Home တၢ်ကစီၣ် ပဒိၣ်မၤ၀ဲန့ၢ်လၢအတလိၣ်ကမျၢၢ်ဘၣ်န့ၣ် တမ့ၢ်ဒံၣ်မိၣ်ြခ့ၣ်စံၣ်ဘၣ်အဂ့ၢ်န့ၣ် ဒီၣ်အီၣ်ဆါဆူၣ်ကၠံၣ်စံး၀ဲ

ပဒိၣ်မၤ၀ဲန့ၢ်လၢအတလိၣ်ကမျၢၢ်ဘၣ်န့ၣ် တမ့ၢ်ဒံၣ်မိၣ်ြခ့ၣ်စံၣ်ဘၣ်အဂ့ၢ်န့ၣ် ဒီၣ်အီၣ်ဆါဆူၣ်ကၠံၣ်စံး၀ဲ

259
0
Photo: Nay Naw

လါဖ့ၤြဘူၤအါရံၤ ၂၄ သီႇ ၂၀၂၀ နံၣ်ႇ န့ၣ်နီၣ်

ထံဖိကီၢ်ဖိကမျၢၢ်တလိၣ်ဘၣ် ပဒိၣ်ကစၢ်ဒၣ်၀ဲမၤ၀ဲမ့ၢ်န့ၢ်န့ၣ်ႇ တမ့ၢ်ဒံၣ်မိၣ်ြခ့ၣ်စံၣ်ပဒိၣ်ဘၣ်အသိး ကမျၢၢ်အတၢ်တူၢ်လိာ်မ့ၢ်တအိၣ်ႇ တၢ်ပာ်ဖှိၣ်မၤသကိးဒီးကမျၢၢ်မ့ၢ်တအိၣ်ဘၣ်န့ၣ် ခါဆူညါအဂီၢ် တမ့ၢ်လၢကဒိးန့ၢ်ဘၣ်တၢ်မၤနၢၤဘၣ်အဂ့ၢ်န့ၣ် ထံကီၢ်ၦၤဟ့ၣ်ကူၣ်ဟ့ၣ်ဖးတၢ်တဂၤလၢအမ့ၢ် ဒီၣ်အီၣ်ဆါဆူၣ်ကၠံၣ် စံးလီၤ၀ဲန့ၣ်လီၤႉ

လါဖ့ၤြဘူၤအါရံၤ ၂၄ သီႇ တနံၤအံၤဂီၤခီ (၁၀)နၣ်ရံၣ် အဆၢကတီၢ်န့ၣ် တၢ်မၤ၀ဲဒၣ်တၢ်ထံၣ်လိာ်အိၣ်သကိးဒီးကမျၢၢ်အံၤ ဖဲကညီကီၢ်စဲၣ်ႇ ကီးတရံး၀့ၢ် ခၠီတီၣ်ယၣ် ကညီနံၣ်ထီၣ်သီပျီပူၤအကတီၢ်န့ၣ် ဒီၣ်အီၣ်ဆါဆူၣ်ကၠံၣ်တဲလီၤတၢ်ဒီး ထၢနုာ်စံးလီၤ၀ဲဒ်အံၤလီၤႉ

“ပဒိၣ်နီတဖုလၢ မ့ၢ်တဲ၀ဲ မ့ၢ်ဂ့ၤထဲလဲၣ်ႇ မ့ၢ်သ့ထဲလဲၣ်ဘၣ်ဆၣ် ထံဖိကီၢ်ဖိကမျၢၢ်တဖၣ်အတၢ်တူၢ်လိာ်ႇ တၢ်ပာ်ဖှိၣ်မၤသကိးမ့ၢ်တအိၣ်ဘၣ်န့ၣ် တၢ်တိာ်ကျဲၤလၢအဒိၣ်အထီတဖၣ် လၢကမၤနၢၤတၢ်အဂီၢ် မၤ၀ဲတန့ၢ်ဘၣ်လီၤႉ ကမျၢၢ်တဖၣ်တလိၣ်ဘၣ်ႉ ပကစၢ်ဒၣ်၀ဲပမၤသ့ပဒိၣ်တဖၣ်န့ၣ် တမ့ၢ်ဒံၣ်မိၣ်ခြ့ၣ်စံၣ်အပဒိၣ်ဘၣ်ႉ ခါဆူညါအဂီၢ်စ့ၢ်ကီး တမ့ၢ်ပဒိၣ်လၢအမၤနၢၤတၢ်ဘၣ်” အဂ့ၢ်န့ၣ် အ၀ဲစံး၀ဲလီၤႉ

