Home တၢ်ကစီၣ် တၢ်မုာ်တၢ်ခုၣ်အတၢ်လဲၤကျဲဒီးတၢ်ဃုထၢအဂီၢ် KNU ဒီး ကညီပၣ်တံၣ်တဖၣ် မၤ၀ဲ Online တၢ်အိၣ်ဖှိၣ်

တၢ်မုာ်တၢ်ခုၣ်အတၢ်လဲၤကျဲဒီးတၢ်ဃုထၢအဂီၢ် KNU ဒီး ကညီပၣ်တံၣ်တဖၣ် မၤ၀ဲ Online တၢ်အိၣ်ဖှိၣ်

334
0

လါယူၤ ၁၁ သီႇ ၂၀၂၀ နံၣ်ႇ စးအဲၣ်ဆူ

ခါဆူညါတၢ်မုာ်တၢ်ခုၣ်အတၢ်လဲၤကျဲဒီး လၢကဟဲ ၂၀၂၀ တၢ်ဃုထၢအံၤ တၢ်အိၣ်ကတဲာ်ကတီၤ ထီၣ်အသးအဂီၢ် KNU- ကညီဒီကလုာ်စၢဖှိၣ်ကရၢ လီၢ်ခၢၣ်သးခိၣ်နၢ်တဖၣ်ဒီး ကညီထံရူၢ်ကီၢ်သဲးပၣ်တံၣ်ခိၣ်နၢ် တဖၣ်ႇ ဃုာ်ဒီးကညီသးစၢ်တဖၣ် မၤ၀ဲဒၣ်တၢ်ထိၣ်ဃူထိၣ်ဖိးအတၢ်အိၣ်ဖှိၣ်တခါ ဖဲလါယူၤ ၉ သီအနံၤန့ၣ်လီၤႉ

တၢ်အိၣ်ဖှိၣ်အပူၤ ဟ့ၣ်ခီဟ့ၣ်နီၤလိာ်သးဘၣ်ဃး တကီၢ်ခါ တၢ်မုာ်တၢ်ခုၣ်တၢ်လဲၤကျဲတၢ်အိၣ်သးတဖၣ်ႇ တၢ်တၤတၢ်တဖၣ်ႇ ထံရူၢ်ကီၢ်သဲးပၣ်တံၣ် အသနၢၣ်တဖၣ်ဒီး လၢကဟဲတၢ်ဃုထၢအဂီၢ် ကအိၣ်ကတဲာ်ကတီၤထီၣ်အသးသ့တၢ်ဖံးတၢ်မၤတဖၣ် တၢ်တၢၣ်ပီၣ်တဲသကိး၀ဲအခိၣ်သ့ၣ်လီၤအဂ့ၢ်န့ၣ် KNU နဲၣ်ရွဲၣ်သဃဲၤ (၂) ပဒိၣ်စီၤလၣ်ထိ စံး၀ဲလီၤႉ

အ၀ဲစံး၀ဲလၢ “ဒ်တၢ်မၤဖျါထီၣ်တၢ်မုာ်တၢ်ခုၣ်အသိး ၂၀၂၀ ၀ံၤအလီၢ်ခံ ပဒိၣ်လၢအကဟဲထီၣ်တဖၣ်အဂီၢ် ဘၣ်ဃးဒီးတၢ်မုာ်တၢ်ခုၣ်တၢ်မၤအကျိၤအကျဲအံၤ တၢ်တၢၣ်ပီၣ်တဲကိးထံရူၢ်ကီၢ်သဲးဒီးတၢ်မုာ်တၢ်ခုၣ်အဂီၢ်ႇ ဒ်သိးတၢ်အုၣ်ကီၤသးကအိၣ်အဂီၢ် လၢတၢ်ကမၤ၀ဲ UPC (ကီၢ်စၢဖှိၣ်တၢ်အိၣ်ဖှိၣ်ဖးဒိၣ်) တၢ်ရဲၣ်တၢ်ကျဲၤ UPC အံၤတၢ်ကရဲၣ်ကျဲၤ၀ဲအဂီၢ် လိၣ်ဧါတလိၣ်ဧါႇ UPC အံၤစ့ၢ်ကီး တချုးလၢတၢ်ဃုထၢအတၢ်ဟူးတၢ်ဂဲၤဒံးဘၣ်န့ၣ် ပဒိၣ်အံၤဆှၢဟ့ၣ်၀ဲ ဖဲလါယူၤအတီၢ်ပူၤ ဒ်သိးဒီးတၢ်မၤ၀ဲတၢ်ရဲၣ်တၢ်ကျဲၤကန့ၢ်အဂီၢ် ႇ တၢ်မ့ၢ်မၤ၀ဲန့ၣ် ကမၤ၀ဲ တၢ်ရဲၣ်တၢ်ကျဲၤဒ်လဲၣ်ႇ တၢ်ဂ့ၢ်လၢကတၢၣ်ပီၣ်တဲသကိးတဖၣ် တၢ်သ့ၣ်တဖၣ်အံၤန့ၣ် ပက့ၤမၤဂ့ၤထီၣ်၀ဲန့ၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

