Home တၢ်ကစီၣ် ၦၤကၠိဖိ ၁၂ တီၤလၢအဖျိထီၣ် ကညီကူၣ်သ့ဆဲးလၤ၀ဲၤကျိၤ ပဒိၣ်တၢ်ဒိးစဲး အမျးကယၤလီၤစှၤ

ၦၤကၠိဖိ ၁၂ တီၤလၢအဖျိထီၣ် ကညီကူၣ်သ့ဆဲးလၤ၀ဲၤကျိၤ ပဒိၣ်တၢ်ဒိးစဲး အမျးကယၤလီၤစှၤ

338
0
Photo: KECD

လါအ့ြဖ့ၣ် ၂၉သီႇ၂၀၂၀နံၣ်ႇ ခ့ၣ်အဲးစံၣ်

တနံၣ်အံၤ ၂၀၁၉=၂၀၂၀ တၢ်သိၣ်လိနံၣ်အံၤန့ၣ် ၦၤကၠိဖိလၢအနုာ်လီၤဒိးစဲး၀ဲ ၁၂ တီၤ ကီၢ်သူလ့ၤပဒိၣ် တၢ်ဒိးစဲးတဖၣ် ဖျိထီၣ်အမျးကယၤစှၤလီၤ၀ဲဒၣ်အဂ့ၢ်န့ၣ် ကညီကူၣ်သ့ဆဲးလၤ၀ဲၤကျိၤအနဲၣ်ရွဲၣ် ပဒိၣ်စီၤလီၤအဲၣ်မူစံး၀ဲန့ၣ်လီၤႉ

အ၀ဲစံး၀ဲလၢ “ကၠိဖိဖျိထီၣ် မျးကယၤစှၤလီၤအဖီခိၣ်န့ၣ် ပပဲာ်ထံနီၤဖးအီၤတၢ်ဂ့ၢ်ဟဲကဲထီၣ်သ့တဘျုးမံၤမီၣ်ႉ တၢတမံၤန့ၣ် အအါကတၢၢ်န့ၣ် ပလံာ်မိၢ်ၦၢ်တလၢဘၣ်ႉ ခံခါတခါန့ၣ် ပလံာ်မိၢ်ၦၢ်လၢပနီၤလီၤသ့ၣ်တဖၣ်န့ၣ်ဒီး ကၠိသူ၀ဲတဖၣ်န့ၣ် တဒ်သိးလိာ်အသးခဲလၢာ်ဘၣ်ႉ သၢခါတခါန့ၣ် ကၠိသရၣ်တဖၣ်န့ၣ် မ့ၢ်၀ဲဒၣ်ကၠိသရၣ်လၢအသီအါ အဃိ နၢၤ၀ဲဒၣ်အလံာ်တၢ်တဂ့ၢ်ခိၣ်တီသ့ၣ်တဖၣ်န့ၣ် ပထံၣ်ဘၣ်လၢအဂံၢ်စၢ်ႉ အဃိသတးန့ၣ် တၢ်မၤဂ့ၤထီၣ်က့ၤတၢ်အကံၢ်အစီ လၢနီၣ်ဂံၢ်နီၣ်ဒွးမ့ၢ်ဂ့ၤ ႇတၢ်သ့တၢ်ဘၣ်မ့ၢ်ဂ့ၤ အခီပညီန့ၣ် လၢပတၢ်လိၣ်ဘၣ်သ့ၣ်တဖၣ်န့ၣ် ပထံၣ်ဖျါအါထီၣ်အဃိ လိၣ်က့ၤလၢပကဃုသကိးက့ၤကျဲလၢ ပကမၤဂ့ၤထီၣ် ကပမၤဆူၣ်ထီၣ်တၢ်သ့ၣ်တဖၣ်ဒ်လဲၣ် ဒ်သိးခါဆူညါ ပတၢ်ဖံးတၢ်မၤကဂ့ၤထီၣ်အဂီၢ်မီၤနီၤႉ”အဂ့ၢ်န့ၣ် စံး၀ဲန့ၣ်လီၤႉ

