Home တၢ်ကစီၣ် ၦၤအဂၤ ၃၀ ဘျဲၣ်လၢတၢ်ဖီၣ်ချုး၀ဲလၢကသံၣ်မူၤဘှီးတၢ်ဂ့ၢ် KNU ဟံးန့ၢ်အရ့

ၦၤအဂၤ ၃၀ ဘျဲၣ်လၢတၢ်ဖီၣ်ချုး၀ဲလၢကသံၣ်မူၤဘှီးတၢ်ဂ့ၢ် KNU ဟံးန့ၢ်အရ့

652
0

လါမ့ၤ ၁၀ သီႇ ၂၀၂၀ နံၣ်ႇ ခ့ၣ်အဲးစံၣ်

KNU- ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်ႇ ၀ီၢ်ရီကီၢ်ဆၣ် ကညီဒီကလုာ်ပၢၤကီၢ်သုး -KNPF ဖီၣ်ချုးန့ၢ်၀ဲၦၤဆါကသံၣ်မူၤဘှီးဖိ ၂ ဂၤ ဒီး ၦၤလၢကဟဲသူကသံၣ်ဖိ ၃၅ ဂၤအံၤ န့ၣ် တၢ်ကဟံးဂ့ၢ်၀ီဒ်ကီၢ်သူလ့ၤ ကသံၣ်မူၤဘှီးသဲစးတၢ်ဘျၢအသိးအဂ့ၢ်န့ၣ် ပၢၤကီၢ်သုးၦၤဘၣ်မူဘၣ်ဒါတဖၣ် စံးဘၣ်ခ့ၣ်အဲးစံၣ်လီၤႉ

ဖဲလါမ့ၤ ၇ သီအနံၤန့ၣ် မိၣ်ကီၢ်စဲၣ်ႇ သၣ်ဖၠူၣ်စယၣ်ကီၢ်ဆၣ်ႇ စခါကၠံတၢ်လီၢ် ရီဘၢၣ်ကျီးပူၤန့ၣ် တၢ်ဖီၣ်ချုးန့ၢ်၀ဲ WY ကသံၣ်မူၤဘှီး ၈၀၀ ဖျၢၣ်ဘျဲၣ်အံၤလၢပိာ်ခွါ ၂ဂၤအအိၣ်ဒီး ဖဲတၢ်သမံသမိး၀ဲတၢ်အကတီၢ် ၦၤလၢကဟဲသူ ကသံၣ်မူၤဘှီးအဂီၢ် ဟဲတုၤကဒီး၀ဲ ၃၅ ဂၤ ဒီး အၢၣ်လီၤအတၢ်ကမၣ်အဃိ ဒ်ကသံၣ်မူၤဘှီးသဲစးတၢ်ဘျၢအသိး တၢ်ဖီၣ်ဃုာ်ဒီးအ၀ဲသ့ၣ်အဂ့ၢ်န့ၣ် ၀ီၢ်ရီကီၢ်ဆၣ် ဖါြပးပၢၤကီၢ်ရူမူဒါခိၣ် စီၤည့ခၠါ စံးဘၣ်ခ့့ၣ်အဲးစံၣ်လီၤႉ

