သိလ့ၣ်လၢအကျး၀ဲ ဖီၣ်စုက၀ဲၤကရူၢ်အတၢ်ပနီၣ်တဖၣ် ဘၣ်တၢ်ထုးကွံာ်

လါမ့ၤ ၂၆ သီႇ ၂၀၂၀ နံၣ်ႇ န့ၣ်နီၣ်

ကညီကီၢ်စဲၣ်ႇ ရၤမတံ(မၠၣ်၀တံၣ်)၀့ၢ်ပူၤ သိလ့ၣ်လၢအလ့ၢ်လိၤဟးထီၣ်ဟးလီၤ ကီးတရံး–ဖၣ်အၣ်၀့ၢ်တဖၣ် လၢအကျးထီၣ်၀ဲ ဖီၣ်စုက၀ဲၤကရူၢ်အတၢ်ပနီၣ်တဖၣ်ဒီး သုးကရူၢ်အနီၣ်ဂံၢ်တဖၣ်န့ၣ် ဘၣ်တၢ်ဟ့ၣ်၀ဲတၢ်ပလီၢ်ဒီး ထုးကွံာ်၀ဲဒၣ်န့ၣ်လီၤႉ

ဖဲလါမ့ၤ ၂၁ သီ မုၢ်ထူၣ်အဆၢကတီၢ်န့ၣ် ရၤမတံ၀့ၢ်ပူၤဒီးကျဲမုၢ်ဖးဒိၣ်လၢ ညီနုၢ်သိလ့ၣ်ဟးထီၣ်ဟးလီၤတဖၣ်န့ၣ် ဖီၣ်စုက၀ဲၤကရူၢ်လၢအဟးထီၣ်ဟးလီၤတဖၣ်ဒီး သိလ့ၣ်အဂၤတဖၣ် လၢအကျးထီၣ်၀ဲ ဖီၣ်စုက၀ဲၤ ကရူၢ်အတၢ်ပနီၣ်တဖၣ်န့ၣ် တၢ်ထုးကံွာ်အီၤဒီး တၢ်မ့ၢ်ထံၣ်ကဒီးအသီတဘျီန့ၣ် ဒ်တၢ်ဘျၢသဲစးအိၣ်ပာ်အသိး တၢ်ကဟံအရ့အဂ့ၢ်န့ၣ် တၢ်သမံသမိးသိလ့ၣ်ကရူၢ်ပာ်ဖှိၣ် ၦၤဘၣ်မူဘၣ်ဒါတဂၤ စံး၀ဲန့ၣ်လီၤႉ

၀့ၢ်ရၤမတံအံၤ ဒ်အမ့ၢ် ကီၢ်ဆၢ၀့ၢ်တဖျၢၣ်အသိး ကလုာ်ဒူၣ်ဖီၣ်စုက၀ဲၤကရူၢ်လၢအဆဲးလီၤ၀ဲ NCA တၢ်ပတုာ် တၢ်ခးအလံာ်ဃံးဃာ်အံၤအိၣ်၀ဲ ၃ ဒူၣ် အမဲာ်ညါႇ သုးခိးကီၢ်ဆၢ -BGF ဒီး ဖီၣ်စုက၀ဲၤကရူၢ်အဆံးလၢအဂၤတဖၣ် အိၣ်ဆီလီၤအသးန့ၣ်လီၤႉ ဖီၣ်စုက၀ဲၤကရူၢ် အသိလ့ၣ်တဖၣ်တကးဘၣ်အမဲာ်ညါ သိလ့ၣ်လၢတဘၣ်ဃးဒီး အ၀ဲသ့ၣ်တဖၣ်လၢ အကျးထီၣ်၀ဲဖီၣ်စုက၀ဲၤတၢ်ပနီၣ်အံၤ ဟးထီၣ်ဟးလီၤလၢ၀့ၢ်ပူၤ အိၣ်၀ဲဒၣ်စ့ၢ်ကီးလီၤႉ

