ပယီၤသုးလိာ်ကွီၢ်လၢတၢ်ထုးမ့ၣ်ပိၢ်တၢ်ဂ့ၢ်န့ၣ် KNU ဆှဲလဲထီဒါက့ၤ၀ဲ

လါဖ့ၤြဘူၤအါရံၤ ၄ သီႇ ၂၀၂၀ နံၣ်ႇ စးအဲၣ်ဆူ

KNU= ကညီဒီကလုာ်စၢဖှိၣ်ကရၢႇ သုးက့(၅) ဒီး သုးက့(၂)ဟီၣ်က၀ီၤအပူၤ ဖဲအပူၤကွံာ်လါယနူၤအါရံၤ ၂၇ သီအနံၤန့ၣ် ဘၣ်ဃးဒီးမ့ၣ်ပိၢ်ပိၢ်ဖးထီၣ်တၢ်ဂ့ၢ်အံၤ KNU ဒိးလီၤဃာ်မၤပိၢ်ဖးထီၣ်၀ဲအဂ့ၢ် ပယီၤသုးလိာ်ကွီၢ် ၀ဲဒၣ်အဖီခိၣ်ႇ KNU သုးက့(၅)တပၤ ထုးထီၣ်၀ဲလံာ်တၢ်ပာ်ဖျါတဘ့ၣ်န့ၣ်လီၤႉ

တၢ်ကဲထီၣ်သးန့ၣ် သုးက့(၅)တပၤ တၢ်တအိၣ်ခိးထုးဒီးမ့ၣ်ပိၢ်ဘၣ်ဒီး ကီၢ်ပယီၤတပၤမၤဆှဲလဲ၀ဲမ့ၣ်ပိၢ်အဆၢကတီၢ် KNU ဒိးလီၤဃာ်ကါမ့ၣ်ပိၢ်န့ၣ် အ၀ဲသ့ၣ်ဃုဒီးထံၣ်၀ဲအဃိမၤပိၢ်ဖးထီၣ်၀ဲဒၣ်လီၤႉ ပယီၤသုးလိာ်ကွီၢ်၀ဲတၢ်ဒ်န့ၣ်ႇ တမ့ၢ်၀ဲဘၣ်န့ၣ် တနံၤအံၤ (လါဖ့ၤြဘူၤအါရံၤ ၃ သီ)အနံၤန့ၣ် ဆှၢထီၣ်လံာ်တၢ်က့ၤဆှဲလဲအံၤဆူကလံၤထံးကီၢ်ခီသုး၀ဲၤလီၢ်ခိၣ်သ့ၣ်အအိၣ်ဒီး လံာ်တၢ်က့ၤထီဒါကဒါက့ၤအပူၤပာ်ဖျါ၀ဲလီၤႉ

ဘၣ်ထွဲဒီးတၢ်ဂ့ၢ်အံၤ ခ့ၣ်အဲၣ်ယူၣ် မုၢ်ြတီၢ်ကီၢ်ရ့ၣ် ၦၤပၢၤလီၢ်ဆ့ၣ်နီၤ ပဒိၣ်စီၤထဲဒၢၣ် စံး၀ဲလၢ “အ၀ဲသ့ၣ်(ပယီၤသုး)လိာ်ကွီၢ်၀ဲဒၣ်လၢ KNLA ၦၤသုးဖိတဖၣ် လဲၤဒိးလီၤဃာ်မ့ၣ်ပိၢ်ဒီးမၤပိၢ်ဖးထီၣ်တၢ်လီၤႉ ပက့ၤဃုသ့ၣ်ညါကဒါက့ၤန့ၣ် KNLA လဲၤမၤပိၢ်ဖးထီၣ်၀ဲတမ့ၢ်ဘၣ်ႉ မ့ၢ်၀ဲဒၣ်မ့ၣ်ပိၢ် လၢၦၤဒိးလီၤဃာ်လၢ အပူၤကွံာ်လံန့ၣ်လီၤႉ ဖဲအ၀ဲသ့ၣ်လဲၤဆှဲလဲ၀ဲအဆၢကတီၢ် ဘၣ်၀ဲဒၣ်ဒီးပိၢ်ဖးထီၣ်၀ဲအဃိ ဘၣ်ဒိဘၣ်ထံး၀ဲဒၣ်န့ၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

လၢတၢ်ဂ့ၢ်အံၤအဖီခိၣ် ပယီၤသုးတပၤ ထုးထီၣ်ပာ်ဖျါ၀ဲတၢ်ကစီၣ်လၢ ခ့ၣ်အဲၣ်ယူၣ်တပၤ ထုးမ့ၣ်ပိၢ်ဒီးမၤပိၢ်ဖးထီၣ်တၢ်အံၤလီၤဂာ်ဒ်သိးဒီး ခ့ၣ်အဲၣ်ယူၣ်မၤကမၣ်ဘၣ်တၢ်လီၤအဂ့ၢ်န့ၣ် ပဒိၣ်စီၤထဲဒၢၣ် ဆဲးစံး၀ဲလီၤႉ

