Home တၢ်ကစီၣ် KNU တၢ်ြတီဆၢ Covid-19 အလီၢ် ပယီၤသုးဒွဲၣ်အူမၤဟးဂီၤ၀ဲအဃိ တၢ်ခးလိာ်သးကဲထီၣ်

KNU တၢ်ြတီဆၢ Covid-19 အလီၢ် ပယီၤသုးဒွဲၣ်အူမၤဟးဂီၤ၀ဲအဃိ တၢ်ခးလိာ်သးကဲထီၣ်

355
0

လါမ့ၤ ၈ သီႇ ၂၀၂၀ နံၣ်ႇ ခ့ၣ်အဲးစံၣ်

ဖၣ်ပူၣ်–ကမးမိၣ် အဘၢၣ်စၢၤ KNU-ကညီဒီကလုာ်စၢဖှိၣ်ကရၢ မုၢ်ြတီၢ် (သုးက့ ၅)ကီၢ်ရ့ၣ် တၢ်ြတီဆၢသမံသမိး Covid-19 အလီၢ်(၂)တီၤ ဖဲလါမ့ၤ ၆ သီအနံၤန့ၣ် ပယီၤသုးနုာ်လီၤဒွဲၣ်အူကံွာ်၀ဲအဃိ ခံခီခံကပၤအဘၢၣ်စၢၤ တၢ်သဘံၣ်သဘုၣ်ဟဲကဲထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ် သုးက့(၅)တပၤ စံး၀ဲဒၣ်လီၤႉ

မုၢ်ြတီၢ်ကီၢ်ရ့ၣ်ႇ ဒွဲၣ်လိကီၢ်ဆၣ်ႇ လ့ဖိထၣ်သ၀ီကရူၢ်ႇ ၀ၣ်သိခိၣ်သ၀ီဒီးကတၢၢ်တံာ်သ၀ီကရူၢ်ႇ ဖါလိကျဲဖးဒ့န့ၣ် တၢ်အိၣ်ဆူၣ်အိၣ်ချ့ၦၤမၤတၢ်ဖိတဖၣ်ဒီး ကညီဒီကလုာ်ပၢၤကီၢ်သုး (KNPF) ဖၣ် လၢအ၀ဲသ့ၣ်တၢ်ပၢဟီၣ်က၀ီၤအပူၤ ဒ်သိးကိၣ်ဘံၣ်တၢ်ဆါအံၤ သုတရၤလီၤအသးတဂ့ၤအဂီၢ် ဖဲမၤ၀ဲတၢ်အိၣ်ဆူၣ်အိၣ်ချ့တၢ်သမံသမိးအကတီၢ် ပယီၤသုးနီၣ်ဂံၢ်(၈) ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ် (စကခ) စုဒုၣ်စုတီၤအဖီလာ် ခီၣ်ချ့သုးရ့ၣ်(ခမရ–၄၀၅) ဒီး (ခမရ–၄၁၀)တဖၣ် နုာ်လီၤြတီ၀ဲတၢ်ဒီး ဒွဲၣ်အူအီၣ်ကွံာ်၀ဲ တၢ်သမံသမိးအလီၢ်တဖၣ်အဂ့ၢ်န့ၣ် မုၢ်ြတီၢ်ကီၢ်ရ့ၣ် တၢ်အိၣ်ဆူၣ်အိၣ်ချ့မူဒါခိၣ် စီၤညိၣ်၀့ စံး၀ဲဒ်အံၤလီၤႉ

“ဖဲမဟါန့ၣ် တၢ်သမံသမိးတၢ်အိၣ်ဆူၣ်အိၣ်ချ့အဒဲလၢ တၢ်ပာ်လီၤဃာ်၀ဲလၢ၀ၣ်သိခိၣ်တၢ်လီၢ်အံၤ ပယီၤသုးတဖၣ်ဟဲ၀ဲဒီး ဟဲမၤဟးဂီၤ၀ဲဒၣ်လီၤႉ ၀ံၤအလီၢ်ခံ ဖါလိကျဲဖးဒ့တၢ်သမံသမိးအလီၢ်န့ၣ် နီဟးထီၣ်ကွံာ်၀ဲၦၤလၢဘၣ်မူဘၣ်ဒါတဖၣ်ဒီး ဒွဲၣ်အူအီၣ်ကွံာ်၀ဲတၢ်သမံသမိးအလီၢ်န့ၣ်လီၤႉ ပယီၤသုးအံၤတဲ၀ဲလၢ တၢ်အံၤမ့ၢ်၀ဲဒၣ်ပဟီၣ်က၀ီၤဒီး သုတဘၣ်လိၣ်ဟဲအိၣ်ဖဲအံၤဘၣ်န့ၣ် အ၀ဲသ့ၣ်တဖၣ်စံး၀ဲၦၤဒီး နီဟးထီၣ်ကွံာ်၀ဲၦၤလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

