Home တၢ်ကစီၣ် ပဒိၣ်စးထီၣ်ရဲၣ်ကျဲၤ၀ဲ လၢကကးတံာ်ကံွာ် မၠဲၣ်ကၠံငူၣ် ၦၤလီၢ်အိၣ်ကမှံတၢ်လီၢ်

ပဒိၣ်စးထီၣ်ရဲၣ်ကျဲၤ၀ဲ လၢကကးတံာ်ကံွာ် မၠဲၣ်ကၠံငူၣ် ၦၤလီၢ်အိၣ်ကမှံတၢ်လီၢ်

27
0

လါဖ့ၤြဘူၤအါရံၤ ၁၄ သီႇ ၂၀၂၀ နံၣ်ႇ ခ့ၣ်အဲးစံၣ်

ကညီကီၢ်စဲၣ်ႇ လူၢ်ပျဲၢ်ကီၢ်ဆၣ် ခီတီၣ်(မၠဲၣ်ကၠံငူၣ်)ပူၤ တၢ်အိးထီၣ်ဃာ်၀ဲမၠဲၣ်ကၠံငူၣ် ၦၤလီၢ်အိၣ်ကမှံတၢ်လီၢ် လၢအအိၣ်သူၣ်လီၤအသးယံာ်၀ဲ ၄ နံၣ်အံၤ ကီၢ်ပဒိၣ်ၦၤမၤမူဘၣ်ဒါတဖၣ် ရဲၣ်ကျဲၤ၀ဲလၢ ကကးတံာ်ကံွာ်၀ဲ လီၤအဂ့ၢ်န့ၣ် သ့ၣ်ညါဘၣ်လီၤႉ

မၠဲၣ်ကၠံငူၣ် ၦၤလီၢ်အိၣ်ကမှံလီၢ် လၢၦၤနီၣ်ဂံၢ် အဂၤ ၄ႇ၀၀၀ ဘျဲၣ် အိၣ်တ့ၢ်ဒံး၀ဲဒၣ် အံၤ ဘၣ်ထဲွဒီးတၢ်ကထုးကွံာ်၀ဲ တၢ်ရဲၣ်တၢ်ကျဲၤန့ၣ် ကညီကီၢ်စဲၣ် ၦၤမၤတၢ်ဖိ၀ဲၤကျိၤ ၦၤနဲၣ်တၢ် အူစီၣ်မ့ စံးဘၣ်ခ့ၣ်အဲးစံၣ် ဒ်အံၤလီၤႉ

“ထံကီၢ်ဒီဘ့ၣ်တၢ်အိၣ်သးတခါအဖီခိၣ် ၦၤဃ့ၢ်မှံဟးဖျိးတၢ်လီၢ်အံၤ တၢ်ကထုးကွံာ်အီၤတၢ်ရဲၣ်တၢ်ကျဲၤအိၣ်၀ဲလီၤႉ လၢအကျါန့ၣ် ပ၀ဲဒၣ်ကညီကီၢ်စဲၣ်စ့ၢ်ကီး ပၣ်၀ဲဒၣ်လီၤႉ ပကဃ့ဒံး၀ဲကမျၢၢ်တဖၣ်အတၢ်ပာ်သးလီၤႉ တၢ်ကဃ့၀ဲ ကမျၢၢ်အတၢ်ပာ်သးတၢ်ရဲၣ်တၢ်ကျဲၤအံၤႇ ကညီကီၢ်စဲၣ်ပဒိၣ်တဖၣ် ဒီး ကီၢ်စၢဖှိၣ်ပဒိၣ်တဖၣ်န့ၣ် တနဲၣ်လီၤတၢ်နီ တမံၤဒံးဘၣ်ႉ အခိၣ်သ့ၣ်န့ၣ် မ့ၢ်၀ဲဒၣ်တၢ်ပၢဆှၢရဲၣ်ကျဲၤ တၢ်ဘၣ်ယိၣ်ဘၣ်ဘှီ၀ဲၤကျိၤ ဘၣ်ဟံးမူဒါမၤ၀ဲလီၤႉ ပ၀ဲဒၣ်ဒု အိၣ်ဒၣ်လၢ ပကမၤစၢၤ၀ဲတၢ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

ဘၣ်ထဲဒွီးတၢ်ကမၤ၀ဲတၢ်ရဲၣ်တၢ်ကျဲၤအံၤ တၢ်ကစးထီၣ်အီၤအဆၢကတီၢ်ဖဲလဲၣ်န့ၣ် တၢ်တသ့ၣ်ညါဒံး၀ဲဘၣ်ဆၣ်ႇ မ့မ့ၢ်ပဒိၣ်တပၤန့ၣ် တၢ်ကဟံးန့ၢ်၀ဲကမျၢၢ်တဖၣ်အတၢ်ပာ်သး၀ံၤမးႇ တၢ်ရဲၣ်တၢ်ကျဲၤတၢ်မၤတဖၣ် တၢ်ကဆဲးမၤ၀ဲလီၤ အဂ့ၢ်န့ၣ် အူစီၣ်မ့ ဆဲးတဲ၀ဲလီၤႉ