လၢန့ၣ်အမဲာ်ညါ ပယီၤသုးအဂီၢ်တၢ်ဆှၢ၀ဲတၢ်အီၣ်တၢ်အီဒီး တၢ်ဆှၢအါထီၣ်၀ဲသုးအဂီၢ်ႇ ဘၣ်တၢ်ပာ်ပနီၣ်ဃာ်ဟီၣ်က၀ီၤလံဒီး တၢ်မ့ၢ်လဲၤတလၢ၀ဲတၢ်လီၢ်လၢတၢ်ပာ်ပနီၣ်ဃာ်အီၤန့ၣ်ႇ လီၢ်က၀ီၤကမျၢၢ်တဖၣ်ဒီး လီၢ်က၀ီၤတၢ်ဘံၣ်တၢ်ဘၢအဂီၢ် တၢ်ဘၣ်ယိၣ်ဘၣ်ဘှီအိၣ်၀ဲဒၣ်အဃိ တၢ်ြတီဆၢဒီးတၢ်ဒိးလီၤဃာ်၀ဲမ့ၣ်ပိၢ်အိၣ်၀ဲလီၤႉ မ့ၢ်တလၢထီၣ်ဟီၢ်က၀ီၤလၢတၢ်ပာ်ပနီၣ်ဃာ်အီၤန့ၣ် ဘၣ်ဃးမ့ၣ်ပိၢ်တၢ်ကဲထီၣ်သးဒ်အံၤ ဒီး တၢ်ခးလိာ်သးကဲထီၣ်သ့၀ဲအဂ့ၢ်န့ၣ် KNU တပၤစံး၀ဲလီၤႉ

ဖဲလါယနူၤအါရံၤ ၂၉ သီအနံၤ ကီၢ်ပယီၤသုးမုၢ်ဒိၣ် ထုးထီၣ်ရၤလီၤ၀ဲတၢ်ကစီၣ်အသိး ပကူၣ်ကီၢ်ခီႇ လၢၢ်ဒိၣ်ကီၢ်ဆၣ် ဒီး ကညီကီၢ်စဲၣ်ႇ ဖၣ်ပူၣ်ကီၢ်ရ့ၣ်အပူၤ ကျဲလၢကကဲထီၣ်တၢ်မၤစၢၤလၢ လီၢ်က၀ီၤတၢ်ဂုၤထီၣ်ပသီထီၣ်အဂီၢ် ပယီၤသုး အ့ၣ်ကၠံၣ်နံၣ်ယၢၣ်တဖၣ်လၢအတ့အဘှီကျဲအံၤ ဖဲတၢ်ဆှၢ၀ဲသုးတၢ်အီၣ်တၢ်အီအဆၢကတီၢ်ႇ ပယီၤသုးကျဲအံၤ ခ့ၣ်အဲၣ်ယူၣ် လဲၤဒိးလီၤဃာ်မ့ၣ်ပိၢ်ဒီးမၤပိၢ်ဖးထီၣ်တၢ်န့ၣ် ပယီၤသုးထုးထီၣ်ပာ်ဖျါ၀ဲန့ၣ်လီၤႉ

ခီဖျိတၢ်ထုး၀ဲမ့ၣ်ပိၢ်ပိၢ်ဖးထီၣ်အဃိ သိလ့ၣ်တခိၣ်ဒီး ဘုသးတဖၣ်ဟးဂီၤ၀ဲဒၣ်အဂ့ၢ်ႇ စးထီၣ်လၢပယီၤသုးတ့ကျဲ ၂၀၁၉ နံၣ်ႇ လါနိၣ်၀့ဘၢၣ် ၁၁ သီ တုၤလၢတနံၤအံၤန့ၣ် လၢၢ်ဒိၣ်ကီၢ်ဆၣ် ဒီး ဖၣ်ပူၣ်ကီၢ်ဆၣ်အပူၤ ႇ သိလ့ၣ်လၢအဆှၢ၀ဲတၢ်အီၣ်တၢ်အီလၢ တၢ်ဘံၣ်တၢ်ဘၢအဂီၢ်အံၤန့ၣ်ႇ ခ့ၣ်အဲၣ်ယူၣ်ဒိးလီၤမ့ၣ်ပိၢ်မၤပိၢ်ဖးထီၣ်တၢ်အိၣ်၀ဲ ၃ ဘျီႇ ဘၣ်သဂၢၢ်ခးလိာ်သးအိၣ်၀ဲ ၆ ဘျီႇ ယီၢ်ဘၣ်မ့ၣ်ပိၢ် ၆ ဘျီ အမဲာ်ညါ တၢ်ဘံၣ်တၢ်ဘၢသုးဖိတဖၣ် မၤဖျါထီၣ်လီၢ်က၀ီၤမ့ၣ်ပိၢ်အိၣ်၀ဲ ၈ ဘျီအဂ့ၢ်န့ၣ် ပယီၤသုး တၢ်ဒီတဒၢ၀ဲၤကျိၤအရူ ထုးထီၣ်ပာ်ဖျါ၀ဲတၢ်ကစီၣ်လီၤႉ