ပယီၤသုးမုၢ်ဒိၣ် တၢ်ဘိးဘၣ်ရၤလီၤ တၢ်ဆိကတီၢ်ဃာ်တၢ်ခးအံၤ တမ့ၢ်တၢ်ပာ်သးလၢအမ့ၢ်အတီဘၣ်န့ၣ် KNU Concerned Group စံး၀ဲ

လါမ့ၤ ၁၄ သီႇ ၂၀၂၀ နံၣ်ႇ စးအဲၣ်ဆူ

ဖဲလါမ့ၤ ၉ သီအနံၤ ပယီၤသုးမုၢ်ဒိၣ် ဘိးဘၣ်ရၤလီၤ၀ဲဲလၢကဆိကတီၢ်ဃာ် တၢ်ဒုးတၢ်ယၤ လၢအယံာ်၀ဲ ၃ လါဘျဲၣ်အံၤ တမ့ၢ်လၢအလိၣ်ဘၣ်၀ဲတၢ်မုာ်တၢ်ခုၣ်အနီၢ်ကီၢ်ဘၣ်န့ၣ် KNU Concerned Group ထုးထီၣ်၀ဲလံာ်တၢ်ပာ်သးတဘ့ၣ် ဖဲ လါမ့ၤ ၁၂ သီအနံၤန့ၣ်လီၤႉ

ပယီၤသုးမုၢ်ဒိၣ် တၢ်ဆိကတီၢ်ဃာ် တၢ်ဒုးတၢ်ယၤ တၢ်ဘိးဘၣ်ရၤလီၤအံၤ တမ့ၢ်လၢအလိၣ်ဘၣ်တၢ်မုာ်တၢ်ခုၣ်အနီၢ်ကီၢ်ဘၣ်ဒီး အဲၣ်ဒိး ဖီၣ်ဂၢၢ်ဃာ်၀ဲကလုာ်ဒူၣ်ဖီၣ်စုက၀ဲၤလၢ အဆဲးလီၤ၀ဲထံကီၢ်ဒီဘ့ၣ်တၢ်ပတုာ်တၢ်ခးတၢ်အၢၣ်လီၤ လံာ်ဃံးဃာ်တဖၣ်ဒီး တၢ်အံၤ မ့ၢ်၀ဲ တၢ်ကူၣ်တရံးအကျိၤအကျဲတခါလၢ ကထီၣ်ဒုး၀ဲ တကီၢ်ခါ တၢ်ဒုးတၢ်ယၤအိၣ်ဒံးအဖၢမုၢ် ကလုာ်ဒူၣ်ဖီၣ်စုက၀ဲၤကရူၢ်တဖၣ် အဟီၣ်က၀ီၤပူၤလီၤအဂ့ၢ်န့ၣ် KNU Concerned Group စံး၀ဲလီၤႉ

ကရူၢ် ၦၤကတိၤတၢ်ပၢ KNU ကရၢခိၣ်=၂ လီၢ်လံၤ ပဒိၣ်နီၢ်စံၣ်ဖိရၣ်စ့ၣ် စံး၀ဲ “ပယီၤသုးမၤ၀ဲဒ်ညီနုၢ်လၢညါအပူၤကွံာ်အသိးလီၤႉ တပၤန့ၣ်ပတုာ်၀ဲတၢ်ခးဒီး အိၣ်တ့ၢ်တပၤန့ၣ် မၤ၀ဲဒၣ်တၢ်ထီၣ်ဒုးန့ၣ်လီၤႉ တၢ်လီၢ်အဂၤတဖၣ်စ့ၢ်ကီး ပတုာ်၀ဲတၢ်ခးဘၣ်ဆၣ်ႇ လီၤဆီဒၣ်တၢ် ဒ်သိးရၢၣ်ခၢၣ်တၢ်လီၢ်န့ၣ် တပတုာ်၀ဲတၢ်ခး AA အဖီခိၣ်ဘၣ်န့ၣ် တပၤန့ၣ်က့ၤဟံက့ၤ၀ဲအဂံၢ်အဘါဒီး လၢအအိၣ်တ့ၢ်တပၤန့့ၣ် ကမၤ၀ဲတုၤလၢအလီၤၦီၢ်န့ၣ် ဖျါ၀ဲဒၣ်ပျီပျီရှဲရှဲလီၤႉ အဃိန့ၣ် တၢ်ထုးထီၣ်ပာ်ဖျါဒ်အံၤန့ၣ် တမ့ၢ်တၢ်ပာ်သးလၢအတီ၀ဲဘၣ်န့ၣ် ဖျါ၀ဲဒၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