“အ၀ဲတဂၤန့ၣ် တၢ်ဖီၣ်ချုးန့ၢ်၀ဲကသံၣ် ၄၀ ဖျၢၣ်လီၤႉ တၢ်တီၣ်ထီၣ်တၢ်မူးတၢ်ရၢ်အံၤဆူ၀ီၢ်ရီကီၢ်ဆၣ် ကွီၢ်ဘျီၣ်ရူန့ၣ်လီၤႉ ဒီးလၢအဂၤတဂၤန့ၣ် တၢ်ဖီၣ်ချုးန့ၢ်၀ဲကသံၣ် (၈၀၀ ဖျၢၣ်)ဘျဲၣ်ဒီး မ့မ့ၢ်အ၀ဲန့ၣ် တၢ်ကဘၣ်ဆှၢအီၤဆူ ကီၢ်ရ့ၣ်ကွီၢ်ဘျီၣ်ရူန့ၣ်လီၤႉ လၢကသူကသံၣ်မူၤဘှီးအဂီၢ်ၦၤလၢအဟဲတဖၣ်န့ၣ် တၢ်ကိး၀ဲအမိၢ်အပၢ်သ၀ီသးၦၢ်တဖၣ်ဒီး အၢၣ်လီၤအီလီၤအသး၀ံၤဆဲးလီၤစုမုၢ်ကျၢၢ်ဒီး တၢ်ပျၢ်က့ၤ၀ဲလီၤ” အဂ့ၢ်န့ၣ် ဖါြပးပၢၤကီၢ်ရူမူဒါခိၣ် စီၤည့ခၠါ စံး၀ဲ ဖဲလါမ့ၤ ၉ သီအနံၤန့ၣ်လီၤႉ

ဒ်ကီၢ်သူလ့ၤ ၂၀၁၄ ကသံၣ်မူၤဘှီးသဲစးတၢ်ဘျၢအသိးန့ၣ် တၢ်မ့ၢ်ဖီၣ်ချုးန့ၢ်၀ဲကသံၣ်(၁၀၀ ဖျၢၣ်)ဆူအဖီလာ် ကီၢ်ဆၣ်ကွီၢ်ဘျီၣ်ကဆၢတဲာ်၀ဲတၢ်မူးတၢ်ရၢ်ဒီးႇ တၢ်မ့ၢ်ဖီၣ်ချုးန့ၢ်၀ဲ (၁၀၀ ဖျၢၣ်) ဆူဖီခိၣ်န့ၣ် တၢ်ကဆှၢ၀ဲဆူကီၢ်ရ့ၣ်ကွီၢ်ဘျီၣ်ရူအအိၣ်န့ၣ် တၢ်ပာ်လီၤဃာ်တၢ်သိၣ်တၢ်သီအိၣ်၀ဲဒၣ်လီၤႉ မ့ၢ်သူ၀ဲကသံၣ်မူၤဘှီးမ့ၢ်လီၤတံၢ်လီၤဆဲးန့ၣ် ကဘၣ်အိၣ်လၢတၢ်ဒုးဃာ်အလီၢ် ၆ လါ တုၤလၢ ၁ နံၣ် တၢ်ပာ်ပနီၣ်ဃာ်အိၣ်၀ဲအဂ့ၢ်န့ၣ် သ့ၣ်ညါဘၣ်လၢကီၢ်သူလ့ၤ ကသံၣ်မူၤဘှီးသဲစးတၢ်ဘျၢအကူာ်တဖၣ်အပူၤန့ၣ်လီၤႉ

ဘၣ်ထွဲဒီး KNPF ဖီၣ်၀ဲၦၤမၤကသံၣ်မူၤဘှီးတဖၣ်တၢ်ဂ့ၢ်အံၤ ခီဖျိဟ့ၣ်တၢ်ကမၣ်လၢ အဃ့၀ဲဒၣ်လၢစ့အီၣ်လိးန့ၣ် တၢ်ပဲာ်ထံနီၤဖးဟဲအိၣ်ထီၣ်အါမံၤအါမၠိန့ၣ်လီၤႉ

