လါအ့ြဖ့ၣ် ၆ သီႇ ၂၀၂၀ နံၣ်ႇ နါ၀့ၤဖၠိစၣ်
ဟီၣ်ခိၣ်ဒီဘ့ၣ် တၢ်ဆါသံသြတိာ် တၢ်ဘၣ်ကူဘၣ်ဂာ်လၢအချ့ကဲထီၣ်သးအကတီၢ် ကကွၢ်န့ၢ်တၢ်လၢ ကလုာ်ဒူၣ် လီၢ်ဟီၣ်က၀ီၤပူၤ ကမျၢၢ်ၦၤဃ့ၢ်မှံဟးဖျိးတဖၣ်အဂီၢ်ဒီး ကပတုာ်ကွံာ်တၢ်ခးအဂ့ၢ်န့ၣ် ကညီဒီကလုာ် ဒံၣ်မိၣ်ြခဲၣ်တ့ၣ် ပၣ်တံၣ် =KNDP ဃ့ထီၣ်၀ဲဒၣ်ဆူ ၦၤဘၣ်မူဘၣ်ဒါလၢအဘၣ်ထွဲတဖၣ်အအိၣ်န့ၣ်လီၤႉ
ခီဖျိလၢကီၢ်ပူၤတၢ်ဒုးတၢ်ယၤအဃိ ကလုာ်ဒူၣ်ဟီၣ်က၀ီၤအပူၤ ကမျၢၢ်ၦၤဃ့ၢ်တၢ်ဒုးတၢ်ယၤတဖၣ် တူၢ်ဘၣ်၀ဲဒၣ် တၢ်ကီတၢ်ခဲအါအါဂီၢ်ဂီၢ်လံဒီး တူၢ်ဘၣ်ကဒီး၀ဲတကီၢ်ခါ (Corona Virus) တၢ်ဆါဘၣ်ကူဘၣ်ဂာ် တၢ်အိၣ်သးအိၣ်၀ဲအဃိ ကပတုာ်ကွံာ်တၢ်ခးလိာ်သးခဲလၢာ်အဂီၢ်ႇ ဖဲလါအ့ြဖ့ၣ် ၂ သီအနံၤ ကညီဒီကလုာ်ဒံၣ်မိၣ်ြခဲၣ်တ့ၣ်ပၣ်တံၣ် (Corona Virus) လၢအအိၣ်သူၣ်လီၤအသးလၢကညီကီၢ်စဲၣ်အံၤ ထုးထီၣ်ဘိးဘၣ်ရၤလီၤ၀ဲလံာ်တၢ်ပာ်ဖျါဒီး ဆီၣ်တခူထီၣ်၀ဲန့ၣ်လီၤႉ
KNDP ပၣ်တံၣ် ၦၤပၢၤလီၢ်ဆ့ၣ်နီၤ မါအီၣ်ပၠံၣ်စိ စံး၀ဲလၢ “ လၢတၢ်ဒုးတၢ်ယၤအကျါန့ၣ် ကဘၣ်ဟးဆှဲးကဒီး တၢ်သ့ၣ်တဖၣ်အံၤလီၤႉ တၢ်ကိၢ်တၢ်ဂီၤအါထီၣ်တခါ၀ံၤတခါအဃိ တၢ်ဒုးတၢ်ယၤတအိၣ်လၢၤဘၣ်ႉ မ့ၢ်ဘၣ်အိၣ်လၢတဂၤလၢကစၢ်ဟံၣ်န့ၣ် တဂ့ၤဒိၣ်ဧါႉ လၢအ၀ဲသ့ၣ်အဂီၢ် မ့ၢ်တခးလိာ်သးလၢၤဘၣ်န့ၣ် လၢတၢ်မုာ်တၢ်ခုၣ်အဂီၢ်စ့ၢ်ကီး တဂ့ၤဒိၣ်၀ဲဧါႇ တၢ်အဃိန့ၣ် ပထုးထီၣ်ပာ်ဖျါ၀ဲဒၣ်လီၤ” အဂ့ၢ်န့ၣ် စံးဘၣ် ခ့ၣ်အဲးစံၣ်လီၤႉ
ခီဖျိလၢတၢ်ဒုးတၢ်ယၤအဃိ တကီၢ်ခါ ကညီကီၢ်စဲၣ် KNU-ကညီဒီကလုာ်စၢဖှိၣ်ကရၢ တၢ်ပၢဟီၣ်က၀ီၤအပူၤ သုးက့ (၅)န့ၣ် ၦၤလီၢ်အိၣ်ကမှံဖိတဖၣ် ဘၣ်ဃ့ၢ်အိၣ်ခူသူၣ်အသးအိၣ်ဒံး၀ဲဒၣ်အသိး ရၢၣ်ခၢၣ်ႇ ခၠီႇ ယိၤဒိၣ် ဒီး ကခၠ့ၣ် ကီၢ်စဲၣ်တပၤစ့ၢ်ကီး ၦၤဃ့ၢ်မှံဟးဖျိးတဖၣ်အိၣ်ဒံး၀ဲဒၣ်အဖၢမုၢ်အဃိ တၢ်ကပတုာ်တၢ်ခးလိာ်သးအဂီၢ် အဲၣ်ဒိးဆီၣ်တခူထီၣ်၀ဲ ကီၢ်ပဒိၣ် ဒီး ကလုာ်ဒူၣ်ၦၤဖီၣ်စုက၀ဲၤဖိတဖၣ်လီၤအဂ့ၢ်န့ၣ် အ၀ဲစံးၦဲၤ၀ဲန့ၣ်လီၤႉ
လၢန့ၣ်အမဲာ်ညါ ဟီၣ်ခိၣ်ဒီဘ့ၣ်တၢ်အိၣ်ဆူၣ်အိၣ်ချ့ကရူၢ် -WH0 ဒီး ကီၢ်ပယီၤ တၢ်အိၣ်ဆူၣ်အိၣ်ချ့ဒီးတၢ်လိာ်ကွဲ ကိတိာ်၀ဲၤကျိၤ အတၢ်ဟ့ၣ်ဒုးသ့ၣ်ညါတဖၣ်စ့ၢ်ကီး ကမျၢ်တဖၣ်ကဘၣ်လူၤပိာ်ထွဲ၀ဲအဂီၢ်ဒီး ပဒိၣ်တၢ်အိၣ်ဆူၣ်အိၣ်ချ့၀ဲၤကျိၤ ဒ်တၢ်ြတီဆၢ (Corona Virus) တၢ်ဆါ တၢ်နဲၣ်လီၤအိၣ်အသိးန့ၣ် တသ့ဖဲအသ့ကဟံးထီၣ်ဖီၣ်ထီၣ်သကိးအဂီၢ်န့ၣ် ပၣ်တံၣ်ကရၢဖိတဖၣ်စ့ၢ်ကီး KNDP ပၣ်တံၣ် တၢ်ထုးထီၣ်ပာ်ဖျါအံၤ ဆီၣ်တခူထီၣ်၀ဲန့ၣ်လီၤႉ
