Home တၢ်ကစီၣ် ကမျၢၢ်ကအိၣ်ဘၣ်မုာ်မုာ်ခုၣ်ခုၣ်အဂီၢ် မူဒါအိၣ်ခံခီခံကပၤလၢာ်အဂ့ၢ် မိၣ်ကီၢ်သီပၣ်တံၣ်စံး၀ဲ

ကမျၢၢ်ကအိၣ်ဘၣ်မုာ်မုာ်ခုၣ်ခုၣ်အဂီၢ် မူဒါအိၣ်ခံခီခံကပၤလၢာ်အဂ့ၢ် မိၣ်ကီၢ်သီပၣ်တံၣ်စံး၀ဲ

169
0
Photo: naiaung naing

လါမးရှး ၂၀ သီႇ ၂၀၂၀ နံၣ်ႇ စီၤမၠၣ်အူသၣ်

တနီသရံၣ်ကီၢ်ခီဒိၣ် ယ့ၤဖၠူၤကီၢ်ဆၣ်ပူၤ ခီဖျိလၢဟီၣ်လာ်မ့ၣ်ပိၢ်အဃိႇ လီၢ်က၀ီၤဖိတဖၣ်ဘၣ်ဒိဘၣ်ထံးအိၣ်၀ဲဒၣ်ဒီး ဒ်သိးဒီးအ၀ဲသ့ၣ်ကဖံးအီၣ်မၤအီၣ်လၢမုာ်မုာ်ခုၣ်ခုၣ်အဂီၢ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒီး မိၣ်ကီၢ်သီပၣ်တံၣ် NMSP ခံကပၤတၢ်ထံၣ်လိာ်တၢၣ်ပီၣ်တဲသကိး ကဂုာ်ကျဲးစၢး၀ဲအဂ့ၢ်န့ၣ် ဖဲလါမးရှး ၁၆ သီအနံၤန့ၣ် မိၢ်ကီၢ်သီပၣ်တံၣ် ဒ၀ဲၢ်ကီၢ်ရ့ၣ် ထုးထီၣ်ဘိးဘၣ်ရၤလီၤ၀ဲလံာ်တဘ့ၣ်ဒီးစံး၀ဲလီၤႉ

ဖဲပလဲၤ၀ဲဒၣ်လၢတၢ်မုာ်တၢ်ခုၣ်အတၢ်တိာ်ကျဲၤအဆၢကတီၢ် တၢ်စံၣ်စိၤလၢအပူၤကွံာ်လၢအခၣ်တဖၣ်န့ၣ် ကဘၣ်ဟံးန့ၣ်တၢ်မၤလိဒီး ဒ်သိးထံဖိကီၢ်ဖိကမျၢၢ်အတၢ်အိၣ်မူဟံၣ်ဃီကဒိၣ်ထီၣ်ထီထီၣ်အဂီၢ် ကလုာ်ဒူၣ်တၢ်အိၣ်မူလၢအဒ််သိးလိာ်သးတဖၣ် ကပာ်ဖှိၣ်မၤသကိးဟံးထီၣ်ဖီၣ်ထီၣ်အဂီၢ် ဘၣ်တၢ်ထုးထီၣ်ဘိးဘၣ်ရၤလီၤ၀ဲလီၤအဂ့ၢ်န့ၣ် မိၣ်ကီၢ်သီပၣ်တံၣ် ဒ၀ဲၢ်ကီၢ်ရ့ၣ် တၢ်ဘိးဘၣ်ရၤလီၤအပူၤပာ်ဖျါ၀ဲလီၤႉ

KNU ဒူပျာ်ယာ်ကီၢ်ရ့ၣ် ၀ီၢ်ရီကီၢ်ဆၣ်ခိၣ် ပဒိၣ်စီၤမီၣ်ရှွ့ၣ် စံး၀ဲလၢ “ ခီဖျိလၢတသ့ၣ်ညါတၢ်အိၣ်သးခဲလၢာ် ဘၣ်အဖီခိၣ် ပဟ့ၣ်ထီၣ်တၢ်ထံၣ်တသ့ဒံးဘၣ်မီၤနီၤႉ ဘၣ်ဒိဘၣ်ထံး၀ဲကမျၢၢ်တဖၣ်အတၢ်လုၢ်အီၣ်နီၢ်ခိသးသမူန့ၣ် တြတၢး၀ဲဘၣ်ႉ ဂံၢ်ခီၣ်ထံးတုၤလၢကီၢ်ရ့ၣ်အပတီၢ် ကဆဲးထိၣ်ဃူထိၣ်ဖိး၀ဲလီၤ” အဂ့ၢ်န့ၣ် ဖဲလါမးရှး ၁၇ သီအနံၤန့ၣ် စံးဘၣ်ခ့ၣ်အဲးစံၣ်လီၤႉ

