Home တၢ်ကစီၣ် ၦၤဂ့ၢ်၀ီခွဲးယာ်အတၢ်ဟူးတၢ်ဂဲၤတဖၣ်သးစၢ်တဖၣ်ကပၣ်ဃုာ်အါထီၣ်အဂီၢ် KHRG ဟ့ၣ်သဆၣ်ထီၣ်၀ဲ

ၦၤဂ့ၢ်၀ီခွဲးယာ်အတၢ်ဟူးတၢ်ဂဲၤတဖၣ်သးစၢ်တဖၣ်ကပၣ်ဃုာ်အါထီၣ်အဂီၢ် KHRG ဟ့ၣ်သဆၣ်ထီၣ်၀ဲ

318
0

လါဒံၣ်စ့ဘၢၣ် ၁၀ သီႇ ၂၀၁၉ နံၣ်ႇ စးအဲၣ်ဆူ

ၦၤဂ့ၢ်၀ီခွဲးယာ်အတၢ်ဟူးတၢ်ဂဲၤတဖၣ်အပူၤသူၣ်ဘီၣ်သးစၢ်တဖၣ် ကဟူးဂဲၤပၣ်ဃုာ်အါထီၣ်၀ဲအဂီၢ် လိၣ်၀ဲအဂ့ၢ်န့ၣ် ကညီၦၤဂ့ၢ်၀ီခွဲးယာ်ကရူၢ် KHRG ဟ့ၣ်သဆၣ်ထီၣ်၀ဲ ဖဲလါဒံၣ်စ့ဘၢၣ် ၁၀ သီလၢအလီၤဘၣ်၀ဲ ဟီၣ်ခိၣ်ဒီဘ့ၣ်ၦၤဂ့ၢ်၀ီ ခွဲးယာ်အမုၢ်နံၤအံၤန့ၣ်လီၤႉ

ကီၢ်ပယီၤပူၤန့ၣ်တုၤလၢအခဲအံၤ တၢ်မၤကမၣ်၀ဲၦၤဂ့ၢ်၀ီခွဲးယာ်တဖၣ် ဆဲးအိၣ်ဒံး၀ဲဒီးႇ လၢၦၤဂ့ၢ်၀ီခွဲးယာ်တၢ်တုၤသိး ထဲသိးအဂီၢ် တတုၤထီၣ်ထီၣ်ဘးဒံးဘၣ်အဃိႇသူၣ်ဘီၣ်သးစၢ်တဖၣ်ကဘၣ်ဟူးဂဲၤပၣ်ဃုာ်အါထီၣ်အဂီၢ်လိၣ်၀ဲအဂ့ၢ်န့ၣ် ကညီၦၤဂ့ၢ်၀ီခဲွးယာ်ကရူၢ် ဟ့ၣ်သဆၣ်ထီၣ်၀ဲဖဲ တၢ်မၤလၤကပီၤ၀ဲ ၦၤဂ့ၢ်၀ီခွဲးယာ်အမုၢ်နံၤဖဲဒူသထူၣ်ကီၢ်ရ့ၣ်ႇ ဘံလ့ကီၢ်ဆၣ်ကွံလ့သ၀ီအပူၤန့ၣ်လီၤႉ

KHRG ၦၤနဲၣ်တၢ် နီၢ်ထူထူ စံး၀ဲလၢ “တၢ်မၤကမၣ်ၦၤဂ့ၢ်၀ီခွဲးယာ်အံၤန့ၣ် အက့ၢ်အဂီၤလၢအသီတဖၣ်ဟဲအါထီၣ်၀ဲဒၣ်လီၤႉ လၢကစှၤလီၤအဂီၢ်န့ၣ်တအိၣ်၀ဲဘၣ်ဒီး လၢကဟဲအါထီၣ်န့ၣ်တအိၣ်၀ဲဘၣ်ႉ ကိးနံၣ်ဒဲးဟီၣ်ခိၣ်ကပံာ်တၢ်ဂ့ၢ်ကီတဖၣ်န့ၣ် ခီဖျိလၢတၢ်ဂုၤထီၣ်ပသီထီၣ်အတၢ်တိာ်ကျဲၤအဃိလီၢ်က၀ီၤၦၤထူလံၤဖိတဖၣ်အဖီခိၣ်န့ၣ်ခီဖျိလၢၦၤဂ့ၢ်၀ီခွဲးယာ် အတၢ်န့ၢ်ဘၣ်တဖၣ် တၢ်တလူၤပိာ်မၤထွဲ၀ဲအဃိ လီၢ်က၀ီၤဖိတဖၣ် ဘၣ်တူၢ်ဘၣ်၀ဲတၢ်ဘၣ်ဒိဘၣ်ထံးအိၣ်ဒံး၀ဲထီဘိလီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်လီၤႉ

လၢန့ၣ်အမဲာ်ညါကီၢ်ပယီၤအပူၤန့ၣ်ၦၤဂ့ၢ်၀ီခွဲးယာ်အတၢ်ဟူးတၢ်ဂဲၤတဖၣ်န့ၣ်ပထံၣ်ဘၣ်လၢသူၣ်ဘီၣ်သးစၢ်တဖၣ် ဟဲပၣ်ဃုာ်အါထီၣ်၀ဲ ဒီး ၦၤဂ့ၢ်၀ီခွဲးယာ်အမုၢ်နံၤအဂီၢ်ဘီမုၢ်စၢဖှိၣ်ကရၢဆီၣ်တခူထီၣ်၀ဲလၢၦၤခဲလၢာ်အတၢ်ခွဲးတၢ်ယာ်အဂီၢ် သးစၢ်တဖၣ်ကဘၣ်အိၣ်ဆၢထၢၣ်အိၣ်၀ဲအဃိယနာ်လၢသူၣ်ဘီၣ်သးစၢ်တဖၣ်နုာ်လီၤပၣ်ဃုာ်တၢ်ကအါထီၣ် အဂ့ၢ်န့ၣ်နီၢ်ထူထူ ဆဲးတဲ၀ဲဒၣ်လီၤႉ

