လါယနူၤအါရံၤ ၂၃ သီႇ ၂၀၂၀ နံၣ်ႇ စးအဲၣ်ဆူ
ပယီၤသုးပဒိၣ် ဟးဃုသ့ၣ်ညါတၢ်ဒီး ြဒိ (Drone) ကဘီယူၤအဂ့ၢ်န့ၣ် ဖဲလါယနူၤအါရံၤ ၂၁ သီအနံၤ KNU ကညီဒီကလုာ်စၢဖှိၣ်ကရၢ သုးက့ (၅) ဆှၢထီၣ်၀ဲလံာ်တၢ်ထီဒါအံၤဆူ ကညီကီၢ်စဲၣ် တၢ်ခိးကွၢ်ဟုၣ်ကွၢ်စုၣ် သဃဲၤတၢ်ပတုာ်တၢ်ခး ကမံးတံာ် (JMC-s) အအိၣ်န့ၣ်လီၤႉ
စးထီၣ်လၢအပူၤကံွာ် ၂၀၁၈ နံၣ်လံၤလံၤန့ၣ် ပယီၤသုးတဖၣ် ဟဲဃုသ့ၣ်ညါ၀ဲ အ၀ဲသ့ၣ်သုးရ့ၣ်၀ဲၤလီၢ်သ့ၣ် အံၤ ႇခံနွံတဘျီဟဲဃုသ့ၣ်ညါ၀ဲတၢ်ဒီး တၢ်ဖံးတၢ်မၤဒ်အံၤ မၤပျံၤမၤဖုး၀ဲဒၣ်ကမျၢၢ်ဒီး သုးတၢ်ဘံၣ်ဘၢ အသိးႇ မၤဟးဂီၤ၀ဲဒၣ်ခံခီယၢ်ပၤတၢ်နာ်န့ၢ်လိာ်သးလီၤအဂ့ၢ်န့ၣ် ခ့ၣ်အဲၣ်ယူၣ် သုးက့(၅) ၀ဲၤဒၢးခိၣ် သုးခိၣ်ဒိၣ်ဖိ စီၤကျၢၤဒိၣ် စံး၀ဲဒၣ်လီၤႉ
အ၀ဲစံး၀ဲလၢ “အါဒၣ်တက့ၢ် ပထံၣ်ဘၣ်လၢအ၀ဲသ့ၣ်ပျၢ်ထီၣ်၀ဲဒၣ်ဖဲ မုၢ်နၤခီႉ အပူၤကွံာ် ၂၀၁၈ နံၣ်အခါန့ၣ် တဘျီႇ ဟဲ၀ဲဒၣ်ခံဘျီလီၤႉ အခဲအံၤစးထီၣ်ဖဲ ၂၀၁၉ နံၣ်န့ၣ် ဟဲအါထီၣ်၀ဲလီၤႉ တၢ်လီၢ်လၢပသုးရ့ၣ်အိၣ်သုးတၢ်လီၢ်ႇ အါဒၣ်တက့ၢ်န့ၣ် ဟဲ၀ဲဒၣ်လၢသုးက့တၢ်လီၢ်တဖၣ်လီၤႉ ဖဲကဘီယူၤယူၤ၀ဲဒၣ်လၢတၢ်ဖီခိၣ်အဆၢကတီၢ် သ၀ီဖိတဖၣ်ဒိဃာ်၀ဲ တၢ်ဂီၤအိၣ်၀ဲလီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်လီၤႉ
ကဘီယူၤလၢအဟဲတဖၣ်အံၤ ဖဲတၢ်က့ၤဃုသ့ၣ်ညါက့ၤအခါန့ၣ် တၢ်ထံၣ်ဘၣ်အီၤလၢအက့ၤစီၣ်လီၤက့ၤ၀ဲဒၣ်ဖဲ ပယီၤသုးအိၣ်တၢ်လီၢ်ဒီး လၢတၢ်ဂ့ၢ်အံၤအဖီခိၣ် ခံခီယၢ်ပၤခိၣ်နၢ်တဖၣ် ကထံၣ်လိာ်သးဒီးကဘှါဆှဲ၀ဲ အဂီၢ်လိၣ်၀ဲန့ၣ်လီၤအဂ့ၢ်န့ၣ် သုးခိၣ်ဒိၣ်ဖိ စီၤကျၢၤဒိၣ်ဆဲးစံး၀ဲဒၣ်လီၤႉ
