Home တၢ်ကစီၣ် တသ့ဖဲအသ့ ကဟးဆှဲးတၢ်ဘၣ်သဂၢၢ်ခးလိာ်သးအဂီၢ် ထုးထီၣ်ပာ်တၢ်ကလုၢ်အဂ့ၢ် KNLA သုးရိၣ်မဲခိၣ်ကျၢၢ်စံး၀ဲ

တသ့ဖဲအသ့ ကဟးဆှဲးတၢ်ဘၣ်သဂၢၢ်ခးလိာ်သးအဂီၢ် ထုးထီၣ်ပာ်တၢ်ကလုၢ်အဂ့ၢ် KNLA သုးရိၣ်မဲခိၣ်ကျၢၢ်စံး၀ဲ

1132
0

လါယူၤ ၉ သီႇ ၂၀၂၀ နံၣ်ႇ စးအဲၣ်ဆူ

ပယီၤသုးမ့ၢ်တဟးတလၢ၀ဲ တၢ်ပာ်ပနီၣ်တၢ်လီၢ်ဘၣ်န့ၣ် တသ့ဖဲအသ့ဟးဆှဲးဘၣ် တၢ်ဘၣ်သဂၢၢ်ခးလိာ်အသး တဖၣအဂီၢ် ထုးထီၣ်ဃာ်၀ဲတၢ်နဲၣ်လီၤလၢသုးကျါလံအဂ့ၢ် KNU- ကညီဒီကလုာ်စၢ ဖှိၣ်ကရၢ က ညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤကၠီၤနံၤ စံး၀ဲလီၤႉ

တကီၢ်ခါ KNU ဟီၣ်က၀ီၤတၢ်လီၢ်တဖၣ်အပူၤ ပယီၤသုးစုဒုၣ်စုတီၤအဖီလာ်သုးရ့ၣ်တဖၣ်ဒီး KNLA သုးကရူၢ်တဖၣ်အဘၢၣ်စၢၤ ပာ်ထီၣ်၀ဲတၢ်ဂ့ၢ်လၢလဲၤတလၢ၀ဲတၢ်လီၢ်လၢတၢ်ပာ်ပနီၣ်၀ဲတဖၣ်ဒီးႇ တၢ်သဘံၣ်သဘုၣ်ဒီး တၢ်ဘၣ်သဂၢၢ်ခးလိာ်သးတဖၣ် ခီဖျိလၢဟဲကဲထီၣ်သးအါထီၣ်၀ဲအဃိ ဘၣ်တၢ်ထုးထီၣ်၀ဲတၢ်နဲၣ်လီၤဒ်အခဲအံၤလီၤ အဂ့ၢ်န့ၣ် သုးခိၣ်ကျၢၢ်ဒိၣ်စိ စီၤကီၠၤနံၤ စံး၀ဲဒ်အံၤလီၤႉ

အ၀ဲစံး၀ဲလၢ “အခဲအံၤ ပ၀ဲပၦၤတဖၣ်န့ၣ် ပနဲၣ်လီၤ၀ံၤ၀ဲလံလီၤႉ ကဘၣ်အိၣ်လၢပကစၢ်တၢ်လီၢ်ဒီး မ့တမ့ၢ်လၢလဲၤတလၢဟီၣ်က၀ီၤတၢ်ပနီၣ်ဘၣ်န့ၣ် တဘၣ်မၤနီတမံၤဘၣ်ဒီး မ့ၢ်ဟဲကဲထီၣ်သးလၢလဲၤတလၢဟီၣ်က၀ီၤစ့ၢ်ကီးန့ၣ် ကဘၣ်ဟံးအ&့ဒီးဟံးထီၣ်ဖီၣ်ထီၣ်အီၤဒ်လဲၣ်န့ၣ်လီၤႉ အခဲအံၤယဆိကမိၣ်ဒု နီၢ်တနွံခံနွံန့ၣ် ကဘၣ်ဂီၢ်ဘၣ်ဒွါ၀ဲဒၣ်လီၤ” အဂ့ၢ်န့ၣ် စံးဘၣ် ခ့ၣ်အဲးစံၣ် ဖဲလါယူၤ ၈ သီအနံၤလီၤႉ