ဒီၣ်အီၣ်ဆါဆူၣ်ကၠံၣ် ဆဲးစံးကဒီး၀ဲလၢ ကညီကီၢ်စဲၣ်န့ၣ် တၢ်ပတုာ်တၢ်ခး၀ံၤအလီၢ်ခံ လၢတၢ်လဲၤတၢ်က့ၤအဂီၢ် ကျဲဟဲဂ့ၤထီၣ်၀ဲႇ မုၢ်ကျိၤ၀ဲၤကွာ်ႇ တၢ်ကူၣ်ဘၣ်ကူၣ်သ့ ဒီး တၢ်မၤ၀ဲဒၣ် တၢ်ကွၢ်ထွဲတၢ်အိၣ်ဆူၣ်အိၣ်ချ့တဖၣ်အံၤ ဟဲညီထီၣ်၀ဲဒၣ်အသိးႇ လီသဟီၣ်ဂံၢ်ဘါမ့ၢ်န့ၢ်စ့ၢ်ကီးန့ၣ် တၢ်ဘၣ်ဘျုးကအိၣ်၀ဲအဃိ တၢ်လိၣ်ဘၣ်တဖၣ် ဒ်သိးကန့ၢ် အဂီၢ် တၢ်မုာ်တၢ်ခုၣ်မ့ၢ်အိၣ်မးလီၤအဂ့ၢ်န့ၣ် စံးလီၤ၀ဲဒၣ်လီၤႉ

လၢန့ၣ်အမဲာ်ညါ ထံကီၢ်ၦၤဟ့ၣ်ကူၣ်ဟ့ၣ်ဖးတၢ်စံး၀ဲ “ထံကီၢ်အတၢ်တိာ်ကျဲၤခါဆူညါအဂီၢ်အပူၤန့ၣ် တၢ်မုာ်တၢ်ခုၣ် ဒီး တၢ်ဂုၤထီၣ်ပသီထီၣ်န့ၣ် ပနီၤဖးအီၤလ့ၤတက့ၤတသ့ဘၣ်န့ၣ် ပပာ်ပနီၣ်၀ဲလီၤတံၢ်လီၤဆဲးန့ၣ်လီၤႉ တၢ်မုာ်တၢ်ခုၣ် မ့ၢ်အိၣ်မး တၢ်လဲၤထီၣ်လဲၤထီကအိၣ်လီၤႉ တၢ်လဲၤထီၣ်လဲၤထီမ့ၢ်အိၣ်မး တၢ်မုာ်တၢ်ခုၣ်န့ၣ် ကဆဲးမၤဂၢၢ်ကျၢၤအီၤကသ့လီၤႉ တၢ်အဃိန့ၣ် ပကညီကီၢ်စဲၣ်အံၤ ကလုာ်ဒူၣ်ခဲလၢာ် လၢအအိၣ်ဖျဲၣ်ထီၣ်လၢကီၢ်စၢဖှိၣ်တဖၣ် ယဆၢမုၢ်လၢ်လၢ သုကပာ်ဖှိၣ်ထီၣ်သးဒီးကဂုာ်ကျဲးစၢး၀ဲလီၤ” အဂ့ၢ်န့ၣ် စံး၀ဲလီၤႉ

ကီးတရံး တၢ်ထံၣ်လိာ်အိၣ်သကိးဒီးကမျၢၢ်အံၤ ဒီၣ်အီၣ်ဆါဆူၣ်ကၠံၣ် တဲလီၤ၀ဲတၢ်ယံာ်၀ဲအမံးနံးတဆံဘျဲၣ်ႇ သဲစးတၢ်ဒိၣ်စိႇ ဘၣ်ဃးဒီးကမျၢၢ်တဖၣ်အတၢ်ဘံၣ်တၢ်ဘၢစ့ၢ်ကီး ထံဖိကီၢ်ဖိကမျၢၢ်တဖၣ်အတၢ်ပာ်ဖှိၣ်မၤသကိးတၢ် လိၣ်၀ဲအဂ့ၢ်န့ၣ် စံးလီၤကဒီး၀ဲဒ်အံၤန့ၣ်လီၤႉ

