မဲၢ်လးဘၣ်ကီဘၣ်ခဲဒဲက၀ီၤအပူၤ တၢ်ဖီၣ်ချုးန့ၢ်၀ဲကသံၣ်မူၤဘှီးကသံၣ်ကသ့ၣ်လၢအကထိ

လါယူၤ ၂၄ သီႇ ၂၀၂၀ နံၣ်ႇ စးအဲၣ်ဆူ

ကီၢ်ကၠီၣ်တဲၣ်–ကီၢ်ပယီၤကီၢ်ဆၢ ဘၣ်ကီဘၣ်ခဲဒဲက၀ီၤတဖျၢၣ်လၢအမ့ၢ် မဲၢ်လးဘၣ်ကီဘၣ်ခဲဒဲက၀ီၤအပူၤ ဖဲ(လါယူၤ ၂၃)သီ ဂီၤခီအဆၢကတီၢ်န့ၣ် ကီၢ်ကၠီၣ်တဲၣ်ၦၤဘၣ်မူဘၣ်ဒါတဖၣ် နုာ်လီၤသမံသမိးတၢ်လၢတၢ်သတူၢ်ကလာ်ဒီး ဖီၣ်ချုး၀ဲဒၣ်ကသံၣ်မူၤဘှီးကသံၣ်ကသ့ၣ်တဖၣ်လၢအကထိ လၢဟံၣ်တဖျၢၣ်အပူၤအဂ့ၢ်န့ၣ် ဒဲက၀ီၤၦၤဘၣ်မူဘၣ်ဒါတဖၣ် စံး၀ဲလီၤႉ

ကီၢ်ကၠီၣ်တဲၣ်သုးႇ ပၢၤကီၢ်သုး ဒီး ဒဲက၀ီၤဘံၣ်ဘၢတဖၣ်ပာ်ဖှိၣ်ထီၣ်အသးဒီး မဲၢ်လးဘၣ်ကီဘၣ်ခဲဒဲက၀ီၤ က၀ီၤဒိၣ် (B-5B) ဟံၣ်နီၣ်ဂံၢ်(၉၂) ဟံၣ်ကစၢ်လၢအမ့ၢ် နီၢ်မုၣ်မုၣ်အဟံၣ်အံၤ တၢ်ဟဲသမံသမိး၀ဲဒီးထွံၣ်လၢနၢတၢ်သ့အဃိ တၢ်ဖီၣ်ချုးန့ၢ်၀ဲကသံၣ်ကသ့ၣ်ဘိၣ်တဖၣ်အဂ့ၢ်န့ၣ် က၀ီၤဒိၣ် (B) ဘံၣ်ဘၢမူဒါခိၣ် စီၤရှွ့ၣ်၀့မၠဲၣ် စံး၀ဲလီၤႉ

အ၀ဲစံး၀ဲလၢ “ကီၢ်ကၠီၣ်တဲၣ်သုးႇ ပၢၤကီၢ်သုးႇ ဒဲက၀ီၤဘံၣ်ဘၢတဖၣ်န့ၣ် တဟ့ၣ်ဒုး သ့ၣ်ညါၦၤဘၣ်မူ ဘၣ်ဒါလၢက၀ီၤဒ့၀ဲအံၤတၢ်ဂ့ၢ်တၢ်ကျိၤနီတမံၤဘၣ်ဒီး ဟဲနုာ်လီၤဒီးသမံသမိး၀ဲတၢ်လီၤႉ ဖဲန့ၣ်ဖီၣ်ချုးန့ၢ်ဆိ၀ဲ ၅ ဘိၣ်လီၤႉ ၀ံၤဘျီန့ၣ် ဒဲက၀ီၤဘံၣ်ဘၢတဖၣ်ဒုးသ့ၣ်ညါ၀ဲဒၣ်ၦၤဒီး လဲၤဃုကဒီး၀ဲန့ၣ် ထံၣ်ကဒီး၀ဲ (၂ႇ၄၀၀)ဖျၢၣ်လီၤ” အဂ့ၢ်န့ၣ် စံးဘၣ် ခ့ၣ်အဲးစံၣ်လီၤႉ