စးထီၣ်လၢအပူၤကွံာ်လါတဖၣ် တုၤလၢလါယူၤထီၣ်သီန့ၣ် KNU စုဒုၣ်စုတီၤအဖီလာ်သုးတဖၣ်ဒီး ပယီၤသုး တဖၣ်အဘၢၣ်စၢၤ တၢ်ဘၣ်သဂၢၢ်ခးလိာ်သးတဖၣ် ဟဲက့ၤကဲထီၣ်ကဒါက့ၤဒ်ညီနုၢ်အသိးန့ၣ်ႇ ခ့ၣ်အဲးစံၣ် =ကညီတၢ်ကစီၣ်၀ဲၤလီၢ်ခိၣ်သ့ၣ် ဆဲးကျိးသံကွၢ်၀ဲဒၣ်အဖီခိၣ် သုးခိၣ်ကျၢၢ်စိ စီၤကၠီၤနံၤ က့ၤစံးဆၢကဒါက့ၤ၀ဲဒ်အခဲအံၤန့ၣ်လီၤႉ

KNU လၢအဆဲးလီၤဃာ် ထံကီၢ်ဒီတဘ့ၣ်တၢ်ခးပတုာ်အလံာ်ဃံးဃာ်ဒီး ပယီၤသုးတဖၣ်အဘၢၣ်စၢၤ တၢ်ခးလိာ်သးကဲထီၣ်၀ဲဒၣ်တလီၢ်လီၢ်ဒီး ခီဖျိလၢလဲၤတလၢ၀ဲတကပၤဒီးတကပၤ အဟီၣ်က၀ီၤတၢ်ပာ်ပနီၣ်အဃိ တၢ်ခးလိာ်သးအံၤကဲထီၣ်၀ဲဒၣ်လီၤအဂ့ၢ်န့ၣ် ခံကပၤလၢာ်ဘၣ်မူဘၣ်ဒါတဖၣ် ပာ်ဖျါထီၣ်၀ဲဒၣ်အိၣ်ဘၣ်ဆၣ်ႇ လၢတၢ်တၢၣ်ပီၣ်တဲသကိးတၢ်မုာ်တၢ်ခုၣ်အတၢ်ဖံးတၢ်မၤတဖၣ်န့ၣ် တုၤလၢမုၢ်မဆါတနံၤအံၤ တၢ်ပာ်ပနီၣ်ဟီၣ်က၀ီၤအဆၢအံၤ တၢ်တၢၣ်ပီၣ်တဲသကိးအီၤတန့ၢ်ဒံးဘၣ်အဂ့ၢ် သ့ၣ်ညါဘၣ်လီၤႉ

ဒ်န့ၣ်အသိး ပယီၤသုးအံၤဟံ၀ဲတၢ်ခဲွးတၢ်ယာ်လၢ တၢ်ပတုာ်တၢ်ခးအံၤဒီး လၢအ၀ဲသ့ၣ်ဟီၣ်က၀ီၤအပူၤန့ၣ် မၤအါထီၣ်၀ဲသုးကလၢၤဒီးသုးဂံၢ်ဘါတဖၣ် အါန့ၢ်ဒံးအပူၤကွံာ်နံၣ်တဖၣ်ခံစးအဂ့ၢ်န့ၣ် ဖဲအပူၤကွံာ် လါမ့ၤ ၁၅ သီအနံၤ KNU ထုးထီၣ်၀ဲလံာ်တၢ်ပာ်ဖျါဒီး ပယီၤသုးကျိၤတဖၣ်တၢ်ဟူးတၢ်ဂဲၤအိၣ်ဖျါ၀ဲ ဒ်မၤ၀ဲတၢ်ထီဒုၣ်တၢ်ဒါအဃိ တၢ်ဖီလာ်သုးတဖၣ်ဘၣ်သဂၢၢ်ခးလိာ်သးကဲထီၣ်၀ဲဒၣ်လီၤအဂ့ၢ်န့ၣ် စံး၀ဲလီၤႉ