ဖဲအပူၤကွံာ် လါမ့ၤ ၉ သီအနံၤန့ၣ် ပယီၤသုးတၢ်ဒီသဒၢခိၣ်ကျၢၢ်ရူအံၤစံး၀ဲ ဒ်သိးတၢ်ြတီဆၢ ခိၣ်ဘံၣ် =၁၉ တၢ်ဆါအံၤ ကန့ၢ်တုၤလီၤတီၤလီၤအဂီၢ်ဒီး လၢတၢ်မုာ်တၢ်ခုၣ်လီၤစိၤအဂီၢ် စးထီၣ်ဖဲလါမ့ၤ ၁၀ သီ တုၤလၢ လါအီကူာ် ၃၁ သီအနံၤန့ၣ် ကဆိကတီၢ်ဃာ်၀ဲဒၣ် တၢ်ဒုးတၢ်ယၤတဖၣ်အဂ့ၢ်န့ၣ် ထုးထီၣ်ပာ်ဖျါ၀ဲဒၣ်န့ၣ်လီၤႉ

ဘၣ်ဆၣ် တၢ်ဘိးဘၣ်ရၤလီၤအပူၤစံး၀ဲ တၢ်ဆိကတီၢ်ဃာ်တၢ်ဒုးတၢ်ယၤအံၤ မ့မ့ၢ်ကရူၢ်ကရၢလၢထံကီၢ်ပဒိၣ် ပာ်ပနီၣ်ဃာ်အီၤလၢ တၢ်မၤပူထီၣ်လီထီၣ်တၢ်ကရူၢ်အဟီၣ်က၀ီၤတပၣ်ဃုာ်ဘၣ်ႇ ကဘၣ်မ့ၢ်လီၢ်က၀ီၤလၢအဂၤသ့ၣ်တဖၣ်လီၤအသိး ဖဲတၢ်ဆိကတီၢ်ဃာ် တၢ်ဒုးတၢ်ယၤအကတီၢ်အံၤစ့ၢ်ကီး ကလုာ်ဒူၣ်ဖီၣ်စုက၀ဲကရူၢ်သ့ၣ်တဖၣ် ကဘၣ်လူၤပိာ်မၤထဲွ၀ဲ သုးရိၣ်မဲခိၣ်ကျၢၢ် တၢ်မုာ်တၢ်ခုၣ်ကျဲသနူ ၆ထံၣ်အကျါ ၄ထံၣ်အံၤ တုၤလီၤတီၤလီၤအဂ့ၢ်န့ၣ် စံး၀ဲန့ၣ်လီၤႉ

လၢတၢ်ဂ့ၢ်အံၤအဖီခိၣ် ပယီၤသုးမုၣ်ဒိၣ်အံၤ မၤ၀ဲတၢ်ဆိကတီၢ်ဃာ်တၢ်ဒုးတၢ်ယၤအံၤလၢ အပာ်ကတီၢ်ဃာ် ကလုာ်ဒူၣ်ဖီၣ်စုက၀ဲၤကရူၢ်တနီၤအံၤအဃိ ဖျါလၢအသးလီၤ၀ဲတၢ်မုာ်တၢ်ခုၣ်ဒီးထံလီၢ်ကီၢ်ပူၤတၢ်မုာ်တၢ်ခုၣ်အနီၢ်ကီၢ်ကီၢ်ဘၣ်အသိးႇ ပယီၤသုးရိၣ်မဲခိၣ်ကျၢၢ် တၢ်မုာ်တၢ်ခုၣ်ကျဲသနူ ၆ထံၣ်အံၤစ့ၢ်ကီး အအိၣ်ဒၣ်လၢ ၂၀၀၈ ထံကီၢ်ဘျၢခိၣ်သ့ၣအဖီလာ်န့ၣ်လီၤႉ လၢကလုာ်ဒူၣ်ဖီၣ်စုက၀ဲၤကရူၢ်တဖၣ်အဖီခိၣ် ထံရူၢ်ကီၢ်သဲးတၢ်ဂ့ၢ်ကီန့ၣ် တဟ့ၣ်ဘှါရှဲ၀ဲလၢထံရူၢ်ကီၢ်သဲးအကျဲဘၣ်အသိး ပယီၤသုးမုၢ်ဒိၣ်အံၤစ့ၢ်ကီး ထံရူၢ်ကီၢ်သဲးတၢ်ဂ့ၢ်ကီအံၤ ကဘၣ်ဘှါရှဲအီၤလၢထံရူၢ်ကီၢ်သဲးအကျါန့ၣ် သးတအိၣ်စ့ၢ်ကီး၀ဲဘၣ်အဂ့ၢ်န့ၣ် (KNU Concerned Group) စံး၀ဲန့ၣ်လီၤႉ

