ထၢၣ်၀ံချၢတၢ်မၤလီၢ် ဘၣ်တၢ်ပံးကွံာ်အဃိ ကီၢ်ပယီၤၦၤမၤတၢ်ဖိ ၈၀ ဘျဲၣ် ဟဲက့ၤကဒါက့ၤလၢအလီၢ်အကျဲ

လါနိၣ်၀့ဘၢၣ် ၁၉ သီႇ ၂၀၁၉ နံၣ်ႇ န့ၣ်နီၣ်

ကီၢ်ကၠီၣ်တဲၣ် ခၠိၤဘူရံကီၢ်ရ့ၣ် စံၤလၣ်ခၠါကီၢ်ဆၣ် လါခၠၣ်ဘါတမၤလီၢ်လၢ တရူးထံဖိကီၢ်ဖိပၢ၀ဲ ထၢၣ်၀ံချၢတၢ်မၤလီၢ်ဘၣ်တၢ်ပံးဃာ်၀ဲအဃိ လၢတၢ်မၤလီၢ်အပူၤ ၦၤကီၢ်ပယီၤဖိလၢအမၤတၢ်မၤဖဲန့ၣ် ၆၂၀ ဂၤဘျဲၣ် အကျါ အဂၤ ၈၀ ဘျဲၣ်န့ၣ် ဖဲလါနိၣ်၀့ဘၢၣ် ၁၉ သီ မုၢ်ဃ့ၢ်လီၤအဆၢကတီၢ်န့ၣ် ဟဲက့ၤတုၤ၀ဲဒၣ်လၢ မၠၣ်၀တံၣ်၀့ၢ်ပူၤန့ၣ်လီၤႉ

ဘၣ်ဃးဒီးၦၤမၤတၢ်ဖိဟဲက့ၤ၀ဲအဂ့ၢ်န့ၣ် FAR ၦၤမၤတၢ်ဖိဂ့ၢ်၀ီကရူၢ် လၢအအိၣ်ဖဲ ကီၢ်ကၠီၣ်တဲၣ် ခၠိၤဘးရံကီၢ်ရ့ၣ်ႇ လယီ၀့ၢ်ပူၤအံၤ သဲစးၦၤဟ့ၣ်ကူၣ်တၢ် မၣ်သၣ်ဒၣ်ထိ စံး၀ဲလၢ “သ့ၣ်ခိၣ်န့ၣ်လဲၤဟံးလိၢ်စ့လၢစ့တၢး လၢတၢ်မၤကလဲၤ တရံးအသးအဃိ အကမၢ်အါထီၣ်၀ဲဒီးစ့တလဲၤတရံးလၢၤအဃိ ဘၣ်ပံးဃာ်က့ၤ၀ဲ တၢ်မၤလီၢ်န့ၣ်လီၤႉ သ့ၣ်ခိၣ်ဟးအိၣ်ခူသူၣ်လံႉ ကီၢ်ကၠီၣ်တဲၣ်အၦၤလွံၢ်ဂၤ ဟးဘှါဆှဲ၀ဲတၢ်ဂ့ၢ်ကီအံၤလီၤႉ တၢ်လၢအပၢဘၣ်၀ဲသ့ၣ်တဖၣ်န့ၣ် ကီၢ်ကၠီၣ်တဲၣ်ပဒိၣ်တဖၣ် ဟံးဃာ်ကွံာ်အီၤလံန့ၣ်လီၤ” အဂ့ၢ်န့ၣ် စံး၀ဲဒၣ်လီၤႉ

တၢ်မၤလီၢ်အ၀ဲန့ၣ်အပူၤ ၦၤမၤတၢ်ဖိအိၣ်၀ဲ အဂၤ ၁ႇ၀၀၀ ဘျဲၣ်အကျါ ကီၢ်ပယီၤၦၤမၤတၢ်ဖိအိၣ်၀ဲ ၆၂၀ ဂၤႇ ကၤဘီဒံယါ ၦၤမၤတၢ်ဖိ ၃၉၈ ဂၤ ဒီး ကီၢ်ကၠီၣ်တဲၣ်ၦၤမၤတၢ်ဖိအိၣ်လၢအကယၤန့ၣ်လီၤႉ ဖဲလါအီးကထိဘၢၣ် ၃၀ သီ န့ၣ်တၢ်စးထီၣ်ပံး၀ဲတၢ်မၤလီၢ်ဒီး ခီဖျိလၢ ကီၢ်ပယီၤၦၤမၤတၢ်ဖိတဖၣ်ဃ့၀ဲတၢ်မၤစၢၤအဃိ FAR ကရူၢ်ဒီး ကီၢ်ကၠီၣ်တဲၣ်ပူၤ ကီၢ်ပယီၤၦၤမၤတၢ်ဖိ မီၢ်သီၦၤဘၣ်မူဘၣ်ဒါတဖၣ် ဒ်တၢ်ဘျၢသဲစးအိၣ်အသိး ဒ်သိးကဒိးန့ၢ်ဘၣ်စ့အီၣ်လိးအဂီၢ် ကပာ်ဖှိၣ်မၤသကိးတၢ်အိၣ်၀ဲအဂ့ၢ်န့ၣ် သ့ၣ်ညါဘၣ်လီၤႉ