ကီၢ်ပယီၤအံၤ မ့ၢ်ထံကီၢ်တဘ့ၣ်လၢအဆဲးလီၤဃာ်၀ဲထံဂုၤကီၢ်ဂၤၦၤဂ့ၢ်၀ီခွဲးယာ်ဒီး ၦၤကညီကဒဲကဒဲကအိၣ်ဒီး တၢ်ဒိသူၣ်ဒိသးအလံာ်ဃံးဃာ်အံၤဘၣ်ဆၣ်ပဒိၣ်အသုးတဖၣ်ဒီး ၦၤလၢအအိၣ်ဒီးတၢ်ဆိတၢ်ကမီၤတဖၣ် မၤကမၣ်၀ဲၦၤဂ့ၢ်၀ီခွဲးယာ် အက့ၢ်အဂီၤအကလုာ်ကလုာ်အသိးႇ ဒ်န့ၣ်အသိး ကလုာ်ဒူၣ်ဖီၣ်စုက၀ဲၤသ့ၣ်တဖၣ်စ့ၢ်ကီး မၤကမၣ်၀ဲဒၣ် ၦၤဂ့ၢ်၀ီခဲွးယာ်တဖၣ်အိၣ်စ့ၢ်ကီး၀ဲအဂ့ၢ်န့ၣ်ၦၤအိၣ်ခိးကွၢ်ဟုၣ်ကွၢ်စုၣ်ကီၢ်ပယီၤၦၤဂ့ၢ်၀ီခွဲးယာ် တဖၣ်တနံၣ်တဘျီအလံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

ကွံလ့သ၀ီအပူၤ KHRG တီခိၣ်ရိၣ်မဲ၀ဲဒီးမၤ၀ဲဒၣ် ဟီၣ်ခိၣ်ဒီဘ့ၣ်ၦၤဂ့ၢ်၀ီခွဲး ယာ်အမုၢ်နံၤအံၤန့ၣ်လီၢ်က၀ီၤကမျၢၢ်တဖၣ် ဟဲထီၣ်၀ဲ အဂၤ (၁ႇ၀၀၀) ဃၣ်ဃၣ်ဒီး ၦၤဘၣ်မူဘၣ်ဒါတဖၣ်တဲပၠးလီၤ၀ဲဘၣ်ဃး ၦၤဂ့ၢ်၀ီခွဲးယာ် ဟဲကဲထီၣ်အသးအဂ့ၢ်ႇ ကီၢ်ပူၤၦၤဂ့ၢ််၀ီခွဲးယာ်အတၢ်အိၣ်သးတဖၣ် ဒီး အိၣ်စ့ၢ်ကီးဒီးတၢ်ဂဲၤလိာ်ကွဲအတၢ်ရဲၣ်တၢ်ကျဲၤတဖၣ်န့ၣ်လီၤႉ

ကညီတၢ်ထူၣ်ဖျဲးသုးမုၢ်ဒိၣ် KNLA သုးက့(၁) ပ့ၢ်ဆှါခိၣ်စီၤသ့အီၤ စံး၀ဲလၢ “ၦၤဂ့ၢ်၀ီခွဲးယာ်အလံာ်တဖၣ် အပူၤကွံာ်န့ၣ် တပာ်သူၣ်ပာ်သးအါအါဘၣ်ႉ ပ၀ဲသ့ၣ်တဖၣ်စးထီၣ်လၢပကဲ၀ဲသုးလံၤလံၤန့ၣ် အပူၤကွံာ်န့ၣ်ပမၤကမၣ်ဘၣ် တၢ်အိၣ်၀ဲဒၣ်လီၤႉ အဃိန့ၣ် ယဖိယလံၤလၢကဟဲခါဆူညါတဖၣ်န့ၣ် သုတမၤကမၣ်၀ဲၦၤဂ့ၢ်၀ီခွဲးယာ်တဂ့ၤအဂီၢ်န့ၣ် ယကသိၣ်သီအ၀ဲသ့ၣ်လီၤတံၢ်လီၤဆဲးလီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်လီၤႉ

ဟီၣ်ခိၣ်ဒီဘ့ၣ်ၦၤဂ့ၢ်၀ီခွဲးယာ်အမုၢ်နံၤအံၤဖဲ ၁၉၄၈ နံၣ်လါဒံၣ်စ့ဘၢၣ် ၁၀ သီအနံၤန့ၣ်ဘီမုၢ်စၢဖှိၣ်ကရၢစးထီၣ်ပာ်ပနီၣ် ပာ်ဂၢၢ်ပာ်ကျၢၤ၀ဲဒီး တနံၣ်အံၤ ၦဲၤထီၣ်၀ဲ ၇၁ နံၣ်လံန့ၣ်လီၤႉ KHRG တီခိၣ်ရိၣ်မဲမၤ၀ဲ ဟီၣ်ခိၣ်ဒီဘ့ၣ်ၦၤဂ့ၢ်၀ီခွဲးယာ် အမုၢ်နံၤအံၤၦဲၤထီၣ် ၄ ၀ီတ၀ီလံန့ၣ်လီၤႉ