ဖဲလါယူၤထီၣ်သီအတီၢ်ပူၤစ့ၢ်ကီး KNU သုးက့(၅) ဒီး သုးက့(၇)လီၢ်က၀ီၤတဖၣ်အပူၤ ပယီၤသုးဒီး KNLA သုးတဖၣ်အဘၢၣ်စၢၤ တၢ်ခးလိာ်သးကဲထီၣ်၀ဲအစှၤကတၢၢ် ၂ ဘျီဒီး ဖဲလါယူၤ ၂ သီအနံၤ တၢ်ခးလိာ်သးကဲထီၣ်အံၤ ကမျၢၢ် ၂ ဂၤ ဘၣ်ဒိ၀ဲဒၣ်ဒီးကျိဖးဒိၣ်အသိးႇ ဖဲလါယူၤ ၄ သီအနံၤစ့ၢ်ကီး KNU မုၢ်ြတီၢ်ကီၢ်ရ့ၣ်တၢ်ပၢ သီလဲၤထၣ်ဒီး ဖၣ်အၣ်ကီၢ်ရ့ၣ်တၢ်ပၢ သူမွဲထၣ်တၢ်လီၢ်တဖၣ်အဘၢၣ်စၢၤန့ၣ် တၢ်ခးလိာ်အသးကဲထီၣ်ဒံး၀ဲဒၣ်န့ၣ်လီၤႉ

တၢ်ခးလိာ်သးကဲထီၣ်သးအဂ့ၢ်အကျိၤန့ၣ် ခီဖျိလၢပယီၤသုးအံၤလဲၤတလၢဟီၣ်က၀ီၤတၢ်ပာ်ပနီၣ်ဒီး မၤ၀ဲသုးတၢ်ဟူးတၢ်ဂဲၤအဃိ တၢ်ကဲထီၣ်သးလီၤအဂ့ၢ်န့ၣ် KNU တပၤ စံး၀ဲန့ၣ်လီၤႉ မ့မ့ၢ်လၢ ပယီၤသုးတခီစံး၀ဲလၢ အ၀ဲသ့ၣ်အသုးမုၢ်ဒိၣ်မၤ၀ဲ လီၢ်က၀ီၤတၢ်ဂုၤထီၣ်ပသီထီၣ်အတၢ်ဖံးတၢ်မၤတဖၣ်န့ၣ် KNU အံၤ ဟဲဒိးလီၤဃာ်၀ဲမ့ၣ်ပိၢ်ႇ ဟဲထီၣ်ခးအ၀ဲသ့ၣ်သုးကလၢၤႇ ခီဖျိလၢလဲၤတလၢ၀ဲဟီၣ်က၀ီၤတၢ်ပာ်ပနီၣ်အဃိ တၢ်ခးလိာ်သးဘၣ်ကဲထီၣ်၀ဲဒၣ်လီၤန့ၣ် က့ၤခီၣ်ဆၢကဒါက့ၤ၀ဲအိၣ်၀ဲဒၣ်လီၤႉ

ဒ်န့ၣ်အသိး တၢ်ကဲထီၣ်အသးဒ်န့ၣ်သ့ၣ်တဖၣ်အမဲာ်ညါ လၢတကီၢ်ခါ Covid-19 တၢ်သံသြတိ၁်တၢ်ဆါ ကဲထီၣ်အသးကအတီၢ် ပယီၤသုးတကပၤဟဲမၤတံာ်၀ဲ KNU တၢ်ြတီဆၢတၢ်ဆါတၢ်ဖံးတၢ်မၤတဖၣ်ဒီး မၤဟးဂီၤကံွာ်၀ဲ တၢ်သမံသမိးတၢ်အိၣ်ဆူၣ်အိၣ်ချ့အလီၢ်တဖၣ်အဃိ ခံကပၤအဘၢၣ်စၢၤ တၢ်သဘံၣ်သဘုၣ်ကဲထီၣ်ဒံး၀ဲဒၣ်န့ၣ်လီၤႉ