“ကီၢ်ပယီၤၦၤမၤတၢ်ဖိတနီၤန့ၣ် တက့ၤ၀ဲလၢအလီၢ်အကျဲဘၣ်ဒီး ဆဲးကျိး၀ဲဒၣ်ဒီး (Agent), တနီၤန့ၣ် ကတီၤထီၣ်အသးလၢကဆီတလဲက့ၤတၢ်မၤလၢအသီလီၤႉ ၦၤလၢအဟဲက့ၤတဖၣ် အါတက့ၢ်န့ၣ် မ့ၢ်ၦၤလၢအမၤတၢ်မၤလၢ တၢ်မၤလီၢ်အ၀ဲန့ၣ်အိၣ်၀ဲလၢ ၃ နံၣ် ဃၣ်ဃၣ်လံလီၤႉ”

ကီၢ်ကၠီၣ်တဲၣ်ပူၤ MOU သနူအပူၤန့ၣ် နမ့ၢ်အဲၣ်ဒိးမၤတၢ်မၤထီရီၤန့ၣ် နမၤသ့၀ဲထဲ လွံၢ်နံၣ်အသိး နမ့ၢ်အဲၣ်ဒိးဆီတလဲတၢ်မၤန့ၣ် နကဘၣ်ဆဲးမၤလံာ်ဃံးဃာ်လၢအသီန့ၣ်လီၤႉ တၢ်မၤလီၢ်အ၀ဲန့ၣ်အပူၤ ကီၢ်ပယီၤၦၤမၤတၢ်ဖိ ၆၂၀ ဂၤဘျဲၣ်န့ၣ် မ့ၢ်ၦၤလၢအစိာ်၀ဲဒၣ် MOU အလံာ်ဒီး ၦၤလၢအဖီၣ်၀ဲဒၣ် CI အလံာ် န့ၣ်အိၣ်၀ဲ အဂၤ ၂၀ ဘျဲၣ် အဂ့ၢ်န့ၣ် သ့ၣ်ညါဘၣ်လၢၦၤမၤတၢ်မၤဖိတဖၣ်အအိၣ်န့ၣ်လီၤႉ

ၦၤလၢအဟဲက့ၤကဒါက့ၤအကျါ မၣ်အ့မၠၣ်သူၤအံၤ ပၣ်ဃုာ်၀ဲဒီး အ၀ဲအိၣ်ဆိးတၢ်လီၢ်လၢ ပကိကီၢ်ခီဒိၣ်ႇ ဖၠူကီၢ်ဆၣ် န့ၣ်လီၤႉ အ၀ဲစံး၀ဲလၢ “လၢတၢ်မၤလီၢ်အံၤ တနံၤန့ၣ်န့ၢ်၀ဲ ၃၀၀ ဘးလီၤႉ တၢ်မၤမ့ၢ်ဂ့ၤ (0T)မ့ၢ်အိၣ်န့ၣ် တလါန့ၣ် န့ၢ်၀ဲလၢစ့ပယီၤ ၇ ကလီၢ်ကၠး ဒီး 0T မ့ၢ်တအိၣ်ဘၣ်န့ၣ် န့ၢ်၀ဲဒၣ်ထဲ ၃ ကလီၢ်ဘျဲၣ် ၄ ကလီၢ်န့ၣ်လီၤႉ

ခီဖျိလၢ ပထံပကီၢ်ပူၤ တၢ်ဖံးတၢ်မၤအိၣ်စှၤ၀ဲအဃိ ပလဲၤမၤ၀ဲဒၣ်လီၤႉ ပတနၢ်ပၢၢ်ၦၤကျိာ်အဃိ ၦၤထံၣ်ဆံးၦၤအိၣ်၀ဲလီၤႉ ပကိၢ်သးလၢ ခါဆူညါကဟဲကဲထီၣ်အသးဒ်အံၤအဃိ ကီၢ်ကၠီၣ်တဲၣ်ဒုတလဲၤလၢၤဘၣ်” အဂ့ၢ်န့ၣ် စံး၀ဲဒၣ်လီၤႉ

ကီၢ်ကၠီၣ်တဲၣ်ပူၤန့ၣ် တၢ်ကပံးတၢ်မၤလီၢ်အဂီၢ် တၢ်မ့ၢ်တတဲကျၢဆိအီၤန့ၣ် တၢ်ကဘၣ်ဟ့ၣ်၀ဲစ့အီၣ်လိးအမဲာ်ညါ ၦၤမၤတၢ်မၤဖိတဖၣ် တၢ်ကဘၣ်ဟ့ၣ်၀ဲတၢ်မၤအဘူးအလဲ အစှၤကတၢၢ် အသီ ၃၀ ဒီး ၂၄၀ အဘၢၣ်စၢၤ တၢ်ကဘၣ်ဟ့ၣ်အီၤစ့အီၣ်လိးန့ၣ် တၢ်ပာ်ပနီၣ်ဃာ်၀ဲန့ၣ်လီၤႉ

ဖဲတလါအံၤအတီၢ်ပူၤ ကီၢ်ပယီၤပူၤန့ၣ် တၢ်မၤလီၢ်လၢတစှၤန့ၢ်ဒံး ၆ ဖျၢၣ် ဘၣ်တၢ်ပံးဃာ်၀ဲဒီး ကီၢ်ပယီၤၦၤမၤတၢ်ဖိ အဂၤ ၃ႇ၀၀၀ ဃၣ်ဃၣ် ကဲထီၣ်၀ဲဒၣ်ၦၤတၢ်ဖံးတၢ်မၤတအိၣ်လၢၤဘၣ်လီၤႉ