NCA အလံာ်ဃံးဃာ် တၢ်ကမၤဖျါထီၣ်အမိၢ်လံၤမိၢ်ၦၢ်အဂီၢ် လၢၢ်ဒိၣ်ကီၢ်ဆၣ် ကမျၢၢ်တဖၣ်ပာ်ဖျါထီၣ်တၢ်ဘၣ်သး

လါယနူၤအါရံၤ ၁၀ သီႇ ၂၀၂၀ နံၣ်ႇ ခ့ၣ်အဲးစံၣ်

လၢၢ်ဒိၣ်ကီၢ်ဆၣ်ပူၤ ကီၢ်ပယီၤပဒိၣ်တဖၣ် တၢ်တ့ကျဲအဃိႇ တၢ်ဘၣ်ဒိဘၣ်ထံးအိၣ်၀ဲအဃိ ထံကီၢ်ဒီဘ့ၣ်တၢ်ပတုာ် တၢ်ခးအလံာ်ဃံးဃာ် NCA အံၤန့ၣ် သုးခံကပၤလၢာ် ကမၤဖျါထီၣ်အမိၢ်လံၤမိၢ်ၦၢ်လၢလၢၦဲၤၦဲၤအဂီၢ်ႇ ဖဲလါယနူၤအါရံၤ ၉ သီအနံၤန့ၣ် လီၢ်က၀ီၤဖိလၢအကထိတဖၣ် မၤ၀ဲဒၣ်တၢ်ပာ်ဖျါထီၣ်တၢ်ဘၣ်သးန့ၣ်လီၤႉ

တၢ်ပာ်ဖျါထီၣ်တၢ်ဘၣ်သးလၢ အမုၢ်လၢ်ပာ်၀ဲတၢ်မုာ်တၢ်ခုၣ်အံၤ တၢ်တ့၀ဲကျဲဒီတဘိဒူသ၀ီလၢအမ့ၢ် မူၤသဲးကူၢ်ႇ မီၤဘွဲၤကရူၢ် ဒီး လီၢ်မူၢ်ပဲၤက&ူၢ်တဖၣ်ႇ လီၢ်က၀ီၤၦၤနီၣ်ဂံၢ်အိၣ်၀ဲ အဂၤ ၁ႇ၅၀၀ ဘျဲၣ် ဃုာ်ဒီးလၢၢ်ဒိၣ်၀့ၢ် နီၤဖးလီၤ၀ဲ တၢ်လီၢ် ၃ တီၤဒီး ပာ်ဖျါထီၣ်၀ဲအတၢ်ဘၣ်သးန့ၣ်လီၤႉ

မူၤသဲးကရူၢ် တၢ်ပာ်ဖျါထီၣ်သးအံၤ ၦၤလၢအတီခိၣ်ရိၣ်မဲဒီးပၣ်ဃုာ်၀ဲတဂၤလၢအမ့ၢ် နီၢ်ဂ့ၤဟဲစံး၀ဲလၢ “တၢ်တ့ကျဲအံၤ တဲ၀ဲလၢ တၢ်ဂုၤထီၣ်ပသီထီၣ်အဂီၢ်လီၤႉ တၢ်တ့ကျဲအံၤလီၤအဃိ ဘၣ်ဒိဘၣ်ထံး၀ဲ ပ၀ဲဒၣ်လီၢ်က၀ီၤဖိတဖၣ်လီၤႉ ပဘၣ်ပာ်တ့ၢ်ကွံာ်ပလီၢ်ပကျဲႇ ခံကပၤလၢာ်တၢ်ဒုးကဲထီၣ်ကဒါက့ၤႇ သုးနီၣ်ဂံၢ်တဖၣ်ဟဲအါထီၣ်၀ဲလီၤႉ တၢ်ဂ့ၢ်အခိၣ်သ့ၣ် တခီန့ၣ် တလူၤပိာ်ထွဲ၀ဲဒၣ် NCA အလံာ်ဃံးဃာ်ဘၣ်န့ၣ်လီၤႉ မ့ၢ်လိၣ်ဘၣ်တၢ်မုာ်တၢ်ခုၣ်လီၤစိၤလီၤထီန့ၣ် ကဘၣ် မၤဖျါထီၣ် NCA အလံာ်ဃံးဃာ်လၢလၢၦဲၤၦဲၤန့ၣ်လီၤႉ တၢ်မုာ်တၢ်ခုၣ်တအိၣ်ဒံးဘၣ်ဒီး ပာ်ဖျါ၀ဲလၢတၢ်ဂုၤထီၣ်ပသီထီၣ်အ ဂီၢ်န့ၣ်ႇ တၢ်တဘၣ်မၤ၀ဲဘၣ်န့ၣ်လီၤႉ ပ၀ဲဒၣ်လီၢ်က၀ီၤကလုာ်ဒူၣ်တဖၣ် ပတတူၢ်လိာ်ဘၣ်” အဂ့ၢ်န့ၣ်စံးဘၣ်ခ့ၣ်အဲးစံၣ်လီၤႉ