လၢန့ၣ်အမဲာ်ညါ ဘၣ်ဃးဒီးတၢ်ဆီတလဲဒီး မၤဂ့ၤထီၣ်ထံရူၢ်ကီၢ်သဲးတၢ်ဂ့ၢ်တဖၣ်အံၤ လၢဘျီၣ်ဒိၣ်အပူၤမ့ၢ်ဂ့ၤ ဘျီၣ်ဒိၣ်အချၢမ့ၢ်ဂ့ၤ ကလဲၤ၀ဲဃူဃူကသ့အဂီၢ် အိၣ်ဆၢထၢၣ်၀ဲဒၣ်လၢတၢ်ထံၣ်လိာ်တၢၣ်ပီၣ်တဲ သကိးအတၢ်အိၣ်သးတခါအဖီခိၣ်ဒီး လၢကဟဲ ၂၀၂၀ တၢ်ဃုထၢအံၤ ထံရူၢ်ကီၢ်သဲးပၣ်တံၣ်တဖၣ် ကအိၣ်ကတီၤထီၣ်အသးတၢ်ဂ့ၢ်တဖၣ်ဒီးႇ ကညီသးစၢ်တဖၣ်လၢ ကနုာ်လီၤပၣ်ဃုာ်လၢအသနၢၣ်တဖၣ် တၢ်ကဆဲးတၢၣ်ပီၣ်တဲသကိး၀ဲလီၤအဂ့ၢ်န့ၣ် လၢတၢ်အိၣ်ဖှိၣ်ဘျီ၀ဲအံၤအပူၤ တၢ်ပာ်သးတဖၣ်အိၣ်၀ဲအဂ့ၢ်န့ၣ် ပဒိၣ်စီၤလၣ်ထိ ဆဲးစံး၀ဲလီၤႉ

တကီၢ်ခါ ခီဖျိ Covid-19 တၢ်ဆါသံသြတိ၁်အဃိ ဖဲတနံၣ်အံၤ လါအ့ြဖ့ၣ်လၢာ်န့ၣ် တၢ်အိၣ်ဖှိၣ်လၢ တၢ်ကရဲၣ်ကျဲၤမၤအီၤတဖၣ် လၢအမ့ၢ်ကီၢ်စၢဖှိၣ်တၢ်မုာ်တၢ်ခုၣ်တၢ်အိၣ်ဖှိၣ်ဖးဒိၣ် (UPC) ၂၁ ယၤဖှိၣ်နံၣ် ပ့ၣ်လိၣ်လွံၢ်ဘျီတဘျီတၢ်အိၣ်ဖှိၣ်ႇ ကီၢ်စၢဖှိၣ်တၢ်မုာ်တၢ်ခုၣ် တၢ်တၢၣ်ပီၣ်သဃဲၤကမံးတံာ် (UPDJC) တၢ်အိၣ်ဖှိၣ်တဖၣ်ႇ ကလုာ်လၢအဘၣ်ထွဲတဖၣ် ဒီကလုာ်အပတီၢ် ထံရူၢ်ကီၢ်သဲးတၢ်တၢၣ်ပီၣ်တဲသကိးတဖၣ်ဒီး တၢ်ထံၣ်လိာ်သးဒီးကမျၢၢ်တဖၣ်န့ၣ် တၢ်သုးကွံာ်အီၤလၢတၢ်ပာ်ပနီၣ်၀ဲမုၢ်နံၤမုၢ်သီတအိၣ်ဘၣ်န့ၣ်လီၤႉ

ဘၣ်ဆၣ် တချုးလၢတၢ်ဃုထၢဒံးဘၣ်ဒီး တၢ်ဃုထၢ၀ံၤအလီၢ်ခံ တၢ်မုာ်တၢ်ခုၣ်အကျိၤအကျဲ တၢ်ကဆဲးလဲၤသးကန့ၢ်အဂီၢ် ထံကီၢ်ပဒိၣ် သုးမုၢ်ဒိၣ်အကရူၢ်ကရၢတဖၣ်ဒီး ကလုာ်ဒူၣ်ဖီၣ်စုက၀ဲၤလၢအဆဲးလီၤတၢ်ပတုာ်တၢ်ခးအကရူၢ်ကရၢတဖၣ် ဆဲးတၢၣ်ပီၣ်တဲသကိး၀ဲဒီးထိၣ်ဃူထိၣ်ဖိး၀ဲလၢ Online တၢ်အိၣ်ဖှိၣ်တဖၣ် အိၣ်၀ဲန့ၣ်လီၤႉ

ဒ်န့ၣ်အသိး ကီၢ်စၢဖှိၣ်တၢ်မုာ်တၢ်ခုၣ်အတၢ်အိၣ်ဖှိၣ်ဖးဒိၣ် ၂၁ ယၤဖှိၣ်နံၣ်လွံၢ်ဘျီတဘျီ တၢ်အိၣ်ဖှိၣ်အံၤ ကဲထီၣ်လိၣ်ထီၣ်ကန့ၢ်အဂီၢ် လၢန့ၣ်ပၠံၣ်တီၣ်စ့ၢ်ကီး ပဒိၣ်ႇ ဘျီၣ်ဒိၣ် ဒီး သုးမုၢ်ဒိၣ်ခၢၣ်စးတဖၣ် ဖဲလါယူၤ ၁၀ သီ အနံၤန့ၣ် ထိၣ်ဃူတၢၣ်ပီၣ်တဲသကိး၀ဲဒၣ်အဂ့ၢ်န့ၣ် သ့ၣ်ညါဘၣ်လီၤႉ