဘၣ်&ၤအပူၤ ဟ့ၣ် ဟ့ၣ်သဆၣ်ထီၣ်ဃာ်၀ဲန့ၣ်လီၤႉ
လၢလံာ်တၢ်ဘိးဘၣ်ရၤလီၤအံၤန့ၣ် KHRG နုာ်လီၤထၢဖှိၣ်တ့ၢ်၀ဲ တၢ်ဂ့ၢ်တၢ်ကျိၤ လၢပျီပူၤ စးထီၣ်ဖဲ ၂၀၁၈ လါနိၣ်၀့ဘၢၣ် တုၤလၢ ၂၀၁၉နံၣ်န့ၣ်လီၤႉ ဖဲန့ၣ်တၢ်ထံၣ်လိာ်အိၣ်သကိး၀ဲ လီၢ်က၀ီၤကမျၢၢ် ၁၅၀ ဂၤဃၣ်ဃၣ် အကျါပၣ်ဃုာ်၀ဲဒီး ပိာ်မုၣ် ၃၆ ဂၤန့ၣ် KHRG စံး၀ဲဒၣ်လီၤႉ