တၢ်ဆဲးလီၤ NCA အလံာ်ဃံးဃာ်၀ံၤအလီၢ်ခံ ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်ႇ ဖၣ်ပူၣ်ကီၢ်ရ့ၣ်တဖၣ်အပူၤ ခီဖျိလၢသုးမုၢ်ဒိၣ်တကပၤတၢ်တ့ကျဲအဃိ ခံခီယၢ်ပၤသုးတဖၣ်အဘၢၣ်စၢၤ တၢ်ခးလိာ်သးကဲထီၣ်၀ဲတလီၢ်လီၢ်အသိးႇ လၢတၢ်ဂ့ၢ်သ့ၣ်တဖၣ်န့ၣ်အဃိ လီၢ်က၀ီၤဖိတဖၣ် ဘၣ်ပာ်တ့ၢ်ကွံာ်အလီၢ် အကျဲဒီး ဘၣ်ဟးဃ့ၢ်အိၣ်ခူသူၣ်အသးတၢ်အိၣ်သးတဖၣ်ဟဲအိၣ်ထီၣ်၀ဲန့ၣ်လီၤႉ

တၢ်မၤ၀ဲတၢ်ပာ်ဖျါထီၣ်တၢ်ဘၣ်သးအံၤ လီၢ်က၀ီၤဖိတပၤဃ့ထီၣ်၀ဲ ဒ်သိးကဒိးန့ၢ် ဘၣ်တၢ်မုာ်တၢ်ခုၣ်လီၤစိၤလီၤထီအဂီၢ် တၢ်ကဘၣ်မၤဖျါထီၣ်အမိၢ်လံၤမိၢ်ၦၢ်ႇ NCA အဖီခိၣ် တၢ်ကဘၣ်သ့ဟံးမူဒါႇ တၢ်ပာ်လီၤသုးအလီၢ်အကျဲႇ NCA အလံာ်ဃံးဃာ် တၢ်တဘၣ်မၤကမၣ်အီၤဘၣ်ႇ NCA တၢ်ဂ့ၢ်လၢ တၢ်ကွဲးဃာ်၀ဲတဖၣ် တၢ်မ့ၢ်မၤကမၣ်အီၤန့ၣ် တၢ်ကဘၣ်ဟံအရ့ဒီး ကမျၢ်တဖၣ်လၢအတၢၢၣ်၀ဲလံာ်တဖၣ်န့ၣ် တၢ်ပတုာ်တၢ်ခး တၢ်ခိးကွၢ်ဟုၣ်ကွၢ်စူၣ် သဃဲၤကမံးတံာ် JMC တၢ်ကဘၣ်ပာ်သူၣ်ပာ်သးဒီးကဘၣ်ဟံးထီၣ်ဖီၣ်ထီၣ်အီၤဒီး တၢ်ဂ့ၢ်တၢ်ကျိၤအဂၤတဖၣ်ဃ့ထီၣ်၀ဲန့ၣ်လီၤႉ