ၦၤကမျၢၢ်လၢအအိၣ်ဖဲ ရၤမတံ၀့ၢ်တဂၤစံး၀ဲလၢ“တၢ်မၤ၀ဲဒၣ်ဒ်အံၤန့ၣ် ဂ့ၤ၀ဲဒၣ်လီၤႉ ရၤမတံ၀့ၢ်ပူၤအံၤ သုးကရူၢ် လၢအစဲၤနီၢ်န့ၣ်အိၣ်၀ဲဒၣ်အသိးႇ လၢအတမ့ၢ်တၢ်စဲၤနီၢ်ဘၣ် ကျးထီၣ်ဖီၣ်စုက၀ဲၤကရူၢ်အတၢ်ပနီၣ်ဒီး ဟးထီၣ်ဟးလီၤ စ့ၢ်ကီးအိၣ်၀ဲလီၤႉ အ၀ဲသ့ၣ်န့ၣ် နးဒိၣ်ဒံးတဆဲးလီၤႉ ကျးထီၣ်၀ဲဒၣ်ဖီၣ်စုက၀ဲၤကရူၢ်အတၢ်ပနီၣ်ဒီး တၢ်လူၤပိာ်ထွဲ၀ဲ ဒၣ်သိလ့ၣ်ကျဲတၢ်သိၣ်တၢ်သီတဖၣ်န့ၣ် အဂံၢ်စၢ်၀ဲလီၤႉ တၢ်သ့ၣ်တဖၣ်မ့ၢ်တအိၣ်လၢၤဘၣ်န့ၣ် ကမျၢၢ်လၢအအိၣ်၀့ၢ်ပူၤတဖၣ် ဟးထီၣ်ဟးလီၤကမုာ်ဖးဒိၣ်ညါလီၤ” အဂ့ၢ်န့ၣ်စံး၀ဲလီၤႉ

ရၤမတံ၀့ၢ်ပူၤ သိလ့ၣ်လၢအကျးထီၣ်၀ဲ ဖီၣ်စုက၀ဲၤကရူၢ်အတၢ်ပနီၣ်တဖၣ်အံၤ တၢ်ကဘၣ်ထုးကွံာ်၀ဲဒၣ်န့ၣ် တၢ်ဟ့ၣ်ဒုးသ့ၣ်ညါ၀ဲဒၣ်ဖီၣ်စုက၀ဲၤကရူၢ်တဖၣ်လံအဂ့ၢ်န့ၣ် တၢ်သမံသမိးသိလ့ၣ်ကရူၢ်ပာ်ဖှိၣ် ၦၤဘၣ်မူဘၣ်ဒါစံး၀ဲလီၤႉ

ဘၣ်ဆၣ် ဘၣ်ထဲဒွီးတၢ်ဂ့ၢ်အ၀ဲအံၤန့ၣ် ခ့ၣ်အဲးစံၣ်=ကညီတၢ်ကစီၣ်၀ဲၤလီၢ်ခိၣ်သ့ၣ် ဆဲးကျိးသံကွၢ်၀ဲဒၣ်ဒီး ကညီဖီၣ်စုက၀ဲၤကရူၢ် အကရူၢ်ၦၤကတိၤတၢ်ပၢတဂၤ က့ၤစံးဆၢကဒါ၀ဲလၢသါတသ့ၣ်ညါထဲတွၢ်ဂ့ၢ်အံၤ နီတမံၤဒံးဘၣ်အဂ့ၢ်န့ၣ်လီၤႉ

ဖဲလါမ့ၤ ၂၁ သီအနံၤ တၢ်မၤ၀ဲဒၣ်တၢ်သမံသမိးသိလ့ၣ်ကရူၢ်ပာ်ဖှိၣ်အံၤ ပယီၤသုးမုၢ်ဒိၣ် ႇ ပၢၤကီၢ်ႇ သုးခိးကီၢ်ဆၢ BGF˜ ကညီဖီၣ်စုက၀ဲၤကရူၢ်တနီၤ အကရၢဖိတဖၣ် ပၣ်ဃုာ်၀ဲန့ၣ်လီၤႉ