ကီၢ်ဆၢဂ့ၢ်၀ီဘံၣ်ဘၢကိတိာ်လံာ်ထီဒါအဖီခိၣ် ကဘှါဆှဲ ဒ် JMC အကျိၤအကျဲအသိးလီၤ

လါယနူၤအါရံၤ ၁၅သီႇ ၂၀၂၀ နံၣ်ႇ စီၤရှါ

ကညီကီၢ်စဲၣ်ႇ တၢ်ဘံၣ်တၢ်ဘၢ ဒီး ကီၢ်ဆၢဂ့ၢ်၀ီကိတိာ် စံး၀ဲလၢ တၢ်ထၢသုးသီဒီး ကဲွးဆှၢထီၣ်လံာ်ဒီဒါတၢ်ဂ့ၢ်အံၤန့ၣ် ပကဘှါဆှဲအီၤဒ်တၢ်ကွၢ်ဟုၣ်ကွၢ်စူၣ် သဃဲၤတၢ်ပတုာ်တၢ်ခးကမံးတံာ် JMC အသိးလီၤအဂ့ၢ်န့ၣ် KNU ကညီဒီ ကလုာ်စၢဖှိၣ်ကရၢ လဲဘွဲကီၢ်ဆၣ် ၦၤပၢၤလီၢ်ဆ့ၣ်နီၤ ပဒိၣ်စီၤအဲၣ်ထံကီၢ် စံးဘၣ်ခ့ၣ်အဲးစံၣ်လီၤႉ

ဖဲလါယနူၤအါရံၤ ၁၃ သီအနံၤ ကညီကီၢ်စဲၣ်ပဒိၣ် တၢ်ဘံၣ်တၢ်ဘၢဒီး ကီၢ်ဆၢဂ့ၢ်၀ီကိတိာ်၀ဲၤဒၢး ကီၢ်ဆၢဂ့ၢ်၀ီဘံၣ်ဘၢကိတိာ် သုးခိၣ်ဒိၣ်ဖိ မၠိမ့နီၣ် ဆဲးလီၤ၀ဲစုမုၢ်ကျၢၢ်ဒီး ဆှၢထီၣ်၀ဲလံာ်ထီဒါဆူ JMC-S အအိၣ်၀ံၤအလီၢ်ခံ ပဒိၣ်စီၤအဲၣ်ထံကီၢ် စံးဘၣ် ၀ဲဒၣ်ဖဲတနံၤအံၤ လါယနူၤအါရံၤ ၁၅ သီ အနံၤန့ၣ်လီၤႉ

“KNU လူၢ်ပျဲၢ်ကီၢ်ဆၣ်တပၤ ပဘၣ်တဲတၢ်လီၤလီၤဆီဆီဒုတအိၣ်နီတမံၤဘၣ်ႉ တၢ်ဂ့ၢ်အံၤ ကီၢ်ရ့ၣ်ႇ သုးက့ တဖၣ် အတၢ်ဆၢတဲာ်ဒီးအတၢ်ဖံးတၢ်မၤတဖၣ်လီၤႉ ကဒိးသန့ၤထီၣ်အသးလၢ ပခိၣ်နၢ်လၢတၢ်ဖီခိၣ်တဖၣ် လီၤဆီဒၣ်တၢ် JMC ခိၣ်နၢ်တဖၣ် အတၢ်ပာ်သးအဖီခိၣ်လီၤႉ ကိးဘျီဒဲးစ့ၢ်ကီး ကီၢ်ဆၢဂ့ၢ်၀ီဘံၣ်ဘၢကိတိာ် ဃုာ်ဒီး JMC ခိၣ်နၢ်တဖၣ် ထံၣ်လိာ်တၢၣ်ပီၣ်တဲသကိးတၢ်ဒ်အခဲအံၤလီၤမီၤ” အဂ့ၢ်န့ၣ်စံး၀ဲလီၤႉ

တၢ်ထီဒါလံာ်အပူၤ ပာ်ဖျါဃာ်၀ဲလၢ ဖဲလါယနူၤအါရံၤ ၇ သီအနံၤန့ၣ် KNU လူၢ်ပျဲၢ်ကီၢ်ဆၣ် ၦၤပၢၤလီၢ်ဆ့ၣ်နီၤ ဒီး နဲၣ်ရွဲၣ်ခိၣ် တီခိၣ်ရိၣ်မဲကရူၢ်အံၤ ထံၣ်လိာ်သးဒီး ဟီၣ်က၀ီၤပူၤဒူသ၀ီၦၤပၢဆှၢတၢ်ခိၣ်နၢ်တဖၣ်ပၣ်ဃုာ်၀ဲဒၣ်ဒီး တၢ်ဘၣ်ဆှၢထီၣ်ဟ့ၣ်၀ဲသုးလၢအသီတဖၣ်အဖီခိၣ်ႇ လဲၤမၤကမၣ်၀ဲထံကီၢ်ဒီဘ့ၣ်တၢ်ပတုာ်တၢ်ခးအလံာ်ဃံးဃာ် NCA အံၤအဃိ ကီၢ်စဲၣ်ပဒိၣ်အၦၤတဖၣ်ထီဒါ၀ဲဒၣ်န့ၣ်လီၤႉ

