ကညီဂ့ၢ်၀ီကိတိာ် နီၢ်ၦဲၤစ့ ကက့ၤနုာ်လီၤလၢတၢ်ဃုထၢအဂီၢ် တီၣ်ထီၣ်၀ဲလံာ်လံ

လါယူၤ ၂၄ သီႇ ၂၀၂၀ နံၣ်ႇ စီၤရှါ

ပကိကီၢ်ခီဒိၣ်ပူၤ တကီၢ်ခါ ကညီကလုာ်ဒူၣ် ကလုာ်ဂ့ၢ်၀ီကိတိာ် နီၢ်ၦဲၤစ့အံၤ လၢကညီဂ့ၢ်၀ီကိတိာ်အလီၢ်အဂီၢ်ႇ လၢကဟဲတၢ်ဃုထၢန့ၣ် ကက့ၤဒိးဃုထၢသးအဂီၢ် တီၣ်ထီၣ်ပာ်၀ဲလံာ်လံအဂ့ၢ်န့ၣ် စံးဘၣ်ခ့ၣ်အဲးစံၣ် ဖဲလါယူၤ ၂၃ သီအနံၤန့ၣ်လီၤႉ

“လံာ်ဒုတီၣ်ထီၣ်ပာ်၀ံၤ၀ဲလံလီၤႉ တၢ်ဃုထၢအံၤတတုၤဒံး၀ဲဘၣ်အဃိ တၢ်မ့ၢ်ဃုထၢဘၣ်ဖုးယၤန့ၣ် လၢကညီဖိအဂီၢ် တၢ်လီၢ်လၢအလိၣ်တဖၣ် ယကမၤစၢၤ၀ဲခဲလၢာ်လီၤမီၤနီၤ” အဂ့ၢ်န့ၣ် ကိတိာ် နီၢ်ၦဲၤစ့ စံး၀ဲလီၤႉ

လၢန့ၣ်အမဲာ်ညါ ၂၀၂၀ နံၣ် တၢ်ဃုထၢအံၤ တၢ်မ့ၢ်က့ၤဃုထၢကဒါယၤန့ၣ် ဒ်သိးဒီးကညီကလုာ် လံာ်လဲၢ် တၢ်ဆဲးတၢ်လၤတဖၣ် ကလဲၤထီၣ်လဲၤထီအဂီၢ်ႇ ကျဲႇ တိၤသ့ၣ်တဖၣ် ဃုာ်ဒီးလီၢ်က၀ီၤ တၢ်ဂုၤထီၣ်ပသီထီၣ်တဖၣ်စ့ၢ်ကီး ကဟံးထီၣ်ဖီၣ်ထီၣ်ဒီးကဂုာ်ကျဲးစၢးဒိၣ်န့ၢ်ဒံးအခဲအံၤလီၤအဂ့ၢ်န့ၣ် ကိတိာ် နီၢ်ၦဲၤစ့ ဆဲးစံး၀ဲန့ၣ်လီၤႉ

ကညိဂ့ၢ်၀ီကိတိာ်နီၢ်ၦဲၤစ့ဟံးထီၣ်ဖီၣ်ထီၣ်၀ဲမူဒါလၢ ကညီကလုာ်ဒူၣ် ကလုာ်ဂ့ၢ်၀ီကိတိာ် စးထီၣ်လၢ ၂၀၁၅ နံၣ် တုၤလၢ ၂၀၂၀ နံၣ် အတီၢ်ပူၤန့ၣ် ကလုာ်ဒူၣ်တဖၣ်လီၤဘၣ်တၢ်ကီတၢ်ခဲန့ၣ် တလိၣ်ဘၣ်ဃ့တၢ်မၤစၢၤဘၣ်ဒီး သ့ၣ်ညါ၀ဲတဘျီဃီန့ၣ်လဲၤမၤစၢၤ၀ဲဒၣ်စ့ၢ်ကီးန့ၣ် ကိတိာ် နီၢ်ၦဲၤစ့ စံး၀ဲန့ၣ်လီၤႉ

ဖဲ ၂၀၁၉ နံၣ်န့ၣ် ဒဲၣ်အူကီၢ်ဆၣ်အပူၤ နီၢ်သီသွဲၣ်ထူ လၢအဘၣ်သဂၢၢ်၀ဲလၢအဖီၣ်၀ဲဒၣ်စ့တကလးလၢအယီၤဘျၣ် (အတု)တၢ်မူးတၢ်ရၢအံၤန့ၣ် ပူၤဖျဲးထီၣ်၀ဲဒၣ်အမဲာ်ညါ လီၢ်က၀ီၤလၢအဂၤတၢ်ဂုၤထီၣ်ပသီထီၣ်တၢ်မၤတဖၣ်စ့ၢ်ကီး ကိတိာ် နီၢ်ၦဲၤစ့အံၤ တီခိၣ်ရိၣ်မဲဒီးမၤစၢၤ၀ဲဒၣ်အဂ့ၢ်န့ၣ် သ့ၣ်ညါဘၣ်လီၤႉ

ပကိကီၢ်ခီႇ ကညီလံာ်လဲၢ်ဒီးတၢ်ဆဲးတၢ်လၤကမံးတံာ် ၦၤပၢၤစ့မူဒါခိၣ် စီၤကၠီၤအီၣ် စံး၀ဲ “ပကိတိာ်အံၤန့ၣ် ဂုာ်ကျဲးစၢးဟ့ၣ်၀ဲအနီၢ်ကီၢ်အဃိ သ့ၣ်ညါပာ်ပနီၣ်အီၤလီၤႉ ဘၣ်ဆၣ် လၢကညီကလုာ်အဂီၢ် အဲၣ်ဒိးလၢကညီပၣ်တံၣ်တဖၣ် ကဖံးမၤ၀ဲဒၣ်လီၤ” အဂ့ၢ်န့ၣ် စံး၀ဲန့ၣ်လီၤႉ

ကညီကီၢ်စဲၣ်အချၢ မိၣ်ကီၢ်စဲၣ်ႇ တနီသရံၣ်ႇ ပကိႇ အ့ၣ်ယၣ်၀တံၣ် ဒီး ၀့ၢ်တကူၣ်ကီၢ်ခီဒိၣ်တဖၣ်န့ၣ် တကီၢ်ခါကလုာ်ဒူၣ် ကလုာ်ဂ့ၢ်၀ီကိတိာ်အိၣ်၀ဲဒၣ် ၅ ဂၤဒီး အ၀ဲသ့ၣ်ခဲလၢာ်န့ၣ်မ့ၢ်၀ဲဒၣ် NLD ပၣ်တံၣ်ဖိတဖၣ်န့ၣ်လီၤႉ

မိၣ်ကီၢ်စဲၣ် ဒီး ၀့ၢ်တကူၣ်ကီၢ်ခီဒိၣ်တဖၣ် တကီၢ်ခါကညီကလုာ်ဒူၣ် ကလုာ်ဂ့ၢ်၀ီကိတိာ်တဖၣ်လၢအမ့ၢ် စီၤအီၣ်မၠ့ၣ်ခဲၣ် ဒီး နီၢ်ပါသ့ၤစၤမၠိအံၤ လၢကညီဂ့ၢ်၀ီကိတိာ်အလီၢ်အဂီၢ် လၢကဟဲတၢ်ဃုထၢန့ၣ် တက့ၤဒိးဃုထၢသးလၢာ်ဘၣ်အဂ့ၢ်န့ၣ် စံးတ့ၢ်ပာ်၀ဲန့ၣ်လီၤႉ