လါအ့ြဖ့ၣ် ၂၀ သီႇ ၂၀၂၀ နံၣ်ႇ ခ့ၣ်အဲးစံၣ်
ဖဲလါအ့ြဖ့ၣ် ၁၇ သီ (ကီၢ်ပယီၤ နံၣ်ထီၣ် ၁ သီ)အနံၤန့ၣ် ကီၢ်ပယီၤအကီၢ်ခိၣ်ပျၢ်ဖျဲးကွံာ်၀ဲ ဖၣ်အၣ်ဃိာ်ပူၤ ၦၤဃိာ်ဖိခဲလၢာ် ၂၃၉ ဂၤအဂ့ၢ်န့ၣ် သ့ၣ်ညါဘၣ်လီၤႉ
ထံကီၢ်ဒီဘ့ၣ် ဃိာ်ပူၤႇ တၢ်လီၢ်ကိးတီၤဒဲးစုာ်စုာ် ၦၤဃိာ်ဖိတဖၣ်ႇ ဃုာ်ဒီး ထံဂုၤကီၢ်ဂၤဖိ ၦၤဃိာ်ဖိတဖၣ်ခဲလၢာ် ၂၄ႇ၈၉၆ ဂၤအံၤ ကီၢ်ခိၣ် ပျၢ်ဖျဲးကံွာ်အီၤ ဒ်ထံကီၢ်တၢ်သူၣ်ထီၣ်ဂံၢ်ခီၣ်ထံးတၢ်ဘျၢသဲစး အဆၢ ၂၀၄ႇ အဆၢနီၤဖး (က)အသိးအဂ့ၢ်န့ၣ် ကီၢ်ခိၣ်အရူ ထုးထီၣ်ဘိးဘၣ်ရၤလီၤ၀ဲတၢ်ကစီၣ်န့ၣ်လီၤႉ
ၦၤလၢအထူၣ်ဖျဲးထီၣ်လၢဖၣ်အၣ်ဃိာ်ပူၤတဖၣ် အါဒၣ်တက့ၢ်န့ၣ် သ့ၣ်ညါဘၣ်လၢ မ့ၢ်ၦၤလီၤဘၣ်ဃိာ်ပူၤ လၢက သံၣ်ကသီတၢ်မူးတၢ်ရၢ်အအါကတၢၢ်ဒီး ဖဲအကျါန့ၣ် ပိာ်ခွါ ၁၉၁ ဂၤႇ ပိာ်မုၣ် ၄၁ ဂၤႇ ထံဂုၤကီၢ်ဂၤ ဖိ ပိာ်ခွါ ၅ ဂၤ ဒီး ပိာ်မုၣ် ၂ ဂၤ ပာ်ဖှိၣ်ခဲလၢာ် ၂၃၉ ဂၤ အဂ့ၢ်န့ၣ် သ့ၣ်ညါဘၣ်လီၤႉ
ဖဲအပူၤကွံာ် ၂၀၁၉ နံၣ်ႇ ကီၢ်ပယီၤနံၣ်ထီၣ် ၁ သီအနံၤန့ၣ် ကီၢ်ခိၣ်ပျၢ်ဖျဲးကွံာ်၀ဲ ထံကီၢ်ဒီဘ့ၣ်ဃိာ်တဖၣ်အပူၤ ၦၤဃိာ်ဖိခဲလၢာ် ၉ႇ၅၃၅ ဂၤဒီး ဖၣ်အၣ်ဃိာ်ပူၤ ပၣ်ဃုာ်၀ဲ ၂၅၉ ဂၤအဂ့ၢ်န့ၣ် သ့ၣ်ညါဘၣ်လီၤႉ