လၢန့ၣ်အမဲာ်ညါ ကျဲလၢအတ့ထီၣ်၀ဲအံၤ ပာ်ဖျါထီၣ်၀ဲတၢ်ဂ့ၢ်ခိၣ်တီလၢတၢ်ဂုုၤထီၣ်ပသီထီၣ် ဘၣ်ဆၣ် တၢ်အ၀ဲအံၤ မ့ၢ်၀ဲလၢဒုးယၤတၢ်ရဲၣ်တၢ်ကျဲၤအဂီၢ်ဒီး လၢလီၢ်က၀ီၤဖိတပၤ သ့ၣ်ညါနၢ်ပၢၢ်အသိး လၢတၢ်တ့လဲၢ်ထီၣ်ကျဲတၢ်ဖံးတၢ်မၤ တဖၣ်န့ၣ် ပတလိၣ်ဘၣ်အဂ့ၢ် တၢ်ဂ့ၢ် ၆ ထံၣ် ပာ်ဖျါထီၣ်၀ဲတၢ်ဘၣ်သးန့ၣ်လီၤႉ

ဘၣ်ထဲဒွီးလီၢ်က၀ီၤဖိတဖၣ်ပာ်ဖျါထီၣ်အတၢ်ဘၣ်သးအံၤ လၢၢ်ဒိၣ်၀့ၢ် ခ့ၣ်အဲၣ်ယူၣ် တၢ်ရ့လိာ်မုာ်လိာ်၀ဲၤဒၢးမူဒါခိၣ် စီၤ၀ါရ့ၤတိ စံး၀ဲလၢ “ပ၀ဲပထံၣ်ဒုဂ့ၤ၀ဲလီၤႉ ခံခီယၢ်ပၤကဘၣ်ထိၣ်ဃူထိၣ်ဖိး၀ဲန့ၣ်လိၣ်၀ဲလီၤႉ ဒ်န့ၣ်မၣ် ကဘှါဆှဲ၀ဲကန့ၢ်လီၤႉ မ့မ့ၢ်အခဲအံၤဒု တၢ်ရဲၣ်တၢ်ကျဲၤတအိၣ်နီတမံၤဒံးဘၣ်ႉ ခံခီယၢ်ပၤသုး ကရူၢ်တဖၣ်က ထံၣ်လိာ်သးအိၣ်၀ဲလီၤႉ ဘၣ်ဆၣ်ကတဲတၢ်ဂ့ၢ်တခါအံၤဧါ တတဲဧါဒုတသ့ၣ်ညါဒံးဘၣ်ႉ ပ၀ဲပဆိကမိၣ်ဒု တနံၤအံၤ (KNLA ဒီး တပခ) တၢ်ထံၣ်လိာ်သးအပူၤန့ၣ် ကတဲ၀ဲလီၤႉ ဘၣ်ဆၣ် တၢ်ဂ့ၢ်အံၤ လၢကဘှါဆှဲအီၤတဘျီဃီန့ၣ် တန့ၢ်ဘၣ်ႉ ပမ့ၢ်ထံၣ်လိာ်သးအါထီၣ်န့ၣ် တၢ်ကီတၢ်ခဲတဖၣ်အံၤ တၢ်ကဘှါဆှဲအီၤတဘျီ တဆဲးတဘျီတဆဲးကန့ၢ်၀ဲလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

ကီၢ်ပယီၤသုးမုၢ်ဒိၣ်မၤ၀ဲဒၣ် တၢ်တ့လဲၢ်ထီၣ်ကျဲတၢ်ဂ့ၢ်တဖၣ်န့ၣ် လၢၢ်ဒိၣ်ကီၢ််ဆၣ်အပူၤ ကညီၦၤထူလံၤဖိတဖၣ် ဖဲအပူၤကွံာ် ၂၀၁၈ နံၣ် လါအီးထိဘၢၣ် ၁ တဘျီ ပာ်ဖျါထီၣ်တ့ၢ်၀ဲတၢ်ဘၣ်သးအိၣ်၀ဲအသိးႇ KNU မုၢ်ြတီၣ် (ဖၣ်ပူၣ်)ကီၢ် ရ့ၣ်အပူၤစ့ၢ်ကီး ဖဲအပူၤကွံာ်တနံၣ်စ့ၢ်ကီး ပာ်ဖျါထီၣ်တၢ်ဘၣ်သးအိၣ်၀ဲဒၣ်လီၤႉ