လၢန့ၣ်အမဲာ်ညါ တကီၢ်ခါတၢ်သံသြတိ၁်တၢ်ဆါဟဲကဲထီၣ်သးအဖီခိၣ် ကလုာ်ဒူၣ်ဖီၣ်စုက၀ဲၤကရူၢ်တဖၣ် မၤ၀ဲဒၣ်တၢ်ြတီဆၢတၢ်ဆါအတၢ်ဟူးတၢ်ဂဲၤတဖၣ်ဒီး တၢ်သမံသမိးတၢ်အိၣ်ဆူၣ်အိၣ်ချ့အလီၢ်တဖၣ် ပယီၤသုးတဖၣ်ဟဲြတီမၤတံာ်တာ်တၢ်ႇ ဟဲဒွဲၣ်အူစ့ၢ်ကီး၀ဲတၢ်သမံသမိးအလီၢ်တဖၣ်ဒီး တကီၢ်ခါလၢကဘၣ်ြတီဆၢတၢ်ဆါအံၤအဖီခိၣ်အံၤဒိၣ်န့ၢ်ဒံးအဲၣ်ဒိးဒိၣ်စိလၢ ကလုာ်ဒူၣ်ဟီၣ်က၀ီၤတၢ်လီၢ်တဖၣ်အပူၤလီၤအဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲလီၤႉ

တချုးဒံးလၢပယီၤသုးမုၢ်ဒိၣ်မၤ၀ဲ တၢ်ဆိကတီၢ်ဃာ်တၢ်ပတုာ်တၢ်ခးဒံးဘၣ်အဆၢကတီၢ် ကလုာ်ဒူၣ်ဖီၣ်စုက၀ဲၤလၢအဆဲးလီၤဃာ်၀ဲ တၢ်ပတုာ်တၢ်ခးတဖၣ် အဟီၣ်က၀ီၤပူၤန့ၣ် တၢ်ဘၣ်သဂၢၢ်ခးလိာ်အသးတဖၣ်အိၣ်၀ဲဒၣ်အသိးႇ တကီၢ်ခါ ရၢၣ်ခၢၣ်ဒီးခၠီကီၢ်စဲၣ်အပူၤ တၢ်ဒုးတၢ်ယၤတဖၣ်ဟဲဆူၣ်ထီၣ်၀ဲဒၣ်ဒီး ကမျၢၢ်တဖၣ်ဘၣ်ဒိဘၣ်ထံးဘၣ်သံဘၣ်ၦၢ် ဟဲအါထီၣ်၀ဲဒၣ်ကွ့ၢ်ကွ့ၢ်န့ၣ်လီၤႉ

KNU Concerned Group အံၤ ဖဲအပူၤကွံာ် ၂၀၁၇ နံၣ်ႇ လါယူၤလံအတီၢ်ပူၤ ခ့ၣ်အဲၣ်ယူၣ် ကရၢခိၣ်= ၂ လီၢ်လံၤ ပဒိၣ်နီၢ်စံၣ်ဖိရၣ်စ့ၣ်ဒီး အၦၤမၤသကိးတၢ်ဖိတဖၣ် ဒုးအိၣ်ထီၣ်၀ဲန့ၣ်လီၤႉ ဘၣ်ထဲဒွီး တၢ်မုာ်တၢ်ခုၣ်အဂ့ၢ်အကျိၤန့ၣ် လၢအ၀ဲသ့ၣ်တၢ်သူၣ်ကိၢ်သးဂီၤတဖၣ်ႇ တၢ်ထံၣ်တဖၣ်န့ၣ် ကရူၢ်အံၤ ထုးထီၣ်၀ဲလံာ်တၢ်ပာ်ဖျါတဖၣ်န့ၣ်လီၤႉ