တၢ်ဂ့ၢ်အံၤအဖီခိၣ် ပၢၤကီၢ်ရူမူဒါခိၣ် စီၤည့ခၠါ စံး၀ဲ “အမိၢ်အပၢ်တဖၣ်တဲ၀ဲလၢ အဲၣ်ဒိးက့ၤကိး က့ၤ၀ဲအဖိဃုာ်ဒီးဆဲးကဲးတဘျီဃီန့ၣ်လီၤႉ ခီဖျိလၢအသူ၀ဲလီၤတံၢ်အဃိ ဒ်ကသံၣ်မူၤဘှီးသဲစးတၢ်ဘျၢ နီၣ်ဂံၢ် (၁)အသိး တၢ်ကဘၣ်ဟ့ၣ်တၢ်ကမၣ် ၆ လါ တုၤလၢ ၁ နံၣ်န့ၣ်လီၤႉ ဟံး၀ဲစ့အီၣ်လိးလၢအလီၤလၢ၀ဲတၢ်ကမၣ် ၆ အဂီၢ်လီၤႉ တၢ်အံၤဒ်တၢ်ကမၣ်အသိးလီၤႉ အနီၢ်ကီၢ်ကီၢ်န့ၣ် တန့ၢ်ခဲလၢာ်ဘၣ်” အဂ့ၢ်န့ၣ် စံး၀ဲလီၤႉ

ၦၤလၢတၢ်ဖီၣ်ချုး၀ဲလၢကသံၣ်မူၤဘှီးဒီး တၢ်တၤကျိၣ်တၤစ့တၢ်မူးတၢ်ရၢ်သ့ၣ်တဖၣ်န့ၣ် ဖဲတၢ်ဒုးဃာ်အီၤအဆၢကတီၢ် ကဘၣ်ဟဲအိၣ်၀ဲလၢအနီၢ်ကစၢ်တရံးလၢတၢ်ဒုးဃာ်အလီၢ်န့ၣ် ၀ီၢ်ရီကီၢ်ဆၣ်ပူၤတၢ်ပာ်ပနီၣ်ဃာ်အိၣ်၀ဲအဂ့ၢ်န့ၣ်် သ့ၣ်ညါဘၣ်လၢၦၤဘၣ်မူဘၣ်ဒါတဖၣ်အအိၣ်လီၤႉ

“လၢတၢ်ဟ့ၣ်တၢ်ကမၣ် တၢ်ဟံးဂ့ၢ်၀ီတကပၤန့ၣ် တၢ်တုၤထီၣ်ထီၣ်ဘးအဂံၢ်စၢ်ဒံး၀ဲဒၣ်လီၤႉ မ့မ့ၢ်လၢတၢ်ဟ့ၣ်တၢ်သ့ၣ်ညါနၢ်ပၢၢ်လၢ ဘၣ်ဃးဒီးတၢ်သကဲးပ၀းတပၤန့ၣ် အတုၤထီၣ်ထီၣ်ဘးလီၤႉ သူၣ်ဘီၣ်သးစၢ်လၢအဟဲက့ၤဂ့ၤထီၣ်ကဒါစ့ၢ်ကီး အိၣ်၀ဲဒၣ်လီၤႉ ဖီၣ်မ့ၢ်၀ံၤန့ၣ် ဒ်တၢ်သိၣ်တၢ်ဘျၢအိၣ်အသိး ကဘၣ်မၤတဲာ်တဲာ်ဖျုဖျုအဂီၢ် လိၣ်၀ဲဒၣ်လီၤ” အဂ့ၢ်န့ၣ် ၦၤလၢအလီၤဘၣ်တၢ်ကမၣ်လၢ ဘၣ်ဃးကသံၣ်မူၤဘှီးတဂၤစံး၀ဲလီၤႉ

KNU ၀ီၢ်ရီကီၢ်ဆၣ်အံၤ ဖဲ ၂၀၁၆ နံၣ်န့ၣ် တၢ်မၤဆူၣ်ထီၣ်၀ဲတၢ်လူၤဖီၣ် ၦၤၦ့ၤဆါကသံၣ်မူၤဘှီးဒီးသူ၀ဲတဖၣ်ဒီး ဖဲန့ၣ် တၢ်မၤ၀ဲတၢ်ဒဲွၣ်အူကံွာ်ကသံၣ်မူးဘှီးလၢ တၢ်ဖီၣ်န့ၢ်ချုးန့ၢ်၀ဲတဖၣ်အတၢ်ရဲၣ်တၢ်ကျဲၤ အိၣ်၀ဲ ၄ဘျီလံန့ၣ်လီၤႉ