ကညီဒီကလုာ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ် ဒီး မိၣ်ကီၢ်သီပၣ်တံၣ် ဒ၀ဲၢ်ကီၢ်ရ့ၣ်တဖၣ် ကလဲၣ်ကွ့ၣ်ဒီး အဲၤရှ့ၣ်ကွ့ၣ် တၢ်လီၢ်န့ၣ် တနံၣ်အံၤ လါဖ့ၤြဘူၤအါရံၤ ၂၉ သီႇ လါမးရှး ၁ သီဒီး လါမးရှး ၁၁ သီအနံၤတဖၣ်န့ၣ် လီၢ်က၀ီၤတနီၤ ခီဖျိလၢယီၣ်ဘၣ်၀ဲဒၣ်ဟီၣ်လာ်မ့ၣ်ပိၢ်အဃိႇ နီၢ်ခိက့ၢ်ဂီၤတဖၣ်ဘၣ်ဟးဂီၤကံွာ်ဒီး ဒ်သိးထံဖိကီၢ်ဖိကမျၢၢ်တဖၣ်ကဖံးအီၣ်မၤအီၣ်လၢမုာ်မုာ်ခုၣ်ခုၣ်ကသ့အဂီၢ် ပ၀ဲဒၣ်ခံကပၤလၢာ်န့ၣ် မူဒါအိၣ်၀ဲလၢလၢၦဲၤၦဲၤလီၤအဂ့ၢ်န့ၣ် မိၣ်ကီၢ်သီပၣ်တံၣ် ထုးထီၣ်ဘိးဘၣ်ရၤလီၤ၀ဲန့ၣ်လီၤႉ

မိၣ်ကီၢ်စဲၣ် ဘျီၣ်ဒိၣ် ၦၤပၢၤဆ့ၣ်နီၤ ၂ ဂၤတဂၤ ဒီၣ်ကထၢၣ်အီၤနဲၣ်အူ စံး၀ဲလၢ “ခီဖျိလၢမ့ၣ်ပိၢ်အဃိ ၦၤလၢအဘၣ်ဒိဘၣ်ထံးတဖၣ် မ့ၢ်တၢ်ရှူကွံာ်လၢပလဲလိာ်အလီၢ်တန့ၢ်ဘၣ်န့ၣ်လီၤႉ ပဒိၣ်ကရူၢ်ႇ JMC မ့ၢ်ဂ့ၤႇ ၦၤဖီၣ်စုက၀ဲၤကရူၢ်တဖၣ်မ့ၢ်ဂ့ၤ ပပာ်ဖှိၣ်အံထဲကွွၢ်ထဲသွကိးအီၤန့ၣ် ပဆီၣ်တခူထီၣ်၀ဲအဘျီဘျီလံလီၤႉ ခဲအံၤစ့ၢ်ကီးမ့ၣ်ပိၢ်ပိၢ်ဖးထီၣ်ကဒီးလီၤႉ မ့ၢ်တၢ်ဂ့ၢ်တခါလၢပတူၢ်လိာ်အီၤတသ့ဘၣ်လီၤႉ အ၀ဲသ့ၣ်မုၢ်ကျိၤ၀ဲၤကွာ် တၢ်လုၢ်အီၣ်နီၢ်ခိသးသမူတဖၣ် လီၤဘၣ်တၢ်ကီတၢ်ခဲအါမးလီၤ” အဂ့ၢ်န့ၣ် ဖဲလါမးရှး ၁၇ သီအနံၤန့ၣ် စံး၀ဲလီၤႉ

မိၣ်ကီၢ်သီပၣ်တံၣ် ဒီး ကညီဒီကလုာ်စၢဖှိၣ်ကရၢတဖၣ် မ့ၢ်ကရူၢ်လၢ အဆဲးလီၤ၀ဲတၢ်ပတုာ်တၢ်ခး အလံာ်ဃံးဃာ် (NCA) ဒီး ခီဖျိလၢတၢ်လီၢ်တၢ်ဂ့ၢ်လိာ်ဘှီလိာ်အဃိႇ ခံကပၤလၢာ်သုးကရူၢ်တဖၣ်အဘၢၣ်စၢၤ တၢ်ခးလိာ်သးကဲထီၣ်အိၣ်၀ဲတလီၢ်လီၢ််လီၤႉ