လါယနူၤအါရံၤ ၁၆ သီႇ ၂၀၂၀ နံၣ်ႇ စီၤမၠၣ်အူသၣ်
ပယီၤသုးမုၢ်ဒိၣ်လၢအလဲၤအိၣ်ဆီလီၤအသးဖဲ ကီၢ်ကၠီၣ်တဲၣ်–ကီၢ်ပယီၤကီၢ်ဆၢ ဃိၣ်သၢဖျၢၣ်၀့ၢ် ကလံၤထံး ယပၣ်ထံကမျၢ (ဂျပန်ေရတွင်း) သ၀ီ မိၣ်ကီၢ်သီပၣ်တံၣ် (NMSP) ဟ့ၣ်သၣ်တဲၣ် တြဲၤတၢ်လီၢ်န့ၣ် ဖဲ လါယနူၤအါရံၤ ၁၃ သီအနံၤ မုၢ်ဟါလီၤအဆၢကတီၢ်န့ၣ် ထုးကွံာ်အသးလံအဂ့ၢ်န့ၣ် မိၣ်ကီၢ်သီပၣ်တံၣ် လီၢ်ခၢၣ်သးကမံးတံာ်ဖိ နဲၣ်အၣ်ကၣ် စံးဘၣ် ခ့ၣ်အဲးစံၣ်လီၤႉ
ကၠၤအ့စ့ၣ်ကၠံကီၢ်ဆၣ် ယပၣ်ထံကမျၢလၢအဘူးဒီးမိၣ်ကီၢ်သီပၣ်တံၣ်သုးတၢ်လီၢ်အံၤႇ ဖဲအပူၤကွံာ် လါနိၣ်၀့ဘၢၣ် ၂၇ သီအနံၤ ဂီၤခီအဆၢကတီၢ်န့ၣ် မိၣ်ကီၢ်သီပၣ်တံၣ် ဒီး သုးမုၢ်ဒိၣ်တဖၣ် တၢ်ခးလိာ်သးကဲထီၣ်သးအကတီၢ် ကီၢ်ပယီၤ သုးမုၢ်ဒိၣ်တဖၣ် ဟဲပာ်လီၤ၀ဲအသုးတဖၣ် တုၤလၢဟ့ၣ်သၣ်တဲၣ်ြတီၤတၢ်လီၢ်န့ၣ်လီၤႉ လၢထံကီၢ်ဒီဘ့ၣ်တၢ် ပတုာ်တၢ်ခးအလံာ်ဃံးဃာ် NCA ဒီး တၢ်ဆီလီၤပာ်လီၤ သုးအလီၢ်ကျဲအသိး ထုးကံွာ်ကဒါက့ၤသုး လီၤအဂ့ၢ်န့ၣ် NMSP လီၢ်ခၢၣ်သးကမံးတံာ်ဖိ နဲၣ်အၣ်ကၣ် စံး၀ဲဒၣ်ဖဲ လါယနူၤအါရံၤ ၁၅ သီအနံၤ န့ၣ်လီၤႉ
အ၀ဲစံး၀ဲလၢ “ကီၢ်ပယီၤသုးမုၢ်ဒိၣ်တပၤ ဖဲ ၁၃ သီႇဟါခီ ၃ နၣ်ရံၣ်အဆၢကတီၢ်န့ၣ် အနါကွ့ ဒုးယၤခိၣ် ဆဲးကျိး၀ဲဒၣ်ဒီး ဟးထီၣ်ကွံာ်၀ဲဒၣ်လီၤႉ အ၀ဲသ့ၣ်က့ၤစိာ်ဃုာ်၀ဲဒၣ်ဒီးထံဖိကီၢ်ဖိကမျၢၢ်တဖၣ် တၢ်ဖိတၢ်လံၤတဖၣ်အဃိ ပသးတမုာ်ဘၣ်ႉ တၢ်ဒုးကဲထီၣ်အံၤ တဂ့ၤဘၣ်ႉ ဘၣ်ဒိဘၣ်ထံး၀ဲဒၣ် ၦၤထံဖိကီၢ်ဖိကမျၢၢ် တဖၣ်လီၤႉ လၢအ၀ဲသ့ၣ်မ့ၢ်ဂ့ၤႇ ဒီးပ၀ဲသ့ၣ်တဖၣ် မ့ၢ်ဂ့ၤ ပကဘၣ်ပၢၤဃာ်က့ၤအီၤလီၤ” အဂ့ၢ်န့ၣ် လီၢ်ခၢၣ်သးကမံးတံာ်ဖိ နဲၣ်အၣ်ကၣ် စံး၀ဲန့ၣ်လီၤႉ
ကီၢ်ကၠီၣ်တဲၣ်–ကီၢ်ပယီၤကီၢ်ဆၢ ယပၣ်ထံကမျၢတၢ်လီၢ်အံၤန့ၣ် စံး၀ဲလၢကီၢ်ကၠီၣ်တဲၣ်တကပၤ တ့ထီၣ်၀ဲတၢ်သူၣ်ထီၣ် တဖၣ် အတလၢ၀ဲတၢ်ပာ်ပနီၣ်တၢ်လီၢ်ဒီး ကီၢ်ပယီၤသုးမုၢ်ဒိၣ်တဖၣ် ဖဲအလဲၤဃိထံသ့ၣ်ညါတၢ်အဆၢကတီၢ် တၢ်ခးလိာ်သး ကဲထီၣ်၀ဲဒၣ်ဒီး ခံခီယၢ်ပာ်တၢ်ဘၣ်ဒိဘၣ်ထံးအိၣ်၀ဲလီၤ အဂ့ၢ်န့ၣ် ၦၤဘၣ်မူဘၣ်ဒါတဖၣ်စံး၀ဲဒီးသ့ၣ်ညါဘၣ်လီၤႉ
“သုးတဖၣ်ပထုးကွံာ်အီၤလံႉ သုးမုၢ်ဒိၣ်တဖၣ်စ့ၢ်ကီးဒီး သုးခိးကီၢ်ဆၢတဖၣ်စ့ၢ်ကီးလီၤႉ အခဲအံၤ ဟီၣ်က၀ီၤပူၤ မုာ်မုာ်ခုၣ်ခုၣ်လံလီၤႉ တၢ်လၢကပိာ်ထွဲထီၣ်အခံတဖၣ်ဒု တသ့ၣ်ညါဒံးဘၣ်ႉ” အဂ့ၢ်န့ၣ် သုးခိးကီၢ်ဆၢ (BGF) လၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ် ဖဲ လါယနူၤအါရံၤ ၁၅ သီအနံၤန့ၣ်လီၤႉ
လၢအပူၤကံွာ် အူသ့စ့ၣ် အအစိၤန့ၣ် မိၣ်ကီၢ်သီပၣ်တံၣ် ဒီး ကီၢ်ပယီၤသုးမုၢ်ဒိၣ်တဖၣ် ခံခီယၢ်ပၤ တၢ်သဘံၣ်သဘုၣ်ဟဲအိၣ်ထီၣ်၀ဲဒၣ်အဃိ မိၢ်ကီၢ်သီပၣ်တံၣ် သုးြတဲၤျတၢ်လီၢ်တဖၣ် လၢအမ့ၢ် ဒဒ့ၣ်ႇ တီၣ်ကလ့(နီၣ်တဲ)ႇ အဘံၣ်တၢ်လီၢ်ဒီး ကီၢ်ဆၢဟီၣ်က၀ီၤတြဲၤတၢ်လီၢ်တနီၤ ပယီၤသုးဟံးန့ၢ်ကံွာ်၀ဲဒၣ်န့ၣ်လီၤႉ