KNU တၢ်ကရၢကရိအံၤ လၢတၢ်ဘံၣ်တၢ်ဘၢဒီးတၢ်ြတီဆၢအဂီၢ် ဒုးအိၣ်ထီၣ်၀ဲၦၤဖီၣ်စုက၀ဲၤက&ူၢ်တဖၣ်အမဲာ်ညါ တၢ်တီတၢ်ြတၢ်, တၢ်ကူၣ်ဘၣ်ကူၣ်သ့ႇ ထံဂုၤကီၢ်ဂၤႇ စံာ်လီၢ်တၢ်သူၣ်တၢ်ဖျးႇ သ့ၣ်ၦၢ်ႇ တိၢ်ႇ တၢ်ရိၣ်ဖှိၣ်ဒီးတၢ်ဘိးဘၣ် ရၤလီၤတၢ်တဖၣ် ဒုးအိၣ်ထီၣ်၀ဲ၀ဲၤကျိၤ အိၣ်၀ဲ ၁၄ ခါန့ၣ်လီၤအဂ့ၢ်န့ၣ် သ့ၣ်ညါဘၣ်လီၤႉ

လၢန့ၣ်အမဲာ်ညါ လၢတၢ်ထီဒါလံာ်အပူၤန့ၣ် ပာ်ဖျါ၀ဲတၢ်ဂ့ၢ်အခိၣ်သ့ၣ်န့ၣ် ခ့ၣ်အဲၣ်ယူၣ်အံၤ မၤ၀ဲတၢ်ထၢသုးသီဘၣ်ဆၣ်ႇ ခ့ၣ်အဲၣ်ယူၣ်တခီ လၢတၢ်ကရၢကရိအစုဒုၣ်တီၤအဖီလာ်၀ဲၤကျိၤတဖၣ် ၦၤမၤတၢ်ဖိအတၢ်လိၣ်ဘၣ်တဖၣ်အသိး ဘၣ်တၢ် မၤ၀ဲဒၣ်လီၤအဂ့ၢ်န့ၣ် ပဒိၣ်စီၤအဲၣ်ထံကီၢ် စံးၦဲၤ၀ဲဒ်အံၤလီၤႉ

“ပထုးဖှိၣ်၀ဲသုးဖိအသီတမ့ၢ်ဘၣ်ႉ ပမ့ၢ်ဘၣ်က့ၤကွၢ်လၢအ၀ဲသ့ၣ်တပၤန့ၣ် ခ့ၣ်အဲၣ်ယူၣ်န့ၣ်အ၀ဲၤကျိၤအိၣ်ဒီဒူၣ်ညါလီၤႉ အနံၣ် ၇၀ ဘျဲၣ် တၢ်ပၢၢ်ဆၢအံၤ ၦၤမၤတၢ်ဖိတဖၣ်လီၤစှၤ၀ဲအါမးအိၣ်၀ဲဒၣ်လီၤႉ ဒ်န့ၣ်အသိး ပ၀ဲၤကျိၤအံၤ ၦၤမၤတၢ်ဖိ တၢ်လိၣ်ဘၣ်တဖၣ်အိၣ်၀ဲအါမးလီၤန့ၣ် ပက့ၤမၤၦဲၤက့ၤ၀ဲလီၤ” အဂ့ၢ်န့ၣ် စံး၀ဲလီၤႉ

ခ့ၣ်အဲၣ်ယူၣ်ဒီး ဒူသ၀ီၦၤပၢဆှၢတၢ်တဖၣ် မၤ၀ဲတၢ်အိၣ်ဖှိၣ်အ၀ဲန့ၣ် ဖဲလါယနူၤအါရံၤ ၇ သီအနံၤန့ၣ် ဖဲ အပူၤကွံာ်နံၣ် တၢ်ဆၢတဲာ်တဖၣ်န့ၣ် တၢ်က့ၤတၢၣ်ပီၣ်က့ၤ၀ဲႇ ကိးနံၣ်ဒဲးတၢ်မၤစၢၤတၢ်ႇ ဟံၣ်နီၣ်ဂံၢ်စရီႇ ဂံၢ်ဘါအသီႇ တၢ်ခိတၢ်သွဲ တၢ်ဂ့ၢ်သ့ၣ်တဖၣ်အံၤ တၢ်က့ၤတၢၣ်ပီၣ်ကဒါက့ၤအီၤလီၤအဂ့ၢ်န့ၣ် သ့ၣ်ညါဘၣ်လီၤႉ