တနံၣ်ဒီးတနံၣ်ကညီကီၢ်စဲၣ်ပူၤ ကၠိလၢအဟံသိၣ်လိ၀ဲကညီကူၣ်သ့ဆဲးလၤအလံာ်ညိၣ်သိၣ်ဒိၣ် ဟဲအါထီၣ်၀ဲကိးနံၣ်ဒဲးအသိး ကၠိလၢအသိၣ်လိကညီကူၣ်သ့ဆဲးလၤအလံာ်ညိၣ်သိၣ်ဒိၣ်ဘၣ်ဆၣ် တနုာ်လီၤဒိးစဲး ၁၂ တီၤ ကီၢ်သူလ့ၤပဒိၣ်တၢ်ဒိးစဲးတဖၣ်စ့ၢ်ကီး အိၣ်၀ဲအဂ့ၢ်န့ၣ် အ၀ဲတဲအါထီၣ်၀ဲန့ၣ်လီၤႉ

လၢတၢ်ဂ့ၢ်အါမံၤအဖီခိၣ် ၁၂ တီၤ ကၠိဖိလၢအဖျိထီၣ်ကီၢ်သူလ့ၤပဒိၣ်တၢ်ဒိးစဲးအမျးကယၤလီၤစှၤန့ၢ်ဒံး နံၣ်လၢအပူၤကွံာ် ၂ နံၣ်အသိး ခီဖျိတကီၢ်ခါခဲအံၤ ခိ၀ံၣ် ၁၉ တၢ်ဆါသံသြတိ၁်အဃိ တၢ်ဟဲဒိဘၣ်လၢကညီကူၣ်သ့ဆဲးလၤ၀ဲၤကျိၤအဂီၢ်အိၣ်ဒ်လဲၣ်အဂ့ၢ်န့ၣ် ပဒိၣ်စီၤလီၤအဲၣ်မူတဲအါထီၣ်၀ဲဒ်အံၤန့ၣ်လီၤ