ဖဲတၢ်နုာ်လီၤသမံသမိးဒီးတၢ်ဖီၣ်၀ဲအဆၢကတီၢ်န့ၣ် ၦၤလၢအမၤဆါကသံၣ်မူၤဘှီးအံၤန့ၣ် ဃ့ၢ်ပူၤဖျဲး၀ဲအသးဒီး ဟံၣ်ဖိဃီဖိလၢအအိၣ်တ့ၢ်(၄)ဂၤ လၢအမ့ၢ် ဖံသးၦၢ်တဂၤႇ အဒ့မုၣ်တဂၤႇ အမုဂါတဂၤ ဒီး ပိာ်ခွါတဂၤ တၢ်က့ၤကိး၀ဲဒၣ်အ၀ဲသ့ၣ်တစိၢ်တလီၢ်အဂ့ၢ်န့ၣ် စီၤရှွ့ၣ်၀့မၠဲၣ် ဆဲးစံး၀ဲန့ၣ်လီၤႉ

ဖဲန့ၣ်၀ံၤအလီၢ်ခံ ဒ်ဒိးန့ၢ်ဘၣ်တၢ်ကစီၣ်အသိး ၦၤလၢအမၤဆါကသံၣ်မူၤဘှီးန့ၣ်မ့ၢ်၀ဲ စီၤအဲငဲ သးနံၣ်(၂၇)နံၣ်ဒီး ၦၤလၢအဖီၣ်လိာ်စုမၤသကိးတၢ်ဒီးအီၤတဂၤ တၢ်ဖီၣ်ချုးန့ၢ်၀ဲဒၣ်ဒီး မ့မ့ၢ်ၦၤမၤဆါကသံၣ်မူၤဘှီးဖိတဂၤန့ၣ် တုၤလၢဆၢကတီၢ်ခဲအံၤ တၢ်ဖီၣ်၀ဲတချုးဒံးဘၣ်ဒီး အမိကိးအီၤလၢလီတဲစိဘၣ်ဆၣ် ကဟဲက့ၤဒိးဖီၣ်အသးတအိၣ်၀ဲဘၣ်န့ၣ် မဲၢ်လးဒဲက၀ီၤ ဘံၣ်ဘၢခိၣ်(၂) စီၤအဲၣ်မှံၤ စံး၀ဲလီၤႉ

စီၤအဲၣ်မှံၤ စံး၀ဲ “အမိန့ၣ်တဲ၀ဲအဖိခွါလီၤႉ ဖိခွါဧၢဟဲက့ၤမီၤႉ ခဲအံၤၦၤဖီၣ်၀ဲၦၤလံလီၤႉ နမ့ၢ်ဟဲက့ၤမး ၦၤကပျၢ်က့ၤၦၤလီၤႉ ဘၣ်ဆၣ်အ၀ဲတခီ သံသံမူမူယတဟဲက့ၤဘၣ်ႉ ခဲအံၤသါအိၣ်အလီၢ်န့ၣ် ၦၤဟဲဃု သါဒီး (GPS) န့ၣ် သ့ၣ်ညါ၀ဲတၢ်လီၢ်လံလီၤႉ တဲဒံး၀ဲဒံး ဟဲဖီၣ်မ့ၢ်ဘူၣ်န့ၣ်ဟဲဖီၣ်မီၤႉ သါအိၣ်ဒီးကျိလီၤ” အဂ့ၢ်န့ၣ် စံး၀ဲန့ၣ်လီၤႉ

မဲၢ်လးဘၣ်ကီဘၣ်ခဲဒဲက၀ီၤအပူၤ ဘၣ်ဃးဒီးကသံၣ်မူၤဘှီးတၢ်ဂ့ၢ်န့ၣ် ကီၢ်ကၠီၣ်တဲၣ်ၦၤဘၣ်မူဘၣ်ဒါတဖၣ် ညီနုၢ်နုာ်လီၤသမံသမိးတၢ်လၢဒဲက၀ီၤပူၤတလါတဘျီဒီး တၢ်ဖီၣ်ချုးန့ၢ်၀ဲကသံၣ်ကသ့ၣ်အိၣ်၀ဲတလီၢ်လီၢ်န့ၣ်လီၤႉ လၢတၢ်ဖီၣ်တၢ်တဘျီအံၤန့ၣ် လီၤဂာ်ဒ်သိးဒီးအ၀ဲသ့ၣ်ဒိးန့ၢ်ဘၣ်တၢ်ကစီၣ်လီၤတံၢ်လီၤဆဲးဒီးဟဲဖီၣ်၀ဲလီၤအသိးႇ မ့ၢ်စ့ၢ်ကီးတၢ်ဖီၣ်ချုးန့ၢ်၀ဲကသံၣ်မူၤဘှီးလၢအနီၣ်ဂံၢ်အအါကတၢၢ်လီၤအဂ့ၢ်န့ၣ် သ့ၣ်ညါဘၣ်လီၤႉ