Home တၢ်ကစီၣ် ဖဲဆဲးလီၤကၠိမံၤအကတီၢ် ထၢနုာ်ဃုာ် စီၤႇနါႇနီၢ်တဖၣ်န့ၣ် မိၣ်ကီၢ်စဲၣ် ကညီကိတိာ် ဆီၣ်တခူထီၣ်

ဖဲဆဲးလီၤကၠိမံၤအကတီၢ် ထၢနုာ်ဃုာ် စီၤႇနါႇနီၢ်တဖၣ်န့ၣ် မိၣ်ကီၢ်စဲၣ် ကညီကိတိာ် ဆီၣ်တခူထီၣ်

453
0

လါယူၤ ၂ သီႇ ၂၀၂၀ နံၣ်ႇ နါ၀့ၤဖၠိစၣ်

ကညီကလုာ်ဒူၣ်လၢအအိၣ်ဆိး၀ဲ ဖဲတလၢၤ(မိၣ်)ကီၢ်စဲၣ်အပူၤတဖၣ် နံၣ်လၢကဟဲ ၂၀၂၀–၂၀၂၁ တၢ်သိၣ်လိနံၣ်န့ၣ် ဖဲလဲၤဆဲးလီၤမံၤအဆၢကတီၢ် ထၢနုာ်ဃုာ်ဒီးကညီကလုာ်ဒူၣ်တဖၣ်အတၢ်မၤနီၣ်လၢအမ့ၢ် စီၤႇ နါႇ နီၢ် တဖၣ်န့ၣ် မိၣ်ကီၢ်စဲၣ် ကညီကလုာ်ဒူၣ်ဂ့ၢ်၀ီကိတိာ် စီၤအီၣ်မၠ့ၣ်ခဲၤ ဆီၣ်တခူထီၣ်၀ဲန့ၣ်လီၤႉ

ဘၣ်ထဲဒွီးတၢ်ထၢနုာ်ဃုာ်ဒီးကလုာ်ဒူၣ်အတၢ်ပနီၣ်ကန့ၢ်အဂီၢ် ဆဲးလီၤမံၤလၢတၢ်သူၣ်အိၣ်သးအိၣ်နီၢ်နီၢ်န့ၣ် ကၠိဖိ မိၢ်ပၢ်ႇ က၀ီၤဒ့ႇ ဒူသ၀ီပၢြပးအခိၣ်လၢအဘၣ်ထဲတွဖၣ်ဒီး ကညီလံာ်လဲၢ်ဒီးတၢ်ဆဲးတၢ်လၤကမံးတံာ်တဆီ ဒ်သိးကသ့ၣ်ညါ၀ဲအဂီၢ် ဖဲလါမ့ၤ ၂၆ သီအနံၤ ကီၢ်ဆၣ်လၢအအိၣ်မိၣ်ကီၢ်စဲၣ်အပူၤ ပၢြပး၀ဲၤကျိၤခဲလၢာ် ကညီကလုာ်ဒူၣ်ကလုာ်ဂ့ၢ်၀ီကိတိာ်အံၤ ဆှၢဟ့ၣ်ဒုးသ့ၣ်ညါ၀ဲလံာ်န့ၣ်လီၤႉ

မိၣ်ကီၢ်စဲၣ် ကညီဂ့ၢ်၀ီကိတိာ် စီၤအီၣ်မၠ့ၣ်ခဲၤ စံး၀ဲ “ဘၣ်ဃးဒီးမံၤကမၣ်တဖၣ်အံၤ အ၀ဲသ့ၣ်အတၢ်ကီတၢ်ခဲတဖၣ်န့ၣ် ဟဲတီၣ်ဖျါထီၣ်၀ဲအိၣ်၀ဲဒၣ်လီၤႉ ဖဲ(လ၀က)က့ၤဘှီဘၣ်အကတီၢ်န့ၣ် တၢ်တံာ်တာ်အိၣ်၀ဲအဃိႇ ဖဲတၢ် လဲၤဆဲးလီၤမံၤအကတီၢ် ဒ်သိးကကဲထီၣ်တၢ်တိစၢၤမၤစၢၤလၢအ၀ဲသ့ၣ်အဂီၢ်ႇ ၦၤကိးဂၤဒဲး အဲၣ်ဒိးထၢနုာ်ဃုာ်ဒီး ကညီမံၤအမဲာ်ညါအတၢ်ပနီၣ်န့ၣ်လီၤႉ တနီၤန့ၣ်ဆိကမိၣ်၀ဲလၢ ထၢနုာ်တန့ၢ်ဘၣ်န့ၣ်လီၤႉ တၢ်သ့ၣ်တဖၣ်အံၤ ကပာ် သူၣ်ပာ်သးဒီးမၤအီၤန့ၣ် ထံကီၢ်အံၤဘိးဘၣ်ရၤလီၤ၀ဲဒၣ်လံအဃိႇ တၢ်အဃိန့ၣ် ဒ်သိးပတၢ်ပနီၣ်သုတအိၣ်တ့ၢ်တဂ့ၤ န့ၣ် ပဟ့ၣ်ပလီၢ်၀ဲဒီးဆီၣ်တခူထီၣ်၀ဲန့ၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်လီၤႉ

ကညီကလုာ်ဒူၣ်မိၢ်ပၢ်လၢအအိၣ်ဆိးဖဲမိၣ်ကီၢ်စဲၣ်အပူၤတဖၣ် အပူၤကွံာ်န့ၣ် ဖဲလဲၤဆဲးလီၤမံၤ လၢဂံၢ်ခီၣ်ထံးတၢ်ကူၣ်ဘၣ်ကူၣ်သ့ကၠိအပတီၢ်န့ၣ် ကလုာ်အတၢ်ပနီၣ်အမံၤတဖၣ် ၦၤလၢအထၢနုာ်ဃုာ် တဘူၣ်ဘၣ်တဖၣ်ႇ လၢကထၢနုာ်ဃုာ်အဂီၢ် တပာ်သူၣ်ပာ်သးဘၣ်တဖၣ်ဒီး ထၢနုာ်ဃုာ်ကမၣ်အိၣ်၀ဲဒၣ်စ့ၢ်ကီးအဂ့ၢ်န့ၣ် သ့့ၣ်ညါဘၣ်လီၤႉ