လၢတၢ်ဂ့ၢ်တဖၣ်အံၤအဖီခိၣ် ဆှၢထီၣ်၀ဲလံာ်ထီဒါအံၤဆူ ကညီကီၢ်စဲၣ် တၢ်ခိးကွၢ်ဟုၣ်ကွၢ်စုၣ်သဃဲၤ တၢ်ပတုာ် တၢ်ခးကမံးတံာ် (JMC-s) အ၀ဲၤဒၢးဒီး တၢ်မၤဒ်အံၤသ့ၣ်တဖၣ်န့ၣ် လဲၤမၤဘၣ်ဒိ၀ဲဒၣ် (NCA) အဆၢဒိၣ်(၃) တၢ်ဂ့ၢ်တၢ်ကျိၤတဖၣ်ဒီး သုးခံခီခံကပၤ ကဘၣ်လူၤပိာ်မၤထဲွ တၢ်ပတုာ်တၢ်ခး အတၢ်သိၣ်တၢ်သီတၢ်ဘျၢဒီး သုးဂ့ၢ်၀ီအတၢ်သိၣ်တၢ်သီတၢ်ဘျၢတဖၣ်န့ၣ်လီၤႉ
ဘၣ်ထွဲဒီးတၢ်ဂ့ၢ်တဖၣ်န့ၣ် JMC-s အနဲၣ်ရွဲၣ်သဃဲၤ(၂) သုးခိၣ်ဒိၣ်စိ သါထိအီၣ် စံး၀ဲလၢ “လၢပအိၣ်ဒုလံာ် ထီဒါတဟဲတုၤဒံးဘၣ်ႉ နီၢ်နီၢ်တခီန့ၣ် ကဘၣ်ဟဲတုၤ၀ဲလၢ ဲ္နဃ အ၀ဲၤဒၢးလီၤႉ ယတလဲၤဘၣ်ဒံးလၢ၀ဲၤဒၢဒံးဘၣ်လီၤႉ ပ၀ဲသ့ၣ်တဖၣ်ဒု တလါတဘျီပဘှါဆှဲ၀ဲဒၣ်တၢ်ထီဒါလံာ်အံၤ လၢခ့ၣ်အဲၣ်ယူၣ်တပၤန့ၣ် ပဒိၣ်စွ့ၣ်မီ(ဒူပျာ်ယာ်ကီၢ်ရ့ၣ်ခိၣ်)တဖၣ်ပၣ်၀ဲလီၤႉ တၢ်သ့ၣ်တဖၣ်န့ၣ် တလါတဘျီပဟံးထီၣ်ဖီၣ်ထီၣ်၀ဲလီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်လီၤႉ
ခ့ၣ်အဲၣ်ယူၣ် သုးက့(၅)တၢ်လီၢ်တပၤန့ၣ် ပယီၤသုး အသုးကလၢၤခဲလၢာ်အိၣ်၀ဲ ၈၀ ဃၣ်ဃၣ်ဒီး လီၤဆီဒၣ်တၢ် မုၢ်ထီၣ်ကလံၤထံး ကီၢ်ခီသုး၀ဲၤလီၢ်ခိၣ်သ့ၣ် ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ=၁) စုဒုၣ်စုတီၤအဖီလာ် ခီၣ်သုးရ့ၣ် (၁၉)ႇ ခီၣ်ချ့သုးရ့ၣ် (၃၄၁) ဒီး (၃၄၀) ဃုာ်ဒီးသုးရ့ၣ်အဂၤတဖၣ် ဟူးဂဲၤလီၤဆီအိၣ်၀ဲအဂ့ၢ်န့ၣ် ခ့ၣ်အဲၣ်ယူၣ် သုးက့(၅)တပၤ စံး၀ဲလီၤႉ
