လါယနူၤအါရံၤ ၆ သီႇ ၂၀၂၀ နံၣ်ႇ ခ့ၣ်အဲးစံၣ်
တနီသရံၣ်ကီၢ်ခီဒိၣ်ႇ တနီသရံၣ်ကီၢ်ဆၣ် မဲး၀ါသ၀ီ တီၤဖုၣ်ကၠိ ကၠိကရၢၢ်အပူၤ ဒူဖိသ၀ီဖိလၢအထီထီၣ်၀ဲကညီနီၣ်တယၢ် လၢအထီသဃဲၤဃုာ်သးဒီးထံကီၢ်အနီၣ်တယၢ်အံၤ ဘၣ်တၢ်မၤဟးဂီၤ၀ဲအဖီခိၣ် တၢ်ကဆှၢလံာ်ထီဒါလီၤအဂ့ၢ်န့ၣ် KNU ကညီဒီကလုာ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်စံး၀ဲဒၣ်လီၤႉ
လါယနူၤအါရံၤ ၁ သီအနံၤန့ၣ် မၠ့ၣ်ကီၢ်ရ့ၣ် မဲး၀ါသ၀ီ လီၢ်က၀ီၤသ၀ီဖိဃုာ်ဒီး ကၠိၦၤဘၣ်မူဘၣ်ဒါတဖၣ် လၢကၠိကရၢၢ်ပူၤန့ၣ် ဆီထီၣ်၀ဲဒၣ်ကညီနီၣ်တယၢ်၀ံၤအလီၢ်ခံ ဖဲလါယနူၤအါရံၤ ၂ သီ ဟါခီ ၉ နၣ်ရံၣ်တခီအဆၢကတီၢ်န့ၣ် ကီၢ်ပယီၤသုးမုၢ်ဒိၣ် လၢအအိၣ်ဆီလီၤအသးလၢတၢ်လီၢ်ဖဲန့ၣ်တဖၣ် သုးကရူၢ်ဖိလၢအအိၣ်၀ဲ အဂၤ ၂၀ ဃၣ်ဃၣ် ဟဲမၤဟးဂီၤကွံာ်၀ဲဒၣ်လီၤ အဂ့ၢ်န့ၣ် လီၢ်က၀ီၤသ၀ီဖိတဖၣ် စံး၀ဲလီၤႉ
ဘၣ်ထွဲဒီးတၢ်ဂ့ၢ်တဖၣ်န့ၣ် ဒ၀ဲၢ်၀့ၢ် KNU တၢ်ရ့လိာ်၀ဲၤဒၢး မူဒါခိၣ် ပဒိၣ်၀့ခဲၣ်စံး၀ဲလၢ “ပကဆှၢထီၣ်လံာ်ထီဒါဆူ JMC အအိၣ်န့ၣ်လီၤႉ ဘၣ်မနုၤအဃိလဲၣ်န့ၣ် လၢ NCA အလံာ်ဃံးဃာ်အပူၤန့ၣ် တၢ်တဘၣ်သူ၀ဲဂံၢ်ဘါ တၢ်ဆိ တၢ်ကမီၤ ဘၣ်ဒီး တၢ်ကဘၣ်ဘှါဆှဲအီၤလၢတၢ်မုာ်တၢ်ခုၣ်န့ၣ် တၢ်ပာ်သးတဖၣ်န့ၣ် လီၤမၢ်ကံွာ်၀ဲလီၤႉ တၢ်ဂ့ၢ်တဖၣ် အံၤ မ့ၢ်၀ဲဒၣ် တၢ်ဂ့ၢ်လၢပထိၣ်ဃူထိၣ်ဖိးအီၤသ့လီၤမီၤႉ မ့ၢ်တတူၢ်လိာ်ဘၣ်န့ၣ် တတူၢ်လိာ်ဘၣ်ႉ တထိၣ်ဃူ ထိၣ်ဖိး၀ဲ ဒၣ်ဘၣ်ဒီး လဲၤမၤ၀ဲအဃိ မုၢ်၀ါထီၣ်ဒီးထံၣ်ဘၣ်၀ဲတၢ်ဒ်အံၤအဃိ ၦၤကိးဂၤဒဲးသးတမုာ်၀ဲဘၣ်လီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်လီၤႉ