ဒ်သိးသုတကဲထီၣ်သးတဂ့ၤအဂီၢ် ကညီကလုာ်ဒူၣ်ကၠိဖိမိၢ်ပၢ်တဖၣ် နီၢ်ကစၢ်အိၣ်ဖျဲၣ်မုၢ်နံၤမုၢ်သီႇ ထံကီၢ်လံာ်အုၣ်သး(မှတ်ပံုတင်)တဖၣ် ဒ်သိးတၢ်ကမူၤကမၣ်သုတအိၣ်တဂ့ၤအဂီၢ် ကဘၣ်ပာ်သူၣ် ပာ်သးလိၣ်၀ဲအသိးႇ လၢကဟဲတၢ်သိၣ်လိနံၣ် ဖဲဆဲးလီၤဖိသၣ်မံၤအကတီၢ်စ့ၢ်ကီး ဖိဒံဖိသၣ်အမံၤမဲာ်ညါ ထၢနုာ်ဃုာ်ဒီးကစၢ်ကလုာ်အတၢ်ပနီၣ်တဖၣ်အဂ့ၢ်န့ၣ် ကညီဂ့ၢ်၀ီကိတိာ် စီၤအီၣ်မၠ့ၣ်ခဲၤ ဆဲးဆီၣ်တခူထီၣ်၀ဲန့ၣ်လီၤႉ

“အစးထီၣ်န့ၣ် မ့ၢ်တထၢနုာ်န့ၣ်ကဂ့ၤ၀ဲဧါန့ၣ် ပတဲ၀ဲဒၣ်လီၤႉ ဖဲတၢ်ဆီၣ်တခူထီၣ်၀ဲလၢ ထၢနုာ်ခဲအံၤအကတီၢ်န့ၣ် တြကၢးလၢပသးပ့ၤနီၣ်အီၤဘၣ်ႉ ဖဲပလဲၤဆဲးပဖိပလံၤမံၤအကတီၢ်န့ၣ် မိၢ်ပၢ်တဖၣ်ကပာ်သူၣ်ပာ်သး၀ဲဒၣ်န့ၣ် အဲၣ်ဒိးဆီၣ်တခူထီၣ်ယဲလီၤ” အဂ့ၢ်န့ၣ် ကိတိာ်စီၤအီၣ်မၠ့ၣ်ခဲၤ စံး၀ဲလီၤႉ

၂၀၂၀–၂၁ တၢ်သိၣ်လိနံၣ်စးထီၣ်န့ၣ် ပဒိၣ်ဂံၢ်ခီၣ်ထံးတၢ်ကူၣ်ဘၣ်ကူၣ်သ့၀ဲၤကျိၤအံၤ စးထီၣ်ဖဲလါအ့ြဖ့ၣ် ၁ သီအနံၤ ကလုာ်ဒူၣ်ကလုာ်တဖၣ်အမံၤမဲာ်ညါန့ၣ် ကဘၣ်ထၢနုာ်ဃုာ်၀ဲဒၣ်ဒီးကလုာ်အတၢ်ပနီၣ်လံာ်မဲာ်ဖျၢၣ်တဖၣ်အဂီၢ် တၢ်နဲၣ်လီၤတဖၣ်အိၣ်၀ဲဒၣ်အဂ့ၢ်န့ၣ် သ့ၣ်ညါဘၣ်လီၤႉ

မိၣ်ကီၢ်စဲၣ်အပူၤ ကီၢ်ဆၣ်အိၣ်၀ဲ(၁၀)ဘ့ၣ်အကျါ သထူၣ်ႇ ဘံလ့ႇ ကၠဲၣ်မယီႇ အပီၤႇ ယ့ႇ ကၠဲၣ်ထိၤႇ ခၠီစိၤႇ သရိာ်၀ါ(သၤဖၠူၤစယၣ်) ကီၢ်ဆၣ် ၈ ဘ့ၣ်အံၤ ကညီကလုာ်တဖၣ်အိၣ်ဆိး၀ဲအအါကတၢၢ်ဒီး လၢအကျါ သထူၣ်ကီၢ်ဆၣ်ပူၤ ကညီကလုာ်နီၣ်ဂံၢ်အိၣ်၀ဲ(၈ ကလး)ဘျဲၣ်ဒီး မ့ၢ်ကီၢ်ဆၣ်တဘ့ၣ်လၢၦၤနီၣ်ဂံၢ်အိၣ်ဆိး၀ဲအအါကတၢၢ်လီၤအဂ့ၢ်န့ၣ် သ့ၣ်ညါဘၣ်လီၤႉ

လၢန့ၣ်အမဲာ်ညါ ဒ်ပၢြပး၀ဲၤကျိၤအစရီပူၤအသိး မိၣ်ကီၢ်စဲၣ် ကီၢ်စဲၣ်ဒီဘ့ၣ်အပူၤ ကညီၦၤနီၣ်ဂံၢ်အိၣ်၀ဲ(၃ ကလီၢ်)ဃၣ်ဃၣ်ညါအဂ့ၢ်န့ၣ် မိၣ်ကီၢ်စဲၣ် ကညီကလုာ်ဒူၣ်ဂ့ၢ်၀ီကိတိာ် စံး၀ဲလီၤႉ