“ပ၀ဲ ပဒိၣ်တဖၣ်အတၢ်မုၢ်လၢ်ကွၢ်ဆိအပူၤန့ၣ် တၢ်လၢသဲစးဒိၣ်စိန့ၣ် ပၣ်၀ဲဒၣ်လီၤႉ တၢ်လၢသဲစးဒိၣ်စိစံးတၢ်န့ၣ် ကဘၣ်မ့ၢ်သဲစးဒိၣ်စိလၢ ကဘၣ်ဟ့ၣ်ထံဖိကီၢ်ဖိကမျၢၢ်တဖၣ်တၢ်ဘံၣ်တၢ်ဘၢလီၤႉ တၢ်ဘံၣ်တၢ်ဘၢစံးတၢ်န့ၣ် ဘၣ်ဃးနီၢ်ခိတၢ်ဘံၣ်တၢ်ဘၢႇ ဘၣ်ဃးနီၢ်သးတၢ်ဘံၣ်တၢ်ဘၢႇ ကဘၣ်မ့ၢ်သဲစးဒိၣ်စိလၢ တၢ်အိၣ်မုာ်အိၣ်ခုၣ်အတၢ်ဘံၣ်တၢ်ဘၢႇ မုၢ်နၤခီမ့ၢ်မံစ့ၢ်ကီးန့ၣ် ကမံဘၣ်လၢမုာ်မုာ်ခုၣ်ခုၣ်ႇ ယဟံၣ်န့ၣ်အိၣ်၀ဲဘံၣ်ဘံၣ်ဘၢဘၢလီၤႉ ယကျဲန့ၣ် ဘံၣ်ဘံၣ်ဘၢဘၢလီၤႉ တဘၣ်ဆိမိၣ်တၢ်နီတမံၤတဂ့ၤႉ တၢ်ဘံၣ်တၢ်ဘၢအိၣ်ဧါ တအိၣ်ဧါန့ၣ်ႇ ပသးမ့ၢ်အိၣ်လၢတဘၣ်လိၣ်ဆိကမိၣ်ဘၣ် မ့ၢ်အိၣ်ထီၣ်လံမး သဲစးဒိၣ်စိအိၣ်၀ဲလီၤန့ၣ် ကဘၣ်ဆိကမိၣ်လီၤႉ တၢ်သ့ၣ်တဖၣ်အံၤ ဒိးသန့ၤထီၣ်၀ဲလၢပ၀ဲလီၤႉ တၢ်သ့ၣ်တဖၣ်အံၤ မ့ၢ်ဒိးသန့ၤထီၣ်အသးန့ၣ် အခိၣ်သ့ၣ်န့ၣ်မ့ၢ်၀ဲ ထံကီၢ်ကမျၢၢ်အတၢ်ပာ်ဖှိၣ်မၤသကိးတၢ်လီၤ” အဂ့ၢ်န့ၣ် ထံကီၢ်ၦၤဟ့ၣ်ကူၣ်ဟ့ၣ်ဖးတၢ် ဒီၣ်အီၣ်ဆါဆူၣ်ကၠံၣ် စံး၀ဲလီၤႉ

တၢ်ထံၣ်လိာ်အိၣ်သကိးဘျီ၀ဲအံၤ ထံကီၢ်ၦၤဟ့ၣ်ကူၣ်ဟ့ၣ်ဖးတၢ် ဒီၣ်အီၣ်ဆါဆူၣ်ကၠံၣ် ဃုာ်ဒီး ကီၢ်စၢဖှိၣ်ပဒိၣ်ကရူၢ် ကိတိာ်တဖၣ်ႇ ကိတိာ်ခိၣ်ကျၢၢ် နါခ့ၤထွ့မၠ့ၣ်ႇ တၢ်ဘံၣ်တၢ်ဘၢဒီးကီၢ်စၢဂ့ၢ်၀ီကိတိာ် သုးခိၣ်ဒိၣ်စိ မၠိမ့နီၣ်ႇ ကီၢ်စဲၣ် ပဒိၣ်ကိတိာ်တဖၣ် ဟဲထီၣ်၀ဲဒၣ်ဒီး ကီးတရံး၀့ၢ်ဒီး၀့ၢ်ခိၣ်ဃၢၤထံဖိကီၢ်ဖိကမျၢၢ် အဂၤ ၁၀ႇ၀၀၀ ဘျဲၣ် ဟဲထီၣ်၀ဲန့ၣ်လီၤႉ

ကီၢ်ပယီၤၦၤဟ့ၣ်ကူၣ်ဟ့ၣ်ဖးတၢ် ဒီၣ်အီၣ်ဆါဆူၣ်ကၠံၣ်အံၤ အတၢ်ဟဲဟးလၢကညီကီၢ်စဲၣ်လၢအယံာ်၀ဲခံသီအံၤ မၤ၀ဲတၢ်ထံၣ်လိာ်အိၣ်သကိးဒီးကမျၢၢ် လၢ၀့ၢ်(၄)ဖျၢၣ်ႇ တနံၤအံၤ လါဖ့ၤဘြူၤအါရံၤ ၂၄ သီအနံၤန့ၣ် ကီးတရံး၀့ၢ် ဒီး ကၠးအ့ဆ့ၣ်ကၠံ၀့ၢ်ႇ လါဖ့ၤြဘူၤအါရံၤ ၂၅ သီအနံၤန့ၣ် မၠၣ်၀တံၣ်၀့ၢ် ဒီး လဲဘွဲ၀့ၢ်တဖၣ် တၢ်ကမၤ၀ဲတၢ်ထံၣ်လိာ်အိၣ်သကိးဒီးကမျၢၢ်အဂ့ၢ်န့ၣ် သ့ၣ်ညါဘၣ်လီၤႉ

ကညီကီၢ်စဲၣ်ပူၤ ဖၣ်အၣ်ႇ ကီးတရံးႇ ဖၣ်ပူၣ်ႇ မၠၣ်၀တံၣ် ကီၢ်ရ့ၣ် (၄)ဘ့ၣ်ႇ ဒီး ဖၣ်အၣ်ႇ လဲဘွဲႇ သၣ်တီၣ်ႇ ဖၣ်ပူၣ်ႇ ကီးတရံးႇ ဃိၣ်သၢဖျၢၣ်၀့ၢ် ဒီး မၠၣ်၀တံၣ် ကီၢ်ဆၣ် (၇)ဘ့ၣ် အိၣ်၀ဲန့ၣ်လီၤႉ