တၢ်ဆဲးလီၤ၀ဲ ထံကီၢ်ဒီဘ့ၣ်တၢ်ပတုာ်တၢ်ခးအလံာ်ဃံးဃာ် NCA ၀ံၤအလီၢ်ခံ KNU ဘျံးဒ၀ဲၢ်ကီၢ်ရ့ၣ်အပူၤ တၢ်ကဲထီၣ်သးဒ်အံၤတဖၣ်တအိၣ်၀ဲဘၣ်အသိး တကီၢ်ခါဘၣ်ထွဲဒီးတၢ်ကဲထီၣ်သးတၢ်ဂ့ၢ်တဖၣ်န့ၣ် KNU ဘျံးဒ၀ဲၢ်ကီၢ်ရ့ၣ်တပၤ တယံာ်တမီၢ်န့ၣ်ကကွဲးဆှၢထီၣ်လံာ်ထီဒါဆူ JMC အအိၣ်အပတီၢ်ဘၣ်အပတီၢ်လီၤ အဂ့ၢ်န့ၣ်အ၀ဲဆဲးတဲ၀ဲလီၤႉ
မဲး၀ါသ၀ီ တီၤဖုၣ်ကၠိအံၤ မ့ၢ်၀ဲဒၣ်ပဒိၣ်အကၠိတဖျၢၣ်စ့ၢ်ကီးဒီး တၢ်သိၣ်လိ၀ဲပဒိၣ်အလံာ်ညိၣ်သိၣ်ဒိၣ် တကးဘၣ်အမဲာ်ညါ တၢ်သိၣ်လိဃုာ်၀ဲဒၣ်ဒီးကညီလံာ်လဲၢ်န့ၣ်လီၤႉ လၢတၢ်ကထီထီၣ်၀ဲဒၣ်ကညီနီၣ်တယၢ်အံၤ တဂ့ၢ်ဃီဒီး ကီၢ်ပယီၤထံကီၢ် နီၣ်တယၢ်ႇ တတီၣ်ထီၣ်လံာ်ဆူၦၤဘၣ်မူဘၣ်ဒါတဖၣ်အအိၣ်ဘၣ်ဒီး တၢ်ဟ့ၣ်အခွဲးတအိၣ်ဘၣ်အဂ့ၢ်န့ၣ် ထံ၀ါ(ေရြဖူ) ကီၢ်ဆၣ် ဒုးယၤခိၣ် သုးခိၣ်ဒိၣ်စိ ၀့သူၣ်ထဲၣ် ဒီး သုးကရူၢ်ဖိတဖၣ်ဟဲတြီ၀ဲဒၣ်အဂ့ၢ်န့ၣ် လီၢ်က၀ီၤဖိတဖၣ်တဲ၀ဲဒီး သ့ၣ်ညါဘၣ်လီၤႉ
မဲး၀ါကၠိ ထီထီၣ်၀ဲကညီနီၣ်တယၢ်အတၢၣ်လၢ ကီၢ်ပယီၤထံကီၢ်နီၣ်တယၢ်စုဆ့ၣ်တပၤဒီး ဖဲလါယနူၤအါရံၤ ၃ သီအနံၤန့ၣ် ကတီၣ်ထီၣ်၀ဲကညီနီၣ်တယၢ်အံၤဘၣ်ဆၣ် တၢ်ဟဲမၤဟးဂီၤအီၤဒ်အခဲအံၤအသိးလီၤအဂ့ၢ်န့ၣ် လီၢ်က၀ီၤဖိလၢ တအဲၣ်ဒိးပာ်ဖျါအမံၤတဖၣ်စံး၀ဲလီၤႉ