လၢပယီၤသုးတပၤ ဟဲြတီ၀ဲတၢ်ဒီးနီဟးထီၣ်၀ဲတၢ်ဒ်အံၤအဃိ ဖဲလါမ့ၤ ၆ သီႇ မုၢ်ထူၣ်(၁၂ နၣ်ရံၣ် ၁၂ မံးနံး)ဒီး ၂ နၣ်ရံၣ်ဘျဲၣ်အကတီၢ် ဖဲ၀ၣ်သိခိၣ်သ၀ီပူၤ တၢ်ခးလိာ်သးကဲထီၣ်၀ဲဒၣ် ၂ ဘျီဒီး ဖဲမုၢ်ဟါလီၤ ၃ နၣ်ရံၣ် ၄၁ မံးနံး အဆၢကတီၢ်န့ၣ် ကတၢၢ်တံာ်သ၀ီကရူၢ် ဖဲဖါလိကျဲဖးဒ့ တၢ်ဒွဲၣ်အူအီၣ်အလီၢ်ကပၤန့ၣ် တၢ်ခးလိာ်သးကဲထီၣ်တ ဘျီဒီး တၢ်ခးလိာ်သးကဲထီၣ်သးပာ်ဖှိၣ်ခဲလၢာ် ၃ ဘျီ အဂ့ၢ်န့ၣ် စီၤညိၣ်၀့ ဆဲးစံး၀ဲဒၣ်လီၤႉ

လၢန့ၣ်အမဲာ်ညါ တုၤလၢလါမ့ၤ ၇ သီန့ၣ် ခံခီခံကပၤတၢ်ခးလိာ်သးအိၣ်၀ဲဒၣ်တဆံးတက့ၢ်ဒီး လၢတၢ်ခးလိာ်သး အံၤအဃိ ပယီၤသုးတပၤတၢ်ဘၣ်ဒိဘၣ်ထံးအိၣ်တအိၣ်ဧါန့ၣ် တသ့ၣ်ညါဒံးဘၣ်ဒီး မ့မ့ၢ်လၢခ့ၣ်အဲၣ်ယူၣ်တပၤန့ၣ် တၢ်ဘၣ်ဒိဘၣ်ထံးတအိၣ်၀ဲဘၣ်လီၤႉ ခီဖျိလၢတၢ်ခးလိာ်သးကဲထီၣ်အဃိ ၀ၣ်သိခိၣ်လီၢ်က၀ီၤဖိတနီၤန့ၣ် ဘၣ်စံၣ်အိၣ်ခူသူၣ်၀ဲလၢၦၢ်လၢ်ကျါအိၣ်၀ဲအဂ့ၢ်န့ၣ် ခ့ၣ်အဲၣ်ယူၣ် စံး၀ဲလီၤႉ

ဘၣ်ထွဲဒီးတၢ်ဂ့ၢ်အံၤန့ၣ် ပယီၤသုး မုၢ်ထီၣ်ကလံၤထံး ကီၢ်ခီသုး၀ဲၤလီၢ်ခိၣ်သ့ၣ်(ရတခ) ၦၤကတိၤတၢ်ပၢ သုးခိၣ်ဒိၣ်စိ မီၣ်မီၣ်လၣ် စံး၀ဲလၢ “လၢပအိၣ်န့ၣ် တၢ်တီၣ်ဖျါထီၣ်တၢ်တအိၣ်ဒံးဘၣ်ႉ ယတသ့ၣ်ညါဒံးဘၣ်မီၤႉ ယကလူၤသံကွၢ်ခဲအံၤလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ် ဖဲလါမ့ၤ ၇ သီ မုၢ်ဟါလီၤန့ၣ်လီၤႉ

ဒ်န့ၣ်အသိး ဖဲအပူၤကွံာ် လါအ့ြဖ့ၣ် ၃၀ သီအနံၤစ့ၢ်ကီး ပယီၤသုးဟ့ၣ်တၢ်ဆီၣ်သနံးဒီး ခီဖျိလဲၤြတီမၤတံာ်တာ်တၢ်အဃိ ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့–၁) အဟီၣ်က၀ီၤပူၤ တၢ်အိးထီၣ်၀ဲတၢ်ြတီဆၢ Covid-19 တၢ်သမံသမိးအလီၢ်အံၤစ့ၢ်ကီး ဘၣ်တၢ်ထုးကွံာ်၀ဲဒၣ်အသိး တၢ်လီၢ်အ၀ဲန့ၣ်စ့ၢ်ကီး ပယီၤသုးတပၤ နုာ်လီၤဟံးန့ၢ်အလီၢ်အကျဲဒီး ပာ်လီၤ၀ဲအသုးကလၢၤကဲထီၣ်သးအိၣ်၀ဲအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ

ခ့ၣ်အဲၣ်ယူၣ် မုၢ်ြတီၢ်ကီၢ်ရ့ၣ်အံၤ ဒ်သိးတၢ်ြတီဆၢတၢ်သံသြတိ၁်တၢ်ဆါအံၤကန့ၢ်အဂီၢ် လၢအ၀ဲသ့ၣ်ဟီၣ်က၀ီၤအပူၤ အိးထီၣ်၀ဲဒၣ်တၢ်သမံသမိးတၢ်ဆါအလီၢ် ၁၄ ခါ အကတီၢ် ပယီၤသုးတပၤ ဒွဲၣ်အူအီၣ်၀ဲတၢ်သမံသမိးတၢ်ဆါအလီၢ် ၂ ခါ ကဲထီၣ်သးန့ၣ်လီၤႉ