Home တၢ်ကစီၣ် ကီးတရံး၀့ၢ် မ့ၣ်ပိၢ်ပိၢ်ဖးကဲထီၣ်သးအဃိ ၦၤ(၃)ဂၤ ဘၣ်ဒိ

ကီးတရံး၀့ၢ် မ့ၣ်ပိၢ်ပိၢ်ဖးကဲထီၣ်သးအဃိ ၦၤ(၃)ဂၤ ဘၣ်ဒိ

159
0

လါယူၤ ၁၀ သီႇ ၂၀၂၀ နံၣ်ႇ န့ၣ်နီၣ်

ကညီကီၢ်စဲၣ်ႇ ကီးတရံး၀့ၢ် နီၣ်ဂံၢ်(၃)က၀ီၤဒ့ႇ ပၢၤကီၢ်အ၀ဲၤလီၢ်အမဲာ်ညါန့ၣ် ဖဲလါယူၤ ၈ သီအနံၤ မုၢ်နၤခီ ၈ နၣ်ရံၣ် ၅ မံးနံးအဆၢကတီၢ် မ့ၣ်ပိၢ်ပိၢ်ဖးထီၣ်အဃိ ပိာ်ခွါ ၃ ဂၤ ဘၣ်ဒိဘၣ်ထံး၀ဲဒၣ်အဂ့ၢ်န့ၣ်သ့ၣ်ညါဘၣ်လီၤႉ

ဖဲလါယူၤ ၈ သီ မုၢ်နၤခီ ၈ နၣ်ရံၣ် ၅ မံးနံးအဆၢကတီၢ် ကီးတရံး၀့ၢ် နီၣ်ဂံၢ်(၃)က၀ီၤဒ့ ပၢၤကီၢ်အ၀ဲၤလီၢ်ကျဲႇ ဘိၣ်ဘိၣ်ၦၤဆါလီတဲစိကျးမဲာ်ညါ လၢအယံၤ၀ဲဒၣ်ဒီးပၢၤကီၢ်အ၀ဲၤလီၢ်အမဲာ်ညါ (၁၀ ပ့ၣ်)အံၤ ၦၤလၢတၢ်တသ့ၣ်ညါအီၤ ၂ ဂၤ ဟဲဒိး၀ဲဒၣ်ဒီးဆဲးကဲးဒီး ကွံာ်လီၤ၀ဲဒၣ်မ့ၣ်ပိၢ်အဃိ ပိၢ်ဖးထီၣ်၀ဲတဖျၢၣ်ဒီး အ၀ဲတဖျၢၣ်န့ၣ်တပိၢ်ဖး၀ဲဘၣ်အိၣ်တ့ၢ်က့ၤ၀ဲအဂ့ၢ်န့ၣ် ၦၤအိၣ်ကီးတရံး၀့ၢ်တဂၤ စံး၀ဲလီၤႉ

ခီဖျိလၢမ့ၣ်ပိၢ်ပိၢ်ဖးထီၣ်အဃိ နီၣ်ဂံၢ်(၃)က၀ီၤဒ့ ကမျၢၢ်ဖိတဂၤလၢအမ့ၢ် အူ၀့နဲၣ်အူ ၂၈ နံၣ်အံၤ ဘၣ်ဒိ၀ဲအသးနါၦၢ်ႇ မ့မ့ၢ်အူဟ့၀့ကၠီၣ် ၃၃ နံၣ်အံၤ ဘၣ်ဒိ၀ဲအခီၣ်လ့ၢ်ဒူအစ့ၣ်ဒီး ၦၤလၢအအိၣ်နီၣ်ဂံၢ်(၃) က၀ီၤဒ့ မီၤကီခၣ် ၁၃ နံၣ်အံၤ ဘၣ်ဒိ၀ဲဒၣ်ခီၣ်ကံၣ်ဒုၣ်အစ့ၣ်ဒီး ၦၤတဖၣ်အံၤတၢ်ဆှၢအ၀ဲသ့ၣ်ဆူကီးတရံးကမျၢၢ်တၢ်ဆါဟံၣ်န့ၣ်လီၤႉ

ဒ်န့ၣ်အသိး ဖဲမဟါ လါယူၤ ၉သီ မုၢ်နၤခီ ၈နၣ်ရံၣ်ဘျဲၣ်အဆၢကတီၢ်န့ၣ် မ့ၣ်ပိၢ်ပိၢ်ဖးထီၣ်ကဒီးတဖျၢၣ်ဖဲ ၀့ၢ်မၠၣ်၀တံၣ်ခၢၣ်သး ကီၢ်ရ့ၣ်ပၢၤကီၢ်အ၀ဲၤလီၢ်အမဲာ်ညါန့ၣ်ဒီး သီခါ (၂ ပါ) ဘၣ်ဒိ၀ဲတဆံးတက့ၢ်အဂ့ၢ်န့ၣ် သ့ၣ်ညါဘၣ်လီၤႉ