ဒ်ထံကီၢ်ဒီဘ့ၣ်တၢ်ပတုာ်တၢ်ခးအလံာ်ဃံးဃာ် NCA အဆၢဒိၣ် (၁)ဂံၢ်ခီၣ်ထံးသနူႇ အဆၢဖိ(၁)ႇ (စ)အပူၤန့ၣ် ကီၢ်စၢဖှိၣ် အပူၤ ကလုာ်ဒူၣ်လၢအအိၣ်ဆီလီၤအသးတဖၣ် တၢ်စံၣ်စိၤတဲစိၤႇ လုၢ်လၢ်တၢ်ဆဲးတၢ်လၤႇ လံာ်လဲၢ်ႇ ကျိာ်တၢ်ကတိၤဒီး ကလုာ်အတၢ်ပနီၣ်တဖၣ်တဒ်သိးလိာ်အသးလီၤဆီ၀ဲန့ၣ် တူၢ်လိာ်ပာ်ပနီၣ်အီၤဒီး ကလုာ်ခဲလၢာ်ႇ ကျိာ်တၢ်ကတိၤခဲလၢာ် တဖၣ် ကီၢ်စၢဖှိၣ်အတၢ်ပနီၣ်တခါန့ၣ် ထံဖိကီၢ်ဖိတဖၣ် ခဲလၢာ်ကပာ်ဖှိၣ်ဒီးမၤဖျါထီၣ်အမိၢ်လံၤမိၢ်ၦၢ်အဂ့ၢ်န့ၣ် ပၣ်ဃုာ်၀ဲလီၤႉ
တၢ်ကဲထီၣ်သးတၢ်ဂ့ၢ်တၢ်ကျိၤအံၤ ကလုာ်ဒူၣ်ကလုာ်တဖၣ် တၢ်ဒီသဒၢတၢ်ခွဲးတၢ်ယာ်လၢအမ့ၢ် တၢ်ဘျၢသဲစးႇ အဆၢဒိၣ်(၃)ႇအဆၢဖိ(၄)ႇ(ဂ)အပူၤန့ၣ် နီၢ်ကစၢ်တၢ်ဆဲးတၢ်လၤႇ လုၢ်လၢ် အသိး တၢ်မၤ၀ဲတၢ်ရဲၣ်တၢ်ကျဲၤတဖၣ်ဒီး မုၢ် နံၤ ဒိၣ်မုၢ်နံၤထီတဖၣ်န့ၣ် တၢ်မၤလၤကပီၤအီၤသဘျ့သ့၀ဲတၢ်ဂ့ၢ်အဖီခိၣ် လဲၤမၤကမၣ်၀ဲတၢ်ပာ်လီၤဃာ်တဖၣ်အဂ့ၢ်န့ၣ် ခ့ၣ်အဲၣ် ယူၣ်စံး၀ဲလီၤႉ
တၢ်ထီထီၣ်ကညီနီၣ်တယၢ် တၢ်ြတီဃာ်၀ဲဒၣ်တၢ်ဂ့ၢ်တၢ်ကျိၤတဖၣ်အံၤ KNU ဒီး ကီၢ်ပယီၤပဒိၣ်တဖၣ် ခံခီယၢ်ပၤ တၢ်ပၢဟီၣ်က၀ီၤအပူၤ ကဲထီၣ်သးအိၣ်၀ဲဒၣ်ဒီးႇ ဖဲ ၂၀၁၈ နံၣ် လါယူၤလံစ့ၢ်ကီး ကၠၤအ့စ့ၣ်ကၠံကီၢ်ဆၣ် KNU ဒူပျာ်ယာ်ကီၢ်ရ့ၣ်ႇ ၀ီၢ်ရီကီၢ်ဆၣ်အပူၤ ပဒိၣ်တီၤဖုၣ်ကၠိပူၤ တၢ်ကဲထီၣ်တ့ၢ်အသးတဘျီန့ၣ်လီၤႉ