ဒ်တၢ်အိၣ်သးဆၢကတီၢ်ခဲအံၤအသိး ၦၤစံၣ်မှံဟးဖျိးကမျၢၢ် ဖဲန့ၣ်သ့ၣ်တဖၣ် တၢ်လီၢ်လၢအအိၣ်တ့ၢ်ဃာ်၀ဲတဖၣ်အပူၤန့ၣ်ႇ တၢ်မုာ်တၢ်ခုၣ်တၢ်ဂၢၢ်တၢ်ကျၢၤတအိၣ်၀ဲဒံးဘၣ်အသိး ၦၤလၢအကက့ၤအိၣ်ကဒါလၢအတၢ်လီၢ်တၢ်ကျဲန့ၣ် ကအိၣ်၀ဲစှၤလီၤအဂ့ၢ်န့ၣ် ၦၤလၢအအိၣ်ဖဲၦၤလီၢ်အိၣ်ကမှံတၢ်လီၢ်တဖၣ် စံး၀ဲအဃိ သ့ၣ်ညါဘၣ်လီၤႉ

လၢန့ၣ်အမဲာ်ညါ ၦၤနီၣ်ဂံၢ် အဂၤ ၄ႇ၀၀၀ ဘျဲၣ် ၦၤလၢအအိၣ်တ့ၢ်ဒံးလၢၦၤလီၢ်အိၣ်ကမှံတၢ်လီၢ်တဖၣ် တၢ်အိၣ်သးခဲအံၤ ဒ်သိးတၢ်အိၣ်မူခါဆူညါကဘၣ်အိၣ်ဆၢထၢၣ်အဂီၢ်ႇ ဟးတူၢ်ငါအီၣ်တၢ်လၢတၢ်ချၢ ႇ တၢ်တ့ဟံၣ်တ့ဃီတၢ်မၤႇ ၦၤတ့အိး(အုတ်)တၢ်မၤတဖၣ် ဒီး ဟးထီၣ်မၤတၢ်မၤလၢတၢ်ချၢအိၣ်၀ဲဒၣ်အသိးႇ တနီၤန့ၣ်လဲၤမၤတၢ်မၤလၢကီၢ်ဆၢ ရွ့ၣ်ကိၣ်ကိၤသ၀ီ အိၣ်၀ဲဒၣ်အဂ့ၢ်န့ၣ် သ့ၣ်ညါဘၣ်လီၤႉ

ၦၤလၢအအိၣ်ဖဲလီၢ်အိၣ်ကမှံတၢ်လီၢ် စီၤရွ့ၣ်ထိ စံး၀ဲလၢ“မ့ၢ်ဘၣ်က့ၤလၢပကစၢ်တၢ်လီၢ်န့ၣ် တၢ်ဘံၣ်တၢ်ဘၢ တအိၣ်နီတမံၤဘၣ်လီၤႉ အါဒၣ်တက့ၢ်န့ၣ်ပ၀ဲသ့ၣ်တဖၣ်ပကက့ၤအိၣ်၀ဲလၢ ပဒိၣ်ရဲၣ်ကျဲၤတၢ်လီၢ်န့ၣ်လီၤႉ ပဒိၣ်တဖၣ်ကရဲၣ်ကျဲၤ၀ဲတၢ်လီၢ်တၢ်ကျဲႇ တၢ်လုၢ်အီၣ်နီၢ်ခိသးသမူစ့ၢ်ကီး ကရဲၣ်ကျဲၤ၀ဲအဃိန့ၣ် တၢ်သ့ၣ်တဖၣ်အံၤလၢပ၀ဲတပၤပတူၢ်လိာ်၀ဲလီၤႉ အ၀ဲသ့ၣ်တဲ၀ဲလၢ ၂၀၂၀ န့ၣ် ကမၤန့ၢ်ၦၤလီၤန့ၣ် တဲဃာ်၀ဲဒၣ်လၢညါအိၣ်လီၤႉ ပ၀ဲသ့ၣ်တဖၣ်စ့ၢ်ကီး ပအဲၣ်ဒိးအိၣ်လၢပကစၢ်အဟံၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

ဖဲ၂၀၁၆ နံၣ် လါစဲးပထ့ဘၢၣ်န့ၣ် ပယီၤသုးမုၢ်ဒိၣ်ႇ သုးခိးကီၢ်ဆၢဒီး DKBA ထုးဖးအသးတဖၣ်အဘၢၣ်စၢၤ တၢ်ဒုးစးထီၣ်ကဲထီၣ်၀ဲအဃိႇ ၦၤလၢဘၣ်ပာ်တ့ၢ်ကွံာ်အလီၢ်အကျဲဒီးၦၤစံၣ်မှံဟးဖျိးအဂီၢ် မၠဲၣ်ကၠံငူၣ်သီခါ လၢအလဲၤပူၤကွံာ်အသးအံၤ အိၣ်ထီၣ်န့ၢ်၀ဲ ၦၤလီၢ်အိၣ်ကမှံလီၢ် ၂ခါဖဲ ခီတီၣ်(မၠဲၣ်ကၠံငူၣ်)တၢ်လီၢ်အံၤန့ၣ်လီၤႉ