“တၢ်ဒိဘၣ်န့ၣ်အိၣ်ဖးအါညါ တၢတခါန့ၣ်ပတသ့ၣ်ညါလီၤတံၢ်ဒံးဘၣ်လၢ ကၠိန့ၣ်ပစးထီၣ်အီၤကန့ၢ်အဆၢ ကတီၢ်ဖဲလဲၣ်ႉ ဒ်သိးလၢအပူၤကွံာ်ပစးထီၣ်ညီနုၢ်အသိးန့ၣ် တန့ၢ်ဘၣ်န့ၣ်လီၤတံၢ်လံႉ ခံခါတခါန့ၣ်တၢ်ကိၢ်ခါကၠိ သရၣ်တၢ်မၤလိန့ၣ်ပမၤအီၤထီဘိလီၤႉ အဃိန့ၣ် ပတမၤဘၣ်ကၠိသရၣ်တၢ်မၤလိဒ်ပတိာ်ပာ်အသိးဘၣ်ႉ တနီၤန့ၣ်မၤဘၣ်တ၀ာ် တနီၤန့ၣ်တမၤဘၣ်န့ၣ်အိၣ်၀ဲစ့ၢ်ကီးလီၤႉ အဃိန့ၣ်ကဲထီၣ်၀ဲဒၣ်တၢ်ကီတၢ်ခဲတခါလီၤႉ ဒီးခဲအံၤန့ၣ်ပကဘၣ်နီၤလီၤ၀ဲဒၣ်ကၠိအတၢ်ပီးတၢ်လီဒ်အမ့ၢ်၀ဲဒၣ် လံာ်ကွဲးႇ ထိၣ်ဒံးဘိႇစၢၢ်ဘိဒီး တၢ်လိာ်ကွဲတၢ်ပီးတၢ်လီႉ အဃိန့ၣ် တၢ်တဖၣ်န့ၣ် ပမၤအီၤတန့ၣ်ဘၣ်ႉ ဒီးဒ်န့ၣ်အသိး လၢပကအိၣ်ဖှိၣ်ထံၣ်လိာ်ဃုသကိးကျဲစ့ၢ်ကီးဒီး ပပာ်ဖှိၣ်လိာ်ပသးပလဲၤထီၣ်က့ၤလီၤတန့ၢ်ဘၣ်အဖီခိၣ်န့ၣ် အကဲထီၣ်၀ဲဒၣ်တၢ်တံာ်တာ် တၢ်ဒိဘၣ်ၦၤဖးဒိၣ်တခါစ့ၢ်ကီးလီၤမီၣ်ႉ”အဂ့ၢ်န့ၣ် ပဒိၣ်စီၤလီၤအဲၣ်မူ စံး၀ဲန့ၣ်လီၤႉ ဒ်ကညီကူၣ်သ့ဆဲးလၤ ပာ်လီၤ၀ဲအလံာ်ညိၣ်သိၣ်ဒိၣ်အိၣ်၀ဲအသိး လၢတၢ်ၦဲၢ်ထံက့ၤကညီကီၢ်စဲၣ်ႇကီၢ်ရ့ၣ် ၇ ဘ့ၣ်ပူၤ ကၠိလၢအသိၣ်လိ၀ဲကညီအလံာ်ညိၣ်သိၣ်ဒိၣ် အတၢ်သိၣ်လိအတီၤပတီၢ်ကန့ၢ်အဂီၢ် ၁၂ တီၤ ကီၢ်သူလ့ၤပဒိၣ်တၢ်ဒိး စဲးအံၤ ဘၣ်တၢ်က့ၤဒုးမူထီၣ်ကဒါက့ၤအီၤဖဲ ၂၀၁၃=၂၀၁၄နံၣ် အဆၢကတီၢ်န့ၣ်လီၤႉ

လၢ၂၀၁၉=၂၀၂၀နံၣ် ၁၂ တီၤ ကီၢ်သူလ့ၤပဒိၣ်တၢ်ဒိးစဲးအဂီၢ် ကညီကီၢ်စဲၣ်ႇကီၢ်ရ့ၣ် ၇ဘ့ၣ်အပူၤ ကၠိလၢအနုာ်လီၤ ဒိးစဲး၀ဲပဒိၣ်တၢ်ဒိးစဲးအိၣ်၀ဲ(၁၇) ဖျၢၣ်ႇ ၦၤကၠိဖိနုာ်လီၤတၢ်ဒိးစဲးအိၣ်၀ဲ (၅၆၅)ဂၤ ဒီးၦၤဖျိထီၣ်အိၣ်၀ဲ (၃၁၃)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ကီၢ်သူလ့ၤပဒိၣ်တၢ်ဒိးစဲးအံၤဘၣ်တၢ်နီၤဖးလီၤအီၤအိၣ်၀ဲတီၤ ၃ ပတီၢ် လၢအမ့ၢ်၀ဲ ၆တီၤႇ ၉တီၤ ဒီး ၁၂တီၤန့ၣ်လီၤႉ ၆ တီၤ ပဒိၣ်တၢ်ဒိးစဲးန့ၣ်ဘၣ်တၢ်သမံသမိးအီၤလၢကီၢ်ဆၣ်ကူၣ်သ့ဆဲးလၤ၀ဲၤကျိၤႇ ၉တီၤန့ၣ် လၢကီၢ်ရ့ၣ်ကူၣ်သ့ ဆဲးလၤ၀ဲၤကျိၤဒီး မ့မ့ၢ် ၁၂တီၤပဒိၣ်တၢ်ဒိးစဲးတခီန့ၣ် ဘၣ်တၢ်သမံသမိးအီၤ လၢလီၢ်ခၢၣ်သးကညီကူၣ်သ့ဆဲးလၤ၀ဲၤကျိၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